Rom 1
1
1Rei mae Pol, kahe noa mae gloku Jisas Kraes. God neke kiloghau rei mala noa mae khuru ni neke fafateghau rei mala thuturiza noa Grorogo te Keli ie. 2Tifa ie, God neke na'alepo harighita gna u Grorogo te Keli gne, ni fafatera mae profetre mala i'iniza u na'alepo igne ka noa i'ini te blahire. 3-4U Grorogo te Keli igne, gna thugna Magne Jisas Kraes noda Lod. Magne neke kahra mei ka vikegna mae Nafano Devet ni magne kahe mae blahi jateula God, ni God eulanauwa neke fakegra fapuloza magne ka noa noilaghi bi'o ie, mala laseza nanonire te magne tufuni Thugna God teuwe. 5Rei neke atha noa fablahi God ie ka Kraes, eigna magne neke fafateghau rei mala loku jateula kahe mae khuru eu mala kilora nanoni ka nau te hui re, mala fatutu'ani ni leghuza eu magne. 6Euwateuwe, ghotolu nanoni te fatutu'ani te au Rom ra, God neke fafateghamu ni kiloghamu mala leghuza Jisas Kraes.
7Letasi te i'ini ari rei igne, malami ghotolu nanoni te fatutu'ani te hui te au Rom re, God nahmaghamu ni kiloghamu mala noa nanoni blahi thaigna. Rei toreza noa kokofakasa ni keliphari eu God Mada ni Jisas Kraes noda Lod mala au balumi ghotolu.
Mae Pol ngaguza tei kofira hatimare Rom
8Ululahu ie, rei ngagughau lepoza te grorogomi ghotolu te fatutu'aniza God ie la tei dufu hia te hia ka nauthoglu gne. Eigna teugne, rei lepo fakeliza God gnami ghotolu ka nahngagna Jisas Kraes. 9Rei loku hariza God balu gnagnafagu fate'o mala ghaghazalaza u Grorogo te Keli gna Thugna God ie. Ni God laseghau rei te ghathoghamu koba ghotolu ka nogu tharai re. 10Tutu'ani, leuleghu fata kate tarai ie, rei eulanauwa toreza God mala thotora nabrau harighau mala ari kofighamu ghotolu ka teuwae. Te leghuza noa gaoghatho God ie, rei kaina ie na ari dufu au lana ka ghotolu.
11Rei tufuni ngagughau lui te ari kofighamu ghotolu ie, mala toghoghamu ni athiza eu ghotolu noa noilaghi Tharunga te Blahi ie, mala faheheta ra nomi fatutu'ani ghotolu re. 12Te ghathoza rei ie, nomi fatutu'ani ghotolure kaina toghoghau rei mala au heta koba, ni nogu fatutu'ani rei ie kaina eulanauwa toghoghamu ghotolu mala au heta koba ghotolu. 13Uve kheragura ka khilo'au, chuku fata lui te ngagughau mala ari kofighamu ghotolu teu rei ie, ni keha puhini te fofotoghau rei ie euwa. Rei ngagughau te ari mala toghora chuku nanoni ka teuwae re mala leghuza Jisas, jateula teke eira rei ka keha nanoni te theome Jiura euwa.
14Rei ngagughau lui te toghora nanoni te hui re, meubame mae sikolu ba ihei te theome sikolu, meubame mae te glalase ba te na'iho. 15Eume ka gaoghatho igne, rei ngagughau lui te mala ari dufu ka ghotolu Rom, mala ghaghazalaza u Grorogo te Keli igne.
Grorogo te keli noa God
16Tutu'ani, rei theome mamaza te thuturiza u Grorogo te Keli ie, eigna Grorogo te Keli gne noa noilaghi God mala fakahrira ihei te fatutu'aniza magne ie. Ululahu ie magne fakahrira mae Jiu ihei teke rogiza Grorogo te Keli gne, euwateuwe ke leghu ie magne eulanauwa neke fakahrira mae ihei te theome Jiure. 17U Grorogo te Keli gne lepo harighita neigna puhigna God te fakohlighita ka nathagna thaigna kate tufuni fatutu'aniza lana tati Jisas ie. Jateula te lepoza ka i'ini te blahi ia, “Mae ihei te fatutu'aniza God ie, magne kaina kohlo ka nathagna God, euwateuwe magne kaina athiza u nakahra te the'o ka huigna ie.”#1:17 Habakuk 2:4.
