Matiu 21
21
Jisas fatakleza thaigna te magne mae Nafano ie
(Mak 11:1-11; Luk 19:28-40; Jon 12:12-19)
1Jisas ni noa mae farogore ne tei thata Jerusalem, hatimare ne kofu teiza nau Betfeij te au kehreagna gukhu te kiloza Gazu Oliv. Agnoni, Jisas ne kuri teira phalu noa mae farogore. 2Magne ne lepo eu'ani ka phalumare, “Ghopa kaina tei ka nau te kofu laoza tati igno. Ka teuwae, ghopa na kofiza kahe dongki sosolo au hatimare balugna thugna ie. Rurutha ni faleuleghura mei ka rei ani euwa. 3Ni ne ghuhnaghamuna ki mae gna hna te eiza ghopa teugneni, ghopa lepo eu'ani ka magne, ‘Lod au te ngaguza ie.’ Teu ghopa ie, magne kaina sakrera aulana. ”
4Igne ne horoghoto lui ka hna teke lepoza kahe mae profet tifa ia,
5“Lepo ka nanonidi Zaeon re,
‘Kofu sonighotolu, nomi mae Nafano ghotolu ie la mei ka ghotolu.
Magne na'a fapariza thaigna ne saghe ka dongki,
magne saghe ka sua dongki ie.’ ”#21:5 Sekeraea 9:9.
6-7Eume, phalumae farogore ne leghuza noa khuru Jisas ie, ne atha ne mei dongki ni thugna ie eu ka magne. Ni phalumare ne ngifra keha nodi phokore ka phogrudi dongkire mala saghe Jisas. 8Chuku nanoni lui ne ghatho boheza magne ne ngifra leghuza nabrau ie nodi phokore, ni kehare rave thubo ni ngifra ka nabrau ie. 9Agnoni, nanoni fate'o te tei ke ulu ni ke leghugna teu magne re ne kafua fagra, ni lepo eu'ani,
“Hosana! Lepo fakeliza thugna mae Nafano Devet!”
“God fablahiza magne te mei ka nahngagna Lod!”#21:9 Sam 118:25,26.
“Lepo fakeliza God te au klia!”
10Kate ruma haghe Jisas ka gruru Jerusalem ie, nanoni fate'o re ne hneahnegha chari mei mala kokofu nodi, ne ghuhna eu'ani, “Mae ihei ignea?” 11Ni nanoni te mei balugna Jisas re ne lepo eu'ani, “Jisas, mae profet gna Naesaret ka nohi Galili.”
Jisas ne tei ka Suga Blahi ie
(Mak 11:15-19; Luk 19:45-48; Jon 2:13-22)
12Agnoni, Jisas tei ne ruma ka hnimoto glalaba gna Suga Blahi ie, ne fnaji fajiflara ne hui nanoni teke foifoli ni saisabiri teu nodi goifatare ka hnimoto teugne. Magne eulanauwa ne pili fatofora nodi thevo mae te hoho'i nanugra mala foli takisi gna Suga Blahi ie, ni nodi mala hokro mae te sabiri bahlu mala fafara re. 13Ni magne ne lepo eu'ani ka hatimare, “Ka i'ini te blahi ia, God ne lepo eu'ani, ‘Sugagu rei gne suga mala tarai.’#21:13 Aesaea 56:7. Ni ghotolu ke eiza suga igne mala jateula suga mala polodi eu mae te lase chiochikore!#21:13 Jeremaea 7:11.”
14Nanoni te doa ni nanoni te blughu teure ne mei ka Jisas ka Suga Blahi ie. Ni magne ne fakekeli ra ne hui. 15Hatimare mae pirisi ulu ni mae velepuhigna vetula noa mae Moses teure, ne fua di'atadi lui ka Jisas kate kofira hatimare kofunaboboi te eira magne re, ni rogira goro sua te aku eu'ani ka glalaba gna Suga Blahi ie, “Lepo fakeliza Thugna mae Nafano Devet!”
16Agnoni, hatimare ne lepo eu'ani ka Jisas, “Koma! Rogira ghoe hna te lepora goro sua ire?”
Magne ne lepo eu'ani ka hatimare, “Uve, rei la rogira hui. Ihna, ghotolu theome ijuijuza lana i'ini te blahi ia?”
“ ‘Ghotolu fagriura goro sua ni suagege'e teure mala lepo fakeliza magne.’#21:16 Sam 8:2. ”
17Agnoni, ke leghugna teugne Jisas jifla neke pulo Betani ne thuru ka teuwae.
