2 SAMWERE 3
3
1Yita yopokatji kava wokukwafa epata lyaSauru nava wokukwafa Ndafita tayi twikire ngorooro siruwo sosire. Ndafita eyi ana kunkondopa, vakwawo awo kuna kupira nonkondo.
Vana vaNdafita wovagara
2Vana wovagara vatano‐nagumwe moomu va likwamena, ava va reterere Ndafita moHeburoni vava: Amunoni, ozina Ahinoamu gomoJesireli; 3Kireyabu, ozina Abigayili, ogu ga kwere nakufaNabali gomoKarumeli; Abisaromo, ozina Maka, munwahompa Talimayi gwaGesure; 4Adoniya, ozina Hagiti; Sefatiya, ozina Abitali; 5Itereyamu; ozina Egira. Vana navenye ava wovagara kwa va reterere moHeburoni.
Abineli tava lipakerere naNdafita
6Yita eyi yina kutwikira ngorooro pokatji kovakwayita vaNdafita nava wokuhamena kepata lyaSauru, Abineli kuna kunenepa mwava wokuhamena kwaSauru.
7Ezuva limwe Isiboseti munwaSauru gomugara kwa kuyaukire Abineli asi ga rara Lisipa zaAya, sihora soguhwe Sauru. 8Eyi kwa handukisire unene Abineli, ta tanta asi: “Ove kuna kugazara asi nyame na hwedesa Sauru ndi? Ndi kuna kugazara nawa‐nawa asi ame kuna kuruganena Juda? Hana tunda nakwanare ame kwa hama kwaguhwo Sauru nokovamumbya vendi nokovakwawo, na mu popera kokumufunda Ndafita; nye makura yiyo ono kupera nge usima mombinga zomukadi! 9-10Hompa kwa tumbwidira Ndafita asi nga gusa sirongo kwaSauru nokoruvharo rwendi, nga ture Ndafita mouhompa waIsraeli naJuda, kutunda oku sa hura sirongo koDana dogoro koku sa ka twa koBereseba. Ngesi Karunga a dipage nge, nsene kapi ngani yi sikisa mo eyi!” 11Isiboseti kwa tjilire Abineli, makura kapi ga kumbwilire ko.
12Abineli ta tumu nontumi kwaNdafita posiruwo oso age moHeburoni, va ka tante asi: “Yilye ogu nga pangera sirongo? Paka po egwanekero name, makura ame ngani ku kwafe mokuhamesera Israeli mudima koge.”
13Ndafita ta limburura asi: “Ngoso nawa! Ngani paka po egwanekero noge mosininke simwe esi: ngo piture munwaSauru gomukadi Mikali apa ngo wiza kwange.” 14Ndafita ta tumu hena nontumi kwa Isiboseti asi: “Mpe nge mukadange Mikali. Ame kwa mu randa yipapa yomaugara goVafilisiti efere ntani nina kumukwara.” 15Makura Isiboseti ta mu gusa po pwayendi Paliti zaRaisi. 16Paliti ta mu kwama‐kwama nzira nazinye oku ta lili dogoro kositata saBahulimu. Ano apa ga tente Abineli asi: “Tengura,” makura ta ka za.
17Abineli ta zi kovagendesi vaIsraeli, ta va tantere asi: “Nare mwa yi gusa yokuhara asi Ndafita a kare hompa gweni. 18Ntaantani eli evega lyeni nye. Diworokeni asi Hompa kwa tente asi: ‘Ngani ruganesa mukereli gwange Ndafita, nga yoworore mbunga zange zaIsraeli koVafilisiti nokononkore dawo nadinye.’ ” 19Abineli kwa tanterere hena vantu vezimo lyaMbenyameni, makura ta zi koHeburoni a ka tantere Ndafita eyi vana pura wonkwaMbenyameni noVaisraeli asi yiyo nava rugana.
