Matiu 6
6
Fagriu gna toghora nanoni te kuma
1Jisas ne lepo eu'ani, “Koikofighamuni ghotolu ia, tovi mala kofighamuna nanonire eu eira gloku te keli re ke uludi hatimare. Eigna mae Mami ghotolu te au klia ie, magne kaina theome tabaghamu ghotolu.
2“Kate tufa goifata ka nanoni te kuma ie, tovi jateula nanoni te muamugna ra eume fataetakle ka nanonire. Hatimare eira teure ke hnua suga tharai, ni ka nabrau bi'o. Hatimare ngagura nanonire te ghatho bohera lana. Ni tutu'ani lui te lepoza rei ka ghotolu ie, nafnata nanoni teure la kulu atha hui nodi tabare. 3Eume, kate tufa goifata ka nanoni te kuma ie, ghoe eiza ka u nafnata puhi te mala theome tangomana laseza mae tufuni kheramu fafaudu ie hna te eiza ghoe ie. 4Teu ie, ghoe thaimu lana te laseza hna teke tufa ghoe ie. Ni mae Mamu ghoe God teke kofiza hna teke tufa polo ghoe ie, kaina tabagho au ghoe.”
Fagriu gna tharai
(Luk 11:2-4)
5Jisas ne lepo eu'ani, “Kate tarai ie, tovi jateula mae te muamugna ra euwa. Hatimare ngagura lui te tei kegra te tarai ke hnuadi suga tharai, ba ka glalabare. Hatimare ngagura nanonire te kofira hna te eira hatimare re. Ni tutu'ani lui te lepoza rei ka ghotolu ie, hatimare la kulu atha hui ka nanonire nodi tabare. 6Ni kate tarai ie, ghoe ruma ka nou chogho ie, bobotho nathanga ie ni tarai polo ka mae Mamu te theome tangomana ihei te kofiza ie. Magne lana kaina te kofiza hna te eiza ghoe ie, euwateuwe magne kaina tabagho ghoe. 7Kate tarai ie, ghotolu tovi tharai jateula mae bongihehe te lepora nafnata goeghoze te the'o nafudi re euwa. Eigna hatimare ka gaoghathodire, kate tarai theve ie ame tangomana na God te rogira hatimare re euwa. 8Ghotolu tovi jateula hatimare euwa, eigna ame tarai na ghotolu teuwe, mae Mami ghotolu ie la kulu lasera hui hna te ngagughamu ra ghotolure.
9“Eume kate tarai ie, ghotolu tarai jateula igne euwa:
“‘Maghe klia,
gheati ghatho boheza nahngamu te Blahi.
10Gheati toregho mala mei funei frunighami gheati fate'o,
ni sakre meiza hna te ngagughoza ghoe ie ani pari, jateulanauwa klia.
11Gumei harighami u gano te thokami gheati ka naga'e igne.
12Atha kokora tami gobigna nasapla tela ei fadi'ara hui gheati, jateulanauwa gheati te atha kokora nasapladi ihei teke ei fadi'a harighami.
13Tovi sakreza kahe goifata mala mei fa'au'aughami,
ni kegra fotighami ka u noa noilaghi mae Satan.’
14Uve, te atha kokora ghotolu hna nasapla teke eira hatimare harighamu re, mae Mami te au klia ie kaina eulanauwa atha koko u nasapla teke eira ghotolure. 15Te theome atha koko ghotolu u nasapladi keha nanonire, mae Mami ghotolu te au klia ie kaina eulanauwa theome atha koko u nasapla teke eira ghotolure.”
Fagriu gna lugu
16Jisas ne lepo eu'ani, “Kate lugu ie, ghotolu tovi jateula te eira mae te muamugna ra euwa. Hatimare fadiadi'a lui kokofudire ka naga'e te lugu ie. Hatimare eiza igne, mala kokofuna nanonire eulana. Ni tutu'ani lui te lepoza rei ka ghotolu ie, hatimare la kulu atha hui nodi tabare ka nanonire. 17Ni kate lugu ie, baubahru nathata naflomire ni pore fakeli naklamire. 18Teu ghoe ie, nanonire kaina theome tangomana te laseza ne lugu ghoe teuwe. Kahe mae Mamu te theome tangomana kahe nanoni te kofiza ie lana te lasegho ghoe ie. Euwateuwe, mae Mamu mae ihei te kofiza hna te ei polo ghoe ie, magne kaina tabagho ghoe.”
