Matiu 22
22
Lepo naba gna ngahngamu thoilaghi
(Luk 14:15-24)
1Jisas neke thuturirani keha lepo naba ka nanonire. Magne ne lepo eu'ani, 2“Nafnata puhi God te funei frunira noa nanonire, jateula te eiza ka u thuturi igne euwa. Uve, kahe mae funei neke tarabana kahe ngahngamu bi'o mala toilaghigna mae thugna ie. 3Agnoni, mae funei gne ne kilora nanonire mala mei ka ngahngamu ie. Kate tarabana te hui ngahngamu ie, magne ne kuri teira noa mae glokure mala lepora nanonire mei ka u ngahngamu gne, ni hatimare tho'anodi mei lana.
4“Agnoni, mae funei ie neke kuri teirani keha mae gloku mala lepo mei ihei teke torera mala mei teura. Magne ne lepo eu'ani ka hatimare, ‘Lepo meira ghotolu mae teke kilora rei ra, eigna ngahngamu igne la tarabana hui. Rei faleleme buluka te keli ni blokha eu mala ngamu ie, euwateuwe gobigna goifatare la tarabana hui. Mei ka ngahngamu toilaghi gne.’
5“Ni nanonire tho'anodi farogo fakeli ka mae glokure. Hatimare sopana thei ne eira lana nodi gloku thaidi re. Kahe mae ie tei loku ka noa sinabo ie, keha ie tei hiro noa nanugra. 6Ni kehare tei ne lokira noa mae gloku magne re, ne anira, ni falemera. 7Agnoni, mae funei ie ne di'atagna lui ka hatimare. Magne ne lepo eu'ani ka noa mae soldiare, ‘Ghotolu tei faleme ra nanoni te faleme ra nogu mae gloku rei ra, ni fangamu kha'aghi ra nodi grurure euwa.’ Hatimare ne leghuza noa goeghoze mae funei ie ne eiza teugne.
8“Ke leghugna igne, mae funei ie ne lepo eu'ani ka noa mae glokure, ‘U ngahngamu thoilaghi ie la tarabana hui. Rei neke kilomei ra nanoni teura, ni hatimare theome thokadi te mei ka ngahngamu ie. 9Eume gignoa igne ie, ghotolu tei ka u nabrau bi'o are ni kilomei ra lana ihei te kofira ghotolure. Lepora mala mei ka nogu ngahngamu ie.’ 10Mae glokure tei ka nabraure ne kafua udi meira nanoni te kofudei ra hatimare te keli ba te di'are. Agnoni, suga ngahngamu thoilaghi gne ne fodu lui ka nanoni ie.
11“Ni kate mei mae funei ie te kofira nanoni teke kilora thaigna re, magne ne kofiza kahe mae ka teuwae te pipichi pohe te theome thokagna te mala mei ka u ngahngamu thoilaghi ie. 12Agnoni, mae funei ie ne lepo eu'ani ka magne, ‘Mae kheraguia, fahneuwa ne mei ani ghoe gnea? Ghoe theome thokamu te mei ani ie, eigna ghoe theome pipichi pohe malagna ngahngamu thoilaghi gne.’ Ni magne ne theome tangomana te ho'ilepo ka mae funei ie.
13“Mae funei ie ne lepo eu'ani ka mae glokure, ‘Ghotolu haru faudu khamegna nenegna mae igne ni koko fakosi ka hnimoto te romo ae. Ka hnimoto teuwae magne kaina papara tahngi ni fakikikri khe'ignare.’ ”
14Ke leghugna igne, Jisas ne lepo eu'ani, “Uve, chuku nanoni God neke kilora re, ni keha lana teke fafatera re.”
Guaghuhna gna foli takisi ka mae nafano bi'o gna Rom
(Mak 12:13-17; Luk 20:20-26)
15Agnoni, mae Farisire ne jifla kokoza hnimoto te fagriu te'au Jisas ie, ne funu hiro puhi mala ei keha guaghuna mala fakuitiza magne. 16Eume, hatimare ne kurira keha nodi mae farogo thaidi re ni keha mae ka noa thotoghei mae Nafano Herod re mala tei ghuhna eu'ani ka Jisas, “Mae velepuhi, gheati lasegho ghoe kahe mae kohlo lui. Ni ghoe fagriuza lana hna puhi te tutu'ani gna God ie. Ghoe theome hmaura lana hna te lepo eimu ghoe nanonire, eigna nanoni te hui re kahe nanaba lana ka gaoghathomu ghoe ie. 17Eume, lepo meiza ba ghoe gaoghathomu ie. Ihna, kohlo au lana ka noda vetula tati ie te foli takisi lao tati ka mae Sisa ie? Ba the'o?” Mae Sisa gne mae Nafano bi'o gna Rom.
18Ni Jisas ne kulu lase noara gaoghathodi hatimare re, ne lepo eu'ani, “Ghotolu mae muamugna! Ne fahneuwa ghotolu te ngagughamu fakuitighau rei gnea? 19Fatakle mei ba ghotolu ka rei nanugra te mala foli takisi teuwae.” Agnoni, hatimare ne gulao kahe nanugra ka magne. 20Magne atha nanugra ie ne ghuhna eu'ani ka hatimare, “U thotoghalegna, ni nahngagna eu mae ihei te kofira ghotolu ka nanugra igne?”
21Hatimare ne lepo eu'ani ka magne, “Mae Sisa.”
Agnoni, Jisas ne lepo eu'ani ka hatimare, “Uve, hna neke noa mae Sisa nani tusu fapulo ka Sisa, ni hna neke noa God nani tusu fapulo ka God euwa.”
