Matiu 13
13
U lepo nabagna hmitu ni fati nafnata glose
(Mak 4:1-9; Luk 8:4-8)
1Ka naga'e igne Jisas jifla ka suga ie, ne tei hokro ne fagriu ka gerigna Grano Galili. 2Chuku nanoni lui mei ne krapu falithuza magne. Agnoni, Jisas tei ka mola ie ne saghe, ni nanonire ne au ke longa. 3Jisas ne fagriura chuku goifata ka u lepo naba. Magne ne lepo eu'ani ka nanonire, “Igne u thuturi gna kahe mae te hnuma hmitu ie. Kahe fata, kahe mae tei ne toatofa tafiri hmiture ka sinabo ie. 4Kate toatofa tafiri magne hmiture, keha hmiture ne uthu soru ka geri nabrau ie ni memehare mei ne ngamu fate'o hmiture. 5Keha hmiture ne uthu soru ka glose te theome thuta, eigna ne au ke klia thina bi'o. Hmitu teure ghoseni ne kotu, eigna u glose ie ne theome thuta tei pari. 6Ni kate fua jala nadafi ie, hmitu te kotu ire ne kafua gho'e ne leme, eigna glathidire ne theome tei pari. 7Keha hmiture ne uthu soru ka hnimoto ahia te au chuku glathi buburu te fakaikahi. U glathidi buburu te fakaikahi ire ne kafua grii haghe ne fruni u hmiture. Hmitu teure ne theome kotu ne the'o sisidi. 8Euwateuwe, kehare uthu soru ka glose te keli, agnoni kotu fakeli ne ure. Kehare dufiza kahe gobi sisi, kehare namno salei sisi, ni kehare tolufulu sisi.” 9Agnoni, Jisas ne lepo eu'ani, “Uve, ghotolu nanoni te farogo ka rei re, hiro fakelira gaoghathodi goeghoze ire!”
Gaoghatho gna te thuturi Jisas ka lepo naba
(Mak 4:10-12; Luk 8:9-10)
10Hatimare mae farogore mei ne ghuhna eu'ani ka Jisas, “Ne fahneuwa ghoe te thuturi ka lepo naba ka nanonire gnea?”
11Jisas ne lepo eu'ani ka hatimare, “Te eiza rei igne, eigna God neke gu'ari lana ka ghotolu glalase te mala kofu falasera puhi tutu'ani te au polo ka nakahra God te funei fruniza ie. Ni nanoni teure God neke theome gulao harira glalase teugne. 12Ihei te au hui tagna glalase ie, God kaina ke gulao harizani magne keha glalase te bi'o, mala ke lalase laoni magne. Ni mae ihei te the'o glalase teugne tagna ie, meubame au khata glalase ichoni lana ka magne, God kaina atha famaghani ka magne. 13Eigna teugne te thuturi rei ka hatimare ka lepo naba ie, eigna hatimare kokofu, ni theome kofu falaseza lana kahe puhi. Hatimare farogo, ni theome rogo falaseza lana kahe goifata. 14Eume, goeghoze teke lepoza mae profet Aesaea tifa ia ne tufuni horoghoto lui ka hatimare, u goeghoze te,
“ ‘Ghotolu kaina ie farogo e farogo, ni ghotolu kaina theome rogi laseza lana kahe goifata.
Ghotolu kaina ie kokofu e kokofu, ni ghotolu kaina theome kofu falaseza lana kahe goifata.
15Eigna gaoghathodi nanoni ire la bobotho hui,
ni khulidi re la theome tangomana te farogo,
ni nathadire la doa hui lanauwa.
Meuni theome eu meuwe, nathadire jame kofu falase,
ni khulidire jame rogi falaseza hna ie,
ni gaoghathodire jame ghatho deira gaoghathodire,
euwateuwe hatimare jame pulomei ka rei mala tangomana rei teke fakekelira re.’#13:15 Aesaea 6:9,10.
