Yirugana Yovapositoli 19
19
Paurusa moEfeso
1Siruwo esi ga kere Aporo moKolinte, age Paurusa kuna kugendagura moyirongo yorwaUrundu, makura ta wiza moEfeso. Omo ta ya gwana mo varongwa vamwe, 2makura ta va pura asi: “Apa mwa pura, nye mwa gwana tupu Mpepo zoKupongoka ndi?” Awo tava limburura asi: “Nokuzuvha kapi twa zuvha asi Mpepo zoKupongoka za kara ko.” 3Age makura ta va pura asi: “Ekuhoke no va mu kuhwa one?” Awo tava limburura asi: “Ekuho lyaJohanesa.” 4Paurusa makura ta tanta asi: “Johanesa nga kuhu ekuho lyelitezururo, yiyo nga tantere vantu asi va pure ogu nga mu kwama konyima, age yige Jesus Kristusa.” 5Eyi va yi zuvha, makura tava va kuhwire medina lyaJesus. 6Paurusa ta va kambeke mawoko, Mpepo zoKupongoka makura tazi va wizire, makura tava uyunga maraka oku tava porofeta. 7Mokuvapakerera vantu owo, kwa hulire ngwendi povagara murongo navavali ngoso.
8Paurusa nga zi mosinagoge zoVajuda, ta uyunga nawo nouradi makwedi gatatu, a heteke kuvasingwenena yininke yokuhamena Untungi weguru. 9Nye vamwe tava likukutike, tava nyoka kuyipura, tava uyungire momudona erongo eli mosinagoge. Age makura ta va sigi, makura ta gusa varongwa a va lipakere, makura ta va rongo nkenye ezuva mosikora zaTiranusi. 10Eyi kwa yi ruganene nomvhura mbali, makura Asiya mudima tazi zuvhu nonkango daHompa Jesus, a kare Mujuda, a kare Mugereka.
Vana vaSikeva
11Karunga nga ruganesa Paurusa yitetu yoyinene, 12nononasituke si deedi noyiteta si yokorutu rwendi, sinene yi kundama vaveli, makura tava veruka, nonompepo donondona tadi va tundi. 13Vajuda vamwe ava ngava gendagura va tjide mo nompepo donondona, nawo ngava kambadara kuruganesa edina lyaHompa Jesus. Ngava tantere nompepo donondona asi: “Tani ku ganesa kwaJesus ogu a udisa Paurusa.” 14Ava ngava yi rugana, vana vatano‐navavali womuprisiteli gomunene, edina lyendi Sikeva. 15Nye nompepo donondona ngadi va limburura asi: “Jesus twa mu diva, a kare Paurusa nage twa mu diva, nye one, nyone wolye one?” 16Mugara gumwe ga kere nonompepo donondona, ta va vatukire a di va sare, hawe neisi vana kutompora, nomo monzugo kwa duka mo nye muhere‐here, awo hena vana rwa‐rwa. 17Vajuda navenye noVagereka navenye tava yi zuvhu, Efeso nazinye tururu. Ehuhwe tali va gwana, makura tava fumadeke unene edina lyaHompa Jesus. 18Sinzi sava va pulire, kwa litongwenene tava horora yirugana yawo yoyidona. 19Wovanzi hena ava ngava ruganesa youmpure, tava pongaike nobuke dawo, makura tava di hwike komeho zovantu navenye. Mulyo gwado apa va gu varwire, tava gwana mayovi nomurongo ntano moyimaliva yosisiliveli. 20Yimo nye ngoso da lihanene nonkango daHompa, tadi korerere.
Ndjorongani moEfeso
21Ya pwa eyi, makura Paurusa ta tokora mompepo kukapita moMakedoniya nomoAkaya a ze koJerusarema. Age ta tanta asi: “Konyima zokudingura Jerusarema, nyame kukapahukira hena Roma.” 22Age makura ta tumu vakwafi vendi oTimoteusa naErasitusa koMakedoniya, nye age mwene ko kwa kere tanko siruwo moAsiya.
23Pomazuva aga ndjorongani za wizire po zokuvyuka Erongo eli. 24Yeeyi Demetiliusi, muhambuli gosisiliveli, nga hambura tuntembeligona twaDiana, age nga gwanesesa mo unene vantu ava ngava mu ruganene. 25Makura age ta va zigida novarugani vamwe hena woyirugana yooyo, ta tanta asi: “One vagara, amesi mwa diva asi emona lyetu yimo ali tundu moyirugana eyi. 26Nyamweni tomu yi mono, one hena tomu yi zuvhu asi ogu Paurusa ta mpyadura mbunga zonene pokutanta asi, vakarunga ava va honga nomawoko, kapisi vakarunga. Kapisi moomu moEfeso mwelike, nye nomoAsiya mudima. 27Apa yina kara, kapisi yirugana yetu yelike yiyo nayi swauka, nontembeli si zakarungakadi gomunene Diana nazo kapi ngava zi tara asi yuma, ano efumano lyendi eli ga fumana moAsiya nomouzuni mudima, kapi ngali kara po hena.”
28Tupu va yi zuvhire, makura tava handuka unene, tava zigire asi: “Diana goVaefeso munene!” 29Sitata nasinye kayira‐yira kelike kuna kulironda ngwendi muntu gumwe va ze kosira. Vamakedoniya oGaiyusi naAlisitarekusi ava ngava gendi kumwe naPaurusa nawo tava va koka‐koka. 30Paurusa nage kwa here asi a ze mo mozo mbunga, nye varongwa tava yi mu nyokere. 31Vapangeli vamwe ava va kere vakwawo womoAsiya, tava tumu ko asi, ga ha za ko kosira. 32Tava zogomoka kuzigira, vamwe ngesi, ava ngesi, yeeyi sigongi kwa piyaganene, sinzi sawo neyi ya va pongesere kapi va yi divilisire. 33Vamwe kwa ga zarere asi Arekisandere yige ana yi reta, yeeyi Vajuda kwa mu gusire mombunga, va mu zundwilire komeho. Arekisandere makura ta va kava nokuwoko asi va mwene a lipopere. 34Vana kumuzuvha asi Mujuda, tava zogomoka hena kuzigira kumwe‐kumwe notundi mbali asi: “Diana goVaefeso munene!”
35Hamutjanga gositata yige ga va mwenekedere pokutanta asi: “One Vaefeso, muntuke ga puka asi, esi sitata yiso asi nomene karunga gomukadi goVaefeso Diana nefano eli lya gwa meguru? 36Moomu dina pili po nompata doyo, mwa fira kuliguminina, mwa ha rugana yuma ya hana mutwe nondungu. 37Ava vagara yinke nye muna va retere, awo va hana asi vahakani wontembeli ndi vasensi vakarunga gwetu. 38Ogo Demetiliusi novarugani vendi nsene asi kwa lizona nomuntu, mazuva gonompanguro yipo ga kara, ano va kare vapanguli nawo poveli; ngava litware vene kombangwiliro. 39Nye nsene poyili hena eyi muna hara, ngayi tokokwa mosigongi sopaVeta. 40Ezi ndjorongani ezi, nsene ngava ka zi tu hetera, yidona ngayi kara, morwa kutupu edi, eli ngatu ka lipoperesa mondjorongani ezi.” 41Kononkango edi mbunga makura tazi liharagana.
© Egwanekerobibeli Lyanamibia 1987, 2003
© Bible Society of Namibia 1987, 2003