Matiu 14
14
Glemegna mae Jon Siublahi
(Mak 6:14-29; Luk 9:7-9)
1Ka miolo te kegra Nafano mae Herod Antipas ka provens Galili ie, magne rogiza chuku thuturi gna Jisas. 2Agnoni, mae Herod ne lepo eu'ani ka noa mae glokure, “Mae igne jau mae Jon Siublahi ke kahra fapulo gne. Eigna teuwae te au noilaghi magne te eira kofunaboboi ire.”
3-5Tifa ie, mae Filip tahigna mae Herod gne neke toilaghi ka Herodias. Ni mae Herod gne ngaguza Herodias, eume ke toilaghi ka gne'e euwa. Eume, mae Jon Siublahi lepo koba mae Herod. Mae Jon eiza teugne ka magne, eigna tufuni blahi lui ka nodi vetula mae Jiure teke toilaghi ka khetogna mae tahigna ie te kahra na te'au magne ie. Ni Herodias ne di'atagna lui ka Jon, ne ngaguza lui te koko laoza magne ka suga sosolo ie. Eume, mae Herod ne athiza mae Jon ne koko laoza ka suga sosolo ie. Magne ngaguza te falemeza mae Jon, ni magne hmaura nanonire euwa, eigna hatimare mae Jiure laseza mae Jon gne kahe noa mae profet God.
6Ka u naga'e ghatho fapuloza kahragna mae Herod ie, thugna ga'ase Herodias gne mei ne ragi ke ulugna mae Nafano Herod, ni thotoghei nanoni teke mei ka u ngahngamu ie. Mae Herod ne tufuni hneahnegha lui ka gne'e. 7Agnoni, magne ne eiza kahe na'alepo ka gne'e, ne lepo eu'ani, “Rei na'alepo, te rei kaina gu'ari harigho hna goifata te toreza ghoe ka rei ie.” 8Leghuza hna teke kulu fagriuza hui dogna ie, gne'e ne lepo eu'ani ka mae Herod, “Rei ngagughauza pha'ugna mae Jon Siublahi ka thapera igne gignoa igne lana.” 9Mae Nafano Herod ne di'agnagnafa lui. Ni eigna teke eiza hui magne na'alepo ie, ni mae kheragna te mei ka ngahngamu re la rogiza hui lanauwa teuwe, magne ne lepora noa mae glokure ne eiza hna te toreza ga'ase gne. 10Magne kurira hatimare tei ka suga sosolo ie ne kukusu pha'ugna mae Jon ie. 11Eume hatimare atha ne mei ka thapera pha'ugna mae Jon ie, ne gulao ka thugna ga'ase Herodias ie. Euwateuwe, gne'e ne atha ne tei ka dogna ie. 12Noa mae farogo Jon re ne tei ka suga sosolo ie, ne atha thonogna magne ie ne tei giugiluza. Agnoni, hatimare tei ne thuturi ka Jisas.
Jisas ne fangamura glima thogha mae
(Mak 6:30-44; Luk 9:10-17; Jon 6:1-14)
13Kate rogiza gleme gna mae Jon Siublahi ie, Jisas ne saghe ka mola ie ne tei au thaigna sopa ka kahe hnimoto gou. Kate rogiza nanonire te jifla te tei Jisas ka mola ie, nanonire jifla ka naudire ne liu longa ne tei leghuza magne. 14Kate togha longa Jisas guta ie, magne ne kofiza kahe nakrapu bi'o tukiza ne'au magne. Agnoni, magne ne kokhoni noara lui ne fakekeli ra nanoni te fogra re.
15Kate thatai rafigna naga'e teugne, noa mae farogo Jisas re mei ne lepo eu'ani ka magne, “Mae velepuhi, igne nau nagou the'o kahe gano te mala fangamu ra nanoni ire. Ni gignoa igne la rafi hui. Kuri teira nanonire ka gruru te au ka nohi igne mala foli gedi gano thaidi.”
16Ni Jisas ne lepo eu'ani ka hatimare, “Nanoni ire theome tangomana te ghae ie. Feigedi hatimare sonighotolu.”
