Matiu 18
18
Mae ihei te ulu ka nanoni God te funei frunira re
(Mak 9:33-37; Luk 9:46-48)
1Ka naga'e teugne mae farogore mei ne ghuhna eu'ani ka Jisas, “Ba, mae ihei nate ulu ka nanoni God te funei frunira re?”
2Agnoni, Jisas ne kilo meiza kahe sua ichoni ne fakegraza ke uludi mae farogore, 3ne lepo eu'ani, “Tutu'ani lui, te lepoza rei ka ghotolu ie, te theome hoho'i ghotolu puhimi re ni theome na'a faparighamu thaimi jateula sua teuwe, ghotolu kaina ie tufuni theome thokami te au baludi nanoni God te funei frunira re. 4Eume, mae ihei te na'a fapariza thaigna jateula sua igne teuwe, magne lana kahe mae te ulu te thokagna au baludi noa nanoni God re. 5Eume, ihei te toghoza kahe sua jateula igne teu ka nahngagu rei ie, magne toghoghau lanauwa rei.”
Ihei te batu fadi'aza noa fatutu'ani keha nanoni ie
(Mak 9:42-48; Luk 17:1-2)
6Ni Jisas ne lepo eu'ani, “Ihei te batu fadi'aza noa fatutu'ani kahe sua ka ire te mala theome fatutu'anighau rei ie, mae teugne thokagna ie haharu kahe thina bi'o ka naragna ie ni tei fabloblohmo ka hnoraragno euwa. 7Ghotolu nanonigna nauthoglu gne, koukofu fakelighamuni! Eigna nafnata mae teure au te tangomana eira puhi te mala ke theome fatutu'ani nanonire. Nafnata puhi ire kaina mei koba aulana. Ni mae te eiza puhi teugne, magne koikofi fakelizani thaigna! 8Jame khamemu ba nenemu ghoe te batu fadi'agho mala theome fatutu'ani ghoe ie, kusu koko. Te au ghoe kahe khamemu ba nenemu, ni ruma ghoe ka tufuni nakahra ie teuwe, ke kelignani te au ghoe phalu khamemu ba phalu nenemu teure ni koko laogho hatimare ka glamagna kha'aghi te the'o ka lemegna teuwe. 9Ni jame nathamu ghoe te batu fadi'agho te theome fatutu'ani ghoe ie, atha koko. Te au lana ghoe kahe nathamu, ni ruma ghoe ka tufuni nakahra ie teuwe, ke kelignani te au ghoe phalu nathamure ni koko laogho hatimare ka glamagna kha'aghi te the'o ka lemegna teuwe.”
Lepo naba gna sipsip te iho
(Luk 15:3-7)
10Ni Jisas neke lepo eu'anini, “Koikofighamuni ghotolu ia, na euni kofu fapariza ghotolu kahe sua ka ire euwa. Te lepoza rei ka ghotolu ie, nodi engjel sua ire au fatheve klia balugna mae Magu.” 11Eigna rei mae teke mei funugu ka God gne, mei mala fakahrira nanoni te iho te the'o tadi tufuni nakahra ie.
12“Jame kahe mae au noa kahe gobi sipsip, euwateuwe kaheni the'o kofiza, kaina hna te eiza magne ie? Magne kaina lisa laora hniasalei hniani sipsip are ngamu au ka gukhu ie, ni tei hiroza te ihogne euwa. 13Tutu'ani lui te lepoza rei ka ghotolu ie. Kate tei te kofudeiza magne sipsip ie, magne kaina tufuni hneahnegha lui ke tulaognani te hneahnegha magne gnadi hniasalei hnia sipsip te theome ihore. 14Kaina jateula teuwae eu mae Mami ghotolu te au klia ie. Magne theome ngaguza kaheni ka goro sua ire te iho ie.”
Jame ei fadi'a harigho kahe mae kheramu ka khilo'au
15Agnoni, Jisas neke lepo eu'anini, “Jame kahe mae kheramu ka khilo'au ie ei fadi'a harigho kahe puhi, ghoe tei kofiza magne mala fakokohlo ghopa puhi teugne farithaimi. Te farogo magne ka hna te lepoza ghoe ie, ghoe toghoza huila magne mala ke fafaudu fapulo ghopa. 16Ni jame tho'anoa farogo magne ka ghoe, ghoe kaina udiza kahe mae ba phaluni balumu ni ke puloni ka magne euwa. Eigna i'ini te blahi ie lepo eu'ani, ‘Kate fathoro kahe mae gna keha mae ie, phalumae ba tholuni eu te mala au te farogo ka hna te lepoza magne ie.’#18:16 Diutronomi 19:15. 17Ni ne tho'anoa farogona magneni, ghoe tei fatakle puhi teugne ka mae ka khilo'au re. Ni ne tho'anoa farogoni ne'au lana magne ka hna te lepora mae khilo'aureni, ghotolu kofu laoza magne jateula te kofiza ghotolu kahe mae bongihehe ba mae te di'a te saosalo takisi ia eu lana.