20Apa ga ya sikire Abineli koHeburoni novagara nomurongo mbali, makura Ndafita ta va ruganene sipito. 21Abineli ta tantere Ndafita asi: “Ngesi tani zi nye ni ka hamesere Israeli mudima koge ove Munekuto. Awo ngava ku tambure ngo kare hompa, ngo rugane eyi wa hara, ngo pangere sirongo mudima.” Ndafita makura ta rekere Abineli, gwina ta ka za nombili.
Abineli tava mu dipaga
22Konyima Jowabu nomarenga gamwe gaNdafita nago gana ka tengura kehomono, kumwe noyininke yoyinzi eyi va ka kwete. Abineli age ana tundu po pwaNdafita moHeburoni, ana zi, morwa Ndafita ga mu rekerere a ze nombili. 23Apa va wizire oJowabu novantu vendi, tava ya mu tantere asi Abineli ka wizire kwahompa Ndafita, nye vana mu rekere a ze nombili. 24Jowabu makura ta zi kwahompa, ta ka mu tantera asi: “Yinke eyi ono rugana? Abineli ka wizire koge — yinke nye yokumusigira a ze ngoso? 25Age ka wizire a ya ku kumbagere a ya tarurure nayinye eyi o rugana noku o zi nakunye. Nove ono yi diva nawa‐nawa!”
26Eyi ga tunda po Jowabu pwaNdafita, ta tumu nontumi di ka gwane Abineli, tava ka mu tengwidira petope lyaSira; Ndafita age nkara dendi. 27Apa ga ya sikire Abineli moHeburoni, ta mu gusa va ka hukumane koyiha yevero, ngwendi vava asi tava ka likunda kahore‐hore, makura ta mu tu mezimo. Yimo nye va mu dipagere Abineli ngoso, morwa ga dipagere Asaheli mumbyaJowabu. 28Ano Ndafita eyi ga yi zuvha, ta tanta asi: “NaHompa ana yi diva asi vantu vange nanyamwange kwanuunu nzo zedipago lyaAbineli. 29Efutiso lyayo li mu gwane mwene Jowabu nepata lyendi nalinye. Mwankenye epupi mepata limwe ngamu kare gokuzoza mahu ndi goyiheru ndi gokurugana yosikadi yelike ndi gokufa moyita ndi gokupira nondya dokugwana po.” 30Jowabu namumbyendi Abisayi kwa rugwidire Abineli kuwoko, ogu ga dipagere mumbyawo Asaheli moyita poNgibiyoni.
Abineli tava mu vhumbike
31Makura Ndafita ta tantere Jowabu novantu vendi asi va tavagure yikoverero yawo, makura va dware nonsako, va lire Abineli. Pevhumbiko hompa Ndafita mwene kwa gendere konyima zosikesa sosimpu. 32Abineli kwa mu vhumbikire poHeburoni, ano hompa ta lili unene, novantu navenye nawo ngosikwawo. 33Ndafita makura ta dimbi rusumo rononkali daAbineli oru asi:
“Yinke yokufira Abineli ngwendi egova?
34Mawoko gendi va hana kugamanga,
nompadi dendi da hana kuza mokakunzu;
kuna fu ngwendi gogu vana
dipaga vakorokotji!”
Makura vantu tava mu lili.
35Ezuva mudima vantu kwa sininikire Ndafita asi a lye yuma, nye age kwa gene asi: “Karunga a dipage nge, nsene nani lya yuma alyo lya hana kutoka!” 36Vantu tava yi nongonona, makura tava hafa. Nayene nkenye eyi nga rugana hompa kuhafesa vantu. 37Vantu vaNdafita navenye novantu navenye womoIsraeli tava siki po asi hompa kapi ga heme ko kedipago lyaAbineli. 38Hompa ta tantere marenga gendi asi: “Kapi muna yi diva asi ezuva lyanaina mugendesi gomunene ana fu moIsraeli? 39Nampili ngomu asi ame hompa ogu ga horowora Karunga, na dombo mutjima naina. Vana wovagara ava vaSeruya vakukutu unene kwange. Hompa ngano ta futisa vakorokotji owo, moomu va yi liruganena!”
© Egwanekerobibeli Lyanamibia 1987, 2003
© Bible Society of Namibia 1987, 2003