Matiu 9
9
Jisas fakekeliza kahe mae te blughu
(Mak 2:1-12; Luk 5:17-26)
1Jisas saghe ka mola ie, kasa neke pulo ka noa nau ie. 2Agnoni keha maere pala ka sape ne tei ka magne kahe mae te blughu. Kate laseza Jisas nodi fatutu'ani hatimare re, magne ne lepo eu'ani ka mae te blughu gne, “Mae kheraguia, tovi nanga nou, rei la atha koko hui nakhibomu ghoe re.”
3Agnoni keha mae ka hatimare mae velepuhigna vetula noa Moses re, ne lepo eu'ani farithaidi, “Tholumae, mae igne te lepoza ie, ne thaigna huila God ie euwa! Goeghoze teugne lepo fapariza God!”
4Ni Jisas ne lasera gnagnafadi hatimare re, ne lepo eu'ani, “Ne fahneuwa te au nafnata gaoghatho te di'a teure ka gnagnafami ghotolure gnea? 5Tufuni bluse lui te lepo eu'ani ka magne ie, ‘Mae thuguia, rei la atha koko hui nakhibomu ghoe re’ teuwe, eigna the'o kahe nanoni te tangomana kofiza te rei au noilaghi mala eiza gloku igne ie. Ni ninigrana lui te lepo eu'ani ie, ‘Kegra haghe, atha nou gnagru ie ni tei’ teuwe, eigna nanoni ie tangomana kofiza te rei au noilaghi mala eiza gloku teugne ie. 6Ni gignoa igne rei na falalase ariza ka ghotolu, te rei mae teke mei funugu ka God gne au nogu noilaghi ka nauthoglu gne te mala atha koko nakhibore!” Agnoni, Jisas ne lepo eu'ani ka mae te blughu gne, “Kegra haghe, atha nou sape ie ni pulo ka sugamu ie!” 7Agnoni, magne kegra haghe ne tei ka noa suga ie. 8Nanonire kofiza igne ne vere nodi lui balu hmau. Hatimare ne kilo uluza God, eigna God ne gulao nafnata noilaghi bi'o teugne ka nanonire.
Jisas kiloza Matiu mala leghuza
(Mak 2:13-17; Luk 5:27-32)
9Jisas jifla ka hnimoto teugne ne mei kofiza kahe mae mala saosalo takisi, nahngagna ie Matiu, magne hokro ne'au ka hnimoto mala foli takisi nanonire. Jisas ne lepo eu'ani ka magne, “Mae kheraguia, mei leghughau rei, ghoe mala nogu mae farogo rei.” Agnoni mae Matiu ghoseni kegra haghe ne leghuza Jisas.
10Ke leghugna igne, Jisas ne tei ngamu ka sugagna mae Matiu ie. Chuku mae te di'a te saosalo takisi, ni keha mae te di'a lanauwa eu ne kafua tei hokro ka thevo ie balugna Jisas ni noa mae farogore. 11Kate kofiza igne, keha mae ka mae Farisire ne ghuhna eu'ani ka noa mae farogo magne re, “Ne fahneuwa magne te ngamu baludi mae te di'a te mala saosalo takisi, ni keha nanoni di'a lanauwa teu irea?”
12Jisas rogiza nodi goeghoze mae Farisire ne lepo eu'ani ka hatimare, “Ghotolu laseza igne, nanoni te theome fogra re, theome tangomana te tei kofiza mae dokita ie. Ni nanoni te fogra re lana te ngagura tei kofiza mae dokita ie. 13Jateula teugne eu lana rei theome mei mala kilora nanoni te kohlo hui ka nathagna God re mala leghughau. Ni rei mei mala kilora lana nanoni te di'are mala ho'ignagnafa. Ke pulo sonighotolu hiroza gaoghathogna noa goeghoze God igne, ‘Rei theome ngagughaura nomi faafara ghotolure,#9:13 Hosea 6:6. ni rei ngagughaughamu ghotolu te kokhonira ni kaliti fakelira teu nanonire!’ ”
Fagriu gna lugu
(Mak 2:18-22; Luk 5:33-39)
14Noa mae farogo Jon Siublahi re tei ne ghuhna eu'ani ka Jisas, “Velepuhi, gheati ni mae Farisi re teure lugu gano koba. Ne fahneuwa nou mae farogo ghoe re te theome lugu rea?” 15Ni Jisas ne ho'ilepo eu'ani, “Kheragura, mae te tei ka u ngahngamu thoilaghi ie theome tangomana te mala di'agnagnafa ie, eigna mae te mala toilaghi ie au baludi au hatimare. Ni naga'e nate tei kokora magne hatimare ie kaina mei au euwa. Agnoni ame tangomana na hatimare te lugu ni di'agnagnafa teuwe. Jateula teugne eu kate au te au rei ani baludi nogu mae farogore, hatimare kaina theome lugu ni di'agnagnafa euwa.”
Lepo naba gna fagriu tiatifa ni valu
16“Theome tangomana tati te atha nabreku pohe valu ie te susuki lao ka pohe tiatifa tela kora hui ie. Teu tati ie, kate lulumi tati ie, u nabreku pohe valu teugne kaina rerekuza lana pohe tiatifa ie. Euwateuwe, khora teugne kaina ke bi'o lao gnani teke ulu ie. 17Ni theome thokagna lanauwa nanoni ie te totoho waen valu ka u buubulu tiatifa ie. Eigna lao te pazagna waen ie, u buubulu teuwae kaina ie na breku di'a, ni u waen ie kaina tofa. Eume te keli ie, magne jame totoho waen valu ie ka duku te valu, malani kafua keli phalu goifata teure euwa.”
