Rom 6
6
Leme ka nakhibo ni kahra ka Kraes
1Eume, fahneuwa eu tati te lepoza mala kohlo ka nathagna God ie? Tati kaina au fatheve au lana ka puhi nakhibo mala ke bi'o laoni eu noa kokofakasa God ie harighita? 2The'o lui! Tati la leme hui ka nakhibo, eume ne fahneuwa tati te au fatheve te au lana ka nafnata puhi ignea? 3Ghotolu jame la laseza hui te tati te hui ie la kafua siublahi ni kaheni balugna Kraes. Kate eiza tati igne, tati eulanauwa kaheni balugna magne ka u glemegna ie. 4Kate siublahi tati ie, tati jateula te leme ni giugilu eu hui balugna magne. Eume ka puhi igne, tati eulanauwa tangomana te kahra fapulo jateula Kraes mala au nakahra valu, eigna God Mada neke fakegra fapuloza magne ka noa noilaghi te bi'o ie.
5Eigna tati tela kaheni hui balugna Kraes ka gleme gna ie, God kaina eulanauwa fakegra fapulo ghita jateula magne te fakegra fapuloza Kraes ia euwa. 6Tati laseza igne, nakahrada tifa ie tati jateula te tupijuru eu hui balugna Kraes ka gazu fafata, mala tangomana God te re'oza noa noilaghi nakhibo teke au ka nakahrada tifa re. Ka puhi igne, nakhibo ie the'o kahe noa noilaghi te mala funei frunighita ie. 7Eigna ke leghugna te leme ie, nanonire sagla ka noa noilaghi nakhibo.
8Eume, te leme hui tati balugna Kraes ie, tati fatutu'aniza te tati eulanauwa kaina kahra balugna magne. 9Tutu'ani lui, tati laseza Kraes kela kahra fapulo hui. Eume, tati tufuni laseza magne theome tangomana te mala ke leme fapalu fatani ie, eigna gleme gne the'o kahe noa noilaghi te mala funei fruniza magne ie. 10Ka glemegna ie, magne ne fahuiza noa noilaghi nakhibo ie, me gignoa igne magne au ka nakahra, u nakahra te kaheni balugna God, tifa e tifa.
11Eume jateula teuwae eu ghotolu mala ghathoza te ghotolu la leme hui ni tei kokoza eu puhi nakhibogne. Ni eigna tela kaheni hui ghotolu balugna Jisas Kraes ie, nakhibo ie the'o kahe noa noilaghi ke kliami ghotolu, eume ghotolu tangomana te au ka nakahra balugna God. 12Eume, tovi sakreza nakhibo ie mala funei frunira thonomi ghotolu te tangomana leme re. Na euni batughamu nakhibo ie me leghura ghotolu puhimi te di'are euwa. 13Euwateuwe, tovi sakreza kahe hnimoto ka thonomire mala eiza puhi te di'are, eigna ghotolu la kegra fapulo hui ka gleme. Sakre laoghamu thaimi ka God na, sakre lao thonomi te hui re ka God mala eira puhi te kohlore. 14U nakhibo ie theome tangomana te mala funei frunighamu ghotolu ie, eigna ghotolu theome au ke parigna noa vetula Moses, ni ghotolu au ke parigna noa kokofakasai God.
Seka gna puhi te kohlo
15Eume, kaina fahneuwa tati tela au ke parigna noa kokofakasai God ni theome au ke parigna noa vetula mae Moses teugne? Ihna, kohlo aulana te ei nakhibo fatheve te'au lana tati ie? The'o lui! 16Ghotolu laseza hui igne, te sakreghamu ghotolu thaimi te mala au ke parigna noa noilaghi kahe mae ie, ghotolu mala tufuni leghuza noa goeghoze magne ie. Eume, jateula teuwae eu nakhibo gne, ne loku hariza na ghotolu nakhibo ie ni, ghotolu noa seka hui nakhibo ni ghotolu kaina leme. Ni te au jateula noa seka God teu ghotolu te mala leghura goeghozegna magne re, God kaina toghoghamu mala au kate kohlo ka nathagna ie. 17Tifa ie ghotolu neke loku hariza hui nakhibo, ni gignoa igne ie ghotolu tufuni leghura goeghoze teke fagriughamu gheati tifa re. Rei lepo fakeliza God gna igne! 18God neke fasaglighamu hui ka noa noilaghi nakhibo, euwateuwe gignoa igne ie ghotolu mala ke mae seka ka mala eiza hna te kohlo ie.
19Rei thuturi ka lepo naba gna “mae seka” te kafua laseza ghotolu ia, eigna gaoghathomi ghotolure theome behra. Tifa ie, ghotolu neke sakre ra thonomi fate'o re mala noa seka puhi te theome kohlo ni nafnata nakahra te di'a lui re. Ni gignoa igne ie, ghotolu ke sakre lao thonomi fate'o re mala noa seka puhi te kohlo ni nakahra te blahi ie euwa. 20Tifa ie, ka teke seka na teke au ghotolu ka nakhibo ie, ghotolu theome ke ghathoza lana te mala eiza puhi te kohlo ie. 21Tutu'ani, ghotolu neke theome athiza kahe goifata te keli ka nakhibo teke eira ghotolure, euwateuwe gignoa igne ie ghotolu la mamaza nomira lui te mala eira puhi teuware. Ni nafnata puhi te di'a teuware mala batu falemera lana nanonire. 22Ni gignoa igne ie God atha fasaglighamu hui ka nakhibo mala noa mae seka thaigna. Eume nakahrami ghotolu re mala blahi, malani athiza nakahra te the'o ka huigna ie. 23Tutu'ani lui! Ihei te tapla fasapla ka nakhibo ie tabagna ie u gleme lana, u gleme te the'o ka huigna. Ni God neke gumei harighita u nakahra te the'o ka huigna ie. Ka nakahra igne, tati kaina kaheni balugna Jisas Kraes noda Lod.
© 2025 SIL Solomon Islands