Yirugana Yovapositoli 13
13
Ehoroworo netumo lyaBaranabasa naSauru
1Mombungakriste zomoAntiyokiya mwa kere vaporofete novarongi ava: Baranabasa naSimoni ogu ngava tumbura asi Musovagani naRukiusi goMukireni naManayeni gekura limwe nomupangeli Herodesa naSauru. 2Hava za kuruganena Hompa oku tava dilire, makura Mpepo zoKupongoka tazi va tantere asi: “OBaranabasa naSauru va gusireni nge po, va kare moyirugana eyi na va horowera.”
3Awo tava dilire oku tava kanderere, makura tava va kambeke mawoko, tava va sigi va ze.
OBaranabasa naSauru moKipurusi
4Yimo nye va va tumisisire ngoso oBaranabasa naSauru koMpepo zoKupongoka, tava zi koSereukiya, va ka tunda omo, zomomema nye va ze kosirudi saKipurusi. 5Eyi va wiza moSaramesi, makura tava udisa nonkango daKarunga monosinagoge doVajuda. Johanesa yige ga kere mukwafi gwawo.
6Awo kwa gendere mwa za sirudi omo dogoro koPafo. Makura tava ka gwana mpure zimwe zoMujuda, muporofete goyimpempa, edina lyendi Bara‐Jesus. 7Age kwa kere pwamupangeli Seregiusi Paurusa, mugara gonondunge. Mupangeli kwa zigidire kwendi oBaranabasa naSauru, yeeyi ga here kuzuvha nonkango daKarunga. 8Nye ogo mpure Elimase — yilyo edina lyendi moRugereka, ta va silike, yeeyi age kwa here kuninka mupangeli a dire kupura. 9Nye Sauru, ogu ngava tumbura hena asi Paurusa, ga zulire Mpepo zoKupongoka, ta mu nwike, 10ta tanta asi: “Ove munwaSatana goyimpempa yoyinzi noukorokotji naunye, nkore zouhungami naunye, siruwoke ngo hageka kupengesa nonzira douhungami daHompa! 11Ano opo ono kara, kuwoko kwaHompa taku ku gwana, to twika, to kara siruwo wa hana kumona uzera wezuva.” Poopo ngoso usovagani nendema tayi mu gwana, makura ta puputire a papare ogu na mu kwata komupango. 12Ano mupangeli apa ga mwene eyi ya horokere, makura tali mu tetura erongo lyaHompa, makura ta pura.
MoAntiyokiya zomoPisidiya
13OPaurusa novakwawo tava tundu koPafo va gende zomema, makura tava wiza koPerege zomoPamufiliya. Johanesa yimo ga va siga, a tengure koJerusarema.
14Nye awo tava tundu moPerege va twikire, makura tava ka sika moAntiyokiya zomoPisidiya. Ano mezuva lyEsabata, makura tava zi mosinagoge, tava ka hingira. 15Ano eyi ya pwa kuresa yomoVeta novaporofete, makura vakurona wosinagoge tava va tumine asi: “Vakwetu, ntene muna kara nonkango zokuza vantu konomutjima, zi uyungeni.” 16Paurusa makura ta katuka, ta va kava nokuwoko, ta tanta asi:
“Vakwetu Vaisraeli none ava omu tjira Hompa, purakeneni! 17Karunga gomuhoko ogu Israeli yige ga horowere ozinyakurwetu, yiyo ga zerwire muhoko gwetu apa gwa kere unayirongo mosirongo saEgipite. Karunga kwa va gusire mo moEgipite nokuwoko kononkondo. 18Age kwa va lididimikilire momburundu nomvhura dokuhura ngwendi ponomurongo ne ngoso opo. 19Marudi gatano — nagavali ga haraganesere moKanana, makura sirongo sago ta si pe muhoko gwendi si kare sawo.
20“Kutunda poyo eyi pa pita nomumvho dokuhura ngwendi pomafere gane nonomurongo ntano ngoso, ntani nye ana kuvapaapa vapangeli dogoro nokomuporofete Samwere. 21Ano kutunda opo makura tava nyenene hompa, makura Karunga ta va pe Sauru, munwaKisi, mugara gemezimo lyaMbenyameni, a va pangere nomvhura nomurongo ne. 22Karunga eyi ga mu gusa ko oko, makura ta tumbu Ndafita a kare hompa gwawo. Karunga kwa mu uyunga asi: ‘Ame kwa gwana Ndafita munwaIsayi, mugara ga za nge komutjima, yige nga sikisa mo nayinye eyi na panga.’ 23Moruvharo rwaNdafita, yimo ga tumba Karunga Jesus, a kare Muzowoli goVaisraeli, moomu ga va tumbwidira. 24Ano age Jesus simpe nokuhoroka si, Johanesa nga udisire Vaisraeli navenye asi, va litezurure, va va kuhwe. 25Ano Johanesa apa ga sikire pouhura woukaro wendi, ta tanta asi: ‘Omu omu gazara asi nyame yilye? Ame kapisi nyame ogu mwa ndindira. Hawe, tareni age ta wiza konyima zange, nye ame kapi na fira kuhutura ko nonkaku konompadi dendi.’