Jisas ne fakahrira phalu ga'ase
(Mak 5:21-43; Luk 8:40-56)
18Kate thuturi te au Jisas ka nanonire, mae baubatu ka suga tharai gna Kapanam ie mei ne turununu ke ulugna magne, ne lepo eu'ani, “Thugu ga'ase rei ie la leme hui. Ni ghoe tangomana te mei mala habo lao khamemu ie, malani ke kahra fapulo gne'e.” 19Agnoni, Jisas baludi noa mae farogore kegra haghe ne tei balugna magne.
20Kate tei hatimare ie, kahe nani naufa'a te fogra tofa dadara fatheve thokagna saleiphalu finogha ne mei ke leghugna Jisas, ne habo lao ka khukrugna noa pohe magne ie. 21Gne'e eiza igne eigna gne'e ne ghaoghatho eu'ani ka gaoghathogna ie, “Jame haboza lana rei noa pohe Jisas ie, rei na tangomana teke keli nogu ie.”
22Ni Jisas figrilao ne lepo eu'ani ka gne'e, “Nani naufa'a, tovi nanga nou! Ghoe kela keli fapulo eigna ghoe ne fatutu'ani.” Agnoni, ka teuwae lana, fogra teugne ne hui ka gne'e.
23Agnoni, kate tei Jisas te ruma ka noa suga mae funei ie, magne ne kofira chuku nanoni te nanaeru koze ka nifu mala giugilu, ni nanoni te tahngi ni paopado teure, 24magne ne lepo eu'ani, “Ghotolu kafua jifla kosi! Eigna sua ga'ase igne theome leme, gne'e thuru noa aulana!” Hatimare ne kafua ma'eza magne. 25Ke leghugna te jifla te hui nanonire, Jisas ruma ka chogho te au sua ga'ase ie, ne habo laoza khamegna ie. Euwateuwe, gne'e ghoseni ne kegra haghe. 26Agnoni ke leghugna igne, u grorogogna puhi teugne ne tei fate'o hia te hia ka chuku nau ke hnuagna provens teuwae.
Jisas neke fakekelira nathadi phalumae te doa
27Kate jifla Jisas ka hnimoto teuwae, phalumae te doa re ne funu leghuza magne. Phalumare ne aku eu'ani ka magne, “Jisas, vikegna mae Nafano Devet, kokhonighami ghepa!”
28Agnoni kate ruma Jisas ka suga ie, phalumare ne ruma lanauwa balugna magne. Jisas ne ghuhna eu'ani ka phalumare, “Ihna, ghopa fatutu'anighau rei te tangomana fakekelira rei nathamire gnea?”
Phalumare ne lepo eu'ani ka magne, “Uve, mae funei!”
29Agnoni Jisas ne habora nathadi phalumare re, ne lepo eu'ani, “Eigna te fatutu'anighau rei ghopa ie, rei na eiza harighamu.” 30Euwateuwe phalumare ghoseni neke kokofu fakeli. Ni Jisas ne lepo faheta eu'ani ka phalumare, “Tovi ke thuturiza igne ka iheina ghopa ia!” 31Ni meubanauwa, phalumare jifla ne tei thuturi tafiri nodiza grorogo gna Jisas gne ka u nohi teugne.
Jisas ne fakekeliza kahe mae te iho vevese
32Kate jifla phalumare kosi ie, keha nanonire u'udi ne mei kahe mae te iho vevese ka Jisas. Magne theome tangomana te vevese ie, eigna kahe na'itu au ka magne. 33Kate brue fajifla Jisas na'itu teke au ka magne ie, magne neke funu vevese. Nanonire kofiza igne ne vere nodi lui ne lepo eu'ani, “Icho idomi! The'o kahe puhi teke kofiza tati ani Israel tifa ie te jateula igne teuwe!”
34Ni mae Farisire ne lepo eu'ani, “Magne tangomanaza lana te brue ra na'iture, eigna mae Satan, mae funeidi na'iture te gulao hariza magne noilaghi te mala brue ra na'iture.”
Jisas ne kokhonira nanonire
35Jisas ne tei hia te hia ka nau bi'o, ni ka nau te ichoni teu te au ke hnuagna provens Galili re. Magne ne ruma ke hnuadi nodi suga tharai mae Jiure, ne fagriura nanonire ni ghaghazalaza eu Grorogo te Keli gna u naga'e God nate funei frunira noa nanonire. Magne ne fakelira nanoni te au gobigna nafnata fogra ni khata teu tadi re. 36Kate kofira nanonire, Jisas ne kokhoni noara lui, eigna nanonire tufuni nanga nodi lui, ni the'o kahe nanoni te mala togho ra, jateula sipsip te the'o kahe nanoni te mala koikofira euwa. 37Agnoni, magne ne lepo eu'ani ka noa mae farogore, “Nanoni ire jateula gano chuku te au ka sinabo tela ghano huira euwa. Ni theome chuku nanoni te mala toghora hatimare te fatutu'anighau rei ie. 38Ghotolu tore ka God mae tufugna sinabo ie, mala kuru mei chuku mae gloku mala ghaghazalaza u Grorogo te Keli igne, ni toghora hatimare mala fatutu'anighau rei. Kate tei loku ie, hatimare jateula mae te tei agu gano ka sinabo ia euwa.”
© 2025 SIL Solomon Islands