Matiu 27
27
Hatimare udiza Jisas ne tei ka Paelat
(Mak 15:1; Luk 23:1-2; Jon 18:28-32)
1Boibongi fufugho, hatimare mae pirisi ulu ni mae funeidi Jiu teure ne kafua roghe mala falemeza Jisas. 2Hatimare ne haru faudu phalu khamegna Jisas re udiza ne tei ka Paelat, mae gavana gna Rom ie.
Glemegna mae Judas
(Mae khuru 1:18-19)
3Kate laseza mae Judas, mae teke majoraza Jisas te hatimare kaina fateza ni falemeza Jisas teuwe, magne ne ho'i gnagnafa. Agnoni, magne ne atha fapulo tolufulu nanugra teke atha magne ka mae pirisi ulu ni ka mae funei teure. 4Judas ne lepo eu'ani ka hatimare, “Rei la saplahui, eigna mae te majoraza rei igne, theome ke eiza kahe puhi te di'a.”
Hatimare ne lepo eu'ani ka magne, “Teuwae nou puhi ghoe thaimu, theome nomi puhi gheati.”
5Agnoni, mae Judas ne koko sorura nanugra teure ka Suga Blahi ie ni jifla. Ke leghugna teugne, magne tei ne froro thaigna.
6Ke leghugna teugne, mae pirisi ulure ne atha nanugra re ne lepo eu'ani, “Ka noda vetula tati ie, theome sakreza te mala kakaliti nanugra igne baludi nanugra gna Suga Blahi ie. Eigna nanugra igne neke tabagna mae faleme noni.” 7Agnoni, hatimare ne kahe gaoghatho, ne atha nanugra igne ne tei fofoli kahe hnimoto glose te nata ka mae te e'ei kapu ni thapera teuwe, mala nana'a bekudi nanoni te theome Jiure. 8Eigna teugne, hatimare ne kiloza hnimoto nata teugne, “Nata Dadara,” eu ghile dufu gignoa igne. 9Igne ne horoghoto ka hna teke lepo eu'ani mae profet Jeremia tifa ie, “Hatimare ne atha haghe tolufulu nanugra, teugne au nanugra te gnagura nanonidi Israel re te mala foliza magne ie. 10Hatimare atha nanugra igne ne foliza noa hnimoto nata mae te e'ei kapu ni thapera, jateula Lod teke lepo harighau rei ie.”#27:10 Sekeraea 11:12,13; Jeremaea 19:1-13; 32:6-9.
Paelat ne ghuhnaza Jisas
(Mak 15:2-5; Luk 23:3-5; Jon 18:33-38)
11Jisas ne kegra ke ulugna Paelat, mae gavana gna Rom ie. Ka teuwae, Paelat ne ghuhna eu'ani ka Jisas, “Ba, ghoe tufuni nodi Nafano mae Jiure gnea?”
Jisas ne ho'ilepo eu'ani ka magne, “Uve, te lepoza huila ghoe ae.”
12Ni kate ghuhna mae pirisi ulu ni mae thotoghei funeidi Jiu teure, Jisas theome ke ho'ilepora lana hatimare. 13Agnoni, mae Paelat neke lepo eu'ani ka magne, “Rogira au nauwa ghoe puhi chuku te fathorogho nanoni irea?” 14Ni Jisas ne theome ke ho'ilepo lana ka mae Paelat. Eume, mae Paelat ne tufuni vere noa lui ka magne.
Hatimare fate falemeza Jisas
(Mak 15:6-15; Luk 23:13-25; Jon 18:39–19:16)
15Leuleghu finogha ka naga'e Ngahngamu te kiloza Pasova ie, mae Paelat tangomana te sakre fajiflaza kahe mae te au ka suga sosolo, leghuza nodi tore nanoni Jiure. 16Ka naga'e teuwae, kahe mae teke ei puhi te tufuni di'a lui ie neke au lana ka suga sosolo ie. Nanoni te hui re tufuni laseza puhigna mae teugne, nahngagna mae teugne Barabas. 17Agnoni, kate kafua krapu mei nanonire ke kosigna noa suga mae Paelat ie, Paelat ne ghuhna eu'ani ka nanonire, “Mae ihei ka phalumae ire te ngagughamu ghotolu mala sakre fajiflaza rei tami ie? Mae Jisas Barabas, ba, Jisas te kiloza mae Kraes ie?” 18Ni mae Paelat kulu laseza hui te hatimare mae te udiza te mei Jisas ka magne re, gogotuza lana Jisas teuwe.
