Rom 2
2
God kaina fatera nanonire
1Ghotolu mae ihei te lase fatera nanoni ra, ghotolu theome tangomana te lepoza kahe goifata ie. Eigna kate fatera ghotolu nanonire, ghotolu fateghamu lanauwa thaimi, eigna ghotolu eulanauwa eira puhi te di'a te eira hatimare re. 2Tati laseza God ie tufuni kohlo lui kate fatera nanoni te eira koba nafnata puhi te di'a re. 3Ni ghotolu eira koba lanauwa puhi te fatera keha nanonire! Ba, ghotolu gaoghathomire kaina ne theome fateghamu God fugnea? The'o! God kaina fateghamu lanau ghotolu! 4Ghotolu jame ghatho fapaipariza lana puhigna God ie, gna magne au famuu theome faghose di'atagna ni tuku au lana. Ba, ghotolu theome kofu falaseza lana God ie au famuu lui, eigna magne ngagughamu ghotolu te ho'ignagnafa ie gnea?
5Ni meubame au famuu God, ghotolu phaupatu lui me theome ngagughamu ho'ignagnafa ie euwa. Eume, u fate ie kaina bi'o lui ke kliami ghotolu. Fate igne kaina dufu mei ka ghotolu ka naga'e God nate falalase di'atagna ie, ni puhigna te kohlo mala fatera nanoni te hui re. 6Eigna God kaina kafua tabara ba fatera nanonire leghura hna teke eira hatimare re.#2:6 Sam 62:12; Provebs 24:12. 7Ihei te eira koba gloku te keli ni ngagura God te broabronara nahngadire, ni ghatho bohera, ni toghora mala theome fei leme teure, ire lana nanoni God nate gulao harira u tufuni kahra tutu'ani te the'o ka huigna ie. 8Ni ihei te ghathora lana thaidi, ni theome ngagura hna te tufuni tutu'ani, ni leghura lana puhi te di'a teure, God kaina di'atagna ra lui ni kaina fate ra hatimare. 9Nanoni te hui te eira koba puhi te di'are, puhi di'a ni paapara teure kaina dufira au. Puhi igne kaina kulu dufira mae te Jiure, ni kaina ie eulanauwa dufira ihei te theome Jiure. 10Ni nanoni te hui te eira koba puhi te keli re, God kaina broabronara nahngadire, ni ghatho bohera ni gulao harira u keliphari ie. Puhi igne kaina kulu dufira mae te Jiure, ni kaina ie eulanauwa dufira ihei te theome Jiure. 11God kaina eiza igne ka nanoni te hui re, eigna nanoni te hui re kahe nanaba lana ka magne.
12Mae Jiu fate'o te au ke parigna noa vetula mae Moses, ni tapla fasapla ka nakhibo teuwe, vetula teuwae kaina fatera hatimare. Euwateuwe, nanoni te theome Jiu te theome au ke parigna noa vetula mae Moses, ni tapla fasapla ka nakhibo teuwe, God kaina fatera lanauwa neubane theome au hatimare ke parigna vetula teuwae. 13Nanoni te fite farogo lana ka vetula ie, theome tangomana te kohlo ka nathagna God ie. Ni ihei te leghuza lana hna te lepoza ka vetula ie te kohlo ka nathagna God ie. 14Ihei te theome Jiu ie, theome au ke parigna noa vetula mae Moses. Ni kate leghura hatimare gaoghatho te nanaba ka hna te lepoza ka vetula ie, igne fatakleza te hatimare au vetula ka gnagnafadire, neubanauwa ne theome laseza hatimare noa vetula mae Moses ie. 15Tutu'ani, igne fatakleza hna te lepoza ka vetula ie au hui ka gnagnafadire teuwe, eigna hatimare laseza hui hna te kohlo ie ni hna te theome kohlo ie teuwe. Ni gaoghathodi hatimare te keli igne fatakleza hui lanauwa. Euwateuwe, gaoghathodi hatimare igne lepo harira hatimare te hna te eira hatimare re kohlo ba theome kohlo teuwe. 16Leghuza hna te lepoza rei ka Grorogo te Keli gne, igne kaina dufu mei ka naga'e God nate gulao noilaghi ka Jisas Kraes te mala fatera hna te au polo ka gnagnafadi nanonire.
