Matiu 15
15
Nodi kastom fagriu mae Jiu
(Mak 7:1-13)
1Ke leghugna igne, keha mae Farisi ni keha mae velepuhigna vetula noa mae Moses teure ne mei funudi Jerusalem. Hatimare mei ne ghuhna eu'ani ka Jisas, 2“Ne fahneuwa nou mae farogo ghoe re te theome leghuza nodi fagriu mae ku'eda tati tifa ra gnea? Hatimare theome kulu lulumi fakeli khamedire ame ngamu na euwa.”
3Ni Jisas ne lepo eu'ani ka hatimare, “Ne fahneuwa ghotolu te theome leghuza noa vetula God gne ni leghura lana nomi kastom thaimi re teugnea? 4God ne lepo eu'ani, ‘Ghatho bohera mamu domure,’#15:4 Eksodas 20:12; Diutronomi 5:16. ni ‘Ihei te lepo fadi'aza dogna ba magna ie, nanoni teuwae thokagna ie mala faleleme.’#15:4 Eksodas 21:17; Levitikas 20:9. 5Ni te lepoza ghotolu ie, nanoni ie tangomana te lepo eu'ani ka magna ba dogna ie, ‘U goifata te thokagna mala toghoghamu ghopa ie, rei kaina ie theome gu'ari ka ghopa, ni rei na gulao hariza God.’ 6Ghotolu fagriuza nanoni ie mala theome toghora magne magna dogna teure. Eume, te leghuza nomi kastom thaimi teu ghotolu ie, ghotolu theome ghatho boheza lana goeghozegna God ie. 7Ghotolu mae muamugna lui! Hna teke lepoza God ka mae profet Aesaea eimi ghotolu tifa ia tufuni tutu'ani lui. 8Magne neke lepo eu'ani,
“ ‘Nanoni ire kilo'ulughau rei ka goeghozedi lana,
ni gnagnafadi re theome thata ka rei.
9Tufru soru te eira hatimare ka rei ire the'o nafudi lana,
eigna hatimare fagriura nanonire mala leghura lana vetula teke e'ei haghe thaidi re.’ #15:9 Aesaea 29:13. ”
Hna goifata te tangomana fathonaza nanoni
(Mak 7:14-23)
10Jisas ne lepora nanonire mala ngigru mei fathata ka magne. Euwateuwe magne ne lepo eu'ani ka hatimare, “Farogo fakeli ghotolu ia mala lasera hna te lepora rei ire. 11Hna te ruma ka naflogna nanoni ie, theome tangomana te fathonaza nanoni ie. Ni hna goifata te di'a te lepora ni ghathora teu magne ka gnagnafagna re te fathonaza magne ka nathagna God ie.”
12Agnoni, noa mae farogore mei kehreagna magne ne lepo eu'ani, “Velepuhi, mae Farisire di'a tadi ka hna te lepora ghoe ra.”
13Ni Jisas neke lepo eu'ani, “Gazu fate'o te theome hnuma mae Magu te au klia ie, magne kaina rarathu koko balu glathidi. 14Eume, tovi ghatho bohera ghotolu mae Farisire. Hatimare fariuriu batura mae te doa re, ni hatimare thaidi ba jateu mae te doa eulanauwa. Ni ghotolu laseza, mae te doa ni batuza keha mae te doa lanauwa teuwe, phalumare kaina ie kafua tei uthu ka khora ie.”
15Mae Pita ne lepo eu'ani ka magne, “Ruarutha mei ba ghoe harighami gheati gaoghathogna lepo naba igne.”
16Jisas ne lepo eu'ani ka noa mae farogore, “Tholumae, kafua romo jateula mae Farisire eu lana ghotolu gnea? 17Ihna, ghotolu theome laseza au lana gaoghathogna nogu lepo naba rei ignea? Goifata te ruma ka naflogna nanoni ie, ruma tei hnua ka thi'a nanoni. Euwateuwe, kaina ke jifla lana ka thonogna ie. 18Ni hna te jifla mei ka naflogna nanoni ie, jifla mei funu hnua ka gnagnafagna ie. Puhi teure te fathonaza nanoni ka nathagna God ie. 19Ire puhi te jifla mei te fathonaza gnagnafagna nanoni ie: gaoghatho te di'a, faleme nanoni, toilaghi pedo, hmala, chiko, muamugna, vuavuha lepo ni buiburiza ihei. 20Ire puhi te fathonaza nanoni ka nathagna God ie. Eume, u nafnata kastom mala kulu lulumi fakeli khame ame ngamu na teu igne, theome tangomana te mala fathonaza nanoni ie.”
