Rom 10
10
1Kheragura ka khilo'au, rei tufuni ngagughauza lui God te mala fakahrira nanonidi Jiu te hui re!. Igne nogu tharai rei harira hatimare ie!. 2Rei lasera te hatimare tufuni ngagura lui te leghuza God ie, ni hatimare theome tufuni lase fakeliza puhi te kohlo te mala leghuza magne ie euwa. 3Hatimare theome kofu falaseza puhigna God te mala toghora nanonire te kohlo ka nathagna magne ie. Hatimare fariuriu eira lana hna te ngagura thaidi re, ni theome sakreza God mala toghora ka puhi te mala au kohlo ka nathagna magne ie. 4Ni Kraes la mei loku fahuiza hui noa vetula God ie, jateula kahe nabrau te mala dufiza u tufuni nakahra ie. Euwateuwe, ihei te fatutu'aniza Jisas ie, God kaina toghora mala nanoni kohlo hatimare.
U nakahra ie malada tati hui
5Mae Moses neke i'ini neigna u vetula te mala toghora nanonire mala au kohlo ka nathagna God ie. Magne neke lepo eu'ani, “Ihei te leghura puhi fate'o te lepora ka vetulare kaina au kohlo ka nathagna God ni magne kaina au fatheve, tifa e tifa.”#10:5 Levitikas 18:5. 6Ni igne hna te lepoza ka u i'ini te blahi te mala kohlo ka nathagna God ka puhi fatutu'ani ie euwa, “Tovi lepo eu'ani ka gnagnafamu ie, ‘Ihei nate haghe klia ie?’ Gaoghathogna ie, ‘Mae ihei nate haghe klia te mala udi soruza Kraes ie?’#10:6 Diutronomi 30:12. 7Eulanauwa, tovi lepo eu'ani, ‘Ihei nate soru ka naudi mae teke leme re?’ Gaoghathogna ie, ‘Ihei nate soru te mala athiza Kraes mala ke kegra fapulo ie?’ ”#10:7 Diutronomi 30:13. 8Ni igne hna te lepoza ka i'ini te blahi ie, “Goeghoze gna God ie la ari dufu hui ka ghoe. U goeghoze#10:8 Diutronomi 30:14. igne la au hui ka naflomu ni gnagnafamu teu ghoe re.” Igne u fagriu gna fatutu'ani te thuturiza koba tati ie. 9Jame me lepo eu'ani ghoe ke uludi nanoni te huire, “Jisas gne mae funei!” Euwateuwe, te tufuni fatutu'ani ghoe ka gnagnafamu ie, te God ne fakegra fapuloza magne ka u gleme teuwe, magne kaina fakahrigho ghoe. 10Eigna te fatutu'ani tati ka gnagnafada ie, God kaina toghoghita tati mala au kohlo ka nathagna thaigna. Euwateuwe, te lepo fatakleza tati noda fatutu'ani ie, God kaina ie fakahrighita. 11Eigna i'ini te blahi ie lepo eu'ani gna igne, “Ihei te fatutu'aniza magne ie, magne kaina theome maamaza.”#10:11 Aesaea 28:16. 12Eigna mae Jiure theome hno'i ka mae te theome Jiure. Tati te hui ie kahe noda Lod lana, magne tangomana te gulao goifata te keli ka ihei te tore ka magne te mala toghora re. 13Te lepoza ka i'ini te blahi ie, “Ihei te tore ka Lod mala toghora re, magne kaina fakahrira.”#10:13 Joel 2:32.
14Ni fahneuwa me tore hatimare ka Lod euwa, te theome fatutu'aniza hatimare magne ie? Ni fahneuwa me fatutu'aniza hatimare magne euwa, te theome kulu rogiza hatimare kahe thuturigna magne ie? Ni fahneuwa me rogiza hatimare u thuturi gna magne ie, te the'o kahe nanoni te thuturi harira u Grorogo te Keli ie? 15Ni fahneuwa me thuturiza ihei u Grorogo te Keli ie euwa, te theome kuriza God kahe nanoni te mala thuturi fajiflaza ie? Jateula te i'iniza hatimare ka buka blahi ie, “Tufuni puhi keli lui te mei nanonire te mala thuturiza u Grorogo te Keli ie!”#10:15 Aesaea 52:7.
16Ni theome nanoni te huidi Israelre te fatutu'aniza u Grorogo te Keli gne. Jateula teke lepoza mae profet Aesaea tifa ka i'ini te blahi ia, “Lod, theome chuku nanoni lana te fatutu'anira hna te lepora gheatire.”#10:16 Aesaea 53:1. 17Eume, nanonire tangomana te fatutu'ani kate rogiza u Grorogo te Keli ie, euwateuwe hatimare tangomana te rogiza Grorogo te Keli ie kate thuturiza ihei gna Kraes ie. 18Ni rei na ghuhna eu'ani ka ghotolu, “Ihna, nanonidi Israelre theome rogiza au lana Grorogo te Keli ie gnea?” The'o, hatimare la rogiza hui, jateula te lepoza ka i'ini te blahi ie ia euwa,
“Nodi goeghozere la jifla tei hui ka nanoni te hui ka nauthoglu gne,
ni eulanauwa dulu la roghoragha ka nau hia te hia ka nauthoglu gne.”#10:18 Sam 19:4.
19Ni rei nake fapalu ghuhnani, “Ihna, nanonidi Israelre theome lase fakeliza au lana Grorogo te Keli ie gnea?” The'o, hatimare rogira hui ni theome fatutu'ani euwa. Mae Moses neke lepo eu'ani goeghozegna God ie,
“Rei kaina toghoghamu ghotolu mala gogotura ihei te the'o kahe nodi nau re.
Ni rei kaina toghoghamu ghotolu mala di'atamira ghotolu nanoni te theome laseza kahe goifata ie.”#10:19 Diutronomi 32:21.
20Mae Aesaea tufuni frane lui ne lepo eu'ani goeghozegna God ie,
“Ihei teke theome hiroghau rei re, hatimare kaina kofu deighau rei.
Rei ne falalaseghau thaigu ka ihei te theome ghuhnaghau rei te mala toghora re.”#10:20 Aesaea 65:1.
21Ni gnadi nanonidi Israelre, God ne lepo eu'ani,
“Leuleghu naga'e ie rei kilora ihei te huhughu ni ihei te patugama re,
eigna rei ngagughaura hatimare mala ke pulo mei ka rei.”#10:21 Aesaea 65:2.
© 2025 SIL Solomon Islands