Nodi vetula mae Jiu
17Harighamu ghotolu mae Jiura. Ghotolu fatutu'aniza te God kaina fakahrighamu, eigna te leghuza lui ghotolu noa vetula mae Moses ie. Ni ghotolu thuturi fahaehaghe lui te ghotolu noa nanoni God teuwe. 18Ghotolu laseza gaoghatho gna God ie, ni ghotolu lasera lanauwa puhi te kohlo ni puhi te theome kohlo teure, eigna vetula gne au te lepo harighamu ghotolu ie. 19Ghotolu tufuni laseza igne, te ghotolu tangomana te falalase ka nanonire u nabrau te mala tei dufu ka God ie. Ni mala jateula kahe hnalu'i eu ka ihei te au kate romo re. 20Ghotolu ghathoza igne, eigna ghotolu nodi velepuhi mae ihei te sapla gaoghathodi ni ihei te iho. Eigna ghotolu la atha hui noa vetula mae Moses ie. Eume hna te lepoza ghotolu ie, ghotolu falalase ka keha nanonire, eigna ka vetula ie teke atha ghotolu glalase fate'o te keli ni goeghoze te tutu'ani ie teuwe. 21Ghotolu fagriura keha nanonire mala leghura vetulare, euwateuwe, ne fahneuwa fou ghotolu te theome fagriughamu thaimi ie? Ghotolu lepo harira nanonire mala tovi chiko, euni ghotolu thaimi chiko me au lana euwa. 22Ghotolu lepoza te tovi toilaghi pedo teuwe, ni ghotolu thaimi toilaghi pedo me au lana euwa. Ghotolu tho'anomi ra lui mumuzure, euni ghotolu tei chiko me au lana ke hnuadi suga blahi te au mumuzu re. 23Ghotolu fahaehagheghamu lui eigna te gu'ari God noa vetulare, ni ghotolu fapaipariza me au lana God kate theome leghura ghotolu vetulare. 24Ka i'ini te blahi ie lepo eu'ani, “Eigna te eira ghotolu nanoni Jiure puhi te theome kohlo re, nanoni te theome Jiure ne lepo fapariza nahngagna God ie.”#2:24 Aesaea 52:5; Esikiel 36:20,22.
25Jame leghuza ghotolu hna te lepoza ka vetula ie meuwe, nomi puhi ghotolu te tohifalalase te mala fatakleza te ghotolu noa nanoni God ie teugne, tufuni au gaoghatho te keli tagna. Ni te huhughuza ghotolu vetula ie me, u tohifalalase te eiza ghotolu gne the'o kahe gaoghatho te keli lana tagna euwa. 26Nanoni te theome Jiure theome tohifalalase. Ni te leghuza hatimare hna te lepoza ka vetula ie, God kaina kofira hatimare jateula nanoni tela atha hui tufuni gaoghathogna tohifalalase ie euwa. 27Ni ihei te leghuza hna te lepoza ka vetula ie, neubane theome tufuni tohifalalase hatimare, puhidi hatimare re kaina fateghamu ghotolu, eigna neubane au ghotolu vetula ie, ba, tohifalalase hui ghotolu, ghotolu huhughuza lana noa vetula God ie.
28Ihei te Jiu ka nahngahnga lana ie, magne theome tufuni mae Jiu, ba theome noa nanoni God. Eigna puhi tohifalalase gne theome puhi fei thono lana. 29Ni mae te tufuni Jiu ie, ihei te Jiu ka gnagnafagna, igne gaoghathogna ie magne tohifalalase ka gnagnafagna, eume magne hoho'i nakahragna ie. Igne theome jifla mei ka vetula, ni noa Tharunga te Blahi God te eiza igne. Eume nafnata nanoni teugne God te ghatho boheza ie, neubane theome ghatho boheza magne nanonire.
© 2025 SIL Solomon Islands