Yirugana Yovapositoli 12
12
Mahepeko govakriste taga vhuka
1Posiruwo oso hompa Herodesa kwa kwatere vakriste vamwe a va hepeke. 2Age kwa dipagesesere korufuro Jakopo, mukurwaJohanesa. 3Ano apa ga yi mwene asi Vajuda vana yi hafere, makura naPeturusa nage ta mu kwata. (Siruwo oso kwa kere soNomboroto da hana Muhahu.) 4Herodesa eyi ga mu kwata, makura ta mu tura modorongo, makura ta mu gava konombunga ne dovanomeni, nkenye ezi vakwayita vane. Egano lyaHerodesa lyeli asi, nsene sina pu sipito saPaska, ngava mu rete komeho zomuhoko goVajuda. 5Yimo nye ngava mu nomene Peturusa modorongo ngoso. Nye mbungakriste ngazi mu kandererere kwaKarunga, kapi ngazi tuda.
6Ano Herodesa apa ga here asi a ya mu likide muhoko, masiku ogo Peturusa kwa rere pokatji kovakwayita vavali, age kuna mu manga nomalyenge gavali, ano vanomeni vepevero awo kuna kunomena dorongo. 7A liharuke ko, muengeli gwaHompa ana sikama pwendi, uzera kuna kuminikira monzugo. Muengeli ta gumu Peturusa monompatji, ta mu pindura, ta tanta asi: “Pinduka usimbu!” Malyenge nare gana gu ko komawoko gendi. 8Kutunda poyo muengeli ta mu tantere asi: “Limanga liva roge, o dware nonkaku doge!” Peturusa ta rugana ngoso. Muengeli ta mu tantere hena asi: “Dwara erwakani lyoge o kwame nge!” 9Age ta pwaga a mu kwame. Nye age kapi ga divire asi eyi ana kurugana muengeli yosili, age kwa gazarere asi emoneko ana kumona. 10Kwa pitakanene enomeno lyomuhowo neli lyauvali, makura tava wiza perungavero lyosivera, eli lya tarera kositata. Olyo lyene nye lya va lizegwilira, makura tava pwaga. Hava za kugenda nzira zimwe, ga liharuka ko muengeli ana mu sigi.
11Peturusa ntani nye ana kusika po, makura ta tanta asi: “Ntaantani nina yi diva nawa‐nawa asi, Hompa kuna tumu muengeli gwendi a ya yoworore nge momawoko gaHerodesa nomu mweyi guna hara kurugana nge muhoko goVajuda.”
12Eyi ga sika po ngoso, makura ta zi pembo lyaMariya, zinyaJohanesa, ogu ava tumbura hena asi Marukusa. Vantu wovanzi va pongere mo oku tava kanderere. 13Peturusa kwa ngongwere kevero lyoponze, makura mukareli gomukadi edina lyendi Roda, ta zi a ka purakene asi yilye ana kara ko. 14Eyi ga dimburura ezwi lyaPeturusa, nevero kapi ga li zegurura hena morwehafo, kwa duka a hwilire, a ka sanseke asi, Peturusa ana kara pevero. 15Awo tava mu tantere asi: “Ove kuna purumuka!” Nye age kuna kukovekeda ngorooro asi, yimo nawa‐nawa. Awo makura tava tanta asi: “Muengeli gwendi.” 16Ano Peturusa nage kuna kukovekeda ngorooro kungongora. Tupu vana kuzegurura, hawe, yige tupu ogu, makura sitetu tasi va gwana. 17Nye age ta va sansekere omu ana mu pwagesa Hompa modorongo. Ta tanta asi: “Ngomu yi sansekere ko Jakopo novakwetu.” Age makura ta pwaga mo a ze kevega nalyopeke.
18Lya sa ko, vakwayita tayi va tangana unene, nokudiva si omu ana gendi Peturusa. 19Herodesa ta ninki asi va mu papare, nye kapi va mu gwene. Makura ta purageresa vanomeni, ta panga asi va va dipage. Ga tunda Herodesa pweyi, makura ta tundu mo moJudeya, a ze a ka pukure koKesareya.
Nomfa daHerodesa
20Herodesa kwa handukilire unene vantu womoTiro naSidoni. Awo makura tava zi kwaHerodesa kambunga kawo. Makura tava likwambere kwaBirasiusi, erenga lyahompa, asi va va fire nkenda, yeeyi sirongo sawo mogoogo hompa yimo sa tere kombinga zonondya.
21Ezuva eli ga ka ligazwilire Herodesa, makura ta dwara mudwaro gwendi gosiuhompa, ta hingire posipundi sendi souhompa, makura ta va uyungisa. 22Mbunga makura tazi zigire asi: “Ezwi eli lyaKarunga, kapisi lyomuntu!” 23Ga liharuka ko, muengeli ana di mu gwana, maginyo taga mu li, makura tu fu, yeeyi kapi ga fumadekere Karunga.
24Nye nonkango daKarunga ado tadi lihana.
25Ano oBaranabasa naSauru kwa mana tupu sirugana sawo, makura tava tengura va tunde mo moJerusarema, makura tava pitura Johanesa ogu ava tumbura hena asi Marukusa.
© Egwanekerobibeli Lyanamibia 1987, 2003
© Bible Society of Namibia 1987, 2003