Matiu 17
17
Thonogna Jisas ie ne hoho'i
(Mak 9:2-13; Luk 9:28-36)
1Fanamno naga'e ke leghugna igne, Jisas ne udiza mae Pita ni phalumae tabusignare, mae Jems ni mae Jon ne haghe ka kahe gukhu ne au thaidi ka teuwae. 2Kate kofu lao te'au tholumare ie, tholumare ne kofiza thonogna Jisas ie ne hoho'i. Nathagna ni naflogna teu magne re ne siasigla lui jateula nadafi euwa. Euwateuwe, noa pohere eulanauwa ne tufuni vegha. 3Agnoni tholumare ne kofira Moses ni mae Elaeja thuturi ne au balugna Jisas.
4Agnoni Pita ne lepo eu'ani ka Jisas, “Lod, tufuni keli te au tati ani ie. Jame ngagugho ghoe ie, rei kaina babana tholu suga ichoni ani, kaheni mala nou ghoe, kaheni noa mae Moses ni kaheni noa mae Elaeja.”
5Kate vevese te'au mae Pita ie, kahe gromo te siasigla ne toku frunira hatimare. Agnoni, hatimare ne rogiza kahe naogla ne lepo eu'ani mei funu ka gromo ie, “Igne tufuni mae Thugu rei te fua hneghaza ni fua nahmiza lui teu rei ie. Ghotolu farogo fakeli ka hna te lepoza magne ie!”
6Kate rogiza tholu mae farogore goeghoze igne, tholumare ne hmau nodi lui ne tufru soru pari. 7Ni Jisas mei ne habo laora tholumare ne lepo eu'ani, “Kegra haghe, tovi hmau.” 8Agnoni kate kofu haghe tholumare ie, the'o la kahe nanoni te au ka teuwae ie, Jisas thaigna lana te kofiza tholumare ie.
9Agnoni kate sorudi hatimare funu ka gukhu ie, Jisas ne lepo faheta eu'ani ka tholumae farogore, “Hna te kofiza ghotolu ka gukhu ie ia, tovi thuturiza ka iheina au ghile dufiza naga'e ke kahra fapulogu rei mae teke mei funugu ka God gne ka gleme ie.”
10Tholumae farogore ne ghuhna eu'ani ka Jisas, “Ne fahneuwa mae velepuhigna vetula noa mae Moses re te lepoza, ne mae Elaeja ie kaina kulu mei ame mei na mae Kraes ie teugnea?”
11Jisas ne lepo eu'ani, “Tutu'ani lui, mae Elaeja ie kaina kulu mei mala fakokohlo goifata fate'o re. 12Ni te lepoghamu rei ie, mae Elaeja gne la mei hui, ni nanonire theome laseza lana magne. Hatimare neke eira chuku puhi te di'a hariza magne leghura nodi gaoghatho thaidi re. Ni hatimare kaina jateula teugne eulanauwa harighau rei mae te mei funu ka God gne.” 13Agnoni, tholumae farogore ne tufuni laseza te Jisas gne thuturi neigna mae Jon Siublahi teuwe.
Jisas ne brue fajifla na'itu ka kahe maseni
(Mak 9:14-29; Luk 9:37-43a)
14Ka teke soru dufu Jisas ni tholu noa mae farogore ka maviture, kahe mae mei ne turununu ke ulugna Jisas ne lepo eu'ani, 15“Lod, kokhoniza mae thugu ma'ane rei ie! U fogra snosnogho te au ka magne gne la fua paraza lui magne. Chuku fatare magne uthu soru ka glama kha'aghi ni ka glama kho'u. 16Rei neke udi meiza hui magne ka nou mae farogo ghoe re, ni hatimare theome tangomana harira te fakekeliza magne ie.”
17Jisas ne lepo eu'ani, “Tholumae, ghotolu nanoni gignoa igne re di'a lui puhimire, ni the'o nomi fatutu'ani lana ka God euwa! Kaina ngiha fata au rei balumi ghotolu ie? Rei hongoghau lui ka ghotolu! Udi meiza maseni teuwae ka rei ani!” 18Jisas ne lepo faheta ka na'itu te au ka mae maseni ie. Agnoni, na'itu ie ne jifla mei ka magne. Euwateuwe, ka teuwae lana maseni teke fogra ie ne ghose ne keli fapulo noa.
19Ke leghugna igne, hatimare noa mae farogo Jisas re ne mei thaidi ne ghuhna eu'ani ka magne, “Ne fahneuwa gheati te theome tangomana brue fajiflaza na'itu ignea?”
20Jisas ne lepo eu'ani, “Ghotolu theome tangomanaghamu te brue fajiflaza na'itu igne, eigna nomi fatutu'ani ghotolure fua glape lui. Tutu'ani lui te lepoza rei ka ghotolu ie, neubane ichoni lui ghotolu nomi fatutu'ani ie jateula sisi gazu mastad neuwa, ghotolu tangomana au lana te lepo eu'ani ka gukhu igne, ‘Ghae ani ke tei au ka igno.’ Teu ghotolu ie, gukhu teuwae kaina ngigru tei lana. Eume, kaina the'o kahe goifata te ninigrana harighamu ie.
21“Ni nafnata na'itu teugne tangomana jifla lana ka puhi tharai ni lugu euwa.”
Jisas fapalu lepoza glemegna ie
(Mak 9:30-32; Luk 9:43b-45)
22Ke leghugna igne, mae farogore ne kafua krapu mei ka kahe hnimoto Galili. Agnoni, Jisas ne lepo eu'ani ka hatimare, “Rei mae teke mei funugu ka God gne, hatimare kaina sakre laoghau rei ka khamedi mae naokare mala falemeghau rei. 23Ni ka fatolu naga'e ie rei kaina ke kegra fapulo ka u gleme.” Kate rogiza igne, mae farogore ne kafua di'agnagnafadi lui.
Jisas foli takisi gna Suga Blahi noa God
24Jisas baludi noa mae farogore ne tei dufu Kapanam, hatimare mae saosalo takisi gna Suga Blahi ie mei ka Pita ne ghuhna eu'ani ka magne, “Ihna, nomi mae velepuhi ghotolu gne foli takisi gna Suga Blahi gne au nauwa gnea?”
25Mae Pita ne lepo eu'ani ka hatimare, “Uve, magne fofoli aulana.”
Agnoni, kate tei mae Pita ka suga te au Jisas ie, Jisas ne ghuhna eu'ani ka magne, “Saemon, hna eu ghoe gaoghathomu ie? Mae nafano ka nauthoglu igne, hatimare saosalo chuku nafnata takisi, saosalo ka ihei hatimare takisi irea? Saosalo ka mae thudi thaidi re, ba ka nanoni maghani re?”
26Mae Pita ne ho'ilepo eu'ani, “Uve, hatimare saosalo ka keha nanonini.”
Ni Jisas ne lepo eu'ani, “Teuwae au gaoghathogna ie, thudi hatimare mae nafano are theome mala fofoli takisi. 27Ni neuba nauwa, tati theome ngagughita ra hatimare te di'atadi ka tati ie. Eume, ghoe tei ka Grano Galili gno mala koko soru nou gagha ie. Ni sasa te ulu saraka ghoe ie, ghoe fabungangaza naflogna ie ni ghoe kaina kofiza kahe nanugra ka glamagna ie. Euwateuwe, atha nanugra teuwae ni tei me fofoli noda takisi tapa re euwa.”
© 2025 SIL Solomon Islands