Matiu 19
19
Jisas fagriu gna klisu thoilaghi
(Mak 10:1-12)
1Ke leghudi te lepora puhi ire, Jisas ne jifla Galili ne tei ka nohi Judia, ka keha phile Kho'u Bi'o Jodan. 2Chuku nanoni lui te leghuza magne re, ni ka teuwae magne ne fakekelira nanoni te fogra re.
3Agnoni, keha mae Farisire mei ne fariuriuza Jisas. Hatimare ne ghuhna eu'ani ka magne, “Ihna, ka noda vetula tati ie, sakreza au nauwa kahe mae te mala kokoza khetogna ie, ka keha puhi te ngaguza lana magne thaigna ie?”
4Jisas ne lepo eu'ani ka hatimare, “Uve, ghotolu la ijuijuza hui ka u i'ini te blahi ia, ‘Ka vuavuhagna nauthoglu gne, God neke vuavuhaza ma'ane ni ga'ase,’#19:4 Fufunu 1:27. 5Ni God ne lepo eu'ani, ‘Eigna teugne, mae ma'ane ie mala jifla kokora dogna magna re mala au faudu balugna khetogna ie, ni repa phalu nanoni teure mala au faudu mala kahe thono lana.’#19:5 Fufunu 2:24. 6Eume, repa theome phalu nanoni ni kaheni lana. Tufuni blahi lui kahe nanoni te fasopa aura repa teke salofaudu hui God re.”
7Ni mae Farisire ne lepo eu'ani ka magne, “Teuwe, ne fahneuwa mae Moses te sakreza mae ma'ane ie tangomana koko au lana khetogna ie, ke leghugna te gulao magne phepagna mala klisu thoilaghi ie teu gnea?”
8Jisas ne lepo eu'ani, “Mae Moses neke sakreza ka ghotolu te mala koko khetomire, eigna ghotolu fua ninigrana lui te mala fagriughamu ie. Ni ka vuavuhadi goifata fate'o re God neke theome sakreza. 9Ni te lepoza rei ka ghotolu ie, jame khetogna kahe mae theome ke ei fadi'a lana ka ihei ma'ane na, ni magne koko khetogna ie ke tei toilaghi noa ka kahe ga'aseni nauwa, mae teugne khale hui ka toilaghi pedo ie.”
10Agnoni, noa mae farogo Jisas re ne lepo eu'ani ka magne, “Te teuwae lana gaoghatho te tangomana koko magne khetogna ie, te keli ie tovi toilaghi lana euwa.”
11Ni Jisas ne lepo eu'ani ka hatimare, “Fagriu igne theome maladi nanoni te hui re, ni maladi lana nanoni God teke mala eu teu re euwa. 12Keha nanonire kahra mei mala theome toilaghi nekeuwa. Euwateuwe, keha nanonire neke e'eira mala theome toilaghi. Agnoni, keha nanonire theome ngagura toilaghi, eigna hatimare ngagura te loku fakeli hariza God. Ni ihei te ngaguza toilaghi ie mala leghu fakeliza u fagriu igne.”
Jisas fablahira goro suare
(Mak 10:13-16; Luk 18:15-17)
13Ke leghugna igne, keha nanonire udira goro suare ne mei ka Jisas, mala habo lao magne khamegnare ke kliadi mala taraira ni fablahira euwa. Ni kate kofiza igne, mae farogore ne lepo faheta ka nanonire mala tovi eiza teugne.
14Ni Jisas ne lepo eu'ani ka hatimare, “Sakre ra goro suare mala mei ka rei, tovi lothira, eigna nanoni God te funei frunira re nodi nafnata nanoni te jateula sua ire euwa.” 15Ke leghugna te habo lao khamegnare ka pha'udi goro suare te fablahira re, magne ne jifla kokoza nau teugne.
Kahe mae hnaghevalu te nadedei
(Mak 10:17-31; Luk 18:18-30)
16Agnoni, kahe mae hnaghevalu te nadedei ne mei ka Jisas ne ghuhna eu'ani, “Velepuhi, hna puhi keli nate eiza rei te mala athiza nakahra te the'o ka huigna ie?”