16Ni ghotolu tufuni hneahnegha nomi lui, eigna ghotolu kofufalasera hna te kofira ka nathamire, ni rogo falasera hna te rogira ka khulimire. 17Tutu'ani lui, te lepoza rei ka ghotolu ie. Chuku mae profet ni chuku nanoni te kohlo ka nathagna God teke au tifare, hatimare neke tufuni ngagura lui te kofira hna te kofira ghotolu gignoa igne re, ni hatimare theome kofira. Ni eulanauwa, hatimare neke tufuni ngagura te rogira hna te rogira ghotolu gignoa igne re, ni hatimare theome rogira goifata ire.”
Gaoghatho gna lepo nabadi hmitu ni fati nafnata glose
(Mak 4:13-20; Luk 8:11-15)
18“Ghotolu farogo fakeli, igne u gaoghatho gna lepo nabagna mae te hnuma hmitu ka sinabo ie. 19Nanoni te rogiza goeghozegna God te funei frunira noa nanonire, ni theome laseza gaoghathogna ie, ni mae Satan mei ne atha koko goeghoze teugne ka gaoghathogna ie teuwe, jateula hmitu te uthu soru ka geri nabrau ie ra euwa. 20Ni hmitu te uthu soru ka glose te au ke klia thina bi'o ie ire, ire nanoni te rogiza ghoeghoze ie, ni ghoseni me atha balu hneahnegha. 21Ni theome ruma dufu pari ka gnagnafadire, eume theome au faraugha lana. Ka naga'e dufu meigna nakahra ninigrana, ba na'au paapara gna goeghozegna God ie, hatimare ghoseni glape lana. 22Euwateuwe, hmitu te uthu soru ka hnimoto te au ka glathi buburu te fakaikahi ie ire, nanoni te rogiza goeghozegna God ie, ni goeghoze gne fruni ka chuku puhi te nangara ni ngagura teu hatimare gobi nafnata nadedei gna nauthoglu igne. Eume, goeghoze gne theome tangomana te kahra ie. 23Ni hmitu te uthu soru ka glose te keli ie ire, ire nanoni te rogiza goeghozegna God ie ni lase fakeliza gaoghathogna ie. Euwateuwe ure ganodi, kehare dufiza kahe gobi sisi, kehare dufiza namno salei sisi, ni kehare dufiza tolufulu sisi.”
Lepo nabadi wit ni sokiara
24Jisas neke thuturiza kahe lepo naba ka nanonire. Magne ne lepo eu'ani, “Naga'e God te funei frunira noa nanonire jateula kahe mae te hnuma hmitu te keli te kiloza wit ka sinabo ie ia euwa. 25Kate thuru te'au nanonire, noa mae naoka magne ie tei ka sinabo ie ne hnuma sisi sokiara ke hnuadi witre. Ke leghugna teuwae magne ne ghae noa. 26Kate kotu haghe sisi te keli re te funu ure ie, sokiarare ne kotu haghe lanauwa baludi.
27“Agnoni hatimare mae gloku re mei ne lepo eu'ani ka magne, ‘Mae funei, ghoe neke hnuma sisi te keli ka nou sinabo ia! Ne fahneuwa teke kotu lanauwa sokiara te di'a area?’
28“Magne ne lepo eu'ani ka hatimare, ‘Mae naoka au te eiza teuwae.’
“Mae glokure ne ghuhna eu'ani ka magne, ‘Ihna, ghoe ngagugho tei gheati mala rarathu koko sokiarare?’