22Kate rogiza hatimare hna te lepoza Jisas igne, hatimare ne vere nodi lui. Agnoni, hatimare jifla ne tei kokoza magne.
Guaghuhna gna kegra fapulo ka gleme
(Mak 12:18-27; Luk 20:27-40)
23Ka naga'e la teuwae, keha mae Sadiusire ne mei ka Jisas. Mae teure theome fatutu'aniza u kegra fapulo ke leghu gleme gne. Agnoni, hatimare mei ka magne ne ghuhna eu'ani, 24“Mae velepuhi, kahe vetula teke i'iniza mae Moses malada tati ia ne lepo eu'ani, ‘Jame kahe ga'ase leme khetogna ie, ni repa the'o thudi, mae tahigna ie nake toilaghi ka ga'ase gne mala ke au thugna mae tighagna te leme ie.’ 25U puhi igne ne khale ka hatimare fitu mae tabusigna te au ani balumi gheati re. Mae bi'o lahu ie toilaghi ni the'o thugna aulana neke leme. Agnoni, mae tahigna ie neke toilaghi ka nani gleme ka'aigne. 26Magne eulanauwa ne leme. Ni fatolu mae tabusigna ie ne eulanauwa, eume fitu mae tabusignare ne kafua eu ne hui lana. 27Agnoni leghu lahu ie, nani gleme ka'aigne ne leme lanauwa. 28Lepo mei ba ghoe, ka u naga'e kegra fapulo ie, mae ihei ka fitu mae tabusigna ire kaina te tufuni khetogna ga'ase teugne?”
29Jisas ne lepo eu'ani ka hatimare, “Ghotolu tufuni sapla lui, eigna ghotolu theome lasera gaoghathodi i'ini te blahi ire, ni ghotolu eulanauwa theome laseza noa noilaghi God ie. 30Eigna ka u naga'e kegra fapulo ie, nanonire kaina theome toilaghi. Hatimare kaina jateula engjel eu lana klia. 31Euwateuwe, gnadi mae te kegra fapulo re, ghotolu neke theome ijuijuza lana hna teke lepoza God ka ghotolu ia? God neke lepo eu'ani, 32‘Rei noa God mae Ebraham, mae Aesak, ni mae Jekop.’#22:32 Eksodas 3:6. Eume, neuba nanoni ire neke leme hui tifa, God teke lepoza ka mae Moses ie, hatimare kahra aulana. Eigna jame leme hui hatimare ie, God jame theome lepoza te ‘Rei noa God mae Ebraham, Aesak, ni Jekop’ teuwe. Tutu'ani, God gne theome nodi God nanoni te leme re, ni nodi God nanoni te kahra re na euwa.”
33Kate rogiza hatimare goeghoze igne, nanonire ne fua vere nodi lui ka noa fagriu magne re.
U vetula bi'o lahu
(Mak 12:28-34; Luk 10:25-28)
34Kate rogiza mae Sadiusire ne theome ghagri kahe goeghoze ka Jisas teuwe, mae Farisire ne kafua ghonei faudu. 35-36Agnoni, kahe mae ka hatimare te fua laseza lui noa vetula mae Moses re, ne mei ka Jisas ne ghuhna eu'ani mala fakuitiza magne, “Velepuhi, vetula ahiagne te bi'o lahu ka noa vetula mae Moses re?”
37Jisas ne ho'ilepo eu'ani ka magne, “ ‘Nahmiza Lod nou God ie. Nahmiza magne ka gnagnafamu fate'o, ni ka gaoghathomu fate'o, ni ka nou glalase fate'o.’#22:37 Diutronomi 6:5. 38Igne vetula bi'o lahu ie. 39Euwateuwe, fapalu vetula te bi'o lahu ie igne, ‘Nahmiza kheramu fafaudu ie, jateula ghoe te nahmagho thaimu ie.’#22:39 Levitikas 19:18. 40Noa vetula mae Moses re, ni nodi fagriu mae profet teure, lehleghu ka phalu vetula ire lana.”
Guaghuhna gna mae Mesaea
(Mak 12:35-37; Luk 20:41-44)
41Agnoni, Jisas figrilao ka mae Farisi te krapu te'au ka teuwae re ne ghuhna eu'ani ka hatimare, 42“Hna eu ghotolu gaoghathomire gna mae Mesaea gne? Vikegna mae ihei mae teugnea?”
Mae Farisire ne lepo eu'ani ka magne, “Mae Mesaea gne vikegna mae Nafano Devet.”
43Agnoni Jisas ne ghuhna eu'ani ka hatimare, “Ne fahneuwa Tharunga te Blahi gne te gulao gaoghatho ka mae Nafano Devet mala kiloza mae Mesaea gne Lod teugne? Mae Devet neke lepo eu'ani,
44“ ‘God ne lepo hariza nogu Lod rei ie:
Ghoe hokro ani phile matugu rei,
aughile na'i sorura rei nou mae naoka ghoe re ke parigna nou noilaghi ie.’#22:44 Sam 110:1.
45Mae Devet kiloza mae Mesaea gne noa ‘Mae funei’. Ni mae Mesaea ie eulanauwa vikegna Devet. Eume, fahneu eume kafua tutu'ani phalu puhi teurea?” 46Agnoni, the'o lana kahe mae ka hatimare mae Farisire te tangomana ho'ilepoza noa guaghuhna Jisas ie. Eume, funu ka naga'e teugne hatimare ne hmau te mala ke ghuhnazani Jisas ie.
© 2025 SIL Solomon Islands