Matiu 26
26
Mae funeidi Jiure roghe mala falemeza Jisas
(Mak 14:1-2; Luk 22:1-2; Jon 11:45-53)
1Ke leghugna te lepora te hui puhi ire, Jisas ne lepo eu'ani ka noa mae farogore, 2“Ghotolu laseza hui, nauriha lana naga'e Ngahngamu te kiloza Pasova ie. Ka naga'e teuwae, mae te majoraghau rei ie kaina sakre laoghau rei ka khamedi mae naokare, mala tupijurughau rei ka gazu fafata ie.”
3Agnoni, hatimare mae pirisi ulu ni mae funei bi'odi Jiure ne eiza kahe faudu ka sugagna mae nului pirisi Kaefas. 4Ka faudu teugne, hatimare rogheza mala sagu poloza Jisas ni falemeza magne. 5Agnoni, hatimare kahe gaoghatho ne lepo eu'ani, “Tati kaina tovi eiza igne ka ngahngamu ie. Na euni di'atadi lui nanonire ka tati ni fufunu haghe kahe magra bi'o euwa.”
Kahe ga'ase ne tofa sedi ka pha'ugna Jisas i Betani
(Mak 14:3-7; Jon 12:1-8)
6Jisas ne au Betani ka sugagna mae Saemon, mae teke dufiza fogra lepa tifa ia. 7Kate ngamu te'au Jisas ie, kahe ga'ase ne atha kahe botolo sedi te tufuni sisiri khuakuda ni fua haghe lui fofoligna ie ne mei ka magne. Gne'e mei ne toatofa sedi teugne ka pha'ugna Jisas ie.
8-9Agnoni, noa mae farogore magne re kofiza te eiza gne'e igne ne di'atadi lui. Hatimare ne lepo eu'ani, “Tholumae! Chochoghei lana soni gne'e sedi te siri khuakuda teugne! Sedi teugne jame sabiri gne'e meuwe, atha nanugra bi'o ni gulao ka nanoni te kuma re.”
10Ni Jisas ne laseza hna te lepoza hatimare ie ne ho'ilepo eu'ani, “Ne fahneuwa ghotolu te di'atamiza ga'ase ignea? Gne'e eiza au puhi te keli ie harighau rei. 11Nanoni te kuma re au fatheve balumi ghotolu,#26:11 Diutronomi 15:11. eume ghotolu tangomana te toghora nafnata nanoni teure ka naga'e te ngagughamu ghotolu ie. Ni te rei gne, rei kaina theome au fatheve balumi ghotolu. 12Ga'ase igne toatofa sedi ie ka thonogu rei tarabana mala giugiluza thonogu rei. 13Eume, tutu'ani lui te lepoza rei ka ghotolu ie. Ahia ka nauthoglu gne te thuturiza u Grorogo te Keli ie, nanonire kaina ie ke ghatho fapuloza hna teke eiza gne'e ie.”
Judas majoraza Jisas
(Mak 14:10-11; Luk 22:3-6)
14Ke leghudi teure, kahe mae ka hatimare saleiphalu mae farogore tei ne lepo ka mae pirisi ulure. Nahngagna mae farogo teugne mae Judas Iskariot. 15Magne ne ghuhna eu'ani ka hatimare, “Jame me sakre ariza rei Jisas gne ka ghotolu ie, hna kaina te folighau rei ghotolu ie?” Eume, hatimare ne a'ahe nanugra ne gulao tolufulu nanugra ka magne. 16Agnoni funu ka teugne, mae Judas ne tukiza naga'e mala sakre laoza Jisas ka hatimare ie.
Jisas ngamu baludi noa mae farogore ka Ngahngamu Pasova ie
(Mak 14:12-21; Luk 22:7-13,21-23; Jon 13:21-30)
17Ka naga'e ulu lahu Ngahngamu Gna Bereti te The'o Isi gna ie, mae farogore mei ne ghuhna eu'ani ka Jisas, “Hiani te ngagugho ghoe te mala tarabana gheati Ngahngamu gna Pasova ie?”