Kahe nani bongihehe ne fatutu'aniza Jisas
(Mak 7:24-30)
21Ke leghugna igne, Jisas jifla ka hnimoto teugne baludi noa mae farogore, ne tei ka nohi te au phalu gruru bi'o Taea ni Saedon. 22Kahe nani naufa'a gna Kenan te mei au ka nohi teugne, mei ne aku eu'ani ka Jisas, “Lod, vikegna mae Nafano Devet! Kokhonighau rei! Thugu ga'ase rei ie, kahe na'itu ne faparaza lui gne'e.”
23Jisas ne theome vese ka gne'e. Ni noa mae farogore ne lepo eu'ani ka magne, “Velepuhi, lepoza sonighoe nani naufa'a teugne mala tei maghani! Eigna gne'e leghughita tati ni kahe aku fatheve lana teugne.”
24Jisas ne lepo eu'ani, “God neke kuri meighau rei mala fakahrira nanonidi Israel re lana, eigna hatimare jateula sipsip te the'o mae koukofudi ra euwa.”
25Agnoni nani naufa'a gne mei ne turununu soru ke ulugna Jisas ne lepo eu'ani, “Lod, toghoghau rei!”
26Jisas ne lepo naba eu'ani ka gne'e, “Theome kohlo te atha gedi gano suare te koko lao ka khaure.”
27Nani naufa'a igne ne lepo eu'ani ka magne, “Uve Lod, ni meuba nauwa, khaure tangomana aulana te ngamu nabrubrusu gano te uthu soru ke parigna thevo nodi mae funei ie.”
28Agnoni, Jisas ne lepo eu'ani ka gne'e, “Nani naufa'a, ghoe kahe nanoni fatutu'anighau lui rei! Hna te ngagughoza ghoe ie na eiza tutu'ani harigho.” Euwateuwe, ka hnimoto teuwae lana thugna ga'ase gne'e ie ne keli fapulo.
Jisas ne kafua fakelira nanoni te fogra re
29Agnoni Jisas jifla ka teuwae, zaoza'o ne tei ka graeraghe gna Grano Galili. Magne haghe ka gukhu ie ne hokro pari. 30Ka teuwae, chuku nanoni ne mei ka Jisas. Hatimare u'udi ne mei keha nanoni ka magne te leme nenedi, nanoni te doa, nanoni te blughu, nanoni te iho vevese ni ihei lanauwa te au chuku nafnata fogra tadi. Jisas kafua fakekelira ne hui. 31Agnoni, nanonire ne vere nodi lui kate kofira ihei teke iho vevese re teke lase vese, ihei teke blughu re ke keli fapulo, ihei teke leme nenedire ke zaoza'o, ni ihei teke doa re ke kokofu fapulo. Agnoni, hatimare ne kilo uluza nodi God mae Israel re gna igne.
Jisas ne fangamura fati thogha mae
(Mak 8:1-10)
32Jisas kilo meira noa mae farogore ne lepo eu'ani ka hatimare, “Rei kokhoni nogura nanoni ire. Eigna hatimare au hui baluda tati tholu naga'e. Ni gignoa igne, hatimare the'o gedi gano hui te mala ngamu ie. Eume, rei theome ngagughau te kuri fapulo ra ka naudi re te theome ngamu te'au hatimare ie, na euni fnudu hatimare kate tei ka nabrau ie euwa.”
33Noa mae farogore ne lepo eu'ani ka magne, “Hnimoto igne nau nagou, the'o kahe nanoni ani. Agnoni, ani ie the'o kahe hnimoto ahia te mala tei atha gano thokagna te mala fangamura nanoni te chuku lui ire.”
34Ni Jisas ne ghuhna eu'ani ka hatimare, “Ngiha bereti te au ka ghotolu ie?”
Hatimare ne lepo eu'ani ka magne, “Fitu bereti ni keha sasa ichoni euwa.”
35Agnoni, Jisas ne lepora nanonire mala hokro pari. 36Magne atha fitu bereti ni sasare eune lepo fakelira ka God. Magne phipile ne tufa ka noa mae farogore. Agnoni, mae farogore ne tufa ka nanonire. 37Hatimare kafua ngamu ne boho. Agnoni, mae farogore ne fafofodu fitu khara'o ka hnimoto gano teke fusei ka nanonire. 38Mae ma'ane teke ngamu ka naga'e teugne dufiza fati thogha. Ga'ase ni sua eu teke au baludi hatimare ka naga'e teugne neke theome ahera. 39Ke leghugna te ngamu nanonire, Jisas ne lepora nanonire mala ke pulo ka naudi re. Euwateuwe, magne ne saghe ka mola ie ne tei ka nohi Magadan.
© 2025 SIL Solomon Islands