Yirugana Yovapositoli 10
10
OPeturusa naKoroneliusa
1MoKesareya mwa kere mugara gumwe, edina lyendi Koroneliusa, mupitisili govakwayita efere, ava ngava tumbura asi wombunga zaItaliya. 2Age nembo lyendi nalinye kwa kere vahungami, vatjiliKarunga, ngava kwafa unene vahepwe woVajuda, awo hena ngava kanderere nkenye apa Karunga. 3Age ezuva limwe potundi zautatu kositenguko kwa mwene nawa‐nawa memoneko muengeli gwaKarunga, ana kuhwilira, ta mu tantere asi: “Koroneliusa!” 4Age kwa nwikire muengeli nompwagetjima, ta pura asi: “Yinke eyi, Tate?” Gwina ta mu limburura asi: “Makanderero goge noyikwafa yoge Karunga ana yi panda, ana ku diworoka. 5Tuma nye vagara vamwe koJope, va ka hare mugara gumwe, edina lyendi Simoni, ogu ava tumbura hena asi Peturusa. 6Age mweli membo lyaSimoni gumwe, musunti goyipapa, embo lyendi kwa kara pepi nefuta. (Age yige nga ku tantera eyi ngo rugana.)” 7Ano ogo muengeli, ogu ga uyungire naKoroneliusa, eyi ga za, gwina makura ta zigida po vakareli vendi vavali nomukwayita gumwe gomuhungami, ogu nga kara narunye nendi, 8makura ta va sansekere nayinye, ta va tumu koJope.
9Ano eyi kwa sa, awo simpe monzira, vana heda pepi nositata, makura Peturusa ta rondo peguru lyonzugo poyiha yomutwekatji, a ka kanderere. 10Nzara tazi mu kwata unene, ta hara asi a lye. Ano hava za mokutereka nondya, makura ta mono emoneko: 11Eguru lina zeguruka, tamu tundu sininke sokufana ngwendi emumwaye lyenene vana kwata komakovhu galyo gane, tava li hegumwisire pevhu. 12Amo kwa kere mo yikorama noyikasama yomaguru gane neyi yokuwovana noyidira. 13Makura ezwi tali mu tantere asi: “Peturusa, katuka o dipage o lye!” 14Peturusa ta tanta asi: “Nampili kuna manga, Hompa, yeeyi kapi na lya rumwe sokudira kupongoka ndi sokunyata.” 15Makura ezwi tali mu tantere hena rwauvali asi: “Eyi ga kuhura Karunga, ove nokuyininka si asi kapi ya pongoka.” 16Eyi kwa horokere rutatu, makura oso sininke tava si tengwidire meguru.
17Haga za Peturusa mokufa nsika, age nokudiva si eyi lina kutanta emoneko eli ga mwene, vagara ava ga tumine Koroneliusa, ava va puragerere embo lyaSimoni, nawo kuna sikama pevero. 18Tava zigire va pure asi: “Simoni, ogu ava tumbura hena asi Peturusa, mweli ndi?” 19Ano Peturusa haga hokwa kugazara yokuhamena emoneko, Mpepo zaKarunga tazi mu tantere asi: “Tara, poveli vagara vatatu opo, vana kukupapara. 20Katuka nye o humburuke, mu ka ze nawo, wa ha singanyeka, yeeyi nyame nina va tumu.” 21Peturusa makura ta humburuka a ze kovagara ava ga tumine Koroneliusa, ta tanta asi: “Muntu ogu muna kupapara, nyame. Yinke eyi yina mu reta oku?” 22Awo makura tava tanta asi: “Koroneliusa, mupitisili govakwayita efere gomuhungami age kwa tjira Karunga, age hena kwa fumana mokatji koVajuda, yige ga monekerere muengeli gumwe gwaKarunga, ta mu tantere asi, va ya ku zigide o ze kwendi nga ka zuvhe eyi ngo ka tanta.” 23Peturusa makura ta hwilida owo vagenda vendi membo.
