Yirugana Yovapositoli 11
11
Esanseko lyaPeturusa kombungakriste zomoJerusarema
1Vapositoli novapuli vakwaawo womoJudeya kwa zuvhire asi vapagani nawo vana tambura nonkango daKarunga. 2Ano Peturusa apa ga zire koJerusarema, makura ava va rugana yovamba, tava mu patanesa, 3tava tanta asi: “Ove kwa ka hwilira membo lyava va dira kurugana yovamba, yiyo wa ka lya nawo.” 4Peturusa makura ta tameke kuyivasansekera moomu ya genda, ta tanta asi:
5“Ame kwa kere moJope tani kanderere. Za gwana nge Mpepo, makura tani mono emoneko: sininke sokufana ngwendi emumwaye lyenene vana kwaterere komakovhu gane, sa tundire meguru va si hegumwise, makura tasi wiza pwange. 6Tani si tarurura, tani dimburura asi yikorama yomaguru gane noyikasama neyi yokuwovana noyidira mo. 7Ame kwa zuvhire hena ezwi lya tanterere nge asi, 8‘Peturusa, katuka o dipage o lye!’ Nye ame tani limburura asi: ‘Nampili kuna manga, Hompa, hana kara, mokana kange kapi mwa za rumwe yokudira kupongoka ndi yokunyata!’ 9Makura ezwi tali tundu meguru rwauvali li limburure nge asi, ‘Eyi ga kuhura Karunga, ove nokuwapa si kuyininka asi kapi ya pongoka!’ 10Rutatu ya horokere, makura nayinye tava yi koko yi tengure meguru. 11Na liharuka ko vagara vatatu vana sikama pevero lyonzugo ezi na kere, ava va tundire koKesareya va va tume kwange. 12Makura Mpepo tazi tantere nge asi, ni ze kumwe nawo na ha singanyeka. Vakwetu ava vatano‐nagumwe, yiwo nye twa zire nawo tu ka hwilire membo lyogo Koroneliusa. 13Age makura ta tu sansekere omu ga mwene muengeli ga sikamene monzugo zendi, a mu tantere asi: ‘Tuma vagara koJope, va ka hare Simoni ogu ava tumbura hena asi Peturusa. 14Age yige nye nga ya ku tantera nonkango dokukuparwisa, ove kumwe nembo lyoge nalinye.’ 15Ano eyi na tameka kuuyunga, makura Mpepo zoKupongoka tazi va tembere ngwendi moomu za tu temberere ose petameko. 16Ame makura tani diworoka nonkango daHompa edi ga tente asi, ‘Johanesa nga kuhu nomema, nye one ngava mu kuhwa noMpepo zoKupongoka.’ 17Ano Karunga nsene asi kwa va pere uhwi ngou ga tu pa ose apa twa pura Jesus Kristusa, ame po nyame yilye nye, ni ka silike Karunga?”
18Ano eyi va yi zuvha oyo, makura tava mwena, tava hamberere Karunga asi: “Karunga nani ana pe nye vapagani nawo mpito zelitezururo, li va tware komwenyo.”
Mbungakriste zokoAntiyokiya
19Vapuli ava ga haraganesere mahepeko aga ga varekerere pedipago lyaSitefanesa, kwa zire mwa za sirongo dogoro koFonisiya nokoKipurusi nokoAntiyokiya, nye awo kapi ngava dimbwire ko nawopeke mbudi, nye Vajuda velike. 20Movapuli mwa kere vagara vamwe ava va tundire koKipurusi nokoKirene, awo kwa zire koAntiyokiya va ka tantere ko noVagereka hena, va ka va zuvhisire Mbudi zoNgwa zokuhamena Hompa Jesus. 21Nonkondo daHompa pwawo da kere, makura mbunga zonene tazi pura zi hamene kwaHompa.
22Mbudi zeyi za ka sikire kombungakriste zomoJerusarema, awo makura tava tumu Baranabasa a ze koAntiyokiya. 23Apa ga ka sikire ko, a mone asi vantu Karunga ga va fira unene nkenda, ta hafa, ta korangeda navenye asi va kwatere unene kwaHompa nonomutjima dawo nadinye. 24Baranabasa kwa kere mugara gomuwa, age hena kwa zura Mpepo zoKupongoka nepuro. Age kwa retere vantu wovanzi kwaHompa.
25Baranabasa makura ta zi koTaruso a ka papare Sauru. 26Ano eyi ga ka mu gwana, makura ta mu reta moAntiyokiya. Mvhura mudima kumwe ngava kara nombungakriste oku tava rongo mbunga zonene. MoAntiyokiya yimo va rukilire varongwa romuhoverera asi Vakriste.
27Pomazuva ogo vaporofete vamwe tava gurumuka, va tunde koJerusarema va ze koAntiyokiya. 28Gumwe po, edina lyendi Agabusi ta katuka, makura Mpepo zoKupongoka tazi mu divisisa asi, mouzuni naunye ngamu wiza erumbu lyenene, (eli lya wizire sili posiruwo sahompa gwaRoma Keraudiusi.) 29Ano varongwa makura tava tokora asi, nkenye ogu a gave yuma paapa ga hulira yi ka kwafe vapuli vakwaawo ava va kere moJudeya. 30Nawo yimo va rugana, makura tava yi tumu kovakurona wombungakriste, va yi piture oBaranabasa naSauru.
© Egwanekerobibeli Lyanamibia 1987, 2003
© Bible Society of Namibia 1987, 2003