Matiu 8
8
Jisas fasagliuza kahe mae te thubu bi'o
(Mak 1:40-45; Luk 5:12-16)
1Kate soru mei Jisas funu ka gukhu ie, chuku nanoni lui ne leghuza magne. 2Agnoni, kahe mae te au thubu bi'o te kiloza lepa ka thonogna ie mei ne turununu soru ke ulugna Jisas ne lepo eu'ani, “Mae funei, ne ngagughona ghoeni, ghoe tangomana teke fasagliughau rei ie.”
3Agnoni Jisas habo lao ka magne ne lepo eu'ani, “Uve, rei ngagughau, ke sagliu sonighoe!” Ka goeghozegna Jisas teugne, thubu ka thonogna magne ie ghose ne sagliu fapulo. 4Agnoni, Jisas ne lepo eu'ani ka magne, “Tovi thuturi tafiri gna igne ka iheina. Ni ghoe kohlo tei ka mae pirisi ie mala kulu kofiza magne thonomu ie. Euwateuwe ke leghugna teugne, ghoe tei e'ei faafara leghuza hna te lepoza mae Moses ia, mala laseza nanonire te kela keli fapulo hui ghoe ie.”
Noa fatutu'ani kahe mae funeidi amigna Rom
(Luk 7:1-10)
5Ka dufu laogna Jisas nau Kapanam ie, kahe mae funeidi amigna Rom ne mei toreza magne mala toghoza. 6Magne ne lepo eu'ani, “Mae velepuhi, kahe nogu mae gloku te au ka sugagu ie tufuni fogra bi'o lui thuru aulana ka sape ie, eigna magne blughu ni theome tangomana teke ngigru tafiri ie.”
7Jisas ne lepo eu'ani ka magne, “Uve, keli lui. Rei kaina ari ka sugamu ghoe ie mala fakekeliza magne.”
8Agnoni mae funei gna ami ie ne lepo eu'ani ka Jisas, “The'o mae velepuhi, rei theome thokagu te mei ghoe ka nogu suga ie. Ni ka goeghozemu lana, mala ke keli fapulo nogu mae gloku ie. 9Tutu'ani lui, rei gne au lanauwa mae funei bi'o te mala kurighau ie. Ni rei eulanauwa au chuku mae soldia te mala kuri ra rei re. Eume, te lepo eu'ani rei ka kahe mae, ‘Tei sonighoe,’ teuwe, magne na tei. Ni te lepo eu'ani rei ka keha mae ie, ‘Mei sonighoe ani,’ teuwe, magne na mei. Ni te lepo eu'ani rei ka nogu mae gloku ie, ‘Eiza sonighoe igne,’ teuwe, magne na eiza.”
10Kate rogiza goeghoze igne, Jisas ne vere noa lui ka magne. Magne figrilao ne lepo eu'ani ka nanoni teke leghuza magne re, “Icho idomi! Tutu'ani lui te lepoza rei ka ghotolu ie, rei theome kofiza kahe nanonigna ani Israel te hneta noa fatutu'ani ie jateula mae igne teuwe. 11Ni te lepoza rei ka ghotolu ie, chuku nanoni kaina mei funudi ke maghati ni ke mosu, mala mei kafua hokro ni ngamu faudu baludi mae Ebraham, mae Aesak ni mae Jekop ka noa nauthoglu valu God ie. 12Euwateuwe, mae Jiu te theome fatutu'ani re, God kaina lepora noa engjelre mala koko fajiflara kosi ka nau te romo lui ie. Ka teuwae, hatimare kaina ie au paapara lui tahngi ni fakikikri khe'idi re euwa.”
13Agnoni Jisas ne lepo eu'ani ka mae funeigna ami ie, “Ke pulo sonighoe ka sugamu ie. Ka nou fatutu'ani ghoe, nou mae gloku ie kaina keli fapulo.” Agnoni, ka teuwae lana noa mae gloku magne teke fogra ie ghoseni neke keli fapulo.
Jisas ne fakekeli ra chuku nanoni
(Mak 1:29-34; Luk 4:38-41)
14Kate tei Jisas te ruma ka sugagna mae Pita ie, magne ne kofiza nahngogna mae Pita ie fogra ne thuru ne'au ka sape ie. 15Jisas lao ne haboza khamegna gne'e ie, ka teuwae lana gne'e ghoseni neke ghaota fapulo ka fogra ie, agnoni gne'e kegra haghe ne kakaliti gea gano Jisas.
16Ka grafi teuwae, ke leghu plulugna nadafi ie, keha nanonire udira ne mei ka Jisas chuku nanoni te au na'itu tadire. Jisas ne lepora thotoghei na'iture ni kuri fajiflara, agnoni nanoni teke fogra re ghoseni ne kafua keli fapulo. 17Noa goeghoze mae profet Aesaea te lepo eu'ani ie ne horoghoto lui ka naga'e teuwae,
“Magne ne koko fahui fogra te nigrara tatire,
ni eulanauwa atha kokora fogra te au ka tatire,”#8:17 Aesaea 53:4. teu ia.