19Kate hokro fateza Jisas te'au mae Paelat ie, khetogna magne ne famei kahe grorogo. Grorogo igne lepo eu'ani, “Tovi eiza kahe puhi ka mae te the'o ki nakhibogna teuwae. Eigna ka mifi bongi ie, rei neke kofiza magne ne theome thuru nogu fakeli.”
20Ni hatimare mae pirisi ulu ni mae velepuhi teure ne lepora nanonire mala huhuruza Paelat mala fajiflaza Barabas ka suga sosolo ie, ni falemeza Jisas.
21Agnoni, Paelat neke ghuhna eu'anini ka nanonire, “Mae ihei ka phalumae ire te ngagughamu ghotolu mala sakre fajiflaza rei ie?”
Nanonire ne aku fapulo eu'ani ka magne, “Mae Barabas!”
22Ni Paelat neke ghuhna eu'ani, “Ni hna nate eiza rei ka Jisas te kiloza mae Kraes gne?”
Hatimare ne kafua aku fabi'o, “Tupijuruza ka gazu fafata ie!”
23Mae Paelat neke ghuhna eu'anini ka hatimare, “Hna puhi di'a teke eiza magne mala fate falemeza rei magne ie?”
Hatimare ne kafua aku fabi'o eu'ani, “Tupijuruza ka gazu fafata ie!”
24Kate kofiza mae Paelat te magne theome tangomana mala fanotora hui nanonire, ni jame na fufunu hagheza kahe magra teuwe, magne ne atha kho'u ne lulumi khamegnare ke uludi nanonire, ni lepo eu'ani, “Glemegna mae igne, theome nogu puhi rei. Igne nomi puhi huila ghotolu thaimi!”
25Agnoni, nanonire ne kafua lepo eu'ani ka magne, “Uve, glemegna mae teugne nomi puhi gheati thaimi ni vikemi teu gheati kaina re!”
26Agnoni, Paelat ne leghuza hna te toreza nanonire ne sakre fajiflaza Barabas. Ni lepora noa mae soldiare aniza Jisas ka pruki, ni tupijuruza ka gazu fafata ie.
Mae soldiare ne ma'eza Jisas
(Mak 15:16-21; Jon 19:2-3)
27Noa soldia mae Paelat re udiza Jisas ne tei hnua ka noa suga bi'o mae gavana ie. Agnoni, hatimare mae soldia fate'o re ne kafua mei kegra falithuza Jisas. 28Hatimare ne atha koko noa phoko magne re neke na'a lao kahe phoko chichi'a ngoangosa ka magne mala jateula mae Nafano eu magne. 29Euwateuwe, hatimare ne na'a lao kahe khepi fifiriulu ka pha'ugna magne ie. Ni faloku lao kahe khodo ka phile khame matugna ie mala jateula mae nafano eu magne kokofugna ie. Euwateuwe hatimare ne turununu soru ke ulugna Jisas ne ma'eza magne. Agnoni, hatimare ne lepo eu'ani ka magne, “Lepo fakeligho, nodi Nafano hatimare mae Jiure!” 30Mae soldiare ne michuza Jisas, ni atha khodo ka khamegna ie ne aniza ne aniza pha'ugna magne ie. 31Ke leghugna te ma'eza magne ie, mae soldiare neke atha koko phoko chichi'a ngoangosa teke fahaghe magne ie, euwateuwe ke falao noa phoko thaigna re. Agnoni, hatimare ne udi fajiflaza magne ka suga bi'o ie mala tei tupijuruza ka gazu fafata ie.