18Jisas ne ho'ilepo eu'ani ka hatimare, “Ghotolu tei kofiza kahe mae te au ka nau ke ulu ae ni lepo eu'ani ka magne, ‘Mae velepuhi ie ne lepo eu'ani, nogu naga'e rei ie la thata hui. Rei kaina mei baludi nogu mae farogore mala ngamu Ngahngamu gna Pasova ie ka sugamu ghoe.’ ” 19Mae farogore ne leghuza hna te lepoza Jisas ie ne tei tarabana gano malagna Ngahngamu Pasova ie.
20Ka grafi teuwae, Jisas ne ngamu baludi saleiphalu noa mae farogore. 21Kate ngamu te'au hatimare ie, Jisas ne lepo eu'ani, “Tutu'ani lui te lepoza rei ka ghotolu ie. Kaheni ka ghotolu saleiphalu mae ire kaina sakre laoghau rei ka khamedi nogu mae naokare.”
22Kate rogiza goeghozegna Jisas gne, mae farogore ne tufuni di'agnagnafadi lui, ne sopagna ghuhna eu'ani ka magne, “Lod, ghoe theome eughau rei?”
23Jisas ne lepo eu'ani ka hatimare, “Mae ihei nate fabobose gea bereti ie ka disi balugu rei ie, mae teuwae lana kaina te majoraghau rei ie. 24Rei mae teke mei funugu ka God gne kaina leme jateula te lepoza ka i'ini blahi ia euwa. Ni kokhoniza lui mae ihei nate sakre laoghau rei ka khamedi nogu mae naokare. Thokagna ie mae teugne jame neke theome kahra mei lana ka nauthoglu gne, eigna magne kaina au paapara lui!”
25Mae Judas ne ghuhna eu'ani, “Tutu'ani, Velepuhi, ghoe theome eughau rei?”
Ni Jisas ne lepo eu'ani ka magne, “Uve. Ghoe au lana.”
Jisas ne fufunuza ngamu blahi
(Mak 14:22-26; Luk 22:14-20; 1 Korin 11:23-25)
26Kate ngamu te'au hatimare ie, Jisas ne atha kahe bereti ne lepo fakeliza ka God, ne phipile. Magne ne gulao ka noa mae farogore ne lepo eu'ani, “Atha bereti igne ni ngamu. Bereti igne u thonogu rei.”
27Magne eulanauwa ne atha kapu te fodu waen ie ne lepo fakeliza ka God. Magne ne gulao ka noa mae farogore ni lepo eu'ani, “Ghotolu te hui ko'u waen igne. 28Igne dadaragu rei mala fahetagna u noa na'alepo valu God ka noa nanonire. Dadara igne tofa mala fakahrira nanoni chuku, mala atha koko God nakhibodire. 29Ni te lepoza rei ka ghotolu ie, rei kaina theome ko'u kahe waen ke leghugna igne, ghile dufu mei naga'e nate ko'uza rei waen valu balumi ghotolu ka noa nauthoglu valu mae Magu ie.”
30Ke leghugna igne, Jisas ni noa mae farogore ne koze kahe himu mala kilo uluza God. Agnoni, hatimare jifla ne tei ka Gukhu Gazu Oliv ie.
Jisas lepo fatakleza te mae Pita kaina iho noaza magne teuwe
(Mak 14:27-31; Luk 22:31-34; Jon 13:36-38)
31Jisas ne lepo eu'ani ka noa mae farogore, “Nabongi ie ghotolu kaina kafua tei kokoghau rei, eigna puhi nate eiza hatimare ka rei ie. Igne hna teke lepoza God ka i'ini te blahi ie,
“ ‘Rei kaina falemeza mae koukofu sipsip ie,
euwateuwe thotoghei sipsipre kaina pelo tafiri.’#26:31 Sekeraea 13:7.
32Ni ke leghugna te kegra fapulo rei ka gleme ie, rei kaina kulu tei ke ulumi ghotolu Galili.”
