Yirugana Yovapositoli 14
14
MoIkoniya
1MoIkoniya namo ngosikwawo oPaurusa naBaranabasa tava zi mosinagoge, tava uyunga dokuza vantu konomutjima, makura mbunga zonene zoVajuda nezi zoVagereka tava pura. 2Nye Vajuda mo ava va dilire kupura, tava zedagwire vapagani asi va di vyuke varongwa. 3Nye vapositoli kwa kere mo siruwo. Awo ngava uyunga nouradi mwaHompa, ogu nga koreke nonkango dendi donkenda pokuruganesa vapositoli yidiviso noyitetu. 4Ano vantu womositata kwa ligawinine, vamwe kwa hamene koVajuda, ano ava vamwe kovapositoli.
5Nye apa va pangere vapagani noVajuda kumwe novapangeli vawo asi, va hepeke vapositoli va va dipage nomamanya, 6vapositoli tava yi nongonona, makura tava tjwayukire koyitata yaLikayoniya, naLisitira naDerube nokonomukunda dayo. 7Yiko va ka udisa Mbudi zoNgwa nye oko.
MoLisitira nomoDerube
8MoLisitira mwa kere mugara gomondambo, maguru gendi kapi ga peke nonkondo, kwa mu vhara nourema, kapi ga genda rumwe. 9Age kwa purakenene omu ana kuudisa Paurusa, ano Paurusa age kuna kumutara tupu, ano eyi ga mu mona asi ana kara nehuguvaro lyokuveruka, 10ta zigire unene asi: “Katuka o vyukililise maguru goge!” Kwa vatuka ga vatuka kuna kugendagura. 11Apa za mwene mbunga eyi ga rugene Paurusa, tazi ziguruka kutanta moSilikoyoniya asi: “Vakarunga kuna lisitunuka vantu, yiyo vana humburuka va wize kwetu!” 12Makura Baranabasa tava mu ruku Zeusi, ano Paurusa Heremesi, asi yeeyi yige muuyungi gononkango. 13Muprisiteli gontembeli zaZeusi, ezi za kere kontundiliro zositata, ta reta kumwe nombunga nontwedu noyimbarara yonombya asi va ya zambere vapositoli nzambo. 14Vapositoli oBaranabasa naPaurusa apa va yi zuvhire, tava taura yikoverero yawo, makura tava dukire mombunga va zigire 15asi: “Yinke muna kurugana one vagara? Ani nose tu vantu ngwendi nyone. Ose kuna kuudisa Mbudi zoNgwa mu zumbe eyi yininke ya hana mutompo, mu tengwire kwaKarunga gumunamwenyo, ogu ga sita eguru nevhu nefuta neyi ya kara mo nayinye. 16Yiruwo yanare kwa sigililire marudi asi ga gende moomu gana hara. 17Mpili ngomu ngoso, nye ga lihorwere pokurugana yoyiwa, pokumurokesera mvhura, ta mu pe ewogo nonondya, nomutjima deni di hafe.” 18Nye kwa kwete po pokuvamwenekeda asi va ha va zambera, nampili ngomu va uyungire vapositoli nonkango odo.
19Nye mwa wizire Vajuda ava va tundire koAntiyokiya nokoIkoniya, yiwo va ngongomekedere mbunga, makura Paurusa tava mu toona nomamanya va mu kokere ponze zositata, awo kwawo asi ana fu. 20Nye apa va mu umbilikidire varongwa, ta pinduka a ze mositata. Kuna kusa, makura tava zi naBaranabasa koDerube.
Mutengu gokoAntiyokiya zomoSiliya
21OPaurusa naBaranabasa kwa udisire Mbudi zoNgwa moDerube, tava gwana varongwa wovanzi, makura tava tengura nye koLisitira nokoIkoniya nokoAntiyokiya. 22Awo makura tava koreke nomutjima dovarongwa, tava va korangeda va kare mepuro, tava tanta asi: “Mokuza moUntungi waKarunga, nyose kupita momaudigu gomanzi ntani.” 23Awo makura tava va horowere vakurona wombungakriste mwankenye mbungakriste. Vana kumana kukanderera nokudilira, tava va tura kosipara saHompa ogu va pura.
24Eyi va mu mana ko Pisidiya, makura tava wiza moPamufiliya. 25Ano eyi va mana kuudisa Mbudi zoNgwa moPerege, makura tava gurumuka va ze koAtaliya. 26Va tunda opo kwa gendere nye zomomema va ze koAntiyokiya, oku va va rekerere monkenda zaKarunga asi va ka rugane sirugana esi vana sikisa mo nye ngesi. 27-28Ano eyi va wiza ngoso omo, makura tava pongeke mbungakriste, makura tava va dimbwire yininke nayinye eyi ga va ruganena Karunga, hena asi Karunga ana gava mpito kovapagani asi va wape kupura. Awo makura tava kara mo omo siruwo kumwe novarongwa.
© Egwanekerobibeli Lyanamibia 1987, 2003
© Bible Society of Namibia 1987, 2003