Rom 9
9
Nanonidi Israel
1Rei vevese ka tutu'ani, eigna rei noa nanoni Kraes, eume rei theome phiapita. Ni Tharunga te Blahi te funei fruniza gaoghathogu rei ie, lepo faheta ka gnagnafagu rei gnadi goeghoze nate eira rei re tutu'ani lui teuwe. 2-3Igne te lepoza rei ie. Rei tahu lui gaoghathogu ie, ni eulanauwa di'agnagnafagu koba gnadi mae Jiure, mae ihei te tufuni mae kheragu ni tufuni vikegu teure theome fatutu'aniza Jisas. Rei ngagughauza God te mala faparaghau ni atha fajiflaghau ka Kraes, eu te puhi teugne tangomana te toghora mae Jiure te mala fatutu'aniza Jisas ie. 4God neke fafatera nanonidi Israel re mala jateula thugna nekeuwa, euwateuwe hatimare eulanauwa neke kofiza noa noilaghi bi'o magne ie. God neke eira chuku na'alepo baludi hatimare, ni gulao harira u noa vetula mae Moses re. Magne eulanauwa fagriura tufuni puhi te mala tufru soruza ie, ni magne neke ei chuku na'alepo harira. 5Hatimare neke jifla mei ka vikedi mae bi'odi Jiu te ulu tifa re, ni Kraes eulanauwa neke kahra mei nanoni ka vikedi hatimare. Euwateuwe, magne lana mae funei bi'o ke kliadi nanoni te hui re, mae ihei tati te mala kilo uluza tifa e tifa. Amen.
6Meubame chuku mae Jiure theome fatutu'aniza Jisas Kraes, noa na'alepo God hariza mae Ebraham, mae Aesak, ni mae Jekop teure theome sapla. Eigna theome nanoni te huidi Israel re te tufuni noa nanoni God ie. 7Tutu'ani, theome nanoni te hui te kafua kahra mei ka vikegna mae Ebraham re te tufuni thugna God re. Ni ka i'ini te blahi ie God neke lepo eu'ani, “Vike teke na'alepo rei ka ghoe ra kaina jifla mei ka vikegna mae Aesak.”#9:7 Fufunu 21:12. 8Igne gaoghathogna ie, theome nanoni te hui te kahra mei ka vikegna mae Ebraham re te thugna God ie, ni ihei te kahra mei leghuza noa na'alepo God ie lana te tufuni thugna Ebraham re. 9Euwateuwe noa na'alepo God gne neke lepo eu'ani, “Ka naga'e gignoa igne ka finogha te mei ae, rei kaina ke pulo mei ka ghoe, euwateuwe Sera gne kaina au kahe thugna ma'ane.”#9:9 Fufunu 18:10,14.
10Ni theome teuwae lana euwa, eigna Rebeka gne eulanauwa neke kahra phalu thugna ma'ane praki ka mae ku'eda Aesak. 11Ni God ngaguza te leghuza noa gaoghatho thaigna ie, ne fafateza kahe mae ka phalumare. Ka teke theome kahrana teke au phalumare ni theome eiza na phalumare kahe puhi te keli ba te di'a. 12God neke lepo eu'ani ka Rebeka, “Thumu ma'ane ghoe te kulu kahra ie mala loku hariza mae thumu ma'ane ghoe te kahra ke leghu ie.”#9:12 Fufunu 25:23. 13Jateula te lepo eu'ani ka i'ini te blahi ia, “Rei nahmaza mae Jekop, ni rei theome ngagughauza mae Iso.”#9:13 Malakae 1:2,3.
14Hna kaina te lepoza tati ie? Ihna, God gne eiza puhi te theome kohlo ie? The'o lui! 15Eigna God neke lepo eu'ani ka mae Moses,
“Rei kaina kokhoniza ihei te ngagughau kokhoniza ie,
ni eulanauwa rei kaina toghoza ihei te ngagughau toghoza ie.”#9:15 Eksodas 33:19.
16Eume kate fafateza God nanoni ie, magne fafate leghuza noa kokhoni thaigna ie. Magne theome lehleghu ka hna te ngagura nanonire ba hna te fariuriu mala eira hatimare re. 17Eigna ka u i'ini te blahi ie, God neke lepo eu'ani ka mae Fero, “Rei fafategho ghoe mala Nafano, eigna ka ghoe rei kaina te falalase nogu noilaghi ie mala laseghau rei nanoni te hui ka nauthoglu gne.”#9:17 Eksodas 9:16. 18Eume te laseza tati ie, kate ngaguza God kokhoniza ihei ie, God kaina kokhoniza magne, euwateuwe kate ngaguza God faphaupatuza ihei ie, God kaina faphaupatuza magne.