17Hatimare ne lepo eu'ani ka magne, “Ni gheati au glima bereti ni phalu sasa eulana.”
18Jisas ne lepo eu'ani ka hatimare, “Atha mei ka rei gano teuware.” 19Agnoni, magne lepora nanonire mala hokro ka buburu ie. Magne ne atha ka hatimare glima bereti ni phalu sasa teure ne kofu haghe klia ne lepo fakelira ka God. Magne phipile bereti re ne gulao ka noa mae farogore mala tufa ka nanonire. 20Nanoni te hui re kafua ngamu ne boho. Agnoni, ke leghugna te hui ngamu ie, mae farogore ne salofaudu gano teke fusei re ne fafofodu saleiphalu khara'o. 21Nanoni teke ngamu ka naga'e teuwae re dufiza glima thogha ma'ane. Goro ga'ase ni sua eu teke au baludi re neke theome ahera.
Jisas zaoza'o ka kholo ie
(Mak 6:45-52; Jon 6:15-21)
22Ke leghugna igne, Jisas ne lepo ka noa mae farogore mala saghe ka mola ie ni kulu kasa tei hatimare ka keha phile grano ie. Jisas au fapulo ne'au mala lepora nanonire ke pulo ka naudi re. 23Ke leghugna te fapulora te hui nanonire, magne haghe ka gukhu ie ne tarai. Euwateuwe ka rafi sorugna naga'e ie, magne au ne'au lana thaigna ka gukhu ie. 24Ka teuwae mola ie la tei fatifa hui farihotei kholo. Agnoni, naulafa bi'o ie ne mei ke uludi hatimare, euwateuwe mola ie ne thatai lodu eigna galo bi'o lui.
25Farihotenidi tahngi tholuni ni tahngi namnoni boibongi fufugho, Jisas zaoza'o ne tei ka hatimare ka phogru kholo ie. 26Kate kofiza Jisas zaoza'o te mei ka phogru kholo ie, mae farogore ne hmau ne aku eu'ani fabi'o, “Koe, kahe na'itu igno!”
27Ni Jisas ghoseni ne lepo eu'ani ka hatimare, “Tovi nanga nomi! Rei Jisas lana! Tovi hmau!”
28Agnoni mae Pita ne lepo eu'ani ka Jisas, “Lod, ne tufuni ghoe tutu'ani nani, lepo meighau mala zaoza'o rei ari tamu!”
29Jisas ne lepo eu'ani ka mae Pita, “Mei sonighoe!”
Mae Pita jifla ka mola ie ne funu zaoza'o ka phogru kholo ie ne tei ka Jisas. 30Ni kate kofira naulafa ni galo bi'o teure, magne ne hmau lui ne funu plulu soru. Magne ne aku eu'ani fabi'o lao ka Jisas, “Lod, fakahrighau!”
31Jisas ngafa lao ne loku hagheza Pita. Agnoni Jisas ne lepo eu'ani ka magne, “Pita, nou fatutu'ani ghoe ie glape lui! Tovi ghatho paupalu!”
32Kate saghe phalumare ka mola ie, naulafa ie ne noto. 33Agnoni, mae farogore ne tufru soruza Jisas ne lepo eu'ani, “Tutu'ani lui, ghoe tufuni Thugna God!”
Jisas fakahrira nanonidi Genesaret te fogra re
(Mak 6:53-56)
34Ke leghugna te kasa hatimare ka keha philegna grano ie, hatimare mei ne longa ka nohi te kiloza Genesaret. 35Euwateuwe, nanonigna gruru teuwae re ne kofu falaseza Jisas. Agnoni, hatimare thuturi ka nanoni te hui te au falithuza hnimoto teugne mala mei kofiza Jisas. Eume, hatimare ne kafua udi meira nanoni te fogra re ka magne. 36Hatimare ne toreza Jisas mala sakrera nanoni te fogra re hahabo lana ka khukrudi noa pohere, mala ke keli fapulo nodi. Agnoni, nanoni te hui teke habo khamedi ka noa pohe magne re ne kafua keli fapulo.
© 2025 SIL Solomon Islands