Ihei te thokagna mala leghuza Jisas
(Luk 9:57-62)
18Kate kofira chuku nanoni te krapu mei falithuza magne re, Jisas ne lepora noa mae farogore mala tarabana ke kasa ka keha philegna Grano Galili ie. 19Agnoni kahe mae velepuhigna vetula noa mae Moses mei ne lepo eu'ani ka magne, “Mae velepuhi, rei ngagughau te mala kahe nou mae farogo ghoe, mala tei balumu ka nau ahia nate tei ghoe re.”
20Agnoni Jisas ne lepo eu'ani ka magne, “Gauhare au nodi hnimoto mala thuru, ni memehare au nodi gnoku. Ni rei mae teke mei funugu ka God gne, the'o kahe nau te mala augu ie.”
21Kahe mae ka hatimare noa mae farogo Jisas re ne lepo eu'ani ka magne, “Mae funei, sakreghau rei mala pulo giugiluza rei mae magu ie.”
22Ni Jisas ne lepo eu'ani ka magne, “Gignoa igne ghoe mei leghughau rei, lisa laora nanoni te tho'anodiza u nakahragna God ie giugilura thaidi.”
Jisas fabeataza malu bi'o ie
(Mak 4:35-41; Luk 8:22-25)
23Agnoni Jisas ne saghe ka mola ie, ni noa mae farogo magne re ne kafua tei balugna magne. 24Kate kasa hatimare ka grano ie, kahe naulafa bi'o ne dufira hatimare farihotei hnorara. U kholo ie ne funu malu ne galo bi'o lui, ni kholo ie la funu ruma ka mola ie. Ni Jisas ne tufuni thuru iglu lui. 25Agnoni mae farogore lao ne fadofraza magne, ne lepo eu'ani, “Lod, fakahrighita, tati gne kaina lodu ni blohmo euwa!”
26Ka hnimoto teuwae, Jisas ne lepo eu'ani ka hatimare, “Tovi hmau, the'o kahe nafugna te mala hmau ghotolu ie! Theome hneta lana nomi fatutu'ani re ka God ghotolu gnea?” Agnoni, magne kegra ne lepo faheta eu'ani ka naulafa ie, “Noto soru!” Ni eulanauwa ka galore, “Beata!” Ka hnimoto la teuwae, u hnorara ie ne leme soru ni beata.
27Hatimare fate'o ne vere nodi lui, ne lepo eu'ani, “Tholumae, hna nafnata nanoni ba ignea? Naulafa ba ne galo bi'o te fa'uveza lana goeghozegna ie gne!”
Jisas ne fakahrira phalumae te fogra ka na'itu
(Mak 5:1-20; Luk 8:26-39)
28Agnoni kate tei te longa Jisas balugna noa mae farogore ka keha phile Grano Galili ka nohi te kiloza Gadara ie, phalumae te au na'itu tadire mei ne fadedei ka Jisas. Phalumae teure au ka gluma te mala giugilura nanoni te leme re. Euwateuwe, nanonire theome tangomana te liu ka hnimoto te au phalumare ie, eigna phalumare tufuni di'atadi ra lui nanonire. 29Phalumare ne kofu teiza Jisas ne aku eu'ani ka magne, “Thugna God, mei mala fahneughami gheati fughoe gnea? Ihna, ghoe mei mala paraghami gheati ame dufu mei na naga'e teke ulu nana'a God te mala fateghami gheati ie fugnea?”
30Kehreagna hnimoto te au hatimare gne, kahe thotoghei bosu huehume ne au. 31Agnoni na'iture ne toreza Jisas, ne lepo eu'ani ka magne, “Ne brueghami na ghoe ni, kuru teighami gheati ke hnuadi thotoghei bosu are euwa.”
32Jisas ne lepo eu'ani ka na'iture, “Tei nomi!” Agnoni na'iture jifla ne tei ruma ka bosure. Euwateuwe, thotoghei bosure kafua chari ne soru ka thabaravi ie, ne lili ka Grano Galili ne kafua blohmo. 33Agnoni mae teke ohodi bosure ne kafua pelo ne tei dufu ka gruru Gadara, ne thuturiza hna te eiza Jisas harira phalumae te au na'itu tadire. 34Agnoni nanoni fate'ogna gruru ie ne kafua jifla mala tei kofiza Jisas. Kate tei te kofiza magne ie, hatimare ne toreza magne mala jifla kokoza nodi nohi ie.
© 2025 SIL Solomon Islands