Matiu 10
10
Noa saleiphalu mae khuru Jisas re
(Mak 3:13-19; Luk 6:12-16)
1Kahe naga'e Jisas ne kilo faudura saleiphalu noa mae khurure. Magne ne gulao harira hatimare noilaghi te mala brue na'itu, ni noilaghi te mala fakahrira nanoni te au chuku nafnata fogra tadi ni nanoni te glape thonodire.
2Ire nahngadi saleiphalu noa mae khuru magne re: Ululahu ie mae Saemon, te kiloza Pita ni mae tahigna magne Aduru; Jems ni mae tahigna magne Jon, phalu thugna mae Zebedi re; 3mae Filip ni Batolomiu; mae Tomas ni Matiu, mae mala saosalo takisi; mae Jems thugna mae Alfius, ni Tadius; 4mae Saemon, kahe mae ka thotoghei te kiloza Zilot, mae te ngagura khii fajiflara maedi Rom re; ni mae Judas Iskariot, mae te sakreza Jisas ka khamedi noa mae naokare.
Nodi gloku mae khuru
(Mak 6:7-13; Luk 9:1-6)
5Ka naga'e te kuru fajiflara magne saleiphalu noa mae farogore, Jisas ne lepo eu'ani harira hatimare, “Ghotolu tovi tei ka nohi te theome au mae Jiu ni naudi mae Samaria teure. 6Ni ghotolu tei lana ka nanonidi Israel tela iho hui jateula sipsip tela tei iho huira teure. 7Ni kate tei ghotolu tadire, ghotolu lepo eu'ani ka hatimare, ‘Naga'e God te funei frunira noa nanonire la thatai mei hui.’ 8Fakekelira ihei te fogra, fakahra fapulora ihei te leme, ke fasaglira ihei te thubu bi'o lui ka fogra te kiloza lepa, ni brue ra na'iture. Rei gu'ari hui ka ghotolu u noilaghi te mala eira gloku ire, ni ghotolu neke theome fofoli ka rei. Eume ghotolu gignoa igne ie tei mala ke eulanauwa harira keha nanonire, ni tovi tore ra hatimare mala folighamu.
9“Tovi atha ki nanugra balumi ka nomi thei ie. 10Tovi atha ki gnaka, ba fapalu pohe, ba sadolo, ba atha ki khodo balumi. Eigna nanonigna nauwe tangomana mala kalitiza mae ihei te loku ie. 11Kate dufu ghotolu ka kahe gruru bi'o ba kahe nau ichoni ie, ghotolu hiroza kahe mae te keli ni ngaguza te mala au ghotolu balugna ie. Ghotolu au balugna magne ka suga ie au ghile jifla kokoza ghotolu nau teugne. 12Kate ruma ghotolu ka kahe suga ie, ghotolu lepo eu'ani, ‘Keliphari noa God ie au balumi ghotolu.’ 13Ne kalitighamu na nanonigna suga teugneni, sakreza noa keliphari God ie au baludi hatimare. Ni ne the'o na hatimareni, atha fapulo keliphari ie. 14Euwateuwe, jame dufu lao ghotolu ka kahe nau ni nanonigna nau teugne tho'a nodighamu ghotolu, ba theome ngagura farogo ka nomi goeghoze ghotolure, jifla kokoza nau teuwae. Ni kate jifla kokoza ghotolu nau teugne ie, ghotolu ghiha koko gnagnapa te au ka nenemire ke uludi. Igne kahe falalase te mala falalase ghotolu ka nanonire, te God kaina ie fatera hatimare teuwe. 15Tutu'ani lui te lepoza rei ka ghotolu ie. Ka naga'e nate fate ra God nanonire, magne kaina tufuni di'a harira nanoni teure ke tulaodini nanonidi gruru Sodom ni Gomora teure.
16“Farogo mei fakeli ghotolu ia! Rei kaina ie kuri teighamu ghotolu ka nanoni te di'a teure. Kate tei ka hatimare ie, ghotolu kaina jateula sipsip ke hnuadi khau te fakaukatura euwa. Eume, ghotolu mala jateula pholi te lalase lui, ni jateula bahlu te theome magra ni au famuu lana teura euwa. 17Koikofi fakelighamuni; eigna keha nanonire kaina athighamu ghotolu ka u fate. Hatimare kaina ie anighamu ke hnuadi nodi suga tharai re. 18Hatimare kaina ie huhurughamu mala kegra ke uludi hatimare mae funei ba mae nafanore, eigna ghotolu ne leghughau rei. Ni teuwae lana nomi naga'e ghotolu te mala ghaghazalaza u Grorogo te Keli eigu rei harira ihei te theome Jiure. 19Kate athighamu hatimare ka u fate ie, tovi nanga nomiza gna hna nate mala lepoza ka u fate ie. Eigna ka u naga'e teuwae, God kaina gu'ari harighamu noilaghi te mala vese ie. 20U goeghoze nate lepora ghotolure theome jifla mei ka nomi gaoghatho ghotolu thaimi, ni noa Tharunga te Blahi teke mei funu ka mae Mami te au klia ie nate vese ka gnagnafami ghotolure.
21“Nanonire kaina sakre laora kheradi thaidire ka mae naokare mala faleleme hatimare. Euwateuwe, mae madire kaina eura lanauwa thudire, ni thudire kaina eulanauwa sakre laora madi ni dodi teure ka mae naokare mala faleleme hatimare. 22Nanoni te hui re kaina tho'anodighamu ghotolu, eigna ghotolu nogu rei. Ni God kaina ie na fakahrira ihei te kegra famaku ka nodi fatutu'ani re ghile dufiza u naga'e huigna na'au paapara ie. 23Kate paraghamu nanonigna kahe nau ie, pelo tei ka keha nau ie. Tutu'ani lui te lepoza rei ka ghotolu ie, ame huina ghotolu nomi glokure ka nau te chuku Israel re teuwe, rei mae teke mei funu ka God ie nake pulomei.
