2 SAMWERE 2
2
Ndafita tava mu tura mouhompa moJuda
1Konyima zeyi, Ndafita ta pura Hompa asi: “Ni ze ni ka pangere po sitata simwe somoJuda ndi?”
Hompa ta mu limburura asi: “Zende.”
Ndafita asi: “Sipiso po nye?”
Hompa ta tanta asi: “Heburoni.” 2Ndafita makura ta zi koHeburoni, ta pitura vakadi vendi vavali ava: Ahinoamu gomoJesireli naAbigayili gomoKarumeli ogu ga kwere nakufaNabali. 3Age kwa zire novakwayita ava ga kere nawo kumwe nomapata gawo, makura tava ka tura moyitata yaHeburoni. 4Makura vagara womoJuda tava wiza koHeburoni, tava ya gwaveke Ndafita a kare hompa gwaJuda.
Ano Ndafita apa ga zuvhire asi vantu womoJabesi moGiliyata vana vhumbike Sauru, 5ta tumu ko vagara vamwe neraka eli asi: “Hompa ngano ta mu tungike mokuhorora efumadeko kwahompa gweni pokumuvhumbika. 6Hompa ngano ta mu fire nkenda, a mu limburukwe. Name si ngani mu rugana momuwa morwa mwa rugana eyi. 7Ano koreni, mu kare sigara! Sauru, hompa gweni ana fu, ano vantu womoJuda vana gwaveke nge ni kare hompa gwawo.”
Isiboseti tava mu tura a kare hompa gwaIsraeli
8Mupitisili govakwayita vaSauru, Abineli zaNere, kwa dukire naIsiboseti, munwaSauru gomugara, tava vindakana Jorodana va ze koMahanayimu. 9Omo yimo nye ga ka tulilire Abineli Isiboseti mouhompa woyirongo yoGiliyata naAseli naJesireli naEfurayimi naMbenyameni, Israeli tupu nazinye. 10Apa va mu tulire mouhompa, age nomvhura dendi nomurongo ne, age kwa pangerere nomvhura mbali.
Nye ezimo lyaJuda alyo kwa heme kwaNdafita, 11age kwa pangerere Juda moHeburoni nomvhura ntano‐nambali noharufa.
Yita pokatji kaIsraeli naJuda
12Abineli nomarenga gaIsiboseti kwa tundire moMahanayimu va ze kositata saNgibiyoni. 13Jowabu, ozina Seruya nomarenga makwawo gaNdafita kwa gwanekerere nawo posidiva, makura navenye tava hingire, mbunga ezi mesinya omu, ezi nkwawo mesinya mwina. 14Abineli ta tantere Jowabu asi: “Tu guseni ko vamati vamwe kwankenye mbunga va lihetaike yoyita.”
Jowabu ta limburura asi: “Yi kare po tupu.”
15Makura kombinga zaIsiboseti kezimo lyaMbenyameni taku tundu vagara murongo navavali, va rwise vagara murongo navavali wokombinga zaNdafita. 16Navenye tava likwata‐kwata konomutwe, makura twa mukweni monompatji nage a ku twe, makura navenye nomurongo mbali navane tava gwire simwe, tava fu. Evega olyo moNgibiyoni yiyo ava li tumbwire asi: “Evega lyoNomfuro.”
17Makura yita yoyinene tayi sikama nye, ano Abineli noVaisraeli tava va fundu vaNdafita. 18Vana wovagara vaSeruya ava va kere po, vava: Jowabu naAbisayi naAsaheli. Asaheli ogu nga duka unene ngwendi menye mowiza, 19ta tameke kutjida Abineli a mu vyukilire. 20Abineli ta setuka konyima ta tanta asi: “Nyove Asaheli ndi?”
Gwina asi: “Nyame.”
21Abineli ta tanta asi: “Hageka nye kutjida nge! Tjida po mukwayita gumwe o ka mu guse eyi ana kara nayo.” Nye Asaheli age kuna kumutjida ngorooro. 22Abineli ta mu tantere hena asi: “Hageka kutjida nge! Eyi ono kutumangedera nge ni ku dipage yinke? Omu ngatu litara namukuroge Jowabu ngapi?” 23Nye Asaheli nokuzuvha si; makura Abineli ta mu tu sinderenyima egonga mezimo, tali ka bubuka komugongo. Asaheli ta gwire pevhu ta fu, ano nkenye ogu ga wizire po apa ga rere, tanko nkwira poopo.
24Nye Jowabu naAbisayi tava konko Abineli, ano eyi lina kukatoka tava wiza kondundu zaAma ezi za kara koUpumezuva waGiya konzira zokuvyuka komburundu zaNgibiyoni. 25Vagara vemezimo lyaMbenyameni tava umbilikida hena Abineli, tava sikama pondungu zondundu. 26Abineli makura ta zigire Jowabu asi: “Yimo nye ngorooro ngatu rweni narunye nanarunye ndi? Kapi ono diva asi komeho oko udigu ngau kara ko ndi? Ose tu vakweneni. Dogoro siruwoke ntani ngo ka tantera vantu woge va hageke kututjida‐tjida.”
27Jowabu ta limburura asi: “Karunga gomwenyo nina kugana asi, ngano kapi ono uyunga, ngano yimo ngorooro natu mu tjida dogoro komungura ngurangura.” 28Makura Jowabu ta fuda korumbendo, sidiviso kovakwayita vendi sokuninka asi va hageke kutjida Vaisraeli; makura yita tayi litura nye.
29Abineli novakwayita vendi tava gendi masiku mudima moMuramba gwaJorodana, tava vindakana mukuro gwaJorodana, ano eyi va genda ngurangura nazinye, makura tava ka sika koMahanayimu.
30Apa ga hagekere Jowabu kutjida‐tjida, ta pongaike vakwayita vendi navenye, ta mono asi murongo navatano‐navane patupu, rambangako naAsaheli. 31Vakwayita vaNdafita kwa dipagere vakwayita vaAbineli vemezimo lyaMbenyameni 360. 32Jowabu novakwayita vendi tava gusa simpu saAsaheli, tava ka si vhumbika montoko zezimo moBeterehema. Makura tava gendi masiku mudima, eyi lina kugeha kwina, tava ka sika moHeburoni.
© Egwanekerobibeli Lyanamibia 1987, 2003
© Bible Society of Namibia 1987, 2003