Kejadian 9
9
Alatala pina jangi ke Nabi Nuh
1Alatala yabeang berka lako Nuh ke anak-anak, ke bafirman mo lako taunan, "Baranak badadi mo ke salempo dunia ta. 2Kalis to ta sarea binatang, pio-pio pang bao awan, sarea ade ngaloa, ke sarea ade telas pang bao tana sasir dunia ta, ke sarea jangan-jangan pang dalam lit katakit benar lako nene, ke lako nene mo Kusera sarea denan. 3Dunung kamo Kubeang lako nene sarea ade tumung umin nene kakan, ke to ta Kubeang lako nene ampo sarea ade ngaluit ngaloa, ade telas, sarea denan bauʼ nene kakan. 4Sopo-sopo ade no bauʼ nene kakan yanansi empa ade masi ada geti, ling nyawa ada pang dalam geti. 5Konang sai-sai ade satumpak geti tau lin jangka mate, mesti ya Kutuntut balas. Saruntung binatang ke saruntung manusia ade samate manusia ya Kuhukum mate. 6Ling Alatala ka yasanadi manusia mara Nya diri, dadi sai-sai ade samate tau, nan si luk nya yasamate ling tau lin. 7Ke nene, baranak badadi mo sanajan peno jangka no bauʼ yaitung lowe nene pang bao dunia ta, ao baranak badadi mo."
8Bafirman mo Alatala lako Nuh ke anak-anak ade barema-rema ke nya, 9"To ta Kupina jangi ke nene ke sarea rowe beka nene, 10ke sarea ade telas ade barema-rema ke nene, yanansi pio-pio, binatang ade nene patik ke binatang gamang, sarea ade lis kalis dalam bangka nan barema-rema ke nene, yanansi sarea binatang ade ada pang bao tana sasir dunia. 11To ta Kupina jangi ke nene, no si ya Kusanatang ampo aiʼ ba kenang sanonda sarea ade telas ke ade bauʼ sangancir dunia ta."
12Bafirman mo Alatala ampo, "Ta nya tanda jangi-Ku, ade ka Kupina antara Aku ke nene, ke antara Aku ke sarea ade telas pang bao dunia, ade barema-rema ke nene, jangka rowe beka nene turin-temurin, sale-le, 13Kuolo mo teja-Ku pang bao awan mabau dadi tanda jangi antara Aku ke dunia. 14Saruntung waya Kusanatang mega pang bao dunia ke teja nan bauʼ yagita pang bao awan, 15dadi teja nan satotang-Ku luk kajangi-Ku ke nene ke lako sarea ade telas, sarea ade bariak, mabau aiʼ no mo dadi aiʼ ba ade yasangancir sarea ade telas. 16Lamin teja nan ada pang awan, Kugita mo ke yasatotang-Ku luk kajangi-Ku ade kekal antara Alatala ke sarea ade telas, sarea ade ada pang bao tana sasir dunia ta."
17Bafirman mo Alatala lako Nuh, "Ta nya tanda kajangi-Ku ade ka Kupina antara Aku ke sarea ade telas pang bao tana sasir dunia ta."
Riwayat Nabi Nuh ke satelu anak
18Anak-anak Nuh ade lis kalis dalam bangka ade rea nan yanansi Sem, Ham ke Yafet. Ham yanansi bapak Kanaan. 19Satelu anak Nuh nan yanansi balo tolo sarea tau pang bao dunia.
20Nuh tau tani, ke nya ade kamula-mula pina keban anggur. 21Pang sopo ano beru kasuda nya inum anggur, nya mabuk ke ngulang basangkaro pang dalam kema. 22Karing Ham, bapak Kanaan nan, yagita bapak basangkaro, teris yaaran luk nan lako sadua sanak salaki ade ada pang luar. 23Karing Sem ke Yafet yaete salamar kere ke yasalonang pang toak taunan dua, teris taunan balangan surit, yatutup parana bapak ade basangkaro nan, rena samolang rua mabau taunan no mo yagita bapak basangkaro.
24Muntu Nuh mato kalis mabuk ke yamenong apa ade ka yaboat ling Ham, anak supu nya, 25beling Nuh,
"Kusapata Kanaan, anak Ham!
Nya ya dadi budak ade paling hina umin sanak-sanak salaki."
26Beling mo Nuh kabali,
"Puji mo ALATALA, Tuhan Sem!
Beang mo Kanaan ya dadi budak Sem.
27Beang mo Alatala yasaguar tana pang tedu Yafet!#9:27 Yafet: Pang dalam basa Ibrani 'Yafet' kamenong mara kata ade bategas 'saguar' atawa 'batamba'.
Ke beang mo rowe beka nya tedu basaiʼ ke rowe beka Sem.
Ke beang mo Kanaan dadi budak Yafet."
28Kasuda aiʼ ba nan, Nuh masi telas sale 350 tin ampo. 29Dadi Nuh telas jangka barumir 950 tin, nan po nya mate.
Currently Selected:
Kejadian 9: SMW
Highlight
Share
Copy
Want to have your highlights saved across all your devices? Sign up or sign in
©️2025 The Seed Company
Videos for Kejadian 9
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Ep 34. Genesis 10: How Noah’s Sons Shaped the World & God's Redemption Story
The Bible Show
Episode 19: Feeding of Four thousand with the Syrophonecian woman
The Bible Show