Di'atagna God ka nanoni te hui re
18Di'atagna God ie kaina soru mei funu klia. Magne kaina fatera nanonire gnadi nakhibo te hui ni puhi te di'a te eira hatimare re. Eigna nafnata puhi te eira hatimare ire fotiza goeghozegna God te tutu'ani ie. 19God kaina fatera, eigna nanoni te hui re laseza puhigna God ie. Tutu'ani lui, God neke falalase la kohlo hui ka nanonire. 20Funu ka vuavuhagna nauthoglu gne, puhigna God te theome tangomana kofira tati re, tati la kofu deira ka hna te vuavuha magne re. Eume tati laseza te Magne lana God te tutu'ani ni au noilaghi te the'o ka huigna ie. Eigna teugne, nanonire theome tangomana te lepoza ne ihoza God teuwe.
21Hatimare laseza hui God, ni hatimare theome ghatho boheza ni theome lepo fakeliza eu lana magne. Hna te ghathora hatimare re the'o nafudi lana, ni gnagnafadire tufuni sapla lui. 22Meubame lepoza hatimare te hatimare lalase teuwe, hatimare la noinoli hui. 23Hatimare la tei famaghaniza hui puhi te mala ghatho boheza God mae te kahra te fei au ie. Euwateuwe, hatimare e'ei mumuzu jateula nanoni, ba memeha ba pholi ba keha nafnata goifata te tautagu te au ka nagutare. Ire goifata te tufru sorura hatimare re!
24Eume, God la lisa laora hui mala leghura lana hatimare gaoghatho di'a te au ka gnagnafadire, mala gnognoro fatheve ni choghara eu thonodire farithaidi. 25Hatimare tho'anodi fatutu'aniza goeghoze te tutu'ani gna God ie, ni fatutu'anira lana thuturi te muamugna re. Ni eulanauwa, hatimare tufru sorura ni loku harira eu goifata teke vuavuha re lana, ni ghatho ihoza te mala tufru soruza ni loku hariza teu God mae teke vuavuhara gobigna goifatare. Ni nanoni te huire thokagna te mala lepo fakeliza God te the'o ka huigna. Amen.
26Eigna igne, God ne lisa laora nafnata nanoni ire mala eira puhi te tufuni di'a lui te ngagura hatimare ka gnagnafadire. Tulao goro ga'asere theome thuru faudu ka ma'anere, ni re'e thuru faudu lana fari ga'ase. 27Eulanauwa, mae ma'anere theome ngagura te mala thuru faudu ka ga'asere, hatimare ngagura lui lana te thuru faudu fari ma'ane. Mae ire eira lui puhi te di'a re farithaidi. Eume, ka puhi ire God neke fatera, leghura puhi te tufuni di'a lui te eira hatimare re.
28Eigna te theome ngagura hatimare ghatho boheza God ie, God ne lisa laora mala leghura lana hatimare gaoghathodi te di'a re. Eume, ka puhi igne hatimare ne eira puhi te theome thokagna te mala eira nanonire. 29Hatimare la fodu ka puhi te di'a, ni ngagura te atha goifata maladi thaidi lana, ni tufuni fa'ei'eira lui nanonire. Hatimare fodu ka gogotu, faleme noni, maamagra, saosagro, ghaoghatho fadi'aza koba ihei, ni lepo poopoloza ihei. 30Hatimare tho'anodiza God, ni lepo fadi'ara nahngadi keha nanonire, fahaehaghe ni ghatho bohera eu lana thaidi. Hatimare eulanauwa ghathora chuku nafnata phoge te mala eiza hna puhi te di'a ie, ni theome ghatho bohera madi dodire. 31Hatimare theome ghaoghatho fakeli, euwateuwe hatimare lase muamugna lui, ni theome kokhonira keha nanonire. 32Hatimare la laseza hui te noa vetula God ie lepoza te ihei te eira puhi ire, thokadi te mala leme ie. Ni meubanauwa, hatimare heta gedi au lana eira puhi te di'a re, ni eulanauwa kelitadi ka keha nanoni te eira lanau puhi te di'a teure.
© 2025 SIL Solomon Islands