Jisas ne tibriza gazu fig ie
(Mak 11:12-14,20-24)
18Agnoni, ka boibongi fufughogna keha naga'e ie, Jisas neke puloni Jerusalem, ni magne ne rofo noa. 19Kate kofiza kahe gazu fig ka geri nabrau ie, magne ne tei mala atha keha ganogna, ni the'o la ki ganogna te kofiza magne ie, naklagnare lana. Magne ne lepo eu'ani ka gazu fig gne, “Funu gignoa igne te haghe ie, ghoe kaina the'o ganomu!” Agnoni, gazu fig gne ghose ne gnagha ne leme.
20Kate kofiza igne mae farogore ne vere nodi lui. Hatimare ne lepo eu'ani ka magne, “Ne fahneuwa te ghose lana lemegna gazu ignea?”
21Jisas ne lepo eu'ani ka hatimare, “Tutu'ani lui te lepoza rei ka ghotolu ie. Te fatutu'ani ghotolu ni theome ghatho paupalu teuwe, ghotolu kaina tangomana te eiza aulana hna te eiza rei ka gazu fig igne. Ni ghotolu kaina tangomana te eira goifata teke bi'odini ire. Ghotolu kaina eulanauwa tangomana te lepo eu'ani ka gukhu ie, ‘Ghae ani tei au ka hnoraragno,’ teuwe, gukhu teugne kaina ghae tei au lana ka hnoraragno. 22Eume, te fatutu'aniza ghotolu God ni tarai lao ka magne teuwe, ghotolu kaina athiza hna te toreza ka magne ie.”
Hatimare ne ghuhnaza noa noilaghi Jisas ie
(Mak 11:27-33; Luk 20:1-8)
23Agnoni, Jisas neke puloni ka Suga Blahi Jerusalem ie ne fagriura nanonire. Kate fagriu te'au magne ie, mae pirisi ulu ni mae funei mala baubatu teure ne mei ka magne, ne ghuhna eu'ani, “Ba naghe, hna nafnata noilaghi te au ka ghoe te eira ghoe puhi irea? Ni mae ihei teke gu'ari noilaghi ire ka ghoe ie?”
24Jisas ne lepo eu'ani ka hatimare, “Rei ba ngagughau te ghuhnaghamu lanau ghotolu kahe guaghuhna. Ne tangomana ho'ilepoza na ghotolu guaghuhna igneni, rei kaina tangomana lepo ari ka ghotolu hna nafnata noilaghi te au ka rei te eira rei puhi ire. 25Ihna, noilaghi teke fasiublahi nanoni mae Jon ia, neke mei funu ka God, ba funu ka nanoni lana?”
Agnoni, hatimare ne fahnuhnughu farithaidi ne lepo eu'ani, “Meuni lepo eu'ani tati, ‘God teke gulao noilaghi ka mae Jon ie,’ meuwe, magne kaina ie ghuhna eu'ani ka tati, ‘Teuwe, ne fahneuwa ne theome fatutu'anizani ghotolu hna teke lepoza mae Jon ie?’ 26Ni jame lepo eu'ani tati, ‘Nanoni lana teke gulao noilaghi ka mae Jon ie’ meuwe, nanonire kaina di'atadi ka tati, eigna hatimare kafua fatutu'aniza te mae Jon gne kahe mae profet ie.”
27Agnoni, hatimare ne lepo eu'ani ka Jisas, “Gheati theome laseza lana ho'ilepogna ie.”
Ni Jisas ne lepo eu'ani ka hatimare, “Uve, rei ba eulanauwa na theome lepoza ka ghotolu hna nafnata noilaghi te au ka rei te eira rei puhi ire.”
Lepo nabadi phalumae tabusigna
28Jisas ne thuturiza kahe lepo naba gnadi phalumae tabusigna. Magne ne lepo eu'ani ka hatimare, “Lepo meiza ba ghotolu ka rei hna u gaoghatho gna lepo naba igne. Kahe mae au phalu thugna ma'ane. Agnoni, magne tei ne lepo eu'ani ka mae thugna ulu lahu ie, ‘Thuguia, gignoa igne ghoe tei mala loku ka nogu sinabo rei ia.’
29“Mae thugna gne ne lepo euni, ‘Maghe, rei na theome tei.’ Ni ke leghugna teugne, magne neke hoho'i gaoghathogna ie neke tei.
30“Agnoni, mae magna ie tei neke lepo eu'ani ka keha mae thugna ie, ‘Thuguia, gignoa igne ghoe tei mala loku ka nogu sinabo rei ia.’ Mae thugna ie ne lepo eu'ani ka mae magna ie, ‘Uve maghe, rei kaina tei loku!’ Ni magne ne theome tei loku lana.
31“Mae ihei ka phalumae thugna ire te leghuza goeghozegna mae madi ie?”
