Matiu 24
24
Jisas lepoza te hatimare kaina re'o soruza Suga Blahi ie
(Mak 13:1-2; Luk 21:5-6)
1Jisas ne jifla ka Suga Blahi ie zaoza'o ne tei. Agnoni, noa mae farogo magne re mei ne falalase ka magne thotoghei suga bi'o te au ke hnuagna hnimoto te au Suga Blahi ie. 2Jisas ne lepo eu'ani ka hatimare, “Uve, ghotolu la kofira hui suga ire. Ni tutu'ani lui te lepoza rei ka ghotolu ie, babara thina ire kaina kafua brusu pari. Ni kaina the'o kahe thina nate au ka hnimoto te audi te'au gignoa igne re.”
Jisas lepoza te chuku nakahra di'a kaina mei au
(Mak 13:3-13; Luk 21:7-19)
3Kate hokro te'au Jisas ka Gukhu Gazu Oliv ie, noa mae farogo magne re mei ne ghuhna poopolo eu'ani ka magne, “Ngihagno kaina dufu meidire puhi irea? Ni hna nafnata falalase kaina te kofiza ie te mala laseza naga'e mala ke pulo meimu, ni naga'e mala huigna nauthoglu gne teuwe?”
4Jisas ne ho'ilepo eu'ani ka hatimare, “Koikofi fakelighamuni, na euni mei mugnaghamu hatimare euwa. 5Eigna chuku nanoni kaina mei ka nahngagu rei, ni hatimare kaina lepo eu'ani, ‘Rei lana Kraes ie!’ Ni chuku nanoni kaina ie fatutu'ani ra hatimare. 6Ghotolu kaina rogira naogladi magra ka nau chuku te au kehreami ghotolu are, ni thuturidi magra ka nau maghani, ni tovi nanganomi euwa. Puhi teure mala kulu dufu mei au lana, ni igne gaoghathogna ie nauthoglu gne la thata hui teuwe the'o euwa. 7Nanonigna kahe nau kaina kegra haghe magrira nanonigna keha nauwe. Euwateuwe, nanonigna kahe nohi ie kaina kegra haghe magrira nanonigna keha nohi ie, eu hia te hia ka nauthoglu gne. Ni nau chuku ka nauthoglu gne ire kaina hngali ka nakheu bi'o, ni behu ie kaina dufira lanauwa nanonigna nauthoglu igne. 8Puhi ire kaina jateula khata ulu lahu te eiza ga'ase te thatai fakahra sua valu ia euwa.
9“Agnoni, nanonire kaina lokighamu ghotolu mala udighamu tei ka fate. Hatimare kaina paraghamu ni falemeghamu eu ghotolu. Euwateuwe, nanonidi chuku nau ka nauthoglu gne kaina tho'anodighamu ghotolu, eigna ghotolu fatutu'anighau rei. 10Ka naga'e teugne, chuku nanoni teke fatutu'ani re kaina ke theome fatutu'ani. Hatimare kaina ke majora farithaidi ni keha nanonire kaina ke tho'anodi ra kehare. 11Chuku mae profet muamugna re kaina takle mei. Hatimare kaina batu fadi'ara chuku nanoni mala fatutu'ani ra puhi te muamugna re. 12Ni eigna te eira koba hatimare nafnata puhi te di'a teure, nahma teke jala ka gnagnafadi chuku nanonire kaina ke rifu. 13Ni ihei te maku ka nodi fatutu'ani re te ghile dufiza naga'e leghu lahugna na'au paapara ie, God kaina fakahrira hatimare. 14Hatimare kaina jifla tei thuturiza Grorogo te Keli gna nafnata puhi God nate funei frunira noa nanonire. Hatimare kaina thuturiza igne hia te hia ka nauthoglu gne ka nanoni te hui re. Euwateuwe, ke leghugna teugne, me dufu mei na naga'e leghu lahugna nauthoglu igne euwa.”