Kuna kusa, Peturusa ta lirongerere ta zi kumwe nawo, ano vagara vakwawo vamwe wokoJope nawo tava zi kumwe nendi. 24Eyi lina kusa ko, makura tava ka sika koKesareya. Koroneliusa kwa ka mu gwana ana va ndindire, age ana zigida vekoro lyendi novakwawo vene‐vene. 25Ano Peturusa age mokuhwilira ana kerere, makura Koroneliusa ta mu simbagwire, ta ligandere konompadi dendi, a mu tongamene. 26Nye Peturusa ta mu katwisa, ta tanta asi: “Katuka, namesi ni muntu tupu.” 27OPeturusa naKoroneliusa kwa gendere nokuuyunga va hwilire, makura Peturusa ta ka gwana vantu wovanzi ava va pongere mo, 28ta va tantere asi: “None mwa yi diva tupu asi, kapi va yi pulisira asi Mujuda a ligendere nomupagani ndi asi a ze kwendi. Nye Karunga ana yi likida nge asi na ha tumbura muntu asi kapi ga pongoka ndi asi ga nyata. 29Ano eyi vana ka hara nge, makura yiyo nina wiza, kapi na nyoka. Ntaantani tantereni nge ko nye eyi mwa ka harera nge.”
30Koroneliusa ta tanta asi: “Mazuva gane gana piti po kutunda apa na dililire nondya dogoro potundi ezi, ano potundi zautatu kositenguko tani kanderere monzugo zange, na liharuka ko, mugara ana sikama komeho zange goyikoverero yokuvaima, 31makura ta tanta asi, ‘Koroneliusa, ekanderero lyoge lina zuvhika, ano yikwafa yoge, Karunga ana yi diworoka. 32Tuma ko nye vantu koJope, va ka hare Simoni, ogu ava tumbura hena asi Peturusa. Mweli membo lyaSimoni, musunti goyipaga, ogu ga kara pepi nEfuta. (Nsene nga wiza, nga ya uyunga noge.)’ 33Yipo nye na tundire ni ku tumine, nye ono wapeke eyi ono wiza. Ntaantani nyose ava natuvenye kosipara saKarunga, tu zuvhe nayinye eyi ana ku pe Karunga asi o yi tu tantere.”
Eudiso lyaPeturusa
34Peturusa makura ta piti mo asi: “Ntaantani nina yi kwata egano nawa‐nawa asi Karunga kapi ga paka mpongo, 35nye mwankenye muhoko nkenye ogu a mu tjira, nye ta rugana youhunga, ta mu tambura. 36One mwa diva nkango ezi ga tumina Karunga muhoko gwaIsraeli pokuvaudisira Mbudi zoNgwa zombili mwaJesus Kristusa, Hompa gwanavenye. 37Mwa yi diva eyi ya horokere moJudeya nazinye, eyi ya tamekerere moGalireya kutunda kekuho eli nga udisa Johanesa. 38Mwa diva omu ga zwidire Karunga Jesus Munasareta Mpepo zoKupongoka nononkondo. Age nga gendi mosirongo mudima, ta rugana yoyiwa, wonompepo donondona navenye nga va verura, yeeyi Karunga kwa kere nendi. 39Ose nyose nombangi danayinye eyi nga rugana mosirongo soVajuda nomoJerusarema. Awo yiyo va mu dipagere pokumupampara kositji sosilivindakano. 40Nye Karunga yiyo ga mu pindura koufe mezuva lyautatu, yiyo ga mu ninka asi a moneke, 41kapisi kwanavenye, nye konombangi dendi edi ga horowora Karunga kwanare, kwetu ose ava ngatu li oku tatu nu kumwe nendi kutunda kevhumbuko lyendi. 42Age kwa tu pa mpangera asi atu udisire vantu, tu gave umbangi asi, age Karunga ga mu tura po, a kare Mupanguli govanamwenyo novafe. 43Kombinga zendi vaporofete navenye va gava umbangi wokumuhamena asi ogu ana kupura mwendi, ta gwana edongonono lyononzo morwedina lyendi.”
Vapagani tava gwana Mpepo zoKupongoka
44Peturusa haga za simpe kuuyunga nonkango edi, makura Mpepo zoKupongoka tazi va hegumukire navenye ava va zuvhire nonkango dendi. 45Vapuli navenye woVajuda wokoJope, ava va wizire kumwe naPeturusa, kwa tetukire pokumona asi uhwi woMpepo zoKupongoka vana u gava nokovapagani kooku, 46yeeyi awo kwa va zuvhire tava uyunga maraka oku tava hamberere Karunga. Peturusa makura ta uyunga asi: 47“Vantu ava nawo vana gwana Mpepo zoKupongoka ngwendi nyose. Pweli hena gokuvhura kunyokesa mema asi va ha va kuhwa ndi?” 48Age makura ta tanta asi va va kuhwire medina lyaHompa Jesus Kristusa. Awo makura tava mu ninki, asi a kare tanko mazuva gamwe nawo.
© Egwanekerobibeli Lyanamibia 1987, 2003
© Bible Society of Namibia 1987, 2003