Mae khuru 28
28
Mae Pol au Malta
1Kate longa au fakeli te au hui gheati longa ie, ne laseza na gheati moumolu gne nahngagna ie Malta teuwe. 2Ka naga'e teuwae nahani ne rifu lui. Ni nanoni te au ka moumolu gne nahmaghami lui gheati ni tufuni koikofi fakelighami gheati. Agnoni hatimare ne eiza kahe kha'aghi bi'o malami gheati ka teuwae. 3Mae Pol ne agu haghe kahe thotoghei gazu ne koko lao ka kha'aghi ie. Kate eiza magne igne, kha'aghi ie ne fua jala ne jifla mei kahe pholi mokophaza ne katiza khamegna magne ie. 4Kate kofiza mokophaza gne te phipiri falithuza khamegna mae Pol ie, nanonigna moumolu ie ne lepo eu'ani farithaidi, “Ma'igne jame kahe mae faleme noni gne! Ni neubane theome leme magne ka hnorara ie, god mae te kiloza ‘Foli Fapulo’ ie theome sakreza magne te mala kahra ie.” 5Ni mae Pol ne pusi koko pholi ie ne koko laoza ka glamagna kha'aghi ie, ni magne theome khata gea lana. 6Nanonire gaoghathodire na hungu bi'o ba na ghose uthu soru leme mae Pol neuwa. Kate tuku ni fakofu eu tela raugha ni theome fadi'aza lana magne teuwe, hatimare ne hoho'i gaoghathodire ne lepo eu'ani, “Ma'igne kahe god lanauwa!”
7Kehreagna hnimoto teugne, au kahe sinabo gea noa mae Pablias, mae funeigna moumolu teuwae. Mae Pablias toreghami gheati ne tei au ka noa suga ie tholu naga'e, ni magne ne kaliti fakelighami gheati. 8Ni magna mae Pablias gne fogra bi'o balu paraghuma ni khata thi'a. Mae Pol ruma ka chogho ie ne taraiza, euwateuwe fablahiza neke keli fapulo magne. 9Ke leghugna igne, chuku nanoni te fogra ka moumolu teugne ne kafua mei ka mae Pol, ni magne ne kafua fakekeli ra. 10Nanonigna moumolu teugne ghatho boheghami gheati ne nahma chuku goifata. Ni kate thatai ghae gheati ie, hatimare ne agu mei ka vaka ie goifata fate'o te thokagna thei gheati ie.
Pol ne dufu Rom
11Ke leghugna tholu hnigra te au ka moumolu teuwae gheati ne ghae ka vaka gna Aleksadria. Nahngagna vaka teugne, “Phalu god praki.” Vaka ie neke polo Malta ka hnigra khoburu ie. 12Gheati tei dufu Sirakius ne au ka teuwae tholu naga'e. 13Funu Sirakis gheati tei ne dufu ka gruru Rejiam. Ka keha naga'e ie, naulafa khoburu ie neke funu iu'ifu mei ke longa. Kahe naga'e ke leghugna igne gheati ne tei dufu Puteoli. 14Ka gruru igne gheati ne kofira keha nanoni khilo'au re, ni hatimare ne toreghami gheati mala au baludi kahe wiki. Agnoni, leghu lahugna ie gheati leghu nabrau ne tei dufu ka gruru bi'o Rom. 15Ame dufuna gheati Rom teuwe, nanoni khilo'au re ne rogiza thuturimi gheati ie ne soru deighami gheati ka nau te kiloza “Maketi Apius,” ni eulanauwa ka nau te kiloza “Tholu Binaboli.” Kate kofira hatimare re, mae Pol ne hneahnegha lui ne lepo fakeliza God. 16Kate dufu lao gheati Rom ie, hatimare mae funeigna nau ie ne sakreza Pol mala au sopa thaigna. Ni kahe mae soldia te mala au balugna magne te mala koikofiza ie.
