Matiu 23
23
Nodi muamugna mae velepuhi ni mae Farisi
(Mak 12:38-40; Luk 11:43,46; 20:45-46)
1Ke leghugna igne, Jisas ne lepo eu'ani harira nanonire ni noa mae farogore, 2“Mae velepuhigna vetula ni mae Farisi teure, au nodi noilaghi te mala ruarutha gaoghathodi noa vetula mae Moses re ka ghotolu. 3Eume, ghotolu mala tufuni leghura hna te lepora hatimare re. Ni tovi leghura puhidi hatimare re euwa, eigna hatimare theome leghura lana hna te fagriura hatimare ka ghotolure. 4Hatimare nana'a chuku vetula te ninigrana harira nanonire. Ni hatimare thaidi theome tangomana te fariuriu mala leghuza kahe vetula ka teure.
5“Gaoghatho te eira hatimare puhi fate'o ire mala kokofu vere nodina nanonire eulana. Hatimare e'ei fabi'o bokisidi grioriso te blahi re ni sosolo lao ka bahudi ni ka khamedi teure. Ni hatimare eulanauwa e'ei fatheve pruki pohe te sei soru ka khukrudi nodi phoko theve re. 6Ni kate tei ka ngahngamure hatimare fua ngagura lui te hokro ka sape noilaghi. Ni kate tei ka suga tharai re, hatimare ngagura lui te hokro ka sape te fua keli lui re. 7Ni kate tei hatimare ka maketire, hatimare ngagura nanonire te mala ghatho bohera ni kilora ‘Mae Velepuhi’.
8“Ni te lepoza rei ka ghotolu ie, tovi jateula hatimare eu sakreza kahe nanoni kiloghamu ‘Mae Velepuhi’. Eigna ghotolu kahe tabusigna lana, ni kahe rei lana nomi mae velepuhi ghotolu ie. 9Ni tovi kilo ‘Maghe’ eu ka kahe mae ka nauthoglu gne, eigna ghotolu kahe mae Mami lana, ni magne au klia. 10Euwateuwe, tovi sakrera lanauwa hatimare kiloghamu ‘Mae Funei,’ eigna Kraes lana nomi funei ghotolu te hui ie. 11Mae ihei te mala mae funei ka ghotolu ie, magne mala nomi mae gloku ghotolu hui lana. 12Euwateuwe, mae ihei te na'a fahagheza thaigna ie, God kaina ke na'a fapariza magne. Ni mae ihei te na'a fapariza thaigna ie, God kaina ke na'a fahagheza magne.
13“Puhi bi'o ka ghotolu mae Farisi ni mae velepuhi gna vetula noa mae Moses teure! Ghotolu mae muamugna lui! Eigna ghotolu au te bobotho harira nanonire nabrau te mala teidi hatimare ka God ie. Ghotolu thaimi ie theome ngagughamu te ruma ie, ni eulanauwa ghotolu bobotho harira nanoni te ngagura te mala ruma nodi ka thotoghei nanoni God te funei frunira re. 14Puhi bi'o ka ghotolu mae Farisi ni mae velepuhi gna vetula noa mae Moses teure! Ghotolu mae muamugna lui! Eigna ghotolu fakokhonoana ra ni chikora eu koba nodi goifata nani te leme khetodire. Euwateuwe, ghotolu tarai theve koba malani ne mae blahi hui eughamu nanonire. Tutu'ani, God kaina ie paraghamu lui ghotolu!
15“Puhi bi'o ka ghotolu mae Farisi ni mae velepuhi gna vetula noa mae Moses teure! Ghotolu mae muamugna lui! Eigna ghotolu tei kasa hnorara ba moumolu eu ka hiroza ihei te mala leghura puhimi ghotolure. Euwateuwe, ke leghugna te leghura puhimi ghotolure, magne ke di'a tulaomini ghotolu, eume thokagna te tei ka kha'aghi jateula ghotolu euwa.
16“Puhi bi'o ka ghotolu mae velepuhi ni mae Farisi teure! Ghotolu baubatu ra nanonire, ni ghotolu mae baubatu doa! Eigna nomi fagriu ghotolu thaimi re eu'ani, ‘Mae ihei te baubahu ka u Suga Blahi ie, magne tangomana huhughuza aulana baubahu teke eiza ie. Ni mae ihei te baubahu ka u mumuzu sesere te au ke hnuagna Suga Blahi ie, baubahu teuwae te tufuni mala leghuza ie.’ 17Ghotolu mae noinoli ni doa euwa! Ahiagne goifata te ulu ie, mumuzu sesere gne ba Suga Blahi ie? Suga Blahi gne nake goifata ulu, eigna Suga Blahi gne te mala fablahira mumuzu sesere teuware. 18Ni te lepoza lanauwa ghotolu ie, ‘Mae ihei te baubahu ka olta ie, magne tangomana huhughuza aulana baubahu teuwae. Ni mae ihei te baubahu ka faafara te au ke klia olta ie, baubahu teuwae te mala leghuza ie.’ 19Ghotolu mae doa! Ahiagne te goifata ulu ie, goifata te faafara gne ba olta gne? Olta gne nake goifata ulu, eigna olta gne te mala fablahiza faafara igne. 20Eume, mae ihei te baubahu ka olta ie, magne kafua baubahu ka olta, ni ka gobigna goifata te au ke kliagna olta re. 21Agnoni, mae ihei te na'alepo ni baubahu ka Suga Blahi ie, magne kafua na'alepo ni baubahu eu ka Suga Blahi ie, ni ka mae ihei te au ka Suga Blahi teugne. 22Ni mae ihei te baubahu lao klia ie, magne baubahu ka sape noilaghi mala hokrogna God ni baubahu lao lanauwa ka God.