Jisas lepo fa'uluza hna nate dufiza Jerusalem
(Mak 13:14-23; Luk 21:20-24)
15Jisas ne lepo eu'ani, “Ghotolu kaina kofiza kahe mumuzu bi'o te di'a lui kaina kegra au ka glamagna Suga Blahi ie. Mumuzu teugne fathonaza noa Suga Blahi God ie.#24:15 Daniel 9:27; 11:31; 12:11. Mae profet Danel neke kulu lepoza hui igne tifa ie.” Ni mae ihei te ijuijuza igne jame laseza gaoghathogna ie. 16Agnoni ka naga'e teuwae, nanoni te au ka provens Judia re kaina kafua pelo tei ka gukhure. 17Mae ihei te au ka phogrugna noa suga ie, tovi ke soru tei ruma atha fajifla noa goifata ka glamagna suga ie. 18Eulanauwa, ihei te au ka sinabo ie tovi pulo ke tei ka suga ie atha noa phoko ie. 19Ka naga'e teuwae, ga'ase te plukare ni ga'ase te au thudi te chu'u te'au re, kaina ie fua kokhonira lui eigna kaina fua ninigrana harira ka mala pelo ie! 20Ghotolu tarai ka God mala theome pelo ka miolo gna khoburu ba ka naga'e Sabat ie. 21Eigna paapara teugne kaina tufuni di'a lui ke uludini paapara teke mei tifara, funu ka naga'e vuavuhagna God nauthoglu gne. Ni kaina ke leghu ie, kaina the'o kahe paapara nate mei jateula igne teuwe.
22“Jame theome atha koko God keha naga'ere meuwe, kaina the'o kahe nanoni te kahra ie. Ni eigna te kokhonira Magne nanoni teke fafate thaigna re me atha koko magne keha naga'e paapara re euwa. 23Ka u naga'e teuwae, keha nanonire kaina ie lepo eu'ani ka ghotolu, ‘Mae Kraes ie igne te'au!’ ba, ‘Magne au teu ae’, na eu'au, ni tovi ke fatutu'anira euwa. 24Eigna kaina ie, hatimare mae Kraes muamugna ni mae profet muamugna teure kaina thakle mei. Hatimare kaina ie eira chuku puhi bi'o ni kofunaboboi bi'o eu ka nanonire, mala fariuriu mugna ra ni batu fadi'ara eu nanoni te hui teke fafate God re. 25Ni gignoa igne, rei ngagughau te kulu lepo faheta ka ghotolu ame dufu meina puhi ire euwa.
26“Eume, jame mei hatimare lepo eu'ani ka ghotolu, ‘Kofu tei sonighotolu! Magne au te aula ka nau nagou ie igno.’ Tovi tei ka teuwae. Ba, jame lepo eu'ani hatimare ka ghotolu, ‘Mae Kraes ie au hnua chogho.’ Tovi fatutu'anira. 27Eigna kaina ke pulo meigu rei mae teke mei funugu ka God ie, kaina takle jateula naglisa te sigla mei funu ke maghati te dufu ke mosu ia euwa. 28Tutu'ani lui, nanoni chuku kaina kafua kofu falaseza meigu rei ie, jateula kate kofiza kahe thotoghei glango te kofudeiza kahe bosu te leme te siri ia euwa.”
Jisas lepo fatakleza te magne kaina ke pulo mei
(Mak 13:24-27; Luk 21:25-28)
29“Theome raugha ke leghudi puhi bi'o ire,
“ ‘Nadafi ie kaina romo.
Glaba ie kaina theome bae.
Nathunure kaina uthu soru funudi klia.
Euwateuwe, gobigna goifata te au ka manga ie are kaina ngigru tafiri.’#24:29 Aesaea 13:10; 34:4.
30“Ke leghugna igne, falalasegna meigu rei ie kaina takle mei ka manga ie. Euwateuwe, nanoni fate'o ka nauthoglu gne kaina kafua tahngi fabi'o lui ni hmau, eu kate kofiza soru meigu rei ke klia gromo balu noilaghi ni nadulu bi'o. 31Ka naogla gna khufli te bi'o igne, rei kaina ie kuri ra nogu engjelre mala tei ke maghati, ni ke mosu, ni ke raru, ni ke longa. Hatimare kaina ie salo faudura nanoni teke kulu fafate mae Magu God hia te hia ka nauthoglu gne.”