33Ni mae Pita ne lepo eu'ani ka Jisas, “Neubane kafua tei kokogho mae farogore, rei kaina theome tei kokogho ka hna nate eiza hatimare ka ghoe ie!”
34Agnoni, Jisas ne lepo eu'ani ka Pita, “Tutu'ani lui te lepoza rei ka ghoe ie. Ame tahngina kokorako ie nabongi teuwe, ghoe kaina tholu fata lepoza te ghoe iho noughau rei teuwe.”
35Ni Pita ne lepo eu'ani ka Jisas, “Rei theome tangomana te lepoza ne iho nogugho teuwe, rei kaina mala leme balumu ghoe.” Ni keha mae farogore eulanauwa ne lepoza nafnata goeghoze teugne ka Jisas.
Jisas tarai Getsemani
(Mak 14:32-42; Luk 22:39-46)
36Agnoni, Jisas ne tei baludi noa mae farogore ka kahe hnimoto te kiloza Getsemani. Magne ne lepo eu'ani ka hatimare, “Ghotolu hokro au ani mala tei tarai rei ke dela ae.” 37Ni magne ne udira Pita ni phalu thugna mae Zebedire, mae Jems ni Jon mala tei balugna. Kateuwae, Jisas la funu di'agnagnafa ni kokhoniza eu lui. 38Magne ne lepo eu'ani ka tholumare, “Di'agnagnafa ie la bi'o lui ka rei, ni rei la thatai leme ka puhi teugne. Ghotolu au ani mala dofra balugu rei.”
39Agnoni, Jisas ne ghae famaghani khata hnimoto ka tholumare. Magne turununu soru ne tarai eu'ani, “Maghe, jame tangomana ie, ghoe tovi sakreghau rei mala au paapara ka nafnata puhi igne. Ni meuba, eiza hna te ngagughoza thaimu ie, tovi leghuza hna te ngagughauza rei ie.”
40Agnoni, Jisas neke pulo ka tholu noa mae farogore ne kofira te thuru te'au lana tholumare re. Magne ne lepo eu'ani ka mae Pita, “Pita, ne fahneuwa ghotolu te theome tangomana dofra balugu rei kahe aowa gua gnea? 41Dofra ni tarai, mala theome uthu ka noa fa'au'au mae Satan ie. Eigna gaoghathomu ghoe ie ngaguza te eiza hna puhi te kohlo ie, ni thonomu ie fua glape lui euwa.”
42Eune hui, Jisas neke teini fapalu fata ne tarai eu'ani, “Maghe, keli lui te theome atha koko ghoe ka rei puhi te khata igne, rei kaina eiza fahui hna te ngagughoza ghoe ie.”
43Agnoni, Jisas neke pulo meini ka tholumae farogore. Magne ne kofira tholumare thuru nodi au lana, eigna nathadire fua kukape lui. 44Jisas neke ghae famaghanirani tholumare ne tei tarai fatolu fata, ni magne neke leporani lana hna teke lepora hui re.
45Agnoni, Jisas neke pulo meini ka tholu noa mae farogore ne lepo eu'ani, “Ghotolu thuru ni gnafa nomi eu au lana gnea? Fakofu sonighotolu, gignoa igne huila naga'e mala sakreghau rei hatimare ka khamedi mae te nakhibore. 46Kegra haghe, ari ghae noda! Fakofu sonighotolu, mae ihei te mala sakre laoghau rei ka khamedi hatimare ie tela mei hui igne!”
