دوّمِ قُرِنتیا 5

فصلِ پنجُم

خانِه آسمانی

1چُون مو مِیدَنی، هر وختِیکه امی خَیمِه زمِینی#۵‏:۱ «خَیمِه زمِینی» یعنی «جِسم.» که مو دَزشی زِندگی مُونی چَپه شُنه، مو یگ ساختُمان از طرفِ خُدا دَری، خانِه که قد دِستای اِنسان آباد نَشُده، بَلکِه اَبَدی اَسته دَ عالمِ باله. 2ازی که دَ امزی خَیمه مو دَ آه-و-ناله اَستی، آرزوی کَلو دَری که دَ وسِیلِه خانِه آسمانی خُو پوشَنده شُنی. 3یَقِیناً وختِیکه پوشَنده شُنی، مو لُچ معلُوم نَمُوشی. 4چُون تا وختِیکه مو دَ امزی خَیمه اَستی، مو دَ زیرِ بارِ گِرَنگ آه-و-ناله مُونی، چُون مو نَمیخاهی که کالا ره بُر کُنی، بَلکِه میخاهی که کالای دِیگه بُپوشی تا چِیزی که از بَین رفتَنی اَسته دَ وسِیلِه زِندگی اَبَدی قُورت شُنه. 5امُو که مو ره بَلدِه امزی مقصد آماده کده، خُدا اَسته که روح اُلقُدس ره دَ عِنوانِ بَیعانه دَز مو دَده.

6پس مو همیشه خاطرجم اَستی؛ اگرچِه مِیدَنی تا وختِیکه دَ خانِه جِسم اَستی، مو از مَولا دُور اَستی. 7چُون مو دَ مُطابِقِ ایمان زِندگی مُونی، نَه دَ مُطابِقِ دِیدو. 8اَرے، مو خاطرجم اَستی، ولے کَلوتر خوش مُوشی که اِی خانِه جِسم ره ایله کُنی و دَ خانِه آسمانی قد مَولا بَشی. 9پس چی دَ خانِه جِسم بَشی و چی دُور از خانِه جِسم، مقصد مو امی اَسته که مَولا ره خوش کُنی. 10چُون پگ مو باید دَ پیشِ تختِ قضاوَتِ مسیح حاضِر شُنی تا هر کس مُطابِقِ چِیزی که دَ جِسم خُو انجام دَده، چی خُوب و چی بَد، اَجر یا جَزا بِنگره.

خِدمت بَلدِه آشتی دَدو

11پس چُون مو مِیدَنی که ترسِ خُدا چی اَسته، مو کوشِش مُونی که دِیگه مردُما ره وادار کُنی. مو بَلدِه خُدا کامِلاً معلُومدار اَستی و اُمِید دَرُم که بَلدِه وِجدانِ ازشُمو ام خُوب معلُومدار بَشی. 12مو بسم خود ره دَ پیشِ ازشُمو تعرِیف-و-تَوصِیف نَمُونی، بَلکِه بَلدِه شُمو یگ فرصت مِیدی که دَ بَلِه ازمو اِفتخار کُنِید تا بِتنِید جوابِ کسای ره بِدِید که دَ بَلِه چِیزای ظاهِری اِفتخار مُونه، نَه دَ بَلِه چِیزای که دَ دِل اَسته. 13اگه مو عقل خُو ره از دِست دَدے، اِی بَلدِه خُدا اَسته؛ و اگه هُوشیار اَستی، اِی بَلدِه ازشُمو یَه، 14چُون مُحَبَتِ مسیح دَ بَلِه مو حاکِم اَسته و مو دَ اِی نتِیجه رسِیدے که یگ نفر بَلدِه پگ مُرد؛ امزی خاطر پگ مُرده. 15و اُو بَلدِه پگ مُرد تا کسای که زِندگی مُونه دِیگه بَلدِه خودون خُو زِندگی نَکُنه، بَلکِه بَلدِه کسی که بخاطرِ ازوا مُرد و دُوباره زِنده شُد.

16پس بعد ازی مو هیچ کس ره دَ مُطابِقِ اصُولِ اِنسانی#۵‏:۱۶ دَ جای «اصُولِ اِنسانی» دَ زِبونِ یونانی «جِسم» نوِشته یَه. قضاوَت نَمُونی، اگرچِه یگ زمان مو مسیح ره دَ مُطابِقِ جِسم مِیشنَختی، لیکِن آلی دِیگه اُو ره دَ مُطابِقِ جِسم نَمِینَخشی. 17پس اگه کُدَم کس دَ مسیح تعلُق دَشته بَشه، اُو یگ مَخلُوقِ نَو اَسته. چِیزای کُهنه از بَین رفت؛ اینه، پگ چِیزا نَو شُده. 18تمامِ امزی چِیزا از طرفِ خُدا اَسته که مو ره دَ وسِیلِه مسیح قد خُو آشتی دَد و خِدمتِ آشتی دَدو ره دَز مو سِپُرد، 19یعنی خُدا دَ مسیح بُود که مردُمِ دُنیا ره قد خُو آشتی مِیدَد. اُو خطا های ازوا ره دَ حِسابِ ازوا نَوُرد و پَیغامِ آشتی دَدو ره دَز مو سِپُرد. 20پس مو از طرفِ مسیح توره مُوگی، بطَوری که خُدا از طرِیقِ ازمو درخاست مُونه. پس مو از طرفِ مسیح از شُمو خاهِش مُونی که قد خُدا آشتی کُنِید. 21چُون خُدا کسی ره که هیچ گُناه ره نَمِیشنَخت، بخاطرِ ازمو قُربانی گُناه#لاویا ۴‏:۳. جور کد تاکه مو دَ وسِیلِه ازُو، مردُمای عادِلِ جور شُنی.

Currently Selected:

دوّمِ قُرِنتیا 5: HAZ

Highlight

Copy

Compare

Want to have your highlights saved across all your devices? Sign up or sign in

Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:

Scripture taken from Hazaragi Bible.

Learn More About Hazaragi Bible