Rom 8
8
Nakahra ka Tharunga te Blahi
1Gignoa igne tati la kaheni hui balugna Jisas Kraes mala theome fate falemeghita God. 2Ni eigna te kaheni tati balugna Jisas Kraes ie, noa puhi te keli Tharunga te Blahi ie gumei harighita nakahra te tutu'ani. Euwateuwe, magne ne fasaglighita ka puhi nakhibo te tangomana falemeghita ie. 3U vetula ie the'o noa noilaghi te mala atha koko nakhibo ie, eigna tati theome tangomana te leghuza vetula ie. Ni God neke fakahrighita ka teke kuri meiza magne tufuni mae Thugna ie mala jateula tati nanoni nekeuwa, ni magne the'o nakhibogna. Magne kuri meiza mala jateula kahe faafara eu mala atha koko nakhiboda tati re. Ka puhi igne God neke fatera nakhiboda tati nanonire. 4God neke eiza igne, mala horoghoto ka tati hna te kohlo ka vetula ie. Eigna tati tangomana te leghuza puhigna Tharunga te Blahi ie, mala theome leghuza tati puhi di'a te au ka thonoda re.
5Ihei te leghuza puhi te di'a te au ka thonodire, hatimare ghathora lana puhi te di'are. Ni ihei te leghuza Tharunga te Blahi ie, gaoghathodire heta ka hna te ngaguza Tharunga te Blahi ie. 6Tutu'ani, jame kahe mae sakreza gaoghathogna te di'a ie mala batuza, magne kaina leme ka puhi teugne. Ni jame sakreza magne Tharunga te Blahi ie te mala batuza ie, magne kaina atha nakahra ni keliphari eu tagna. 7Eigna mae te ghathoza lui puhi te di'a ie, magne noa naoka God. Magne theome tangomana te leghuza noa vetula God ie, eigna tufuni ninigrana hariza lui magne. 8Euwateuwe, ihei te leghura puhidi te di'are, God kaina theome keli tagna ka hatimare.
9Eume gignoa igne ie, ghotolu theome mala leghura puhimi thaimi te di'are. The'o! Ghotolu mala leghuza Tharunga te Blahi ie, eigna Tharungagna God ie au hui ke hnuami ghotolu. Ni jame kahe mae the'o Tharungagna God tagna ie, magne theome noa Kraes. 10Thonomi ghotolu re kaina leme, eigna ghotolu nakhibo. Ni eigna Kraes te au ke hnuami ghotolu ie, magne la fakohlighamu hui ghotolu ka nathagna God. Eume, Tharunga te Blahi ie kaina gu'ari tami u tufuni nakahra ie. 11God neke fakahra fapuloza Jisas Kraes ka u gleme. Euwateuwe, eigna te au Tharungagna God ke hnuami ghotolu ie, God kaina eulanauwa gu'ari nakahra ie ka thonomi te leme re. Magne eiza igne ka Tharunga te Blahi te au ke hnuami ghotolure.
12Eume kheragura, tati mala leghuza Tharungagna God ie, tati theome mala leghuza puhi te di'a ka nakahradare. 13Te leghuza ghotolu puhi te di'a ie, ghotolu kaina leme. Ni te leghuza ghotolu noa puhi Tharunga te Blahi, ni theome ke eira puhi te di'a te eira ka thonomire teuwe, ghotolu kaina athiza tufuni nakahra ie.
14Tutu'ani lui, ihei te sakreza Tharungagna God te batura re, hatimare thugna God. 15Tharunga te Blahi teke gu'ari God ka ghotolu igne, theome mala haru famakughamu ghotolu ka nahmau, jateula teke au ghotolu ka nahmau tifa ia euwa. The'o. Ni magne toghoghamu ghotolu mala thugna God. Eume, ka noa noilaghi Tharunga te Blahi ie, tati tangomana te lepo eu'ani ka God, “Maghe, Maghe.” 16Tharunga te Blahi ie te lepo ka tharungada tatire te tati thugna God teuwe. 17Eigna te thugna God tati ie, tati kaina athiza fablahi te malada tati tekeu magne re. U fablahi ire mae tighada Kraes la atha hui. Euwateuwe, eigna te au paapara tati jateula Kraes teke au paapara ie, God kaina eulanauwa athighita haghe mala au balugna Kraes ka noa noilaghi te tufuni bi'o ie.
U nakahra te fua ulu kaina mei au
18Rei tufuni laseza igne, kate ghatho laoza tati u nakahra te ulu tulao nate gumei God ka tati igne, puhi te paraghita gignoa igne ire the'o nafudi lana. 19Goifata fate'o teke vuavuha God ire tuku au lana mala dufiza naga'e nate falalase God ihei te tufuni thugna thaigna re. 20Euwateuwe, gignoa igne goifata fate'o teke vuavuha God re ne di'a. Igne gaoghathogna ie theome goifata ire te ngagura mala eu'ani teuwe. The'o! Ni leghuza noa gaoghatho God. God la kulu au noa groghe hui, 21te kahe naga'e magne kaina eira goifata fate'o ka nauthoglu gne mala sagla ka noilaghi te choghara re. Euwateuwe, goifata fate'o ire kaina athiza u nakahra te keli i klia, jateulanauwa tati thugna God re kaina te athira re.
