Matiu 20
20
Lepo naba gna mae gloku ka sinabo
1Jisas ne lepo eu'ani, “U naga'e God te funei frunira noa nanonire, jateula thuturi igne euwa. Kahe fata, mae khoto sinabo ie ne boibongi ghae ne tei hiro nanoni mala loku ka noa sinabo ie. 2Agnoni, magne ne kahe gaoghatho baludi hatimare mala folira noa mae glokure kahe nanugra te thokagna loku kahe naga'e euwa. Eune hui, magne ne fatei ra hatimare mala loku ka sinabo ie.
3“Ka tahngi hniani, magne ke jiflani ne tei kofira keha mae te fite au tafiri te'au lana ka hnimoto mala maketi ie. 4Agnoni, magne ne lepo eu'ani ka hatimare, ‘Ghotolu mei mala ari loku ka nogu sinabo rei ie. Rei kaina folighamu ghotolu thokagna gloku te eiza ghotolu.’ 5Agnoni, hatimare ne tei loku ka sinabo ie.
“Magne eulanauwa neke tei phile aublathagna, ni eulanauwa ka tahngi tholuni. Ka phalu hnimotogna naga'e teure, magne atha nanoni mala tei loku ka sinabo ie. 6Kate haghe mala tahngi glimani phile grafi ie, magne ke teini ka hnimoto mala maketi ie. Ni magne ne kofira keha mae kegra tafiri ne'au ka teuwae. Magne ne lepo ka hatimare, ‘Ne fahneuwa ghotolu te fite kegra tafiri nomi te'au lana naga'e thaudolu gnea?’
7“Hatimare ne lepo ka magne, ‘Gheati gne the'o heina te mei lepoghami mala tei loku ie’.
“Agnoni, magne ne lepo eu'ani ka hatimare, ‘Keli aulana, mei sonighotolu mala ari loku ka nogu sinabo rei ie’.
8“Rafi soru gna naga'e, mae funei gna sinabo ie ne lepo eu'ani ka mae te koukofura mae glokure, ‘Kilo meira mae glokure ni gulao nodi taba re euwa. Fufunu ka mae te mei loku leghu lahu re tei dufu ka mae teke kulu mei loku re.’
9“Agnoni, mae gloku teke tei loku funu ka tahngi glimani re mei ne atha nodi tabare. Hatimare ne sopagna atha kahe nanugra eu ne hui lana. 10Agnoni, mae teke kulu loku funudi boibongi fufugho ra, hatimare ka gaoghathodi re jau na atha nanugra ke bi'odini mae te mei loku ke leghu re euwa. Ni hatimare eulanauwa sopagna atha kahe nanugra kahe mae eu ne hui lana. 11-12Ke leghugna te atha hatimare nodi taba re, hatimare ne di'atadi ka mae khoto sinabo ie ne lepo eu'ani, ‘Thotoghei te mei loku leghu lahu ire, mei loku la kahe aowa re! Ne fahneuwa ghoe te fananaba la fofolimi gheatire gnea? Euwateuwe, gheati gne loku naga'e thaudolu ni paapara ka jalagna nadafi ie.’
13“Mae khoto sinabo ie ne lepo eu'ani ka kahe mae gloku, ‘Farogo mae kheragu ia, rei theome mugnagho ghoe. Ghoe thaimu au teke kahe gaoghatho balugu rei te ngagugho loku kahe naga'e malagna kahe nanugra lana ie. 14Eume, atha sonighoe nou taba ie ni tei ka sugamu ie euwa. Eigna rei ngagughau te tabaza mae teke mei loku leghu lahugne jateula te tabagho rei gne euwa. 15Rei tangomana te eiza hna te ngagughau eiza ka nogu nanugra thaigu re. Ba! Ghoe gogotu eigna te keli harira rei nanoni teuware gnea?’
16“Agnoni, leghu lahugna ie Jisas ne lepo eu'ani, ‘Eume, chuku nanoni te au leghu lahu ka nakahra gignoa igne re kaina ke au ulu, euwateuwe chuku nanoni teke au ulu ka nakahra gignoa igne re kaina ke au ke leghu.’ ”
Jisas fatolufata lepoza u glemegna ie
(Mak 10:32-34; Luk 18:31-34)
17Kate haghe mala tei Jerusalem teuwe, Jisas ne udi famaghanira saleiphalu noa mae farogore ne lepo eu'ani ka hatimare, 18“Farogo fakeli ghotolu ia. Gignoa igne tati kaina haghe dufu Jerusalem, euwateuwe ka nau teuwae, hatimare kaina sakre laoghau rei mae teke mei funugu ka God gne ka khamedi hatimare mae pirisi ulu, ni ka hatimare mae velepuhigna vetula noa mae Moses teure. Ni hatimare kaina fate falemeghau rei. 19Ni hatimare kaina ke sakre laoghau rei ka khamedi mae te theome Jiure. Euwateuwe, hatimare kaina ma'eghau ni anighau eu rei ka pruki ni tupijurughau rei ka gazu fafata ie. Ni ka fatolu naga'e ie, God kaina ke fakahra fapuloghau rei ka u gleme ie.”
