Rom 3
3
1Ihna? Te mala au jateula nanoni Jiu teugne keli gnea? Ihna? Puhi tohifalalase gne goifata tutua'ni mala fakohlighita tati gnea? 2Uve, chuku puhi te keli te jifla mei ka nanoni Jiure. Puhi te ulu ie, God neke gulao noa goeghozere ka mae ku'eda tati mae Jiure.
3Ni neubanauwa keha nanoni ka hatimare re ne theome leghuza noa goeghoze magne re, God theome ke ghatho ihora noa na'alepore. 4Tutu'ani! Neubane muamugna nanonire, God kaina tutu'ani koba ka hna te lepora magne re, jateula te lepoza ka i'ini te blahi ie euwa,
“Nanonire kaina kofu falaseza te nou goeghoze ghoe re tufuni kohlo,
ni ghoe kaina ulura hatimare fatheve kate athigho hatimare ka fate ie.”#3:4 Sam 51:4.
5Fahneuwa me puhi di'a te eira tati re tufuni fatakle fakeliza puhigna God te kohlo ie? Ihna, tati tangomana lepoza te God gne theome kohlo kate faparaghita tati teuwe? Keha nanonire lepoza igne eigna hatimare leghuza lana gaoghathogna nanoni ie. 6The'o, eigna jame me theome kohlo God ie, fahneuwa eu magne fatera nanoni te hui ka nauthoglu gne? 7Ni jame keha nanonire lepo eu'ani, “Meuni tutu'ani te puhigu rei te muamugna gne fatakle fakeliza noa goeghoze God te tutu'ani ie, ni eira nanonire mala kilo uluza God meuwe, ne fahneuwa God te fateghau rei gnadi nakhibogu rei re?” 8Ne fahneuwa ne theome lepo eu'anini lana tati, “Tati kaina eira lana puhi te di'are, mala takle mei puhi te keli re?” Nafnata goeghoze teure tufuni di'a lui. Ni neubanauwa, keha nanonire lepo fadi'aghau rei ni lepoza ne rei te eira nafnata goeghoze teure teuwe. Eume, God kaina fatera nanoni teure.
The'o kahe nanoni te kohlo ie
9Ihna, tati mae Jiure ke fua kohlodini keha thotoghei nanonire ka nathagna God ie? The'o lui! Rei neke lepoza hui te God kaina fatera nanoni te hui re, eigna tati mae Jiu ni mae te theome Jiu teure, kafua eiza lana puhi nakhibo ie. 10Eigna ka i'ini te blahi ie lepo eu'ani,
“Tutu'ani lui, ka teuwae ie the'o lana kahe nanoni te kohlo ie.
11Ka teuwae ie, the'o kahe nanoni te tufuni laseza God ie,
ba toreza God mala toghoza ie.
12Nanoni te hui te tei kokoza nabrau te kohlo ie ne eira puhi te sapla re.
Tutu'ani, ka teuwae ie the'o kahe nanoni te eiza kahe puhi te keli.”#3:12 Sam 14:1-3; 53:1-3; Eklesiastes 7:20.
13“Hna te lepoza hatimare ie, nanonire tangomana te leme tadi,
eigna hatimare lepo muamugna koba.”#3:13 Sam 5:9.
“Ni goeghozedire jateula pholi te tangomana choghara nanonire euwa.”#3:13 Sam 140:3.
14“Naflodire fodu ka goeghoze te di'a te mala choghara nanonire.”#3:14 Sam 10:7.
15“Hatimare kaikaliti fatheve lana mala faleme nanoni,
16ni ka nau ahia te tei hatimare re,
hatimare choghara ni eulanauwa fapaapara ra nanonire.
17Hatimare theome laseza puhi keliphari ie.”#3:17 Aesaea 59:7,8.
18“Ni eulanauwa theome ghatho boheza God.”#3:18 Sam 36:1.
19Tati laseza hui, nanoni te hui te au ke parigna noa vetula God ie mala leghuza hna te lepoza ka vetula ie. Eume the'o kahe nanoni te tangomana lepoza ne the'o nakhibogna teuwe, ni God kaina fatera nanoni te hui ka nauthoglu gne. 20The'o kahe nanoni te kohlo ka nathagna God ie, eu me leghuza lana magne vetula ie. Eigna vetula ie mala fataklera lana nakhiboda tatire.
Mala au kohlo ka nathagna God
21Ni gignoa igne ie God la kulu falalase hui puhi te mala kohlo tati ka nathagna thaigna ie. Noa vetula mae Moses ni nodi goeghoze mae profetre teure neke lepoza lanau puhi teugne. Ni hatimare theome lepoza te tati kohlo ka nathagna God, kate leghuza noa vetula Moses ie! The'o. 22God fakohlighita tati ka nathagna thaigna kate fatutu'aniza lana tati Jisas Kraes ie. Eume kahe nabrau lana te tangomana God te fakohlighita tati ka nathagna thaigna ie. The'o kahe puhini, eigna the'o kahe nanoni te sapla ka nathagna magne ie, meuba ne mae Jiu ba theome mae Jiu. 23Eigna nanoni te hui ka nauthoglu gne kafua tapla fasapla ka nakhibo. Eume nanoni te hui re kafua au fatifa ka God mae te fua kohlo lui ie. 24Ni ka noa nahma harighita, God ne kuri meiza Jisas Kraes mala fasaglighita ka nakhibodare mala kohlo tati. 25God neke kuri meiza Jisas mala leme jateula kahe faafara nekeuwa. Tutu'ani, dadara ka glemegna ie mala atha kokora nakhibodi nanoni te hui te fatutu'aniza magne re. God eiza igne mala laseza tati hna te eiza magne ie kohlo teuwe. Eigna tifa ie, God sasa'aza ne tuku, ni magne theome ghose parara nanonire gnadi nakhibodire. 26Ni gignoa igne ie God falalase harighita te magne kohlo, eigna magne ne sakreza Jisas mala leme, malani ihei te fatutu'aniza magne ie kohlo ka nathagna thaigna.
27Eume, hna gne te mala lepo fahaehagheza tati ie? The'o lana! Ba, eigna te leghuza tati vetula gne te mala lepo fahaehagheza tati ie? The'o! Tati mala lepo fahaehagheza lana te fatutu'aniza tati Jisas ie. 28Tati laseza hui te God fakohlighita ka nathagna thaigna, eigna tati ne fatutu'ani, theome eigna te leghuza tati noa vetula mae Moses ie. 29Ba, God gne nodi God mae Jiure lana? The'o! God gne eulanauwa nodi God ihei te theome Jiure, 30eigna kahe God lana te auwe. Euwateuwe, magne kaina kafua toghora hui ihei te fatutu'aniza Kraes re, meubame mae Jiu ba theome mae Jiu, mala kohlo ka nathagna magne ie. 31Ihna, eigna tela fatutu'aniza hui tati Jisas gne, tati kaina theome leghuza vetula ie? The'o! Eigna kate fatutu'aniza tati Jisas ie, tati tufuni leghuza gaoghathogna noa vetula mae Moses ie.
© 2025 SIL Solomon Islands