26“Vakwetu, one vezimo lyaAbirahamu, none ava omu tjira Karunga: mbudi ezi zeparu kwetu natuvenye va zi tuma! 27Yeeyi vantu ava va kara moJerusarema novapitisili vawo kapi va divire asi yige Muzowoli, hena kapi va yi kwata egano yononkango dovaporofete edi ava resa‐resa nkenye Esabata. Nye apa va pangwire Jesus, yipo va sikisire mo nonkango dovaporofete. 28Nampili ngomu va dilire kugwana yokumutwaresesesa konomfa, nye tava hundire Piratusa asi va mu dipage. 29Apa va yi sikisire mo nayinye eyi va mu tjangera, makura tava mu gusa ko kositji sosilivindakano va ka mu horeke montoko. 30Nye Karunga yiyo ga mu pindura koufe. 31Nye mazuva manzi aga nga horoka pwava ga tundire nawo koGalireya a ze nawo koJerusarema, ano owo yiwo nombangi dendi komuhoko gwaIsraeli. 32Ano ose kuna mu retere Mbudi zoNgwa zetumbwidiro eli va tumbwidira ozinyakurwetu. 33Karunga yiyo ga li tu sikisira mo ose ruvharo rwawo, pokupindura Jesus koufe. Moomu va yi tjanga mEpisarome lyauvali asi:
‘Ove o Munwange,
naina nina ku reta.’
34Ano yombinga zokumupindura koufe a dire kuwora, Karunga kwa tanta asi:
‘Younankenda yokupongoka
eyi na tumbwidira Ndafita
ngani yi sikisira mo.’
35Age yiyo ga tanta hena mEpisarome limwe asi:
‘Mukareli goge gomuhungami kapi ngo mu sigilira a wore.’
36Yeeyi Ndafita nga ruganene womuhoko gwendi moomu ga mu pangerere Karunga, makura yiyo ga fa, yiyo va ka mu vhumbika pozinakuru, yiyo ga wora. 37Nye ogu ga pindura Karunga koufe, kapi ga wora. 38Vakwetu, eyi yi diveni nawa‐nawa asi, mwaJesus yimo ava mu udisire edongonono lyononzo 39asi hena nkenye ogu ana kupura ngava mu hungameka mwarwendi kwanayinye eyi za dilire kuvhura kuhungameka Veta zaMosesa. 40Ano takameseni, neisi ngayi mu gwana eyi va tanta vaporofete asi:
41‘Tareni, one vasensi! Tetukeni mu fe!
Yeeyi ame tani rugana yuma posiruwo seni,
yuma eyi ngomu dira kupura,
nampili a yi ku fwatwire muntu!’ ”
42Ano eyi va pwaga oPaurusa naBaranabasa, vantu tava hundire asi yokuhamena yininke eyi ngano ngava yi va udisire hena nemEsabata lyokukwama ko. 43Nye vantu eyi va pwagere mo mosinagoge asi va liharagane, makura Vajuda wovanzi novapagani ava va lipeke koUjuda, tava kwama‐kwama oPaurusa naBaranabasa. Vena makura tava va rongo oku tava va korangeda asi va kare monkenda zaKarunga.
44Ano mEsabata eli lya kwamene ko, popanunu‐nunu ngano sitata nasinye sa ya pongere, si ya zuvhe nonkango daKarunga. 45Nye Vajuda eyi va mona nombunga, tava kara nomfudu zonene, makura tava patanesa nonkango daPaurusa, tava di swaura. 46Nye oPaurusa naBaranabasa tava uyunga nomupampi asi: “One nyone ngano muhowo kumuudisira nonkango daKarunga. Ano moomu muna di zuvhu yiyo muna kulidima‐dima mwenyo gwanarunye, makura nose tatu zi kovapagani. 47Yeeyi Hompa kwa tu tantera asi:
‘Ame kwa ku paka po
o kare uzera wovapagani,
nkumwe ngo zerese nzira zeparu
dogoro kooku wa ka hura uzuni.’ ”
48Vapagani eyi va yi zuvha eyi, makura tava hafa unene. Awo makura tava hamberere nonkango daHompa. Navenye ava gwa tumbukira mwenyo gwanarunye, tava kara vapuli.
49Nonkango daHompa makura tava di hanesa mosirongo oso nasinye. 50Nye Vajuda tava ngongomekeda vagara, vagendesi wositata novakadi womadina wovapangani ava ngava tongamene Karunga, asi va hepeke oPaurusa naBaranabasa, makura tava va tjida va pwage mo momukunda gwawo. 51Nye vapositoli oPaurusa naBaranabasa tava kukumwine kowo mbundu zokonompadi dawo, makura tava ka za koIkoniya. 52Nye varongwa womoAntiyokiya kwa hafere unene, awo hena kwa zulire Mpepo zoKupongoka.
© Egwanekerobibeli Lyanamibia 1987, 2003
© Bible Society of Namibia 1987, 2003