Di'atagna ni noa nahma God
19Jame kahe mae ghuhna eu'ani ka rei, “Teu te au tuagno, ne fahneuwa te fate faleme ra God nanoni te ei nakhibo re? Eigna kate tapla fasapla nanoni ka nakhibo ie, hatimare eira lana hna te ngaguza God ie.” 20Ni nogu ho'ilepo rei ie, “Ghoe iheiuwa te mala ho'ilepo ka God ie?” Ghoe nanoni lana! Ni gaoghathogu rei ie, thapera teke e'ei hatimare ka glose gne theome tangomana teke lepo eu'ani fapulo ka mae ihei teke e'eigna ie, “Ne fahneuwa ghoe teke e'eighau rei gnea?”#9:20 Aesaea 29:16; 45:9. 21Mae ihei te e'ei thapera ie, magne e'ei leghuza gaoghathogna thaigna ie. Magne tangomana te e'ei phalu nafnata thapera ka kahe naphuki glose, kahe thapera ie mala naga'e te ulu, ni keha thapera ie malagna leuleghu naga'e.
22Hna te eiza God ie jateula igne eulana. Magne tangomana te fatakleza noa di'atagna ie mala laseza nanonire noa noilaghi ie. Ni magne loku famaku di'atagna ie harira nanoni te thokadi magne mala choghara re. 23Euwateuwe, magne eulanauwa ngaguza te falalase noa nadulu te bi'o ka nanoni te kokhoni noara magne re. Magne la fafatera hui nanoni ire mala atha u nadulu te bi'o teugne ka magne. 24Ni tati lana nanoni teke kiloghita God te mala atha noa nahma bi'o magne ie. God neke kilora mae te theome Jiu ni eulanauwa kilora mae te Jiu. 25Jateula God te lepo eu'ani ka noa buka mae profet Hosea ia,
“Nanoni teke theome nogu rei re, rei kaina kilora nogu nanoni.
Nanoni teke theome nahmara rei re, rei kaina nahmara lui.”#9:25 Hosea 2:23.
26Ni “ka nau teke lepo eu'ani rei,
‘Ghotolu theome nogu nanoni rei’ teuwe,
Rei kaina ke lepo eu'ani tadi,
‘Ghotolu thugu rei, God mae te kahra te tifa’.”#9:26 Hosea 1:10.
27Mae Aesaea ne aku eu'ani gnadi nanonidi Israelre,
“Neubane fua chuku lui nanonidi Israelre jateula nusu ka graeraghe neuwa,
God kaina fakahrira lana keha nanoni ka hatimare.
28Eigna theome raugha,
God kaina fapaapara ra fatheve nanoni te au ka nauthoglu igne.”#9:28 Aesaea 10:22,23.
29Ni Aesaea ne lepo eu'ani gna igne,
“Jame theome sakreghita Lod mae te tufuni noilaghi ie
mala au keha nanoni ka noda vikere meuwe,
tati jame the'o hui jateula phalu gruru bi'o Sodom ni Gomora euwa.”#9:29 Aesaea 1:9.
Grorogo te keli maladi mae Israel
30Igne hna te lepoza gheati ie. Neuba nanoni te theome Jiu teke theome fariuriu mala kohlo ka nathagna God kate leghuza vetula ie, hatimare la kohlo hui aulana ka nathagna God, eigna hatimare ne fatutu'aniza Jisas. 31Ni nanonidi Israel, teke fariuriu leghuza noa vetula mae Moses mala kohlo ka nathagna God teure, hatimare theome kohlo lana ka nathagna God ie. 32Ne fahneuwa ne theome kohloni hatimare? Eigna hatimare ne fariuriu mala kohlo ka nathagna God kate leghuza vetula ie, ni theome leghuza puhi fatutu'ani ie. “Hatimare ne tututei ka thina te lase fa'uthu ra nanonire”. 33Eigna God neke lepo eu'ani ka i'ini te blahi ie,
“Ghotolu farogo,
rei kaina nana'a kahe nanoni Zaeon jateula kahe thina mala fatututei
ni fa'uthu ra eu nanonire.
Ni ihei te fatutu'aniza magne ie,
kaina theome tangomana te mamaza ie.”#9:33 Aesaea 8:14; 28:16.
© 2025 SIL Solomon Islands