Hatimare tupijuruza Jisas
(Mak 15:21-32; Luk 23:26-43; Jon 19:17-27)
32Kate jifla te tei hatimare ie, hatimare ne fadeidei ka kahe mae gna Saerin, nahngagna mae teugne Saemon. Agnoni, mae soldiare ne huhuruza magne mala pala noa gazu fafata Jisas ie. 33Hatimare ne tei dufu ka kahe hnimoto te kiloza Golgota. Golgota teugne gaoghathogna ie, “Nahuli Pha'u”. 34Ka teuwae mae soldiare ne gulao waen ka Jisas mala ko'u magne. Ni waen teugne hatimare ngigno balu phopoji te fua paza lui. Ni kate gnaignamiza waen ie, magne ne tho'anoa lana ko'ugna ie. 35Agnoni, ke leghugna te tupijuruza Jisas ka gazu fafata ie, mae soldiare ne tufa noa pohe magne re ka farithaidi, kate nanaeru khale ie. 36Agnoni, hatimare ne hokro ne koikofiza magne kate sei te'au magne ka gazu fafata ie. 37Hatimare ne tuge lao ke kliagna pha'ugna Jisas ka gazu fafata ie kahe fathoro, te i'ini eu'ani,
JISAS NODI NAFANO MAE JIU.
38Agnoni, phalumae chiochiko lanauwa te tupijuru ra hatimare ka gazu fafata kehreagna Jisas ie. Kahe mae ka phile matugna, ni keha ie ka phile merigna. 39Nanoni te liu ari ka teuwae re tufuni ngingirira lui ne lepo fadi'aza Jisas. Hatimare ne faviuviru pha'udire ne lepo eu'ani, 40“Ghoe te lepoza ie ne ghoe tangomana rere'o soru Suga Blahi ie, euwateuwe ke babana fapulo ka glamagna tholu naga'e teu ia. Ne tutu'ani na te Thugna God ghoe ie ni, soru mei ka gazu fafata ie, ni fakahrigho thaimu!” 41Hatimare mae pirisi ulu, ni mae velepuhigna vetula noa mae Moses, ni mae funeidi Jiu teure ne ma'eza lanauwa Jisas, 42ne lepo eu'ani, “Tholumae! Magne fakahrira lana keha nanonire ni theome tangomana te fakahriza thaigna! Ne tufuni mae nafano gna Israel na magneni, soru mei ka gazu fafata ie gignoa igne lana, malani fatutu'aniza tati magne euwa. 43Magne au noa grouronu ka God, ni lepoza koba ne Thugna God teuwe. Agnoni, me tu'ani magne te God ie ghathoza magne ie, lisa laoza mala mei God fakahriza magne.” 44Eulanauwa phalumae chiochiko teke tupijuru balugna Jisas re ne lepo fapaipariza lanau magne.
Gleme gna Jisas
(Mak 15:33-41; Luk 23:44-49; Jon 19:28-30)
45Farihotei aublathagna, nau hia te hia Israel re ne romo au ne ghile tahngi tholuni. 46Jame tahngi tholuni, Jisas ne aku fabi'o eu'ani, “Eli, Eli, lema sabaktani?” Gaoghathogna ie, “Nogu God, nogu God, ne ihna ghoe te tei ka'aghau rei gnea?”#27:46 Sam 22:1.
47Keha nanoni te kegra te'au ka teuwae re ne rogiza igne ne lepo eu'ani, “Tholumae! Magne kiloza mae profet Elaeja!”
48Kahe mae ka hatimare chari ne tei atha kahe phocho ne fabobothu ka u waen te fua paza lui ie, ne chuchuru ka khukrugna khodo ie. Agnoni, magne ne tusu haghe ka najujupe gna Jisas ie mala ko'u magne. 49Ni keha nanonire ne lepo eu'ani, “Lisaza au mala kofinodaza meula mei mae Elaeja fakahriza magne!”
50Ka teuwae, Jisas neke aku fabi'oni, eu ne hui magne ne leme.
