Yirugana Yovapositoli 17
17
MoTesaronika
1Awo kwa gendere moAmufipolisi nomoAporoniya, makura tava wiza moTesaronika, omu mwa kere sinagoge zoVajuda. 2Paurusa kwa zire kwawo moomu ga yika, makura ta uyunga nawo yomomatjangwa Masabata gatatu, 3ta va fwatwire oku ta va likida asi, Kristusa yige sili kunyanda, ntani ana kuvhumbuka koufe. Ta tanta asi: “Ogu Jesus ogu nina kumuudisira yige Kristusa.” 4Vamwe po tadi va zi konomutjima, makura tava hama kwaPaurusa naSirasa, kumwe nombunga zonene zoVagereka wokupura Karunga nombunga zonene zovakadi womadina.
5Nye Vajuda tava kara mfudu, makura tava pongaike vagendaguli woudwa tazi kara mbunga, tava tura sitata mondjorongani. Makura tava homona embo lyaJasoni va papare vapositoli, asi ngano va va pwagese kovantu. 6Nye apa va dilire kuvagwana mo, makura tava koka‐koka oJasoni novakwetetu, va va tware kovapangeli oku tava zigire asi: “Vantu ava ava yoronganesa uzuni, vana wiza nakooku, ano Jasoni yiyo ga va tambura membo lyendi. 7Awo navenye kulilimba neyi ga panga hompa gwaRoma, yiyo ava tanta asi pweli hena hompa gumwe, edina lyendi Jesus.” 8Nonkango odo makura tadi reta ndjorongani kombunga nokovapangeli ava va di zuvhire. 9Vapangeli eyi va mana kuzowesesa oJasoni novakwawo, makura tava va sigi va ze.
MoBereya
10Vakwetetu makura tava tumu usimbu‐simbu oPaurusa naSirasa koBereya masiku. Kwa ka sika tupu, makura tava zi kosinagoge zoVajuda. 11Nye vantu vamo kwa kere vanambili, kupitakana womoTesaronika; awo nonkango kwa di tambwire nawa‐nawa, awo hena ngava konakona nkenye ezuva matjangwa, va dive yininke eyi nsene asi yimo sili. 12Sinzi sawo tava kara nye vapuli. NoVagereka wovakadi womadina wovanzi noVagereka wovagara wovanzi kwa pulire. 13Nye apa va zuvhire vaJuda womoTesaronika asi Paurusa kuna kukaudisa nomoBereya hena, makura tava zi ko va ka yoronganese vantu. 14Vakwetetu makura tava gendereresa kutuma Paurusa koyiha yefuta, nye oTimoteusa naSirasa awo kwa kere moomo. 15Ava va sindikilire Paurusa, kwa ka mu sikisire dogoro koAtena. Apa va ka tengwire koBereya, ta ka va tuminikida asi oSirasa naTimoteusa va genderere kuwiza kwendi.
MoAtena
16Paurusa age moomo moAtena, kuna va ndindire, mutjima gwendi tagu mu buruka pokumona mafano govakarunga woyimpempa gomanzi mositata. 17Age nga uyunga mosinagoge noVajuda noVagereka ava ngava tjira Karunga nopoyirandero nkenye ezuva, novantu ava ngava zi ko. 18Novarongi woukonentu vamwe woVaepikuliya noVasitoya novarongi nawo kwa lipatanene nendi. Vamwe tava pura asi: “Yinke ana kuhara kutanta ogu mukavauki?” Ava vamwe asi: “Nsene a panga muudisi govakarunga vapeke” — morwa age nga udisa Mbudi zoNgwa zaJesus nevhumbuko lyokoufe. 19Awo makura tava mu kwata va mu tware kosigongi somasimbi esi ngava tumbura asi Areyopagi, tava tanta asi: “Kapi no tu tantera ko nose erongo lyepe eli o udisa? 20Yeeyi yininke yimwe eyi o tu udisire kapi twa yi diva. Nose kuna hara tu yi dive asi yininke musinke.” ( 21Vaatena navenye novanayirongo ava va tungire mo, siruwo nasinye ngava kerere kooko kusanseka oku tava purakene nombudi donompe makura.)
22Paurusa makura ta ka sikama komeho zosigongi soAreyopagi, ta tanta asi: “One Vaatena, ame na mu mono asi one vakereli wovakarunga nawa‐nawa. 23Yeeyi moyigendagura yange mositata ni tare mavega geni gokupongoka, na gwana sizambero simwe esi va tjanga asi: ‘SaKarunga gokudira kudivikwa.’ Ano ogu omu fumadeke one mwa hana kumudiva, yige nye nina kumuudisira. 24Karunga ogu ga sita uzuni neyi ya kara mo nayinye, Hompa geguru nevhu, kapi a kara monontembeli edi va tunga nomawoko. 25Age hena kapi aga mu ruganene mawoko govantu ngwendi gogu asi yuma ga hepa, morwa age yige a pe nayinye mwenyo nomunku noyininke nayinye. 26Age yige ga panga asi nomuhoko nadinye depevhu nalinye di tunde momuntu gumwe tupu, age ga panga nare yiruwo nonomururani domauhingiro gawo. 27Kwa yi ruganena asi va papare Karunga, mpamwe ngava mu gwana va mu gume, mpili ngomu ga dira kukara ure nose natuvenye. 28Yeeyi
‘Mwendi yimo twa kerera nomwenyo, tu ligumagure.’
Moomu gwa tanta mutango gweni gumwe asi:
‘Yeeyi nose ekoro lyendi.’
29Ano moomu asi nose kwa tundilira kwaKarunga, kapi hena twa fira kuhamesera sihwi saKarunga kongorodo nosisiliveli ndi kemanya, ndi asi kwa fana efano eli ga honga muntu kounkurungu nokonondunge dendi. 30Karunga ana yi mana ko nye yiruwo youpofu, ntaantani kuna kurawira nye vantu navenye asi va litezurure. 31Yeeyi age ga tokora ezuva eli nga pangwisisa uzuni mouhungami koMugara ogu ga horowora. Age ga horwera navenye usili weyi pokumupindura koufe.”
32Tupu va zuvha evhumbuko lyovafe, vamwe tava yi sense, ano ava vamwe tava tanta asi: “Yininke eyi ose kuna hara, ngatu yi zuvhe hena moge.” 33Paurusa makura ta tundu po pwawo. 34Nye vagara vamwe ava va heme kwendi, tava kara nye vapuli, gumwe Diyonisiusi gomoAreyopagi, nomukadi gumwe, edina lyendi Damalisi, navamwe hena.
© Egwanekerobibeli Lyanamibia 1987, 2003
© Bible Society of Namibia 1987, 2003