Fagriu gna nadedei
(Luk 12:33-34)
19Jisas ne lepo eu'ani, “Tovi salofaudu malami thaimi u nadedeigna nauthoglu igne, eigna u kokorosi ni kukuku teure tangomana fadidi'a ra aulana. Ni mae te chiochikore tangomana te rere'o suga ie ni ruma chiko. 20Ni salofaudu malami thaimi u nadedeigna klia ie. Eigna ka teuwae u kokorosi ni kukuku teure theome tangomana te fadidi'a ie. Ni mae te chiochikore theome tangomana te rere'o suga ie ni ruma chiko.” 21Eigna ahia te au nomi nadedei ghotolu ie, ka teuwae lana te mala au ghotolu gaoghathomire tagna ie.
Nathamu ghoe ie jateula hnalu'i euwa
(Luk 11:34-36)
22“U nathamu ghoe ie jateula kahe hnalu'i eu ka thonomu ghoe ie, eigna ghoe tangomana te kofiza nabae ie. Ni te keli ghoe nathamure, ghoe kaina kafua fodu ka u nabae. 23Euwateuwe, te di'a lui ghoe nathamure, thonomu fate'o ghoe ie kaina tufuni romo. Eume, te the'o kahe nabae ka ghoe ni romo lana teuwe, ghoe kaina tufuni romo lui lana.”
Loku harira phalumae funei
(Luk 16:13; 12:22-31)
24Agnoni, Jisas neke lepo eu'anini, “The'o kahe nanoni te tangomana loku harira phalumae funei ie. Magne kaina ie ngaguza kahe mae funei lana, ni tho'anoaza keha ie. Magne kaina ie ghatho boheza lana kahe mae funei, ni theome ghatho boheza keha ie. Eume, ghoe theome tangomana te loku hariza God ni nadedei gna nauthoglu gne jateula phalu nou mae funei teuwe.”
Fagriu gna farouronu ka God
25Jisas ne lepo eu'ani, “Eigna igne te lepoza rei ka ghotolu ie, tovi nanganomi gna gano ni gna kho'u te mala kahra te'au ghotolu ie, ba gna u pohe maladi thonomi are. Eigna u nakahra ie goifata ke ulugnani gano, ni thono ie goifata ke ulugnani pohe. 26Fakofu sonighotolu ka memeha te flalo tafiri are. Memeha teuware theome hnuma gano, ba theome fnei posa gano mala thotoghei ka suga ie. Ni mae Mami ghotolu te au klia ie lana te fangamura re. Ni ghotolu goifata ke uludini memeha ire ka nathagna God ie. 27Ni neubane fua nangiza lui ghotolu nakahra ie, ghotolu theome tangomana teke na'a laoni kahe aowa ka nakahramire mala kahra laowa ka khata ichoni teuwe.
28“Ghotolu tovi nangaza u pohe te mala pipichi ie. Fakofu sonighotolu ka sisi te kahra tafiri ka naguta ie are. Sisi teuware theome loku ni theome e'ei nodi pohe eu thaidi. 29Ni te lepoza rei ka ghotolu ie, sisi teure tufuni khuakuda lui kokofudire. Neubane mae nafano Solomon, mae hei teke pipichi pohe te khuakuda lui tifa ie, magne neke theome pipichi kahe pohe jateula khuakudadi sisi ire nekeuwa. 30Thaigna God lana teke falalaoni ra sisi teure, u sisi te kahra te au gignoa igne ni nauthu'u teuwe kaina ke koko laora ka kha'aghi. Ghotolu ke uludini sisi ire. Ba, kaina theome falalaonighamu lana God mae Mami te au klia ie nefouba ghotolu ia? Nomi fatutu'ani ghotolure tufuni ichoni lui! 31Tovi nanga nomi me lepo eu'ani, ‘Na ngamu hna tati gnea, ba na ko'u hna, ba na pipichi ka hna ie euwa?’ 32Mae bongihehe te mala nangara lui puhi teure. Ni rei theome ngagughau te mala jateula hatimare teu ghotolu ie. Tutu'ani, mae Mami ghotolu te au klia ie kulu laseza hui te ghotolu ngagughamura goifata ire teuwe. 33Ni te keli ie, ghotolu kulu hirozauwa nakahra God te funei fruniza ie, ni kulu eira hna te ngagura magne re euwa. Te eu ghotolu ie, God kaina gu'ari harighamu goifata fate'o te ngagughamura ghotolure. 34Tovi nangiza naga'e nauthu'u ie, eigna nauthu'u ie au puhigna au thaigna te mala nangiza ie.”
© 2025 SIL Solomon Islands