Yirugana Yovapositoli 16
16
Timoteusa ta zi noPaurusa naSirasa
1Paurusa kwa zire koDerube naLisitira. Oko yiko ga ka gwene murongwa gumwe edina lyendi Timoteusa, zina Mujuda gomupuli, nye guhwe Mugereka. 2Vakwetetu womoLisitira nomoIkoniya ngava mu tangauka. 3Paurusa kwa here a ze nendi ugenda. Makura ta mu rugana yovamba, morwa Vajuda ava va kara moyirongo oyo, yeeyi navenye va yi divire asi guhwe Mugereka. 4Va gendagura ngoso moyitata, tava gava nompangera edi va penge vapositoli novakurona moJerusarema, tava va tantere asi ava di sikise mo. 5Nombungakriste kwa di korekere mepuro, tadi kuru nkenye ezuva.
Emoneko lyaPaurusa moTorowasa
6Awo kwa tavakanene mosirongo saFiligiya naGaratiya, morwa Mpepo zoKupongoka kwa va silikire asi va ha ka udisa moAsiya. 7Apa va sikire poMisiya, tava ninki asi va ze koBitiniya, nye Mpepo zaJesus kapi za yi va pulisilire. 8Ano Misiya kwa mu pitakana nye va kunkumuke koTorowasa. 9Makura masiku Paurusa ta mono emoneko asi Mumakedoniya ana ya mu sikamene a mu likwambere asi: “Ruta omu moMakedoniya, o ya tu kwafe!” 10Ga mona nye ngoso olyo emoneko, makura tatu katuka tu ze koMakedoniya, yeeyi ose twa yi divire nawa‐nawa asi Hompa ana tu zigida, tu ka va udisire Mbudi zoNgwa.
Elitezururo lyaLidiya moFilipi
11Ano eyi twa tunda moTorowasa, tatu gendi zomomema tu vyukilire koSamoterake. Eyi kuna kusa, tatu zi koNeopolisi. 12Twa tunda opo, tatu zi koFilipi, sitata sosinene soruha oro rwaMakedoniya, sepangero lyoVaroma. 13Mezuva lyEsabata, tatu tundu mositata tu ze kevega lyokomukuro eli twa gazarere asi pamwe yiko ava kandererere. Makura tatu hingire, tu uyunge novakadi ava va pongere po. 14Mukadi gumwe Lidiya, ogu nga kerere Karunga, murandesi gomakehe gomageha gopulipuli gomositata saTiyatira, ta purakene, Hompa makura ta zegurura mutjima gwendi, a kwate egano lyeyi ana kuuyunga Paurusa. 15Ano apa ga pwire kumukuhwa kumwe nava vembo lyendi, ta tu kondjesa asi: “Nsene muna mono nge sili asi na pura mwaHompa, ya tu zeni mu ka kare membo lyange.” Ta tu sininike.
Modorongo zaFilipi
16Ezuva limwe hena ose kwa zire kevega eli ava kandererere, makura mupika gumwe gomukadi gompepo zokuyowora, tatu gwanekere nendi, age nga kongere ohekurwendi emona moomo moyiyowora yendi. 17Age ta tu kwama ose naPaurusa oku ta zigire asi: “Ava vagara ava vantu vaKarunga gomunene po, awo kuna kumuudisira nzira zeparu.” 18Mazuva gomanzi nga yi rugana ngoso, Paurusa tayi mu nyegenyesa, makura ta piruka a tantere mpepo asi: “Ame kuna kukutantera medina lyaJesus Kristusa, o tunde mo mwendi.” Poopo ngoso nazo makura tazi tundu mo. 19Ohekurwendi apa va mwene kukongwa kwawo kuna va sumpire, makura tava kwata oPaurusa naSirasa, va va tware pomarandero kovapangeli. 20Tava va twara kovaporosi, tava va tantere asi: “Vantu ava tava reta ndjorongani mositata, awo hena Vajuda. 21Awo kuna kuturonga nompo edi da dira kuliza noVeta zetu, ose Varoma nokuwapa si kuyitambura oyo.” 22Makura mbunga nazo tazi va lizuvhu zi va vyuke, ano vapanguli tava tawisa yikoverero yoPaurusa naSirasa, makura tava ninki asi va va toone noyiuro. 23Va mana kuvatoona, makura tava va tura modorongo, mutakamesi godorongo tava mu tantere, a va nomene nawa‐nawa. 24Va yi mu pangera ngoso, age makura ta va twara nye mokanzugo kopokatji kodorongo, ta va tura mokakunzu.
25Pokatji komasiku oPaurusa naSirasa tava tameke kukanderera oku tava dimbi nonsumo dehamberero, vanadorongo tava va purakene. 26Va liharuka ko, evhu kuna kukankama unene, makuma kuna kukankama dogoro netateko lyeeli. Va tara ko, mapito kuna kuzeguruka, yipandeko kuna kugwaagwa ko kovanadorongo. 27Munomeni godorongo makura ta pinduka. Ga mona asi mapito godorongo kuna zahama, ta gusa rufuro asi a lidipage, age kwendi asi vanadorongo vana pwaga mo. 28Nye Paurusa ta ziguruka kumutantera asi: “Wa ha lizonagura, natuvenye motuli.” 29Gwina ta hundire mundiro va mu minikire, makura ta vatukire mo, ta ligandere konompadi daPaurusa naSirasa oku ta kankama. 30Age makura ta va pwagesa ponze, ta tanta asi: “Vaswamane, omu nani rugana ngapi ni paruke?” 31Awo tava tanta asi: “Pura mwaHompa Jesus Kristusa ngo paruke, nyamoge nembo lyoge.” 32Makura tava mu udisire nonkango daHompa nava vembo lyendi nalinye. 33Masiku googo ta va gusa a kuhwe yironda yawo, makura tava mu kuhu nembo nalinye. 34Age kwa damwine oPaurusa naSirasa, ta va twara membo lyendi, ta va zumbura. Age nembo lyendi kwa hafere unene, morwa vana kara nye vapuli vaKarunga.
35Kwa sa, vaporosi tava tumu ko vakwafi vawo, va ka tante asi: “Owo vagara va sigeni va ze.” 36Munomeni godorongo ta ka sikisa nonkango odo kwaPaurusa asi: “Vaporosi kuna tanta asi, va mu sige. Gendeni nye nombili!” 37Nye Paurusa ta va tantere asi: “Awo kwa tu toona moyitarameho, ose va hana kutupangura, ose nye tu Varoma! Yiyo va tu tura hena modorongo, omu nava tu gusa mo hena mokahore‐hore? Nokanunu si! Va wize vene va ya tu pwagese mo.” 38Vakwafi wovapanguli makura tava di twara odo nonkango kovapanguli. Vena tagu va pwaga pokukazuvha asi awo Varoma. 39Makura tava wiza va ya va likwambere va va pwagese mo, makura tava va ninki asi va tunde mo mositata. 40Eyi va tunda ngoso modorongo, makura tava zi kembo lyaLidiya. Tava ka gwana vakwaawo, tava va korangeda, makura tava ka za.
© Egwanekerobibeli Lyanamibia 1987, 2003
© Bible Society of Namibia 1987, 2003