Hatimare ne saguza Jisas
(Mak 14:43-50; Luk 22:47-53; Jon 18:3-12)
47Agnoni, kate vese te'au Jisas ka noa mae farogore, Judas, kahe mae ka hatimare saleiphalu noa mae farogo magne re ne mei. Chuku mae lui te mei balugna mae Judas re, hatimare louloku naflahi mala magra, ni nanala eu baludi ne mei. Mae pirisi ulu ni keha mae funei eu teke kuri meira hatimare re. 48Ni Judas neke kulu lepo harira hui hatimare kahe falalase. Magne neke lepo eu'ani ka hatimare, “Mae nate lao gnahngoza rei ie, mae teuwae lana te mala saguza ghotolu ie.” 49Agnoni, mae Judas kohlo ne tei ka Jisas ne lepo eu'ani, “Mae velepuhi, keliphari ie au balumu ghoe!” Eune hui magne ne gnahngoza Jisas#26:49 Gnahngo teuza igne gaoghathognae “kisi” ihei te ruma mei ka nodi suga re jateula te kubaeni teu te eira tati re hatimare kisi ra. Igne nodi kastom hatimare mae Israel ni keha kantri re ba eiza lanauwa kastom teugne dufu gignoa igne..
50Ni Jisas ne lepo eu'ani ka magne, “Mae kheraguia, eiza faghose sonighoe hna te ngagugho mei eiza ie.”
Agnoni, hatimare mei ne saguza Jisas. 51Kate mei hatimare te saguza Jisas ie, kahe mae ka noa mae farogo magne re ne kohro fajifla noa naflahi mala magra ie ne toka kusu khuligna noa mae gloku mae pirisi ulu ie.
52Ni Jisas ne lepo eu'ani ka magne, “Ei, nana'a fapulo nou naflahi ie ka hnimoto mala augna ie. Ihei te magra ka naflahi ie kaina kafua leme ka naflahi. 53Tutu'ani lui, ghoe laseza igne. Rei tangomana te toreza mae Magu mala kuri mei ra chuku thogha engjel mala toghoghau ie. 54Ni rei theome eiza igne, eigna rei mala horoghoto au ka hna te lepoza ka i'ini te blahi ia.”
55Euwateuwe, Jisas ne lepo eu'ani ka nanonire, “Ihna, ne mae chiochiko rei eu ghotolu te mei balu naflahi ni nanala mala lokighau rei teugnea? Leuleghu naga'e rei hokro fagriura koba nanonire ke hnua Suga Blahi, ni ghotolu theome mei lokighau lana rei. 56Ni puhi ire dufu mei ka rei gignoa igne, mala horoghoto ka hna teke i'ini ra hatimare mae profet tifara.” Agnoni, kate rogira goeghozegna magne ire, mae farogore ne kafua pelo kokoza magne.
Jisas ke uludi mae mala fate re
(Mak 14:53-65; Luk 22:54-55,63-71; Jon 18:13-14,19-24)
57Agnoni mae te saguza Jisas re, udiza ne tei magne ka sugagna Kaefas, mae nului pirisi ie. Hatimare mae velepuhigna vetula noa mae Moses ni keha mae funei lanauwa teure ne kafua krapu hui ne au ka teuwae. 58Ni mae Pita ne leghura lanauwa hatimare ne tei, ni magne theome fathata ka hatimare. Kate tei te dufu magne ka noa suga mae nului pirisi ie, magne ne hokro ka glalaba ie baludi mae te koukofu gna Suga Blahi re, mala kofiza hna nate eiza hatimare ka Jisas ie.
59Mae pirisi ulu ni thotoghei mae funei teure ne fariuriu hirora keha thuturi muamugna, mala tangomana hatimare te fate falemeza Jisas ie. 60Chuku nanoni ne mei ke uludi mae mala fate re ne thuturi muamugna gna Jisas. Ni mae mala fate re theome kofudeiza lana kahe nafugna ka nodi thuturi hatimare re te mala fate falemeza Jisas ie.
Agnoni leghu lahu ie, phalumae kegra haghe ne lepo eu'ani, 61“Gheati rogiza mae igne neke lepo eu'ani, ‘Rei tangomana te rere'o soru noa Suga Blahi God gne, euwateuwe ke babana fapulo ka glamadi tholu naga'e.’ ”
62Agnoni, mae nului pirisi gne kegra haghe ne ghuhna eu'ani ka Jisas, “Ihna, ghoe the'o ki nou ho'ilepo ka fathoro te eira hatimare ka ghoe ire?” 63Ni Jisas ne theome ke ho'ilepo.