Hatimare mae pirisi ni mae funei teure ne lepo eu'ani ka magne, “Mae sua ke ulu gne.”
Jisas ne lepo eu'ani ka hatimare, “Tutu'ani lui, te lepoza rei ka ghotolu ie. Hatimare mae te di'a te saosalo takisi, ni nanoni vine teu are lana kaina te kulu au ka baludi nanoni God te funei frunira re, ame ghotoluna euwa. 32Eigna mae Jon Siublahi ia neke mei falalase hui ka ghotolu u nabrau te kohlo te mala leghuza ghotolu ie, ni ghotolu theome fatutu'aniza lana goeghozegna magne ie. Ni mae te saosalo takisi ni nani vine teu ire neke fatutu'aniza magne. Ghotolu neke kofiza hui igne, meuba, ghotolu heta gemi tho'anomi ho'ignagnafa ni theome fatutu'anira eu goeghozegna magne re.”
Lepo naba gna Thugna God
(Mak 12:1-12; Luk 20:9-19)
33Jisas ne lepo eu'ani ka hatimare, “Farogo ka lepo naba igne. Kahe fata, kahe mae tufu glose ne hnuma kahe sinabo. Magne bara falithuza sinabo ie ni dokha kahe khora mala poji sisi grepi mala e'ei waen. Agnoni, magne ne babana kahe suga ichoni klia mala toetoe. Hui teuwe, magne ne sakre lao sinabo gne ka hatimare mae koukofu sinabo re mala loku tagna. Ni magne jifla ne tei au ka keha nau maghani lui. 34Kate dufiza ghanogna sinabo gne, magne kuri teira noa mae glokure mala tei hatimare ka mae koukofu sinabo re mala atha keha gea sisi.
35“Agnoni, hatimare mae koukofu sinabo re ne lokira mae glokure. Kahe mae ne nunutu hatimare, fapalu ie ne faleleme ni fatolu ie ne khale faleme ka thina. 36Agnoni, mae tufu sinabo ie neke kuri teirani keha mae gloku ka mae koukofu sinabo re. Gignoa igne magne ne kuri teira chuku mae gloku ke chukudini mae teke ulu tei ra. Ni mae koukofu sinabo re neke jateula teke eira ka mae ke ulu lahu ra eulanauwa ka mae glokure. 37Leghu lahugna ie mae tufu sinabo ie ne kuri teiza mae tufuni thugna ie. Ni magne ne lepo eu'ani, ‘Uve, hatimare kaina ie ghatho boheza mae thugu rei gne.’
38“Ni kate kofiza hatimare meigna mae thugna magne ie, hatimare ne lepo eu'ani farithaidi, ‘Igne tufuni thugna mae tufu sinabo ie. Mei ghotolu mala faleme nodaza, mala ke tufuda thaida sinabo igne!’ 39Agnoni, hatimare ne udi fajiflaza magne ke kosi sinabo ie ne falemeza.”
40Ke leghugna igne, Jisas ne ghuhna eu'ani ka hatimare, “Eume, ka naga'e ke pulo meigna mae tufu sinabo ie, hna kaina te eiza magne ka mae te koukofugna sinabo re?”
41Hatimare ne lepo eu'ani ka magne, “Magne na kafua faleleme nanoni te di'a teuware. Ni magne kaina sakre lao sinabo ie ka keha nanoni maghani te tangomana tusu fapulo keha sisigna sinabo ie ka mae tufugna ie kate dufiza ghanogna sinabo ie.”
42Agnoni, Jisas ne lepo eu'ani ka hatimare, “Uve, ghotolu la ijuijuza hui igne ka i'ini te blahi ia,
‘U thina teke tho'anodiza mae te lase loku suga re, kela kegra haghe kahe thina ulu lui ka suga ie.
U puhi igne Lod thaigna teke eiza ie, ni tufuni keli lui kokofugna ie ka tati.’#21:42 Sam 118:22,23.
43“Eume, eigna te tho'anomighau rei ghotolu nanoni Jiure, ghotolu kaina theome au baludi nanoni God te funei frunira re. Ni keha nanonini kaina te ruma ie, ihei nanoni te eira hna te ngaguza magne re. 44Mae ihei te oha ke klia thina igne, thina igne kaina fadi'aza lui magne. Ni te soru thina igne ke kliagna magne ie, magne kaina brisa jateula naprafu euwa.”
45Hatimare mae pirisi ulu ni mae Farisi teure ne rogiza lepo naba te eiza Jisas igne, ni laseza te magne lepora lana hatimare teuwe. 46Agnoni, hatimare ngagura te lokiza magne. Ni hatimare hmauza te eiza igne, eigna nanonire fatutu'aniza te Jisas gne kahe mae profet.
© 2025 SIL Solomon Islands