Fagriu gna gazu fig
(Mak 13:28-31; Luk 21:29-33)
32Jisas ne lepo eu'ani ka hatimare, “Tufuni farogo fakeli ghotolu ka u fagriu te laseza tati ka u gazu te kiloza fig ia. Kate funu kotu segre gratagnare ni ke fufusu valu naklagnare teuwe, ghotolu laseza huila u finogha valu ie la thata dufu mei hui. 33Eume, jateula teugne eu kate kofira ghotolu dufu meidi goifata fate'o te lepo rei ire, ghotolu kaina laseza te meigu rei ie la thata hui teuwe. 34Tutu'ani lui te lepoza rei ka ghotolu ie! Gobigna goifata ire kaina dufu mei kate theome leme na te'au nanoni te kahra gignoa igne re. 35U manga klia ni nauthoglu gne teure kaina hui, ni goeghozegu rei ie kaina the'o ka huigna.”
Jisas thuturi gna naga'e ke pulo meigna ie
(Mak 13:32-37; Luk 17:26-30,34-36)
36“Tutu'ani lui, the'o kahe nanoni te tufuni laseza naga'e mala ke pulo meigu rei ie. Rei ni mae engjel klia re theome laseza lanauwa. Mae magu thaigna lana te laseza ie. 37Ka naga'e ke pulo meigu rei ie, kaina ie jateula naga'e teke eiza ka mae Noa tifa ia euwa. 38Eigna ka naga'e teke theome mei te'au gnugru ie, nanonire neke ngamu gedi, ko'u gedi, ni toilaghi nodi eu ne'au lana, ghile dufu mei naga'e te saghe mae Noa ka vaka ie. 39Hatimare theome laseza kahe goifata nate dufu mei kaina ie. Agnoni, gnugru bi'o ie ne mei ne kafua blohmo ne leme nanonire. Kaina ie na jateula teugne eu ka naga'e ke pulo meigu rei ie. 40Ka naga'e teugne, phalumae kaina kafua loku ka sinabo ie. God kaina atha kaheni, ni nana'a faleghu keha ie. 41Phalu ga'ase loku faudu ka hnimoto mala e'ei flaoa ie. God kaina atha kaheni, ni nana'a faleghu keha ie.
42“Eume, ghotolu tarabana nomi fakeli leuleghu ga'e, eigna ghotolu theome laseza naga'e mala ke pulo meigna nomi Lod ie. 43Ni ghotolu laseza igne: Jame laseza mae khoto suga ie naga'e te mala meigna mae mala chiko ie, magne kaina theome thuru ni magne kaina koikofi fakeliza noa suga ie mala theome ruma chiko mae teugne. 44Eume, ghotolu eulanauwa tarabana nomi fakeli leuleghu ga'e. Eigna rei mae teke mei funugu ka God gne, kaina ke pulo meigu ka nauthoglu gne ka naga'e te theome ghathoza ghotolu ie.”
U lepo naba gnadi phalu nafnata mae gloku
(Luk 12:41-48)
45Malani laseza mae farogore gaoghatho gna lepo naba igne teuwe, Jisas ne lepo eu'ani ka hatimare, “Ihei mae gloku te keli ni glalase teuwe? Mae gloku te lalase lui te leghuza fatheve noa khuru mae funei ie. Ni fafateza mala koikofira keha mae glokure kate tei magne ie, mala tufa fananaba ganore harira keha mae glokure kate dufiza naga'e mala ngamu ie? 46Mae gloku teugne kaina ie fua keli tagna lui kate pulo mei noa mae funei ie te kofiza magne te ei fakeli noa gloku ie. 47Tutu'ani lui te lepoza rei ka ghotolu ie. Mae funei ie kaina tufuni fafateza mae gloku teugne mala koikofira noa gobigna goifatare. 48Ni jame kahe mae gloku di'a magne ie, magne kaina lepo eu'ani ka gaoghathogna ie, ‘Nogu mae funei rei gne kaina theome ghose pulo mei gne.’ 49Agnoni, magne kaina funu anira keha mae gloku te loku balugna re, ni magne kaina eulanauwa tei ngamu ni ko'u eu baludi keha nanoni te fa'a ko'u koba are. 50Euwateuwe, noa funei magne ie kaina ke pulo mei ka naga'e te theome tarabana ni ghathoza teu magne ie. 51Agnoni, mae funei gne kaina faparaza lui magne. Ni kaina kuri teiza mala au paapara magne baludi mae te muamugna re. Ni hatimare kaina au paapara lui ka teuwae ni tahngi fabi'o ni di'agnagnafa eu lui.”
© 2025 SIL Solomon Islands