51Kate leme Jisas ie, pohe bi'o teke fasesei hnua ka Suga Blahi mala tatahogna hnimoto te tufuni blahi lui ie ne breku palu funu klia ne dufu pari. Ni eulanauwa nakheu bi'o ie ne fahngaliza nauthoglu gne, ni thina bi'o re ne phigle. 52-53Agnoni bekure ne thora, euwateuwe chuku nanoni te kohlo ka nathagna God teke leme tifa re ne kafua kegra fapulo, ne jifla mei ka bekudire. Ni kate kegra fapulo Jisas ka gleme ie, nanoni teure ne kafua tei ka gruru blahi i Jerusalem. Euwateuwe chuku nanonire ne kafua kofira hatimare.
54Ka hnimoto teuwae, mae funei bi'odi mae ami ni keha mae soldia teu teke koikofiza Jisas re ne hmau nodi lui ka nakheu bi'o igne, ni ka goifata fate'o te eira ka naga'e teugne. Hatimare ne lepo eu'ani, “Tutu'ani lui, mae igne tufuni Thugna God!”
55Chuku ga'ase teke mei funudi Galili balugna Jisas te toghoza lui magne re, kegra au maghani ne kofututu lana. 56Ire nahngadi keha ga'ase ka teure, Mere gna Magdala, Mere dodi mae Jems ni Josep, ni dodi mae Jems ni mae Jone (phalu thugna mae Zebedi re).
Giugilu gna Jisas
(Mak 15:42-47; Luk 23:50-56; Jon 19:38-42)
57Ka grafi teuwae, kahe mae nadedei gna Arimatea te au Jerusalem ie ne mei. Nahngagna mae teugne Josep, ni magne kahe noa mae farogo lanau Jisas. 58Magne ne tei ka mae Paelat ne toreza thonogna Jisas ie. Agnoni, mae Paelat ne lepo ka hatimare mala sakreza thonogna Jisas ie ka magne. 59Agnoni, Josep ne atha soru thonogna Jisas ie ne fifiriza ka pohe vegha te valu. 60Magne ne tei nana'a thonogna Jisas ie ka noa gluma valu thaigna teke jokhi ka thina bi'o ie. Agnoni, magne ne pili lao kahe thina thataba bi'o mala fofotogna gluma ie ni tei noa. 61Mere gna Magdala ni keha Mere ie, hokro kehreagna gluma ie ni kofu lao ne'au.
Mae soldiare ne sedereza gluma ie
62Kahe naga'e ke leghugna igne, ka u naga'e Sabat, hatimare mae pirisi ulu ni mae Farisi teure ne kafua tei ka mae Paelat. 63Hatimare ne lepo eu'ani ka magne, “Mae funei, gheati kela ghatho fapuloza teke lepo eu'ani mae te muamugna ia kani kahragna na teke au magne ia, ‘Rei kaina ke kahra fapulo ka gleme ka fatolu naga'e ie, teu ia.’ 64Eume, gheati ngagughamigho ghoe te lepora nou mae glokure, mala koukofu fakeliza gluma ie ghile dufiza fatolu naga'e ie. Na eu tei noa mae farogo magne re chikoza la thonogna magne ie, ni ke thuturi muamugna ra hatimare nanonire, ne kahra fapulo hui magne teuwe euwa. Euwateuwe, muamugna teugne kaina ke di'agnani muamugna te eiza magne kate kahrana teke au magne ia.”
65Agnoni, mae Paelat ne lepo eu'ani ka hatimare, “Uve, lepora sonighotolu keha mae soldiare mala tei koikofi fakeliza hatimare gluma ie.” 66Eume, hatimare ne kafua tei ka gluma ie ne tufuni pige famaku thina bi'o te fofoto u glumagne, mala theome tangomana nanoni te mei atha poloza thonogna Jisas ie. Euwateuwe, hatimare ne nana'a keha mae soldia mala koikofi fakeliza gluma ie.
© 2025 SIL Solomon Islands