23“Puhi bi'o ka ghotolu mae velepuhi ni mae Farisi teure! Ghotolu mae muamugna lui! Ghotolu faafara lao ka God fasalaghidi gemi khuromu te ichoni ka nomi sinabore. Ni ghotolu theome leghura lana puhi te fua ulu lui ka vetula ie ire, tulao mala fakokohlora puhi te sapla, keli harira nanonire ni tufuni fatutu'aniza God. Puhi te ichoni ire ghotolu mala eira, ni tovi ghatho ihora lanauwa puhi te ulu ka vetula ie ire euwa. 24Ghotolu baubatura nanonire, ni ghotolu mae baubatu doa euwa! Eigna ghotolu atha koko glango ichoni te togha ka gemi thapera ganore, euwateuwe kamel te bi'o ie ghotolu tomno thaudoluza tei lana ka thi'amire!
25“Puhi bi'o ka ghotolu mae velepuhi ni mae Farisi teure! Ghotolu mae muamugna lui! Ghotolu jateula kapu ba thapera te lulumi te tufuni ga'e kosidira euwa. Ghotolu ke kosimire famane khuakuda eu kokofumire ni ke hnuamire fodu ka puhi maamagra ni gougotu ni muamugna eulana. 26Ghotolu mae Farisi ire, ghotolu tufuni doa lui! Kulu fagaga'e fakeli sonighotolu gnagnafamire. Agnoni, ame tangomana na ghotolu te keli puhimire euwa.
27“Puhi bi'o ka ghotolu mae velepuhi ni mae Farisi teure! Ghotolu mae muamugna lui! Ghotolu jateula beku te famane simede te malaji kosigna ie, te fua keli lui kokofugna ia euwa. Ni ke hnuagna ie fodu ka nahuli ni thonodi nanoni te leme te bose hui ra. 28Ghotolu jateula teuwae eu fua keli lui koukofumire ka nathadi nanonire, ni ka gnagnafamire ghotolu fodu ka muamugna ni ka puhi fate'o te di'a.
29-30“Tutu'ani lui, puhi bi'o ka ghotolu mae velepuhi ni mae Farisi teure! Ghotolu mae muamugna lui! Ghotolu e'ei nathuthuana ka bekudi mae profet teke anu faleme mae mami ghotolure, ni ghotolu ei lalaonira bekudi mae te au kohlo re. Euwateuwe, ghotolu lepo eu'ani, ‘Jame au dufira tati naga'edi mae madara meuwe, tati jame theome toghora hatimare ka falemera mae profetre.’ 31Ka goeghoze te eira ghotolu teuware, ghotolu fatakleghamu hui thaimi te ghotolu tufuni vikedi hatimare mae teke falemera mae profetre teuwe. 32Eume, ghotolu eira fatheve lana hna puhi teke eira mae ku'emi tifare!
33“Ghotolu muamugna lui jateula pholi euwa! Ghotolu vikegna pholi faghughuhmu! Ghotolu kaina theome tangomana te pelo kokoza noa di'atagna God ie! Magne kaina fateghamu ghotolu ni kuri teighamu ka kha'aghi te the'o ka huigna ie. 34Eume, rei te lepoza ka ghotolu. Rei kaina kuri mei ra keha mae profet, ni keha mae glalase, ni keha mae velepuhi eu ka ghotolu. Keha mae ka mae teure re, ghotolu kaina falemera. Ni kehare ghotolu kaina tupijurura ka gazu fafata. Euwateuwe, kehare ghotolu kaina anira ke hnuadi nomi suga tharai re. Ni eulanauwa, kehare ghotolu kaina hrubira klitu leuleghu nau. 35Eigna igne, God kaina fateghamu ghotolu gna glemedi noa nanoni te kohlo teke faleleme ghotolura: Funu ka glemegna mae Ebol, mae te tufuni kohlo lui ghile dufu ka glemegna mae Zekaraea, thugna mae Barakaea ia. Mae ku'emi ghotolure neke falemeza magne kehreagna olta ka Suga Blahi ie. 36Tutu'ani lui, te lepoza rei ka ghotolu ie. Ghotolu nanoni gignoa igne re, God kaina ie fateghamu ghotolu gnadi gobigna puhi ire.”
Jisas nahmaza lui Jerusalem
(Luk 13:34-35)
37Agnoni Jisas ne lepo eu'ani, “Ghotolu nanoni te au Jerusalem ra! Ghotolu lana teke falemera mae profetra, ni ghotolu eulanauwa khale falemera ka thina mae teke kuru ari God ra. Chuku fata rei ngagughau mala mei ghotolu ka rei. Rei ngagughau koikofughamu ghotolu jateula kokorako ga'asegna te o'opo frunira thugnare ke pari baghignara euwa, ni ghotolu theome ngagughamu lana. 38Eume gignoa igne, God kaina ie tei kokoza nomi Suga Blahi ghotolu gne mala nagou. 39Ni te lepoza rei ka ghotolu ie, ghotolu kaina ie theome kofighau rei ghile dufiza naga'e mala ke meigu rei ie, euwateuwe ghotolu kaina kafua lepo eu'ani, ‘God fablahiza magne te mei ka nahngagna Lod.’#23:39 Sam 118:26. ”
© 2025 SIL Solomon Islands