17Jisas ne ho'ilepo eu'ani ka magne, “Ne fahneuwa ghoe te mei ghuhnaghau rei gna hna puhi te keli teu gnea? God thaigna lana te keli ie. Ni ne ngagugho atha nakahra te the'o ka huigna ie neuna ghoeni, leghura ghoe vetula ire euwa.”
18Agnoni, magne ne lepo eu'ani ka Jisas, “Hna vetula te lepoza ghoe gnea?”
Jisas ne lepo eu'ani, “ ‘Tovi faleme nanoni; tovi toilaghi pedo; tovi chiko; tovi muamugna ka fate ie; 19ghatho bohera mamu domure;’#19:19 Eksodas 20:12-16; Diutronomi 5:16-20. ni ‘nahma ra kheramu fafaudu re jateula ghoe te nahmagho thaimu ie euwa.’#19:19 Levitikas 19:18.”
20Ni mae hnaghevalu gne neke lepo eu'anini ka Jisas, “Velepuhi, rei kafua leghura mei lana vetula fate'o ire. Ke hnani teke mala eiza rei ie?”
21Jisas ne lepo eu'ani ka magne, “Te ngagugho mala kohlo ke ulugna God teu ghoe ie, ghoe tei sabiri fahui nou gobigna goifatare, ni tei tufa nanugradire ka ihei nanoni te kuma re euwa. Teu ghoe ie, ghoe kaina au nou nadedei keli lui klia. Agnoni, tangomana na ghoe te mei leghughau rei ie euwa.”
22Kate rogiza magne goeghoze igne, mae hnaghevalu gne ne fua di'agnagnafagna lui, eigna magne au noa chuku goifata lui. Agnoni, magne ne ghae kokoza Jisas.
23Agnoni, Jisas ne lepo eu'ani ka noa mae farogore, “Tutu'ani lui, te lepoza rei ka ghotolu ie. Fua ninigrana hariza lui nanoni te nadedei ie te mala ruma baludi nanoni God te funei frunira re. 24Uve, te lepoza rei ka ghotolu ie, theome tangomana kamel ie te ruma ka khoragna hnili ie. Euwateuwe, ke fua ninigranagnani teugne te mae te nadedei ie te mala ruma baludi nanoni God te funei frunira re.”
25Kate rogiza goeghozegna Jisas igne, mae farogore ne fua vere nodi lui ne ghuhna eu'ani ka magne, “Tholumae! Teuwe, kaina mae ihei lana nate athiza u tufuni nakahra ie?”
26Jisas ne kofututu lao ka hatimare ne lepo eu'ani, “Tutu'ani lui, puhi igne tufuni ninigrana lui hariza nanoni ie, ni God theome nigraza te mala eiza kahe goifata ie.”
27Agnoni, Pita ne lepo eu'ani ka magne, “Lod, gheati neke lisa sorura nomi goifata fate'o re mala leghugho ghoe. Hna nate atha gheati ie?”
28Jisas ne lepo eu'ani ka hatimare, “Tutu'ani lui, te lepoza rei ka ghotolu ie. Kate dufu meigna noa nauthoglu valu God ie, rei mae teke mei funugu klia ie kaina hokro ka nogu sape noilaghi ie mala funei frunira nanoni ka nauthoglu valu ie. Euwateuwe, ghotolu saleiphalu nogu mae khuru rei re kaina hokro ka saleiphalu sape noilaghi mala funei frunira saleiphalu vikedi Israel re. 29Ni ihei te ghatho boheghau rei te tei kokora noa suga ni thabusigna, greghagna ni magna dogna, ni thugna, ni noa hnimoto glose teure, magne kaina atha kahe gobifata ke uludini gobigna noa goifata fate'o teke na'a faleghu magne re. Euwateuwe, magne kaina athiza nakahra te the'o ka huigna ie. 30Ni chuku nanoni te ulu ka nakahra gignoa igne re kaina ke au leghu. Euwateuwe, chuku nanoni te au ke leghu ka nakahra gignoa igne re kaina ke au ke ulu.”
© 2025 SIL Solomon Islands