29“Ni magne ne lepo eu'ani ka hatimare, ‘The'o, na rarathu haghe sokiarare eu ghotoluni, ke rarathu la ghotolu witre euwa. 30Keli au mala kotu faudu wit ni sokiara teure ghile dufiza naga'e ghanodi witre. Ka naga'e mala fneidire, rei kaina lepo eu'ani ka mae glokure: Ululahu ie ghotolu na saosalo sokiara are mala solo faudu ni koko lao ka kha'aghi. Euwateuwe, atha wit are mala fafofodu nogu suga mala toki gano rei ie.’ ”
Lepo nabadi sisi gazu te kiloza mastad ni u isi
(Mak 4:30-34; Luk 13:18-19)
31Mae Jisas neke thuturi harirani nanonire kahe lepo naba igne. Magne ne lepo eu'ani, “U naga'e God te funei frunira noa nanonire jateula igne euwa. Kahe mae ne atha sisi mastad ne hnuma ka noa sinabo ie. 32Sisi igne ichoni lui ka sisi te hui re. Euwateuwe, kate kotu haghegna ie, kaina bi'o lahu ke hnuagna sinabo ie, agnoni kaina ie na kahe gazu bi'o, euwateuwe memehare na mei e'ei nodi gnoku ka u gratagnare.”
33Ni Jisas neke thuturi harirani keha lepo naba ie. Magne ne lepo eu'ani, “U nakahra God te funei frunira noa nanonire jateula isi te ngigno kahe nani khaekave balu varadaki glima kilo flaoa ia euwa. U isi igne na fabokuza u flaoa ie.”
34Mae Jisas fagriura koba nanonire ka u lepo naba lana. 35Igne ne horoghoto ka hna teke lepo eu'ani kahe mae profet tifa ia,
“Rei kaina ie thuturi ka u lepo naba harira nanonire gnadi hna teke theome falalase God funu ka naga'e teke vuavuhagna nauthoglu te ghile dufu gignoa igne.”#13:35 Sam 78:2.
Gaoghathogna u lepo naba gnadi wit ni sokiara
36Agnoni, Jisas ne ghae kokoza mavitu ie, neke pulo ka suga ie. Noa mae farogo magne re mei ne lepo eu'ani ka magne, “Mae funei, ruarutha harighami gaoghathogna lepo nabagna sokiara ka sinabo ie igne.”
37Jisas ne lepo eu'ani ka hatimare, “Rei mae teke mei funugu ka God ie jateula mae ihei te hnuma wit ka sinabo ie euwa. 38Euwateuwe, u sinabo ie nauthoglu igne. Ni nanoni God te funei frunira ire jateula sisi te keli ia euwa. Euwateuwe sokiarare, ire nanoni te leghuza Satan re. 39Agnoni, mae naoka te hnuma sokiarare, igne te mae Satan ie. Euwateuwe, u naga'e te mala salo wit ie, igne te naga'e leghu lahu ka nauthoglu gne. Agnoni, mae gloku te mala salo witre, ire te noa engjel God re euwa.
40“U sokiara te rarathu mae gloku re mala gahu ka kha'aghi teuire, jateula teuwae eu kate salo mei nanoni engjelre ka naga'e leghu lahugna nauthoglu igne. 41Rei mae teke mei funugu ka God ie kaina kuru fajiflara nogu engjelre. Hatimare kaina fafate fajifla ka noa nanoni God ire ihei te e'ei puhi te di'a, ba te fariuriu batu fadi'ara keha nanonire te mala theome fatutu'aniza God ie. 42Engjelre kaina koko laora nafnata nanoni ire ka glamagna kha'aghi bi'o te fua jala lui ie. Hatimare kaina ie au paapara balu tahngi ni di'agnagnafa euwa. 43Agnoni, nanoni te keli re kaina ie siasigla jateula nadafi eu kate audi hatimare ka glamagna noa nauthoglu valu mae Madi God ie. Uve, ghotolu nanoni te farogo ka rei re, hiro fakelira gaoghathodi lepo naba ire.”
