Rom 4
4
Noa fatutu'ani mae Ebraham
1Na hna eu tati te lepoza ie gna nakahragna mae ku'eda Ebraham ie? 2Meuni mae Ebraham gne kohlo ka nathagna God ka noa gloku te keli teke eira magne re meuwe, magne jame thokagna te mala thuturi fahaehagheza thaigna ie. Ni the'o euwa, magne theome fahaehagheza thaigna ka nathagna God ie. 3Eigna ka i'ini te blahi ie lepo eu'ani, “Mae Ebraham neke fatutu'aniza God. Eigna igne, God ne lepo eu'ani, ‘Mae Ebraham gne kahe mae kohlo ka nathagu rei.’ ”#4:3 Fufunu 15:6.
4Mae ihei te loku fakelire atha nodi taba, nodi taba hatimare teure theome jateula kahe nahma euwa, ni hatimare atha taba gnadi gloku teke eira re. 5Ni ihei te fatutu'ani ka Jisas ni lehleghu ka magne ni theome lehleghu ka nodi glokure te mala kohlo ka nathagna God ie, God kaina toghora. 6Mae Nafano Devet eulanauwa neke lepoza igne. Magne ne lepo gnadi nanoni te hneahnegha nodi luire, eigna hatimare fatutu'ani ka Jisas theome eigna te eira hatimare gloku te keli re. 7Mae Nafano Devet ne lepo eu'ani,
“Nanoni te atha koko God nasapladi,
ni koko fahui nakhibodire teuwe,
hatimare hneahnegha nodi lui.
8Tutu'ani, mae ihei God te theome ke ghathora nakhibognare,
magne hneahnegha noa lui.”#4:8 Sam 32:1,2.
9Ihna, puhi te mala hneahnegha gne maladi lana mae Jiure gnea? The'o! Maladi lanauwa ihei te theome Jiure. Tati kofiza hui ka i'ini te blahi ie ne lepo eu'ani, “Mae Ebraham neke fatutu'aniza God, eigna teugne God ne kofu falaseza te magne kahe mae kohlo teuwe.” 10Ngiha ie God teke kofu falaseza ne Ebraham gne kahe mae kohlo teuwe? Ame tohifalalase na magne, ba ke leghugna te tohifalalase magne? God neke kofu falaseza kani theome tohifalalase na neke au mae Ebraham. 11Kani theome tohifalalase na te'auwe, mae Ebraham ne fatutu'aniza God me God kofu falaseza te magne kahe mae kohlo teuwe. Ke leghugna igne, mae Ebraham neke atha kahe falalase gna tohifalalase, jateula kahe thotoghalegna te magne kahe mae kohlo teuwe. Eigna igne, mae Ebraham gne kafua ku'edi nanoni te theome tohifalalase ni fatutu'aniza God teure, eigna God kofu lasera hatimare jateula nanoni te kohlo. 12Euwateuwe, mae Ebraham gne ku'eda lanauwa tati mae Jiu te tohifalalase ni fatutu'aniza teu God re, eume noda fatutu'ani tatire jateula noa fatutu'ani magne ame tohifalalasena magne teu ia.
Noa na'alepo God ie maladi ihei te fatutu'ani
13God neke na'alepo ka mae Ebraham ni thugna kaina te mei ke leghugna re, te nauthoglu gne kaina nodi hatimare teuwe. God eiza igne theome eigna te leghuza Ebraham hna te lepoza ka vetula ie, ni eigna te fatutu'aniza magne God ie. Eume God ne kofu falaseza magne jateula kahe mae te kohlo. 14Jame gulao lana God u na'alepo igne ka nanoni te leghuza hna te lepoza ka vetula ie meuwe, gaoghathogna u fatutu'aniza God gne jame the'o nafugna lana. Euwateuwe, na'alepo igne eulanauwa the'o nafugna lana. 15Tutu'ani, noa vetula mae Moses ie ne lepo eu'ani, “God kaina ie parara nanoni te theome leghuza u vetula ie.” Ni jame me the'o kahe vetula ie, nanonire kaina theome huhughuza vetula ie.
16Eume nanonire atha noa na'alepo God gne ka puhi fatutu'ani lana. God eiza na'alepo igne mala horoghoto ka noa kokofakasa ie. U na'alepo igne theome maladi lana nanoni te leghuza noa vetula mae Moses re, ni maladi lanauwa nanoni te hui te fatutu'aniza God jateula Ebraham teure. Eigna magne lana mae ku'eda tati te hui ie. 17Jateula te lepoza ka i'ini te blahi ie, “Rei fafategho ghoe mala ku'edi vike te chuku re.”#4:17 Fufunu 17:5. Eume tati laseza te mae Ebraham gne tufuni ku'eda tati mae te fatutu'aniza God re. Tutu'ani lui, God ie au noilaghi te mala gulao kahra ka ihei tela leme hui re, ni au noilaghi te mala vuavuha goifata te theome vuavuhana te au re.
18Neubane naufa'a lui mae Ebraham ni Sera ne theome thokadi te mala au thudi ie, God ne lepo eu'ani ka mae Ebraham, “Thumu ghoe re kaina fua chuku jateula nathunu ka manga ie are euwa.”#4:18 Fufunu 15:5. Neubane ninigrana igne ka kofu laogna ie, mae Ebraham ne fatutu'aniza fatheve lana goeghozegna God ie. 19Ka naga'e teuwae, Ebraham thatai dufiza kahe gobi finoghagna, ni thonogna ie la glape hui lanauwa theome thokagna te mala au thugna ie. Euwateuwe, Sera gne ba ne fua khaekave hui lanauwa, theome tangomana te au sua ie. Ni neubane laseza mae Ebraham igne, magne theome ke glape noa fatutu'ani ie. 20Kate ghathoza noa na'alepo God ie, magne theome ke ghatho paupalu gna igne, ni noa fatutu'ani magne ie ke bi'oni eulana. Euwateuwe magne lepo fakeliza koba noa noilaghi bi'o God ie. 21Eigna mae Ebraham tufuni laseza te God tangomana eiza hna teke na'alepoza ie. 22Eume, ka noa fatutu'ani mae Ebraham te fua hneta ie, God ne kofiza magne kahe mae te kohlo. 23U goeghoze te, “God kofiza mae Ebraham kahe mae te kohlo teugne,” God theome lepo neigna mae Ebraham lana. 24The'o! Ni eida lanauwa tati nanoni te fatutu'aniza God te au mei ke leghugna magne re. Tati fatutu'aniza te God neke fakegra fapuloza Jisas Kraes ka gleme, eigna igne God kaina kofighita tati jateula nanoni te kohlo euwa. 25God neke sakreza noda Lod Jisas mala leme gnadi nakhibodare, ni ke fakegra fapuloza ka u gleme mala tangomana tati te au kohlo ka nathagna magne ie.
© 2025 SIL Solomon Islands