Rom 7
7
Kahe thotoghale gna thoilaghi
1Kheragura, ghotolu kaina laseza hna te lepoza rei tami ie, eigna ghotolu tufuni laseza hui noa vetula mae Moses ia. Kate kahra te au lana nanoni ie, te au noa noilaghi vetula ie ke kliagna magne ie. 2Jame kahe ga'ase toilaghi ni khetogna ie kahra me au lana teuwe, u vetula gna thoilaghi ie soliza gne'e ka khetogna ie. Ni jame me leme mae ma'ane ie, ga'ase gne sagla hui ka vetulagna thoilaghi ie. 3Ni jame ga'ase toilaghi gne tei thuru balugna kahe ma'ane maghani kate kahra te au lana khetogna ie, gne'e huhughuza vetula gna thoilaghi ie, ni gne'e khale ka toilaghi pedo. Ni jame leme khetogna ie, ga'ase teugne sagla ka vetula gna thoilaghi ie, neubane tei toilaghi gne'e ka kahe ma'ane maghani, gne'e theome huhughuza u vetula ie.
4Eume kheragura, eigna Kraes teke leme ka gazu fafata ie, noa vetula mae Moses ie the'o kahe noa noilaghi ke kliada. Tati sagla ka vetula teuwae jateula kahe ga'ase thoilaghi te sagla ka vetula gna thoilaghi ie ia euwa. Eume gignoa igne, tati kaheni ka Kraes mae teke kegra fapulo ka gleme ie, mala tangomana tati te hui te loku fakeli hariza God ie. 5Ni ka teke leghura te au lana tati puhida thaida te di'a tifa re, tati neke tufuni ngagughita lui te leghuza hna te blahi teu ka u vetula ie. Eume tati eira lana puhi te di'a te mala falemeghita thaidare. 6Tifa ie, u vetula gne neke loku famakughita lui tati, ni gignoa igne tati la sagla ka vetula ie, eigna ka gleme gna Kraes tifa ie, tati eulanauwa leme balugna magne. Euwateuwe, gignoa igne ie tati tangomana te loku hariza magne ka puhi valu, eigna tati leghuza Tharunga te Blahi ie, theome leghuza puhi te i'iniza mae Moses ka vetula ie.
Vetula ni nakhibo
7Ihna, igne gaoghathogna ie u vetula gne theome kohlo? The'o lui! Eigna vetula gne te falalaseghau rei te rei ne leghuza puhi te di'a ie teuwe. Jame theome lepo eu'ani vetula ie, “Tovi maamagnara nodi goifata keha nanonire”#7:7 Eksodas 20:17; Diutronomi 5:21. meuwe, rei jame theome laseza puhi igne ne di'a teuwe. 8Ni nakhibo ie au noa nabrau ka goeghoze te au ka vetula ie ire, ne batughau rei ka nafnata gaoghatho te di'a te mala maamagna ie. Jame the'o vetula ie, u gaoghatho te mala ei nakhibo ie theome au ka rei. 9Tifa ie, neubane theome laseza rei vetula ie, nakahragu rei ie neke keli lui, eigna rei theome laseza nakhibo ie. Ni kate funu laseza rei noa vetula God ie, rei ne kofu falaseza te nakhibo ke hnuagu rei ie fua hneta teuwe. 10Eume rei neke leme ka nakhibo teuwae. Tutu'ani lui, God neke gumei vetula ie mala toghoghau rei mala athiza u kahra ie, ni the'o euwa, vetula ire mala falemeghau lana rei. 11Euwateuwe, nakhibo ie ne kofiza kahe nabrau ka gnagnafagu rei, ne atha keha goeghoze ka vetula ie ne mugnaghau ni falemeghau eu rei. 12Eume, u noa vetula God gne tufuni blahi lui, ni goeghoze te hui ka vetula ie ire eulanauwa blahi, kohlo ni keli euwa.
13Ihna, u vetula te keli igne te falemeghau rei ie? The'o lui! Ni rei neke leme ke ulugna God, eigna rei neke leghuza nabrau te sapla ie. Neubane keli vetula ie, puhigna nakhibo ie ne salo faudu baludi vetula ire te mala kotu bi'o ke hnuagu rei u gaoghatho te mala eiza puhi nakhibo ie. Ka puhi igne, tati kofu falaseza te goeghoze ka vetula ie fatakleza te nakhibo gne tufuni di'a teuwe.
Vetula ie theome tangomana te fakeliza nanoni ie
14Euwateuwe te laseza tati ie, u vetula gne neke mei funugna ka God, ni eigna rei te maegu ka nauthoglu ni nanoni lana teuweme, rei au jateula noa seka eu nakhibo. 15Rei theome lase fakeliza puhigu thaigu ie, eigna rei theome tangomana te eiza hna te ngagughau mala eiza ie. Ni leuleghu fata ie, rei eiza lana hna te theome ngagughau te mala eiza ie. 16Kate eiza rei hna te theome ngagughauza ie, rei huhughuza noa vetula God ie. Ni eigna rei te theome ngagughauza te huhughuza vetula ie, igne falalaseza gaoghathogu rei te vetula ie keli lui teuwe. 17Eume, theome rei thaigu te eiza puhi te di'a igne, ni noa noilaghi nakhibo te au ka gnagnafagu rei ie na euwa. 18Rei laseza te phile rei thaigu ie, rei maegu ka nauthoglu gne lana, the'o kahe puhi te keli te au ke hnuagu rei ie. Eigna meubame au rei gaoghatho te keli ie, rei theome tangomana te eiza puhi te keli ie. 19Euwateuwe, hna te eiza koba rei ie, theome puhi te keli te ngagughauza ie euwa, rei eiza lana hna puhi di'a te theome ngagughau mala eiza ie na. 20Ni eigna te eiza rei hna puhi te theome ngagughau mala eiza ie, rei laseza igne te theome rei thaigu te eiza puhi teugne, ni noa noilaghi nakhibo te au ka gnagnafagu rei gne na te eiza ie.
21Eume, rei laseza puhi te di'a teugne te funei fruniza nakahragu rei ie. Eigna kate ngagughau eiza rei puhi te keli ie, gaoghatho te di'a ie lana te au ka rei ie. 22Ka gnagnafagu ie, rei kelitagu ka noa vetula God ie ni ngagughau te leghuza ie. 23Ni rei kofiza puhi te di'a te loku ka glamagna thonogu ie magra ka noa vetula God te au ka gnagnafagu rei ie. U puhi te di'a te au ka thonogu rei ie te huhurughau rei mala eiza puhi te di'a ie. 24Tutu'ani lui, rei gne theome hneahnegha, eigna rei la tufuni di'a lui! Ihei nate toghoghau te mala sagla rei ka puhi te di'a te au ka thonogu te batughau ka gleme teu gnea? 25Tati mala lepo fakeliza God, eigna magne kaina eiza igne ka noa gloku Jisas Kraes noda Lod!
Eume, rei thaigu ie jateula igne euwa. Ka gaoghathogu ie, rei tufuni ngagughau te mala noa mae gloku noa vetula God ie. Ni eigna rei te nanonigna lana nauthoglu gne me, rei leghuza lana puhigna nakhibo te au ke hnuagu ie euwa.
© 2025 SIL Solomon Islands