Yirugana Yovapositoli 18
18
MoKolinte
1Kutunda opo Paurusa ta tundu mo moAtena a ze koKolinte. 2Age kwa ka gwene mo Mujuda gumwe edina lyendi Akura, va vharera moPontusi, awo yipo vana kutunda koItaliya namukadendi Pilisikira, morwa Keraudiusi kwa pangere asi Vajuda navenye va tunde mo moRoma. Paurusa makura ta zi kwawo. 3Ta ka kara pwawo a rugane kumwe nawo, morwa yirugana yendi yiyo tupu yawo yokurugana notenta. 4Age nga udisa nkenye Esabata mosinagoge, asi noVajuda noVagereka va pure.
5Ano apa va tundire oSirasa naTimoteusa koMakedoniya, age Paurusa kuna kupamperekeda kuudisira Vajuda asi Jesus yige Kristusa. 6Ano apa va nyokere va uyunge deswau, makura ta kukumuna mbundu koyikoverero yendi, ta va tantere asi: “Ozo nzo zanyamweni, ame kutupu nzo. Kutunda apa ame tani zi kovapagani nye.” 7Age makura ta tundu mo omo, ta zi membo lyomugara gumwe, edina lyendi Titiusi Jusitusa, age nga tongamene Karunga, alyo embo lyendi hena kwa likundama nosinagoge. 8Ano Kilisipusa, mukurona gosinagoge nembo lyendi nalinye kwa pulire nye Karunga. Vakolinte vamwe hena wovanzi ava va mu zuvhire, nawo va pulire, makura tava va kuhu.
9Hompa kwa tanterere Paurusa memoneko masiku asi: “Nokutjira si, sanseka, wa ha mwena, 10yeeyi ame noge na kara, nagumwe si nga ku guma kuwoko asi a ku rugane yoyidona, yeeyi mositata esi vantu vange vanzi mo.” 11Age kwa kere mo mvhura zimwe nomakwedi gatano nokwedi kumwe, ta va rongo nonkango daKarunga.
12Ano apa ga kere Galiyo mupangeli gwaGereka, yipo va katukilire Vajuda simwe Paurusa, va di mu vyuke, makura tava mu twara kombangwiliro, 13tava tanta asi: “Mugara ogu kuna kuzedagwira vantu asi ava fumadeke Karunga ponkedi zokulilimba noVeta.” 14Mokuninka ngano asi Paurusa a uyunge, Galiyo ta tantere Vajuda asi: “Ngano asi epuko ndi yirugana youmbudi, ngano nani yi mu tara one Vajuda! 15Ano nsene yombinga zerongo ndi madina ndi yoVeta zeni, oyo yanyamweni, ame kapi na hara ni kare mupanguli gwayo!” 16Makura ta va tjida po pombangwiliro. 17Vagereka navenye makura tava kwata Sositenesi, mukurona gosinagoge, makura tava mu toonene poopo pombangwiliro, Galiyo age nombili si.
Mutengu gokoAntiyokiya
18Paurusa kwa kere hena mazuva gomanzi moKolinte, makura ta ligaunuka novakwetetu, a gende zomomema a ze koSireya. Age kwa zire kumwe naPilisikira naAkura. MoKenkereya yimo ga ka likurwilisire nohuki dokomutwe gwendi, yeeyi age kwa gene mugano. 19Awo makura tava wiza moEfeso, omu ga sigire oPilisikira naAkura. Age mwene ko ta zi mosinagoge a ka uyunge noVajuda. 20Ano apa va mu ninkire asi a kare po siruwo pwawo, age ta nyoka. 21Pokukatuka makura ta va rekere asi: “Nsene asi Karunga nga yi hara, ngani wiza hena kweni.” Age makura ta tundu mo moEfeso.
22Eyi ga ka sika moKesareya, makura ta kanduka koJerusarema, ta kundu mbungakriste, makura ta gurumuka koAntiyokiya. 23Ga kara mo karuwo, makura ta tundu mo. Ta ka pita mosirongo saGarate nomoFiligiya, makura ta koreke vapuli navenye.
Aporo moEfeso nomoKolinte
24Mugara gumwe edina lyendi Aporo, kwa mu hampurukilire moArekisandiliya, age mugara ga diva kuuyunga eraka, age hena kwa divire matjangwa. 25Age kwa gwene erongo lyonzira zaHompa, mpepo zendi kwa hwamukire mokusanseka Jesus, oku ta rongo nawa‐nawa yokumuhamena, nye ekuho lyaJohanesa yilyo lyelike ga divire ko. 26Age nga uyunga nouradi mosinagoge, ano oAkura naPilisikira apa va mu zuvhire, makura tava mu gusa va mu fwatwire nawa‐nawa nzira zaKarunga. 27Ano apa ga here asi a ze koGereka, vakwetetu womoEfeso makura tava mu korangeda, tava tjangere varongwa asi va mu tambure. Ga ka sika, ta ka kara ekwafo lyenene lyava va pura, morwankenda zaKarunga. 28Age kwa dininine po Vajuda nononkango dononkondo moyitarameho yawo, pokuvalikidisisa komatjangwa asi Jesus yige Kristusa.
© Egwanekerobibeli Lyanamibia 1987, 2003
© Bible Society of Namibia 1987, 2003