Mae Pol ne au Rom
17Tholu naga'e ke leghugna igne, mae Pol ne kilofaudu ra mae funeidi Jiu te au ka nau gne mala krapu mei ka magne. Kate kafua mei hatimare ie, mae Pol ne lepo eu'ani, “Kheragura, rei theome eiza kahe puhi te di'a harira noda nanonire, ni theome lepo fapariza kahe nodi kastom mae ku'edare. Ni neubanauwa, maedi Jerusalem re ne sagughau rei ni sakre laoghau ka khamedi mae Rom re. 18Hatimare ne athighau rei ka fate, ni ke leghugna te ghuhnaghau rei ie, hatimare ngagura te sakre fajiflaghau rei, eigna rei neke theome eiza kahe puhi te di'a te mala falemeghau rei hatimare ie. 19Ni mae funeidi Jiure ne theome ngagura teugne. Eume rei tore ra hatimare mala mei fateghau ani ke ulugna mae Nafano bi'o gna Rom ie. Ni rei the'o kahe puhi nate fathoro lao harira nogu nanoni thaigu Jiure. 20Eigna igne au te toreghamu rei te mei ghotolu gne, malani tangomana rei te ghoeghoze nogu ka ghotolu. Hatimare solighau rei ka cheni eigna rei fatutu'aniza Kraes, mae ihei tati maeda Israel re te tukiza te au meigna ie.”
21Hatimare mae Jiure ne lepo eu'ani ka Pol, “Gheati theome kofiza kahe letasi te lepo eimu ghoe te mei funugna Judia ie. The'o lanauwa kahe mae ka mae kherada te mei funudi Judia te atha thuturimu ghoe, ba thuturiza ka gheati kahe thuturi di'a eimu ghoe ie. 22Ni gheati ngagughami rogira nou gaoghatho ghoe re, eigna gheati laseza nanonidi nau te hui re lepo fapariza koba thotoghei te au ghoe tagna gne.”
23Agnoni hatimare ne fafateza kahe naga'e mala ke pulo mei teke kofiza mae Pol ie. Ka naga'e teuwae chuku nanoni te krapu mei ka hnimoto te au magne ie. Ni Pol ne thuturi ka hatimare funu boibongi fufugho ne ghile rafi, ruarutha fakeli ka nanonire gna u nakahra God te funei fruniza ie. Magne ne lepo fatakle ra u goeghozegna Jisas te au ka noa vetula mae Moses re, ni ka nodi i'ini hatimare mae Profet. Magne fariuriu lui mala fatutu'aniza hatimare Jisas. 24Keha mae Jiure ne fatutu'ani ra hna te lepora mae Pol re, ni kehare the'o lana. 25Eume hatimare ne maamagra farithaidi ne ngagura jifla nodi. Ni mae Pol ka noa goeghoze leghu lahu harira hatimare re ne lepo eu'ani, “Tharunga te Blahi ie ne lepo ka tutu'ani harira mae ku'emi ghotolura ka mae Profet Aesaea. Ka naga'e teugne magne neke lepo eu'ani,
26“ ‘Tei ka nanoni ire ni lepo eu'ani,
Neubane farogo ne farogo ghotolu,
ghotolu kaina theome rogi falaseza lana ki goifata.
Euwateuwe neubane fakofu ne fakofu ghotolu,
ghotolu kaina theome kofu fakeliza lana ki goifata.
27Eigna nafnata nanoni teure, gaoghathodire la fnotohui,
euwateuwe khulidire theome ngagura teke mala rogiza kahe goifata ie,
ni nathadire fathuru hui.
Na euni tufuni kofu falaseza hatimare hna teke kofiza ka nathadire,
ni tufuni rogi falaseza hna teke rogiza ka khulidire euwateuwe gaoghathodire tangomana te laseza.
Ni hatimare tangomana teke pulo mei ka rei,
malani tangomana rei te fakekeli fapulo ra.’#28:27 Aesaea 6:9,10.
28“Eume, rei ngagughaughamu ghotolu te laseza, te God neke fameiza lanau u grorogo gna mae Fakahra ie harira nanoni te theome Jiure. Euwateuwe hatimare kaina ie na rogiza goeghoze igne!” Ke leghugna te lepoza mae Pol igne, mae bi'odi Jiure ne jifla. 29[29].#28:29 Ka keha Buka Blahi tiatifa re hatimare na'afaruma nabrau goeghoze igne ves 29 Ke leghugna te lepo eu'ani magne ie, mae Jiure ne ghae, fari fa vese farithaidi.
30Mae Pol ne au phalu finogha ka suga teke fofoli thaigna te mala au noa ie. Leuleghu fata Pol ne keli tagna lui ka nanoni te mei sighoza magne re. 31Ni magne thuturi harira u Grorogo te Keli gna u nakahra God te funei fruniza ie, ni fagriu gna noda Lod Jisas Kraes. Magne theome ke hmau kate thuturiza u Grorogo te Keli ie. Eume, the'o kahe nanoni te tangomana fanotoza magne ka mala thuturigna Grorogo te keli gna noa nauthoglu God ie.
© 2025 SIL Solomon Islands