18“Tutu'ani lui te lepoza rei ka ghotolu ie, hna te theome sakreza ghotolu ka u nauthoglu igne ie, God kaina theome sakreza lanauwa klia. Ni hna te sakreza ghotolu ka nauthoglu igne ie, God kaina sakreza lanauwa klia.”
19“Rei nake lepozani igne ka ghotolu, tutu'ani lui jame phalu nanoni ka ghotolu kahe gaoghatho lana ka hna te toreza phalumare ie, mae Magu rei te au klia ie kaina eiza hna te toreza phalumare ie. 20Eigna kate phaluni ba tholu nanoni te salofaudu ka nahngagu rei ie, rei au baludi hatimare.”
U lepo naba gna kahe mae te tho'anoa atha koko nakhibogna keha mae ie
21Ke leghugna igne, Pita mei ne ghuhna eu'ani ka Jisas, “Lod, jame mae kheragu rei ie ei puhi di'a fatheve harighau rei, na ngiha fata rei atha koko nakhibogna magne re? Fitu fata?”
22Ni Jisas ne lepo eu'ani ka magne, “Te lepoza rei ka ghoe ie, theome fitu fata lana, ni fitusalei fituni na euwa.
23“Eigna nauthoglu gna Klia ie, jateula kahe mae nafano te ngaguza lase fakelira fa'ihna noa mae glokure koukofudi noa nanugrare teuwe. 24Kate funu eiza magne igne, hatimare udiza ne mei kahe noa mae gloku magne teke kaoni ka salaghi thogha dola. 25Ni mae gloku teugne theome tangomanaza teke hoho'i fapulo nanugra te bi'o lui teugne. Agnoni, mae nafano ie ne lepora hatimare mala athiza magne, khetogna ni thugna teu magne re mala sabiri ra mala jateula nanoni seka ni sabiri ra lanauwa noa goifata fate'o magne re mala atha nanugra ke hoho'i fapulo noa nanugra re.
26“Agnoni, mae gloku gne ne mei ne turununu soru ke ulugna mae nafano ie, ne lepo eu'ani, ‘Mae nafano, tuku laowa ka khata hnimoto ichoni sonighoe, rei kaina ke hoho'i fapulo au nou nanugra ghoe re.’ 27Agnoni, mae nafano ie ne kokhoni noaza lui magne, eume magne ne atha koko noa kaoni magne re, ni sakre teiza.
28“Ni kate jifla te tei magne ie, magne ne deiza kahe mae kheragna gloku teke kaoni kahe gobi dola ka magne ie. Magne lao ne loku ka naragna mae teugne ne lepo eu'ani, ‘Ghoe, faghose hoho'i fapulo nogu nanugra rei teke kaoni ghoe ra gignoa igne lana!’
29“Ni mae kheragna magne ie ne turununu soru ne lepo eu'ani ka magne, ‘Tuku laowa ka khata hnimoto ichoni sonighoe, rei kaina ke hoho'i fapulo au nogu nanugra ghoe re.’
30“Ni magne ne theome ke ngaguza teke mala tukuni ie. Eume, magne ne lepora hatimare mala athiza mae teugne ne na'iza ka suga sosolo ie, au ghile ke hoho'i fapulo magne nanugra teke kaoni magne re. 31Ni kate kofiza igne, keha noa mae gloku mae nafano re ne di'agnagnafadi lui. Hatimare tei ne thuturi ka mae nafano ie puhi teke eiza magne ie.
32“Agnoni, mae nafano ie ne kilo meiza mae gloku teugne ne lepo eu'ani ka magne, ‘Ghoe kahe mae di'a lana! Rei teke atha koko nou kaoni ghoe re, eigna ghoe neke toreghau rei. 33Eume, ne fahneuwa ghoe te theome kokhoniza keha mae kheramu ie gnea? Jateula teke kokhonigho rei ia euwa?’ 34Mae nafano ie ne fua di'atagna lui, ne sakre teiza magne ka suga sosolo ie mala au paapara fatheve ka teuwae au ghile hoho'i fapulo magne nanugra bi'o teke kaoni magne re.”
35Agnoni, Jisas ne lepo eu'ani, “Mae Magu rei te au klia ie kaina jateula teugne eu ka ghotolu hui, eu te theome atha koko ghotolu nakhibodi kherami fafaudu re.”
© 2025 SIL Solomon Islands