Rom 5
5
Au kohlo balugna God
1Eigna te fatutu'aniza tati God ie, tati kohlo ka nathagna magne. Tutu'ani, noda Lod Jisas Kraes neke toghoghita mala au tati ka u keliphari balugna God. 2Ka noda fatutu'ani tati ka Jisas, God ne thotora harighita puhi te mala laseza tati u noa kokofakasa ie. Eume tati hneahnegha lui, eigna tati tufuni laseza te tati kaina au balugna God i klia. 3Euwateuwe, tati eulanauwa hneahnegha kate dufighita nakahra te ninigrana ire, eigna tati laseza te puhi teure toghoghita mala kegra heta tati. 4Eume, kate kegra heta fatheve tati ie, God kaina ie eulanauwa hneahnegha ka tati, eigna igne tati au noda grouronu te hneta mala athiza u noa na'alepo magne ie. 5Eume, u grouronu igne theome mala fadi'agnagnafaghita tati. Eigna God neke falalaseghita hui noa nahma ie, ni magne neke kuri meiza noa Tharunga te Blahi ie mala au ke hnuada tati.
6Ka tufuni naga'e teke fafateza God ie, Kraes neke leme mala toghoghita tati nanoni te nakhibo re. Tutu'ani lui, tati the'o noda noilaghi te mala toghoghita thaida ie. 7Tufuni ninigrana hariza lui kahe nanoni te mala leme hariza kahe nanoni te kohlo ie. Jame kahe mae te frane na te tangomana leme hariza kahe mae te keli lui ie. 8Ni neubane au nauwa tati ka nakhibo, God neke fatakle harighita noa nahma bi'o ie kate kuri meiza Kraes te leme harighita ie.
9Tutu'ani, gignoa igne ie u dadaragna Kraes ie la fakohlighita hui mala au kohlo tati ka nathagna God. Eume tati tufuni laseza te Kraes kaina fakahrighita, ni God kaina theome di'atagnaghita ka naga'e te mala fate ra nanonire. 10Tifa ie, tati neke noa naoka God, ni ka glemegna Thugna ie, God ne toghoghita mala kheragna thaigna. Eume gignoa igne tati la kheragna hui God, ni tati tufuni laseza God kaina fakahrighita, eigna Kraes kela kegra fapulo gignoa igne. 11Ni igne lanauwa keha puhi ie; tati hneahnegha eigna noda Lod Jisas Kraes gne neke toghoghita mala ke fafaudu fapulo tati balugna God, eume gignoa igne tati au ka keliphari balugna magne.
Mae Adam ni Kraes
12Nakhibo gne mei ka nauthoglu gne leghuza hna puhi di'a teke eiza mae Adam ie. Ni nakhibo gne athi meiza gleme. Eigna teugne nanoni te hui re mala leme, eigna tati te hui ie kafua au ka nakhibo.
13Ame gulao na God u vetula ie ka mae Moses teuwe, nanonigna nauthoglugne neke kulu au hui ka puhi nakhibo. Ni ka teke the'o na teke au vetula ie, God neke theome ghathora nakhibodi nanonire. 14Ni funu ka naga'e gna mae Adam te dufu ka naga'e gna mae Moses ie, nanoni te hui re mala leme lana, neubane theome eiza kahe nasapla jateula mae Adam te huhughuza goeghozegna God ie. Mae Adam gne jateula thotoghalegna Jisas, mae ihei teke mei ke leghugna magne ie.
15Ni phalumare theome nanaba, eigna nakhibogna mae Adam ie theome jateula kokofakasa teke gumei God ka tati gne euwa. Meuba chuku nanoni ne leme ka nakhibo gna mae Adam, tutu'ani lui chuku nanonire athiza u tufuni kahra te the'o ka huigna ie, eigna noa kokofakasa lana kahe mae i Jisas Kraes. Eigna noa nahma ni kokofakasa teu God re puhi bi'o lui, liuza nakhibogna mae Adam ie. 16Ni puhi te jifla mei ka nakhibogna mae Adam ie theome nanaba ka hna te jifla mei ka noa kokofakasa God ie. Ka naga'e teke tapla fasapla mae Adam ka nakhibo ie, God neke fateza magne ne lepo eu'ani, “Ghoe sapla tutu'ani.” Ni ke leghu kate eira nanonire chuku nakhibo ie, God ne fatakleza noa nahma bi'o ie, ne gulao harira u kokofakasa ie ne lepo eu'ani, “Ghotolu kohlo au lana.” 17Meuba nanoni te hui re ne thokadi te mala leme ka nakhibogna mae Adam gne, hna te eiza God ka noa gloku mae Jisas Kraes ie, tufuni bi'o lui. Tutu'ani, God mae ihei te nahmara lui nanonire, ni ihei te athiza noa nahma ie, magne kaina toghora mala kohlo hatimare ka nathagna thaigna. Nanoni ire athiza u tufuni kahra te jifla mei ka Jisas Kraes mala funei balugna klia, tifa e tifa.
18Euwateuwe, ka nakhibogna kahe mae lana, God ne fatera nanoni te hui re ni lepora mala au hatimare ka gleme. Ni jateula teuwae, ka noa puhi te kohlo kahe mae, God neke eiza kahe nabrau harira nanoni te hui re, mala kohlo ni athiza u tufuni nakahra te tutu'ani ie. 19Tifa ie mae Adam neke huhughuza goeghozegna God ie. Eigna teuwae, nanoni te hui re ne kafua leghuza magne ne tapla fasapla ka puhi nakhibo. Ke leghu ie, Jisas ne leghuza goeghozegna God ie, ni nanoni te hui te leghuza magne re kaina kafua kohlo ka nathagna God.
20God ne gulao ka mae Moses u vetula mala tufuni kofu falasera nanonire nakhibodi re. Ni kate eira chuku nakhibo nanonire, noa kokofakasa God ie ke bi'o laoni eu harira nanonire. 21Eume, neubane au noa noilaghi nakhibo ie te mala faleme ra nanonire tifa ie, gignoa igne ie noa kokofakasa God ie au noilaghi bi'o te mala au kohlo tati ka nathagna thaigna ie, ni mala athiza u nakahra te the'o ka huigna ie ka noa gloku noda Lod Jisas Kraes.
© 2025 SIL Solomon Islands