Agnoni, mae nului pirisi ie ne lepo eu'ani ka magne, “Gignoa igne ghoe kaina na'alepo ka gheati. Rei ngagughaugho ghoe ka nahngagna God te kahra, lepo mei ka gheati ka te tutu'ani: Ihna, ghoe lana mae Kraes Thugna God ie?”
64Agnoni, Jisas ne lepo eu'ani ka magne, “Uve, te lepoza te au huila ghoe ae! Ni te lepoza rei ka ghotolu ie: Nauthu'u nauriha ie, ghotolu kaina kofighau rei mae teke mei funugu ka God ie, hokro phile matugna God mae te tufuni noilaghi ie. Ni ghotolu kaina kofighau rei mei ke klia gromo ka manga ie.”#26:64 Sam 110:1; Daniel 7:13.
65Kate rogiza igne, mae nului pirisi ie ne di'atagna lui, ne rereku noa phoko ie, ni aku fabi'o eu'ani, “Tholumae! Mae igne lepo fapariza God! Gignoa igne tati theome ngagughita keha thuturini gna magne. Eigna ghotolu la rogiza hui thaimi magne te lepo fapariza God ie. 66Ba! Ihna eu ghotolu gaoghathomire?”
Nanonire ne kafua lepo eu'ani fabi'o, “Magne thokagna lui te mala leme ie!”
67Agnoni, hatimare ne michu ka nathagna ni naflogna teu magne re. Ni keha nanonire ne nutiza magne. 68Euwateuwe hatimare ne ghuhna eu'ani ka magne, “Te ghoe Kraes ie, lepo meiza ba ghoe, mae ihei te nutigho ghoe ie?”
Pita lepoza te magne ihonoaza Jisas
(Mak 14:66-72; Luk 22:56-62; Jon 18:15-18,25-27)
69Kate hokro te'au mae Pita ka glalaba gna suga ie, kahe ga'ase gloku noa mae pirisi ulu ie mei ne lepo eu'ani ka magne, “Ghoe kahe mae te balugna lanauwa Jisas gna Galili ie.”
70Mae Pita ne mugna ke uludi nanoni kegra te'au ka teuwae re, ne lepo eu'ani, “Rei theome lase noguza hna te lepoza ghoe gne.”
71Agnoni, magne jifla ne tei kegra kehreagna nathanga gna bara ie. Ka nathanga teugne kahe ga'ase lanauwa ne kofiza magne. Gne'e ne lepo eu'ani ka nanoni kegra te'au ka teuwae re, “Mae igne kahe mae te balugna lanauwa Jisas gna Naesaret ie.”
72Ka hnimoto teuwae, mae Pita mugna ne lepo eu'ani balu baubahu, “Rei theome laseza Jisas ie!”
73Theome raugha lana ke leghugna igne, keha nanoni kegra te'au ka teuwae re ne lepo lao ka mae Pita, “Tutu'ani lui, ghoe kahe maemu Galili baludi mae te leghuza Jisas re, eigna gheati lasegho ka naogladi nafnata goeghoze te eira ghoe re.”
74Ni mae Pita ne thibriza thaigna ne lepo eu'ani, “Tutu'ani God klia lana! Te mugna rei ie, God kaina fateghau rei! Rei theome laseza mae teugne!”
Theome raugha ke leghugna te lepoza mae Pita igne, kokorako ie taitahngi. 75Agnoni, mae Pita neke ghatho fapuloza hna teke lepo eu'ani Jisas ia, “Ame tahngina kokorako ie nabongi teuwe, ghoe kaina tholu fata lepoza te ghoe iho noughau rei teuwe.” Agnoni, magne ne jifla ke kosi ne tahngi noa lui, eigna magne fua di'agnagnafa.
© 2025 SIL Solomon Islands