2 Timoteusa 3

Udona wopomazuva gopouhura

1Ove diva asi, pomazuva gopouhura ngapa kara yiruwo yoyidigu. 2Yeeyi vantu ngava lihara tupu vene, ngava dowokera yimaliva, ngava lifumadeka, ngava linenepeka, ngava kara woyitjani, kapi ngava zuvha yovakurona vawo, kapi ngava paka mpandu, kapi ngava pongoka. 3Awo kapi ngava paka nkenda, ngava kara woyimbokauka novarundili, vankenye omu nava woyikotjongana, awo kwa nyenga yoyiwa. 4Awo ngava kara nombudi novalingi‐lingi novalitumbi, ngava hara mahafo goparutu kupitakanesa omu va hara Karunga. 5Awo ngava moneka ngwendi vakereliKarunga, nye nonkondo damo ngava di nyoka. O likare ure nava vangoso! 6Yeeyi vamwe mo kububagura mambo, va kwate vakadi ava da pira nonkondo, da rorora nonzo nokuvakoka‐koka madowo peke‐peke. 7Vakadi vangesi kulironga kwankenye ogu, nye kapi ava vhuru kusika kokudiva usili. 8Moomu tupu va lilimbire oJanesi naJamburesi naMosesa, navaava nawo yimo ava lilimbi nousili. Vantu ava kwa kara nonondunge da dira kuligwana po, awo kapi ava va huguvarere epuro. 9Nye awo kapi ngava za ntando, yeeyi ugova wawo ngau lihorora poruzera kwanavenye, moomu wa lihorwere woJanesi naJamburesi.

Mapukururo gokuhulilira

10Nye ove wa kara muhoneni gerongo lyange noyikara yange nositambo sange nepuro lyange nedidimiko lyange neharo lyange nomu ani lididimike. 11Ame nyose noge moruhepo rwange norunyando rwange oru rwa gwene nge moAntiyokiya nomoIkoniya nomoLisitira. Eh, mahepekogona aga ga gwana nge! Nye Hompa namunye omo ga yoworora nge mo. 12Ano navenye ava va tokora kukerera Karunga momalikwatakano naKristusa, nawo yimo ngorooro ngava va hepeka. 13Nye vadinikarunga novakumbageli, udona wawo ngau vhuka, ngava pukise wopeke oku tava lipukisa vene. 14Nye ove ko, kara mousili ou wa lironga, yiyo wa u pura nawa‐nawa, yeeyi ava va u ku ronga, wa va diva. 15Ove hena hawa tunda unona woge, matjangwa gokupongoka wa ga diva, aga aga ku pe ukonentu, o paruke pokupura Jesus Kristusa. 16Nkenye etjangwa, eli za retesa po Mpepo zaKarunga, kwa kara nomulyo gokuronga usili. Alyo kukorangeda nokupukurura nokurongesa uhungami, 17asi muntu gwaKarunga mokulimburukwa kwalyo, a sikilire mo, age a fire kurugana yirugana nayinye yoyiwa.

Currently Selected:

2 Timoteusa 3: KWN

Highlight

Copy