زبُور 37
37
سرنوِشتِ آدمای شرِیر و آدمای نیک
زبُورِ داوُود.
1بخاطرِ آدمای شرِیر خود ره رنجُور نَکُو
و حَسَدِ بدکارا ره نَخور،
2چراکه اُونا دَ زُودی رقم علف پژمُرده مُوشه
و مِثلِ گیاهِ سَوز، خُشک.
3دَ خُداوند تَوَکُل کُو و نیکی کُو؛
دَ سرزمِین خُو جای-دَ-جای شُو و وفاداری ره نِگاه کُو.
4اوخته از حُضُورِ خُداوند لِذَت مُوبری،
و اُو آرزو های دِل تُو ره دَزتُو مِیدیه.
5راه-و-طرِیق خُو ره دَ خُداوند تسلِیم کده
دَزُو تَوَکُل کُو و اُو دِست دَ کار مُوشه.
6اُو عدالت تُو ره مِثلِ روشَنی صُبح بَرمَلا مُونه
و حق بُودون تُو ره رقمِ آفتَوِ چاشت اَلّی.
7دَ حُضُورِ خُداوند چُپ-و-آرام بَش
و قد صَبر-و-حَوصِله اِنتِظار شی ره بِکَش.
بخاطرِ کسی که دَ راه-و-طرِیق خُو کامیاب اَسته،
و نقشه های شرِیرانِه خُو ره عملی مُونه، رنجُور نَشُو.
8از قار دُوری کُو و غَضَب ره ایله بِدی.
خود ره رنجُور نَکُو،
چراکه سُون شرارَت مُوبره.
9چُون مردُمای بَدکار نابُود مُوشه،
لیکِن کسای که دَ اُمِیدِ خُداوند اَسته، وارِثِ زمی مُوشه.
10بعد از یگ زمانِ کوتاه، آدمِ شرِیر دِیگه وجُود نَمِیدَشته بَشه؛
و هرچِیقَس که اُو ره بُپالی، پَیدا نَمُوشه.
11مگم آدمای حلِیم وارِثِ زمی مُوشه،
و از پِرَیمونی صُلح-و-سلامَتی لِذَت مُوبره.
12آدمِ شرِیر دَ ضِدِ آدمِ عادِل تَوطیه مُونه
و دَ بَلِه شی دَندوخَیی مُوکُنه؛
13لیکِن خُداوند دَ بَلِه آدمِ شرِیر خَنده مُونه،
چُون اُو مِینگره که روزِ بازخاستِ ازُو مییه.
14آدمای شرِیر شمشیر ره مِیکشه
و کَمو ره خَم مِیدیه،
تا مردُمای غرِیب و مُحتاج ره تاه پورته کُنه
و آدمای ره که دَ راهِ راست موره، دَ قتل بِرسَنه.
15لیکِن شمشیرای ازوا دَ دِلِ خودون شی دَر مییه
و کمون های ازوا مَیده مُوشه.
16دارایی کمِ یگ آدمِ عادِل بِهتر اَسته
از مال-و-دَولتِ پگِ شرِیرو.
17چُون بازُوی آدمای شرِیر مَیده مُوشه،
لیکِن خُداوند پُشتِیوانِ آدمای عادِل اَسته.
18خُداوند از روزای آدمای عادِل باخبر اَسته
و میراثِ ازوا اَبَدی اَسته.
19اُونا دَ زمانِ بَلا-و-مُصِیبت شرمِنده نَمُوشه؛
و دَ روزای قحطی خوراکِ پِرَیمو دَره،
20لیکِن آدمای شرِیر نابُود مُوشه،
و دُشمنای خُداوند رقمِ نُوربَندی علفچرها زُودگُذر اَسته که از بَین موره،
اُونا مِثلِ دُود اَلّی گُم مُوشه.
21آدمِ شرِیر قرض مِیگِیره و پس نَمِیدیه،
لیکِن آدمِ عادِل سَخی اَسته و بَخشِش کده موره،
22کسای که از خُداوند بَرکت پَیدا مُونه، وارِثِ زمی مُوشه،
ولے کسای ره که خُداوند نالَت مُونه، اُونا نابُود مُوشه.
23اگه خُداوند از راه-و-طرِیقِ یگ آدم خوش بَشه،
قَدم های ازُو ره مُستَحکم-و-اُستوار مُونه؛
24هرچِیقَس که اُو بوفته، سرنِگون نَمُوشه،
چراکه خُداوند دِستِ ازُو ره مِیگِیره.
25ما جوان بُودُم و آلی پِیر اَستُم
و ما هرگِز نَدِیدیم که آدمِ عادِل پُرمُشت شُده بَشه
و اَولادای شی نان گدایی کده بَشه.
26اُو همیشه سخاوَتمَند اَسته و قرض مِیدیه؛
و اَولادای ازُو مایِه بَرکت اَسته.
27از بَدی دُور شُو و نیکی کُو؛
اوخته تا اَبَد باقی مُومنی،
28چراکه خُداوند اِنصاف ره دوست دَره
و مومنِین خُو ره ایله نَمِیدیه.
اُونا تا اَبَد محفُوظ اَسته،
لیکِن نسلِ آدمای شرِیر قَطع مُوشه.
29آدمای عادِل وارِثِ زمی مُوشه
و تا اَبَد دَز شی زِندگی مُونه.
30دانِ آدمِ عادِل حِکمت ره بَیان مُونه
و زِبونِ ازُو دَ اِنصاف توره مُوگیه.
31شریعتِ خُدای آدمِ عادِل دَ دِل شی اَسته؛
امزی خاطر پایای ازُو نَمِیلَخشه.
32آدمِ شرِیر دَ گیتِه آدمِ عادِل اَسته
و قَصدِ کُشتون شی ره دَره،
33 لیکِن خُداوند اُو ره دَ دِستِ آدمِ شرِیر ایله نَمُونه
و غَیتِیکه دَ محاکِمه اَوُرده شُد، ام نَمیله که محکُوم شُنه.
34دَ خُداوند اُمِید کُو و راه-و-طرِیقِ ازُو ره نِگاه کُو
و اُو تُو ره وارِثِ زمی جور کده سربِلند مُونه؛
اوخته تُو نابُودی آدمای شرِیر ره مِینگری.
35ما یگ آدمِ شرِیر و ظالِم ره دِیدُم؛
که رقمِ دِرختِ سَوُز خود ره بَرتُو و بِلند کده مورفت،
36لیکِن اُو از بَین رفت و دِیگه وجُود نَدَشت.
هرچِیقَس که اُو ره پالِیدُم، اُو پَیدا نَشُد.
37آدمای بےعَیب ره توخ کُو و آدمای راستکار ره بِنگر،
چُون عاقُبَتِ ازوا صُلح-و-سلامَتی اَسته.
38لیکِن آدمای خطاکار پگ شی نابُود مُوشه
و عاقُبَتِ آدمای شرِیر نابُودی اَسته.
39نِجاتِ آدمای عادِل از طرفِ خُداوند مییه؛
اُو دَ غَیتِ مُشکِلات-و-سختی بَلدِه ازوا قلعِه مُستَحکم اَسته.
40خُداوند دَزوا کومَک مُونه و اُونا ره خلاصی مِیدیه؛
اُونا ره از چنگِ مردُمای شرِیر خلاص مُونه و اُونا ره نِجات مِیدیه،
چراکه اُونا دَ خُداوند پناه مُوبره.
Currently Selected:
زبُور 37: HAZ
Highlight
Share
Compare
Copy
Want to have your highlights saved across all your devices? Sign up or sign in
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 UBS. Used by permission. All rights reserved.
