2 SAMWERE 4
4
Isiboseti tava mu dipaga
1Apa ga zuvhire munwaSauru gomugara Isiboseti asi Abineli vana ka mu dipaga moHeburoni, makura tagu mu pwaga, ano mbunga nazinye zaIsraeli tazi limbilirwa. 2Isiboseti kwa kere novakurona wovakwayita vavali ava va kere vagendesi wonombunga dehomono, oBana naRekabu, vana wovagara vaLimoni womoBeroto mezimo lyaMbenyameni. (Beroto kusivarura asi ruha rwaMbenyameni. 3Vakalimo vene‐vene kwa dukilire koGitaymu, omu va ka kara vanayirorongo dogoro naina ngesi.)
4Jonatana zaSauru kwa kere namunwendi Mefiboseti, ogu ga kere nonomvhura ntano apa va dipagere oSauru naJonatana. Apa za tundire mbudi zonomfa dawo kositata saJesireli, makura mureli gwendi ta mu damuna va duke, age kwa gendererere unene, makura ta mu ganda, makura ta remana.
5Rekabu naBana kwa zire kembo lyaIsiboseti, tava ka sika pomutwekatji, age ana pwizumuka po mutenya. 6Mukadi ogu ga kere pevero, age ta tengura rukokotwa, kwa kumaukire, makura ta ponyoka. Rekabu naBana tava livakere mo. 7Omo monda tava zi monzugo ezi a rara Isiboseti, age kuna ponyoka, makura tava mu dipaga. Tava tete ko mutwe gwendi va ze nago, makura tava gendi zoMuramba gwaJorodana masiku mudima. 8Makura tava twarere hompa Ndafita mutwe gwaIsiboseti moHeburoni, tava tanta asi: “Mutwe gwaIsiboseti zaSauru, nkore zoge, ogu nga heteke asi a ku dipage, gogu. Naina Hompa ana ku pulisire ove munekuto, kurugwida kuwoko Sauru noruvharo rwendi.”
9Ndafita ta limburura oRekabu namunwazina Bana asi: “Hompa gomwenyo nina kugana ogu ga parura nge koyimpagwa nayinye! 10Gumwe kwa wizire kwange moSikiragi a ya tantere nge nomfa daSauru, kwa gazarere asi mbudi zongwa ana reta. Ame kwa mu kwatesere tani mu dipagesa. Ozo yizo mfuto na mu pere kombudi zendi zongwa! 11Nsene ngovakorokotji nye yireru, wokudipaga muntu ga hana nzo ana lirarere monzugo zamwene. Ngesi tani mu rugwida kuwoko, morwa kumudipaga, ni mu kombe ko oku konauzuni!” 12Ndafita ta gava mpangera, makura vakwayita vendi tava dipaga oRekabu naBana, tava va tete mawoko nomaguru, makura tava yi tulike yi zenzerere posidiva moHeburoni. Awo makura tava gusa mutwe gwaIsiboseti, tava gu vhumbike montoko zaAbineli omo moHeburoni.
© Egwanekerobibeli Lyanamibia 1987, 2003
© Bible Society of Namibia 1987, 2003