Noa thore kheto mae Zebedi
(Mak 10:35-45)
20Agnoni, kheto mae Zebedi ie ne tei ka Jisas baludi phalu thugna ma'ane re. Gne'e tufru soru ke ulugna Jisas ne toreza magne mala ei hariza hna te ngaguza gne'e ie.
21Jisas ne lepo eu'ani ka gne'e, “Hna te ngagugho ghoe ie?”
Gne'e ne lepo eu'ani ka magne, “Rei ngagughaura phalu thugu ma'ane ire te mala hokro ka sape noilaghi bi'o, kaheni phile matumu ni keha ie phile merimu eu ghoe kate mei mae Nafanomu ghoe kaina ie.”
22Agnoni, Jisas ne lepo eu'ani ka phalumare, “Ghopa theome laseza hna te toreza ka rei ie. Ihna, ghopa tangomana au te paapara ka nafnata paapara kaina te dufighau rei gne?”
Phalumare ne lepo eu'ani ka Jisas, “Uve, ghepa tangomana au lana.”
23Ni Jisas ne lepo eu'ani ka phalumare, “Uve, tutu'ani lui, ghopa kaina au paapara ka nafnata puhi nate au paapara rei gne. Ni te mala hokro phile matugu ni phile merigu teu rei ie theome nogu gloku rei te mala sakreza ka ihei ie. God thaigna kaina te gulao sape teure ka ihei teke kulu fafate magne re.”
24Kate rogiza igne, keha salaghi mae farogore ne di'atadi lui ka phalumae tabusigna re. 25Agnoni, Jisas ne kafua kilo faudura hatimare ne lepo eu'ani, “Ghotolu laseza nodi funei nanoni te theome mae Jiure ngagura te falalase nodi noilaghire ke kliadi nodi nanonire. Ni nodi mae baubature eulanauwa ngagura te kafua kofu falasera nanonire nodi noilaghire. 26Ni ghotolu tovi jateula teuwae euwa farihotenimi thaimi. Ihei ka ghotolu te ngaguza mae funei ie, magne mala jateula mae gloku eulana ka ghotolu. 27Ni mae ihei ka ghotolu te ngaguza mala mae klia lahu ie, magne mala jateula kahe mae seka eu ka ghotolu hui. 28Jateula teuwae eu rei mae teke mei funugu ka God gne theome mei mala loku harighau thaigu. Ni rei mei mala loku harira ni sakreghau thaigu mala leme harira nakhibodi nanonire.”
Jisas ne fakekelira nathadi phalumae te doa re
(Mak 10:46-52; Luk 18:35-43)
29Agnoni, kate jifla Jisas baludi noa mae farogore Jeriko ie, chuku nanoni lui ne tei leghura hatimare. 30Ni phalumae te doare hokro ne'au ka geri nabrau ie. Kate rogiza phalumare te Jisas ne liu ari teuwe, phalumare ne aku eu'ani fabi'o, “Lod, vikegna mae Nafano Devet, kokhonighami ghepa!”
31Ni nanonire ne fnajira phalumare mala au famuu, ni neubanauwa, phalumare neke aku fabi'o laoni eulana, “Lod, vikegna mae Nafano Devet, kokhonighami ghepa!”
32Agnoni, Jisas ne kegra noto ne kilora phalu mae te doa re mala mei ka magne, ne lepo eu'ani, “Hna te ngagughamu ghopa te mala ei harighamu rei ie?”
33Phalumare ne lepo eu'ani ka magne, “Lod, ghepa ngagughami teke kokofu fapulo.”
34Jisas ne kokhoni noara ne habo lao ka nathadi phalumare re. Euwateuwe, ka teuwae lana phalumare ghoseni neke kokofu fapulo nodi. Agnoni, phalumare ne tei leghuza magne.
© 2025 SIL Solomon Islands