Keha lepo naba lanauwa gna God te funei frunira noa nanonire
44Jisas ne lepo eu'ani lanauwa, “Kate funei frunira God noa nanonire jateula kahe goifata te keli lui te au polo ka glama glose ia euwa. Kahe naga'e, kahe mae ne kofu deiza goifata teugne ni magne neke faghose fufruni fapulo noaza. Magne tufuni hneahnegha lui, tei ne saisabiri fahui noa gobigna goifatare, mala foli hnimoto glose teugne. Ke leghugna teugne, magne tei ne foli hnimoto glose teugne.
45“Kate funei frunira God noa nanonire, na jateula kahe mae te hiro buli te fua khuakuda lui kokofugna ie mala foli noa teu ia euwa. 46Kate kofudeiza magne buli te fua khuakuda lui teugne, magne tei ne saisabiri fahui noa gobigna goifatare. Euwateuwe, magne tei ne foli buli teugne.
Kahe lepo naba gna jaraha
47“Ni eulanauwa, kate funei frunira God noa nanonire, na jateula mae te ugra sasa ka jaraha ia euwa. Chuku nafnata sasa khale ka u jaraha teugne. 48Kate fodu sasa ka jaraha ie, mae na'ugrare kohro falonga jaraha ie. Hatimare hokro soru ne hohono sasa te keli re ka khara'o, ni sasa te di'a re hatimare ne koko. 49Kaina ie jateula igne eu ka naga'e leghu lahu ie ka nauthoglu gne. Noa engjel God re kaina ie mei mala fafate famaghani nanoni te di'a re ka nanoni te keli re ke ulugna God. 50Engjelre kaina ie koko lao ra nanoni te di'a re ka glamagna kha'aghi bi'o te fua jala lui ie. Ka hnimoto teugne nanonire kaina au paapara ka teuwae balu tahngi ni di'agnagnafa lui euwa.”
Tutu'ani valu ni thuari
51Jisas ne ghuhna eu'ani ka noa mae farogore, “Ihna, ghotolu lasera hui hna te fagriughamu rei re?”
Hatimare ne lepo eu'ani ka magne, “Uve, gheati lasera hui.”
52Agnoni, Jisas neke lepo eu'ani ka mae farogore, “Hatimare mae velepuhigna vetula noa mae Moses re au farihotenidi nanoni God te funei frunira re. Hatimare jateula mae tufu suga te atha fajifla goifata te valu, ba goifata te thuari re ka noa nachogho te au noa goifata te kelira euwa.”
Nanonidi Naesaret re ne tho'anodi fatutu'aniza Jisas
(Mak 6:1-6; Luk 4:16-30)
53Kate thuturira te hui lepo naba ire, Jisas ne tei kokoza hnimoto teugne. 54Magne neke pulo ka tufuni noa nau teke bi'o haghe ie. Magne ne fagriura nanonire ka nodi suga tharai mae Jiure. Euwateuwe, hatimare ne fua vere nodi lui ka magne ne lepo eu'ani farithaidi, “Icho idomi, neke atha hiani ba magne glalase ni noilaghi teu te eira kofunaboboi irea? 55Tati laseza mae igne. Magne nanoni lana, magne neke theome mei funugna ka God. Magne thugna lana mae kapenta, ni dogna ie Mere. Mae tabusigna magne re te mae Jems, ni Josep, ni Saemon ni mae Judas teu la ira. 56Agnoni, greghagna magne re au te'au lana ani baluda tati ire. Neke atha lana ahia magne glalase irea?” 57Eume, nanonire ne kofu fapariza lana magne.
Jisas ne lepo eu'ani ka hatimare, “Chuku nanoni hia te hia ie ghatho boheza noa mae profet God ie. Ni ihei te au ka naugna, ni vikegna teu magne thaigna re tho'anodi ghatho boheza lana magne.”
58Eume, nanonidi Naesaret re ne tho'anodi fatutu'aniza lana Jisas. Eigna teugne, magne ne theome eira chuku kofunaboboi ka teuwae.
© 2025 SIL Solomon Islands