Matiu 7
7
Tovi fatera keha nanonire
(Luk 6:37-38,41-42)
1Jisas ne lepo eu'ani, “Tovi fateza ihei, na euni fateghamu lanau God euwa. 2Eigna hna nafnata puhi teke fateza ghotolu keha nanoni ie lana kaina God te fateghamu ghotolu ie. U hna vetula teke fateza ghotolu nanoni ie, God kaina eulanauwa ke fate fapuloghamu ka u vetula teuwae.
3“Ne fahneuwa te au gaoghathomu ghoe ka nakhibo ichoni te eiza mae kheramu fafaudu ie, ni theome kofu falaseza u nakhibo bi'o te au ka thaimu ie teugnea? 4Ghoe theome tangomana te lepo eu'ani ka mae kheramu fafaudu ie, ‘Koma, lisa mei ba ka rei, mala atha koko rei nakhibo ichoni te au ka ghoe ae.’ Ni theome kulu atha koko nakhibo bi'o te au ka thaimu ie teuwe. Ghoe kahe mae muamugna! Kulu atha koko sonighoe nakhibo bi'o te au ka thaimu ie ame tangomana na ghoe te ngagugho mala atha koko u nakhibo ichoni te eiza mae kheramu fafaudu ie euwa! 5Ghoe tufuni kahe mae muamugna lui! Kulu atha koko sonighoe u nasapla bi'o te jateula hnimoto gazu bi'o teu te au ka nathamu thaimu ae. Agnoni, ghoe kaina tangomana te kokofu fakeli te mala fateza mae kheramu fafaudu ie, te mala toghoza magne ni atha koko nasapla ichoni te jateula nafruofruhngo gazu teu te au ka nathagna magne ie.
6“#7:6 Khau nasi: U nanoni te tho'a nodi farogo ka goeghoze te blahi re. Bosu: Nanoni te theome kofu ulu za u goeghoze te tufuni tutu'ani ie mine fa maema'e nodi za lana. Tovi gulao goifata te blahi re ka nanoni te jateula khau te nasi teure. Eigna hatimare kaina ie na figri fapulo ke choghagho. Ni tovi koko soru goifata te fua ulu lui re ka bosure, eigna bosure kaina tatapla nodi lana ke kliadi goifata teure.”
Tore, hiro ni kikidi
(Luk 11:9-13)
7Jisas ne lepo eu'ani, “Heta, tovi noto ka thore ie, God kaina ie na gu'ari harighamu. Tovi noto te hiro goifata ka God ie, ghotolu kaina athiza. Tovi noto te mei kikidi ka noa nathanga God ie, God kaina thora harighamu au ghotolu. 8Eigna ihei te tore ka God ie, God kaina gulao hariza magne, ni ihei te mei te hiro noa ka God ie, magne kaina athiza, ni ihei te kikidi ka noa nathanga God ie, God kaina thora hariza magne.
9“Ihna, jame tufuni kahe mae thumu ghoe tore gea gano, ghoe mae magna ie kaina gulao hariza magne kahe thina? The'o, theome tangomana! 10Ihna, jame tore gea sasa magne ka ghoe ie, ghoe na gulao hariza kahe pholi? The'o, theome tangomana! 11Neubane di'a jateula hna eu ghotolu, ghotolu tangomana te gulao goifata te keli ka thumire. Eume, jateula teugne eu mae Mami ghotolu te au klia te tufuni mae keli lui ie. Magne kaina ie na tufa goifata te keli hariza ihei te tore ka magne ie. 12Hna te ngagughamu ghotolu te mala ei harighamu keha nanonire, teuwae lana te mala eiza ghotolu harira hatimare re. Igne au gaoghathogna u noa vetula mae Moses ni nodi fagriu teu hatimare mae profetre.”
