Yirugana Yovapositoli 15
15
Sigongi sovapositoli somoJerusarema
1Vantu vamwe ava va tundire koJudeya va wize koAntiyokiya, kwa rongere varongwa asi: “Ntene va dira kumurugana yovamba moomu nga ruganesa Mosesa, nokuparuka si.” 2Paurusa naBaranabasa kwa kere nomutangu nonompata dononene nawo, makura tava tokora asi, oPaurusa naBaranabasa novakwaawo vamwe va ze koJerusarema nokovakurona, va ka likunde yininke oyo novapositoli novakurona.
3Mbungakriste kwa va sindikilire ko, makura vena tava ka pita moFonisiya nomoSamaliya oku tava sanseke elitezururo lyovapagani; mbudi ozo kwa hafesere vakwetetu unene. 4Apa va ya sikire moJerusarema, makura mbungakriste novakurona novapositoli tava va tambura; awo makura tava va sansekere eyi ga va ruganesa Karunga. 5Nye vapuli vamwe woVafalisayi tava katuka va tante asi: “Va va rugane yovamba ntani, va va tantere hena va sikise mo Veta zaMosesa.”
6Vapositoli novakurona makura tava pongo va liyonge yininke eyi. 7Apa da ya korere nompata dononene, Peturusa ta katuka a va tantere asi: “Vakwetu, mwa yi diva asi, Karunga nare ga horowora mokatji ketu asi vapagani ngava zuvhe nonkango doMbudi zoNgwa mokana kange, ngava pure. 8Ano Karunga ogu ga diva nomutjima, ga yi pamekere pokuvapa Mpepo zoKupongoka ngwendi nyose. 9Age kutupu mpongo pokatji ketu nawo, morwa ga zeresesa nomutjima dawo kepuro. 10Ano ntaantani yinke muna kuhadagwira Karunga, mu twike kononsingo dovarongwa ndjoko ezi za vhura kusimba oguhyetu nose? 11Nye ose kwa pura asi ngatu paruka konkenda zaHompa Jesus Kristusa ponkedi zimwe tupu ngwendi yiwo.”
12Mbunga nazinye pore, zi purakene oPaurusa naBaranabasa omu vana kusanseka yitetu eyi ga rugana Karunga movapagani. 13Eyi va mana ngoso, Jakopo ta tanta asi: “Vakwetu, purakeneni nge! 14Simoni ntaantani tupu ana kusanseka apa, omu ga tameka Karunga kupaparera edina lyendi mbunga movapagani. 15Eyi kuna ligu nononkango dovaporofete, edi va tjanga asi,
16‘Ngani ninka tani tengura
ni ya tungurure nzugo zaNdafita ezi za zunguruka;
eyi va zungurura yiyo ngani tunga ni yi wapeke.
17Vantu wokuhupa ko, kuninka asi vapagani navenye
ava va zigidira edina lyange va papare Hompa,
yimo ana kutanta Hompa ogu a rugana nayinye eyi.
18Yirugana yaKarunga kwa yi divikisa kutunda kwanare.’
19“Yiyo nye nina kugazara asi, ava va tunda moupagani va litezwilire kwaKarunga, nokuvatwika si udigu, 20ngano kuvatjangera tupu asi va ha kundama kweyi ya hamena kovakarunga woyimpempa noruhonda nonyama zokufa nkumatere nohonde. 21Yeeyi nakwanare Veta zaMosesa kuziresa nkenye Esabata, ano nonkango dendi kudiudisa mwankenye sitata monosinagoge.”
Mbilive zokovapuli wovapagani
22Vapositoli novakurona kumwe nombungakriste nazinye kwa tokwere va horowore mo vagara vamwe mombunga, va va tume kumwe naPaurusa naBaranabasa koAntiyokiya. Awo kwa horowere Judasa ogu ava tumbura asi Barasabasa naSirasa, vagara va fumana mokatji kovakwetetu. 23Mbilive ezi va tjenge zezi:
“Ose vapositoli novakurona novakweneni tatu mu kundu one vakwetetu mwa tunda movapagani, mwa kara moAntiyokiya nomoSiliya nomoKilikiya. 24Ose oku twa ya zuvha asi vakwetetu vamwe womombunga zetu yiko va wiza oko va ya mu limbilirwise neyi ava ya mu tantere; nye kapisi nyose twa yi va tuma oyo. 25Yipo nye tuna tokora natuvenye, tu horowore mo vagara ava natu tuma naBaranabasa naPaurusa, 26vagara ava va zumbilira nomwenyo dawo morwaHompa Jesus Kristusa. 27Ano owo woJudasa naSirasa yiwo tuna tumu, va ya yi mu sansekere nomokana eyi tuna tjanga. 28Yeeyi Mpepo zoKupongoka nose kuna tokora asi, nokumupa si hena mudigo nagopeke, gwa hana asi gweyi yosikwafo, ngeyi: 29Walye omu li nondya dokuzamba kovakarunga woyimpempa nohonde nonyama zokufa sinkumatere, walye omu hondere. Nsene mu yi nyoka eyi ngano nawa. Mbaa'a!”
30Nontumi makura tava di tumu di ze koAntiyokiya, tadi ka pongeka mbungakriste, makura tava zi pe mbilive. 31Eyi za pwa kuziresa, makura mbungakriste tazi hafere ekorangedo eli za va pere. 32Ano oJudasa naSirasa ava va kere vene vaporofete, kwa uyungire siruwo sosire novakwetetu, tava va korangeda oku tava va koreke. 33Va kara‐kara po, makura vakwetetu tava va sigi va tengure nombili kwava va va tumine. ( 34Nye Sirasa age kwa tokwere asi va kare kooko.) 35OPaurusa naBaranabasa awo kwa kere moAntiyokiya, tava rongo oku tava udisa Mbudi zehafo zononkango daHompa kumwe novakwaawo vamwe wovanzi.
Paurusa naBaranabasa tava ligaunuka
36Kapi pwa pita mazuva gomanzi, makura Paurusa ta tantere Baranabasa asi: “Tu tengure tu ka tare ko vakwetetu womoyitata eyi twa udisira nonkango daHompa, tu ka va tare omu vana kerere.” 37Ano Baranabasa kwa here va piture Johanesa ogu ngava tumbura asi Marukusa. 38Nye Paurusa kapi ga here asi va piture hena ogu ga va zumbire moPamufiliya, a dire kuza nawo koyirugana. 39Yipo nye ga tamekerere malilimbo opo, makura tava ligaunuka; Baranabasa makura ta pitura Marukusa va gende nendi zomomema, va ze koKipurusi. 40Nye Paurusa kwa horowere po Sirasa va ze nendi, makura vakwetetu tava va rekere monkenda zaHompa. 41Age kwa gendere mwa za Siliya naKilikiya, a koreke nombungakriste.
© Egwanekerobibeli Lyanamibia 1987, 2003
© Bible Society of Namibia 1987, 2003