22Tati laseza funu tifa te ghile dufu gignoa igne, goifata fate'o teke vuavuha God re ne aku fabi'o, eigna ne parara lui, jateula ga'ase te thatai fakahra sua ia euwa. 23Ni theome goifata teure lana te tahngi ie euwa. Tati ba eulanauwa, tati ihei God teke gumei Tharunga te Blahi jateula noa nahma teu harighita ie, tahngi fabi'o ke hnuada balu khata. Eigna tati tukiza fatheve God mala fasaglira thonodare ni gumei harighita u thono valu, mala tangomana tati te tufuni thugna magne ie. 24God la fakahrighita hui, eume tati tukira goifata te keli teke na'alepo malada tati tekeu magne re. Ni jame athira hui tati hna te tukira te au tati re meuwe, tati jame theome tangomana teke tukuni ie. Eigna theome tangomana kahe nanoni teke mala tukuzani hna goifata tela athira hui re. 25Ni neubane theome kofiza tati goifata te ronuza te au ie, tati tuku fatheve au lana ghile dufiza naga'e te mala athiza hna te tukiza te au tati ie.
26Eulanauwa, Tharunga te Blahi ie neke toghoghita, eigna tati theome hneta. Tati theome tufuni laseza puhi tharai ie, ni Tharunga te Blahi thaigna te tarai heta ka God eida tati ka natahngi te theome tangomana tati te ruarutha gaoghathogna ie. 27Ni God mae ihei te lasera gobigna nakahra te au ke hnuadare, magne laseza gnagnafagna Tharunga te Blahi ie. Eigna Tharunga te Blahi ie tarai ra noa nanoni God re ka tufuni puhi te ngaguza God ie.
28Ni te laseza tati ie, ka gobigna nakahra te dufighita tati nanoni te nahmaza God re, God kaina eira chuku puhi te keli ka nakahrada re. Magne eiza igne harira nanoni teke fafate thaigna re leghuza noa gaoghatho ie. 29Eume, nanoni teke fafate God tifa re, magne eulanauwa ngaguza mala mei jateula mae Thugna ie, Jisas Kraes. Ka puhi igne, Jisas Kraes tangomana te jateula mae teke kulu kahra eu ka hatimare mae tabusigna te goro thugna God re. 30Euwateuwe, nanoni God te ngagura mala jateula mae thugna teure, magne eulanauwa neke fafatera hatimare, ni toghora mala kohlo ka nathagna thaigna ie, nime gulao harira nakahragna Jisas te the'o ka huigna ie.
Noa nahma God ka Jisas Kraes
31Eume, kaina fahneuwa eu tati lepora puhi ire? Tutu'ani, te phileghita tati God ie, the'o kahe nanoni te tangomana tapla sorughita ie. 32God neke theome lothiza tufuni Thugna ie, ni magne sakreza mala leme eida tati fate'o. Eume, magne kaina gumei harighita kohlo lana gobigna goifata te ngagughita tati te mala au balugna Kraes re. 33Euwateuwe, ihei te tangomana lepo faparighita tati noa nanoni teke fafate God re? The'o kahe nanoni! Eigna God thaigna lana teke lepoza te tati nanoni kohlo teuwe. 34Te euwe, the'o kahe nanoni te tangomana fateghita tati ie, ni lepoza ne sapla tati teuwe. Eigna Jisas Kraes mae ihei teke leme ie kela kegra fapulo, ni magne gignoa igne la au hui ka khame matugna God, euwateuwe magne tarai heta mala toghoghita tati. 35Hna puhi te tangomana athi fajiflaghita tati ka noa nahma Kraes ie? Jame dufighita puhi bi'o, ba nakahra te ninigrana, ba au paapara, ba grofo, ba te au susuanogho, ba jame hatimare fa'ei'eighita, ba falemeghita, ihna, puhi ire tangomana te athi fajiflaghita tati ka noa nahma Kraes ie? The'o! 36Te lepoza ka u i'ini te blahi ie, puhi ire tangomana te dufighita tati, ne lepo eu'ani,
“Eigna gheati nou ghoe,
nanonire ngagura te falemeghami gheati leuleghu naga'e.
Te ghathoza hatimare ie, gheati gne jateula sipsip
te mala faleleme ra eulana.”#8:36 Sam 44:22.
37Ni tati theome mala ghogro ka puhi ire euwa. Eigna Kraes mae ihei te nahmaghita ie toghoghita au mala tapla sorura tati puhi ire leuleghu naga'e! 38Uve, rei fatutu'aniza lui igne, eigna theome tangomana kahe goifata te atha fajiflaghita tati ka noa nahma God ie. Meuba tati me kahra ba leme, meuba mae thotoghei engjel ba thotoghei na'itu, meuba goifata te mei gignoa igne re ba nate mei kaina re, 39meuba noilaghi ka manga klia ba ka glose pari igne, ba kahe goifata teke vuavuha God re, theome tangomana te athi fajiflaghita tati ka noa nahma God teke fatakle harighita Jisas Kraes noda Lod ie.
© 2025 SIL Solomon Islands