Nathanga mala tei dufu ka u kahra
(Luk 13:24)
13-14Jisas ne lepo eu'ani, “Ghotolu athi hnetami mala tei ruma ka u nathanga te tufuni ghobro ie. Eigna u nathanga ni u nabrau te mala tei dufu ka u gleme ie tufuni behra ni bluse lui eu mala leghuza ie. Ni chuku nanoni lui tela leghuza ie. Euwateuwe, u nabrau te tei dufu ka nakahra te the'o ka huigna ie ghobro lui, nabrau teugne tufuni ninigrana lui ni keha nanoni lana te kofudeiza ie.”
Fagriu gnadi mae profet muamugna
(Luk 6:43-44)
15Jisas ne lepo eu'ani, “Koikofi fakelighamuni ka mae profet muamugna re. Hatimare mei ka ghotolu jateula tufuni sipsip te keli eu kokofudi ke kosi re. Ni ke hnuadi re, hatimare fua choghara lui nanonire jateula khau nasi te fakaukatura euwa, eigna gaoghathodi re sapla lui. 16Ghotolu kaina kofu falasera au lana nafnata nanoni teure ka hna te eira hatimare re. Eigna tati theome tangomana te kofu deiza kahe sisi saeko ka u dogho fifiriulu, ba sisi khoilo ka u gazu naulahi ie. 17Jateula teugne eu gazu te keli ie na ure sisi te keli, euwateuwe gazu te di'a ie na ure sisi te di'a. 18U gazu te keli ie theome tangomana ure sisi te di'a, euwateuwe u gazu te di'a ie theome tangomana ure sisi te keli ie. 19Eume, mae tufugna sinabo ie kaina rave soru gazu te theome ure sisi te keli ie mala koko lao ka kha'aghi. 20Eume, ghotolu kaina ie kofu falasera mae profet muamugna ire ka hna te eira, ba ka puhidi hatimare re.
Rei theome laseghamu ghotolu
(Luk 13:25-27)
21“Nanoni te lepo eu'ani, ‘Lod, Lod,’ teu ka rei ire kaina theome kafua ruma ka noa nauthoglu God ie. Ni ihei te eira lana hna te ngaguza mae Magu rei te au klia ie lana kaina te ruma ie. 22Ka u naga'e leghu lahu nate fatera God nanonire, chuku nanoni kaina mei lepo eu'ani ka rei, ‘Lod, Lod! Gheati neke thuturiza goeghozegna God ie ka nahngamu ghoe. Ni ka nahngamu ghoe, gheati neke bruera na'iture ni eira chuku nafnata kofunaboboi.’ 23Euwateuwe, rei kaina lepo fakohlo eu'ani ka hatimare, ‘Tei nomi, rei tufuni theome laseghamu ghotolu. Ghotolu theome nogu nanoni rei, eigna puhimi ghotolure tufuni di'a lui!’ ”
Nanoni te leghuza goeghozegna Jisas
(Luk 6:47-49)
24Jisas ne lepo eu'ani, “Eume, mae ihei te rogira goeghozegu rei ni leghura teuwe, jateula kahe mae te lalase te babana noa suga ie ka phogru glose te saesape ka thina ia euwa. 25Eigna teuwae, neubane mei nahani bi'o ie, mei gnugru ie, ni mei naulafa bi'o ie ka suga teugne, suga teugne kaina theome ke gre'o. Eigna ne babana ka phogru glose te saesape ka thina ie. 26Ni mae ihei te rogira goeghozegu rei ire ni tho'anoa leghura teuwe, magne jateula kahe mae te theome lalase ia euwa. Eigna magne babana lana noa suga ie ka nusu. 27Agnoni, mei teu nahani bi'o, ni gnugru bi'o, ni naulafa bi'o teure ka suga ie, u suga teugne ne hmukri ne tufuni di'a!”
Noa fagriu Jisas
28Ke leghu huidi Jisas thuturi ire, nanonire ne vere nodi lui ka noa nafnata fagriu magne re. 29Eigna magne theome jateula nodi fagriu mae velepuhigna vetula noa mae Moses re euwa. Ni magne ne fagriu balu noilaghi.
© 2025 SIL Solomon Islands