Matiu 28
28
Jisas neke kahra fapulo
(Mak 16:1-10; Luk 24:1-12; Jon 20:1-10)
1Ke leghugna naga'e Sabat, boibongi fufughogna naga'e Sande. Mere gna Magdala ni keha Mere ie repa ne tei sighoza gluma ie.
2Agnoni, kahe nakheu bi'o megona ne fahngaliza hnimoto teugne, euwateuwe kahe engjel noa Lod ne soru mei funu klia ne pili famaghani thina bi'o ie, ne hokro ke kliagna thina ie. 3Kokofu gna engjel gne siasigla jateula naglisa, euwateuwe noa pohe ie tufuni vegha lui. 4Ka teuwae, hatimare mae soldia teke koikofiza glumagne ne kafua hmau nodi lui ne uthu pari jateula nanoni te leme ra neuwa.
5Agnoni, engjel gne ne lepo eu'ani ka phalu ga'ase teure, “Tovi hmau. Rei laseghamu ghopa hiroza Jisas, teke tupijuru hatimare ka gazu fafata ia. 6Ni magne the'oza ani euwa. Magne kela kahra fapulo hui, jateula teke kulu lepoza hui magne ka ghotolu tifa ia euwa. Mei soni ghopa kofiza hnimoto teke au thonogna magne ie. 7Ghopa kaina faghose ke pulo lepo eu'ani ka noa mae farogo magne re, ‘Jisas ie kela kahra fapulo hui. Ni gignoa igne magne kaina kulu tei Galili mala tukighamu ghotolu. Ka teuwae kaina te kofiza ghotolu magne ie.’ Igne nogu goeghoze rei ka ghopa ie.”
8Agnoni, repa ghoseni ne tei kokoza gluma ie, eigna repa fua hmau nodi lui, ni repa ba tufuni hneahnegha nodi lui lanauwa. Eume, repa chari tei ne thuturi ka noa mae farogore Jisas re. 9Agnoni, Jisas megona ne takle ka repa ne lepo eu'ani, “Keliphari au ka ghopa!” Repa ne loku lao ka nenegnare, ne lepo fakeliza magne. 10Ni Jisas ne lepo eu'ani ka repa, “Tovi hmau. Tei lepora nogu mae farogo rei ra mala tei Galili. Ka teuwae, kaina te kofighau rei hatimare ie.”
Mae soldiare ne thuturi muamugna gna Jisas
11Ni kate zaoza'o te tei te au repa ka nabrau ie, keha mae soldia teke dofra koikofiza gluma re ne kulu tei dufu hui la Jerusalem ka mae pirisi ulure, ni thuturira hna puhi fate'o te kofira re. 12Agnoni, mae pirisi ulure baludi keha mae funei ka mae Jiure, ghonei faudu ne famamaku nodi groghe; hatimare ne gulao nanugra bi'o ka mae soldiare. 13Agnoni, hatimare ne fagriu eu'ani ka mae soldiare, “Ghotolu kaina lepo eu'ani ka nanonire, ‘Noa mae farogo Jisas re thuru iglu aulana gheati farihotei bongigno ne mei atha thonogna magne ie.’ 14Ni ne rogizana mae Paelat puhi teugneni, ghotolu tovi hmau, gheati kaina toghoghamu ghotolu thuturi au balugna magne gnadi puhi ire.” 15Agnoni, mae soldiare ne atha nanugra bi'o teke gulao hatimare re ne tei eiza hna teke lepora hatimare re. Eume, thuturi muamugna teke eiza mae soldiare, ne tei hia te hia ka nanonidi Jiure ghile dufiza gignoa igne.
Noa fagriu Jisas ka mae farogore
(Mak 16:14-18; Luk 24:36-49; Jon 20:19-23; Mae khuru 1:6-8)
16Agnoni, salei kahe mae farogore ne tei dufu Galili. Hatimare ne tei dufu ka gukhu te lepoza Jisas mala tei hatimare teuwe. 17Kate dufu hatimare ka teuwae ie, hatimare ne kofiza Jisas ne turununu soru ni lepo fakeliza magne, ni meubanauwa, kehare theome fatutu'ani aulana. 18Agnoni, Jisas ne mei kegra kehreadi hatimare ne lepo eu'ani, “Mae Magu la sakre mei huila ka rei noilaghi fate'o gna klia ni pari teure. 19Eume, ghotolu tei fagriura nanoni fate'o ka nau te hui ka nauthoglu gne mala nogu mae farogo rei. Ni fasiublahira ka nahngagna Mada ni Thugna ni Tharunga te Blahi. 20Ni eulanauwa, fagriura hatimare mala leghura gobigna goifata te lepora rei ka ghotolura. Ni rei kaina au balumi ghotolu fatheve ghile dufiza huigna nauthoglu gne.”
© 2025 SIL Solomon Islands