24“Mae te sikolu ie theome uluza noa mae velepuhi ie, eulanauwa mae gloku ie theome uluza noa mae funei ie. 25Ni mae te sikolu ie thokagna au lana te mala jateula noa mae velepuhi ie teuwe, ni mae gloku ie thokagna au lana te mala jateula noa mae funei ie teuwe. Keha nanonire kiloghau rei Belzebul, keha nahngagna mae Satan. Ni te lepo eu'ani hatimare ka rei nomi mae funei ghotolu ie, hatimare kaina ie eulanauwa lepo fadi'aghamu ghotolu ke tulaoguni rei.”
Hmauza God, theome nanoni
(Luk 12:2-7)
26“Ni neubanauwa, tovi hmaura nanoni teuware, eigna goifata fate'o teke eipolo, ba lepo poopolora hatimare re, kaina ie na takle au. 27Hna goifata te lepo poopolora lana rei ka ghotolu ire, ghotolu kaina ie tei lepo fataklera ka nanonire mala kafua rogira hatimare. 28Tovi hmaura nanonire, eigna hatimare tangomana ra lana te falemeza u thono ie, ni theome tangomana te faleme ra tharungami ghotolure. Ghotolu hmauza God, eigna magne te au noa noilaghi te mala kafua faleme ra thono, ni tharunga te mala au paapara ka kha'aghi te the'o ka huigna ie. 29Ghotolu laseza, phalu memeha ichoni re hatimare sabiri ra ka kahe senti lana. Ni meuba, the'o kaheni ka memeha teure nate leme ie, eume theome sakreza mae Mami ghotolu te au klia ie. Eigna magne lana kahe mae te mala sakreza kaheni ka memeha ichoni teure, te mala kahra ni leme teuwe. 30Fakofu sonighotolu, God ie kafua laseghamu ghotolu hui jateula magne te kafua lasera ngiha naklakla te au ka pha'umi ghotolure. 31Eume, tovi hmaura hna te eira hatimare harighamu re. Eigna ghotolu tufuni goifata ulu lui ke uludini memeha te chuku are!
Jisas lepo harira mae khurure mala lepoza te hatimare noa magne
(Luk 12:8-9)
32“Ihei te kegra ke uludi nanonire te lepoza te magne ne fatutu'anighau rei teuwe, rei kaina eulanauwa lepo neigna magne ka mae Magu klia te magne nogu mae gloku rei teuwe. 33Ni ihei te kegra haghe ke uludi nanonire te lepoza te magne theome fatutu'anighau rei teuwe, rei kaina eulanauwa lepo neigna magne ka mae Magu klia te magne theome nogu mae gloku rei teuwe.”
Noa mae gloku Jisas re mala eira goifata te ninigrana re
(Luk 12:51-53; 14:26-27)
34Jisas ne lepo eu'ani ka hatimare, “Tovi ghathoza ghotolu na atha mei rei u keliphari ie ka nauthoglu gne teuwe. The'o, rei theome atha mei keliphari ie, ni rei gne mei mala famamagra ra nanonire farithaidi. 35Rei mei mala faphiepilera nanonire, malani ihei te theome fatutu'anighau rei re, na magra ka ihei te fatutu'anighau rei re.
“ ‘Tutu'ani, sua ma'anere kaina magra ra mae madire,
ni sua ga'asere kaina magra ra dodire,
ni goro ga'ase thoilaghire ka nanghodire.
36Eume, tufuni nou mae naoka ghoe re kaina nanoni ka thabutua thaimure lana.’#10:36 Maeka 7:6.
37“Ihei te nahmara lui magna ni dogna, ba thugna ma'ane ni thugna ga'asere ke tulaoguni rei ie, magne theome thokagna te nogu mae farogo rei ie. 38Ihei te ngaguza leghughau rei, euni theome pala noa gazu fafata ie na eu leme teuwe, magne theome thokagna te kiloza nogu mae farogo rei. 39Ni ihei te ngaguza loku famakuza nakahragna thaigna ie, magne kaina ie theome deiza u tufuni nakahra ie. Ni ihei te sakreza nakahragna ie harighau rei ie, magne kaina deiza u tufuni nakahra ie.”
Nanoni nate atha taba ka God kaina re
(Mak 9:41)
40Jisas ne lepo eu'ani, “Ihei te kaliti fakelighamu ghotolu ie, magne kaliti fakelighau lana rei. Ni ihei te kaliti fakelighau rei ie, magne eulanauwa kaliti fakeliza God mae ihei teke kuri meighau rei ie. 41Ihei te kaliti fakeliza kahe mae profet, eigna te mae profet magne ie, God kaina ie tabaza magne jateula God te tabaza noa mae profet teuwae euwa. Ni mae ihei te kaliti fakeliza kahe mae te kohlo, eigna te mae kohlo magne ka nathagna God ie, God kaina ie tabaza magne jateula God te tabaza mae te kohlo teuwae euwa. 42Tutu'ani lui te lepoza rei ka ghotolu ie. Ihei te tufa kahe kapu kho'u rifu lana ka kahe nogu mae farogo rei te theome bi'o ka nathadi nanonire, God kaina ie tabaza magne.”
© 2025 SIL Solomon Islands