Matiu 12
12
Jisas mae funeigna naga'e Sabat
(Mak 2:23-28; Luk 6:1-5)
1Ke leghugna igne, ka kahe naga'e Sabat ie, Jisas ne tei baludi noa mae farogore ne liu ka sinabo wit ie. Noa mae farogo magne re ne rofo lui ne pipisu keha wit ne ngamu. 2Hatimare mae Farisire kofiza igne ne lepo eu'ani ka Jisas, “Koma, fakofu sonighoe ka nou mae farogo are, hatimare loku ka naga'e Sabat ie. Ni naga'e igne tufuni blahi lui ka noda vetula tati mae Jiure!”
3Jisas ne lepo eu'ani ka hatimare, “Ghotolu jame laseza hna teke eiza mae Nafano Devet baludi mae kheragna re ka teke rofo hatimare tifa ia. Uve, ghotolu laseza hui igne, eigna ghotolu neke ijuijuza hui ka i'ini te blahi ie. 4Ka naga'e teugne, mae pirisi ie neke sakreza mae Devet ne ruma ka Suga Blahi ie, ni atha bereti teke faafara ka God ie neke ngamu baludi mae kheragna re. Igne tufuni blahi lui ka noa vetula mae Moses ie. Hatimare mae pirisi lana te tangomana ngamu u nafnata bereti teugne. Meuba, God neke theome di'atagna ka mae Devet. 5Ni ghotolu laseza hui hna te lepoza ka noa vetula mae Moses, gnadi mae pirisi te loku ka u naga'e Sabat ia. Leuleghu naga'e Sabat ie, hatimare loku ka Suga Blahi ie, ni hna te eiza hatimare igne hatimare huhughuza u vetula ie. Neubanauwa, God theome fatera hatimare. 6Tutu'ani lui te lepoza rei ka ghotolu ie, kahe goifata teke ulugnani u Suga Blahi ie au hui ani. 7Ka i'ini te blahi ia God ne lepo eu'ani, ‘Rei theome ngagughaura u nomi faafara ghotolure,#12:7 Hosea 6:6. ni rei ngagughaughamu ghotolu te kokhoni ra ni kaliti fakelira eu nanonire.’ Jame laseza ghotolu tufuni gaoghatho gna goeghoze igne ie, ghotolu jame theome tangomana te fateza nanoni te theome huhughuza kahe hnimoto goeghoze ka vetula ie. 8Eigna rei mae teke mei funu ka God gne lana mae funeigna naga'e Sabat gne.”
9Jisas jifla ka teuwae ne tei ruma ka kahe nodi suga tharai mae Jiure. 10Ni ka suga tharai ie au kahe mae te leme khamegna ie. Euwateuwe, hatimare ngagura te fatoetokeza Jisas gne ne ghuhna eu'ani ka magne, “Ihna, vetula ie sakreghita au tati te mala fakahriza nanoni te fogra ka naga'e Sabat gnea?”
11Jisas ne lepo eu'ani ka hatimare, “Jame kahe mae ka ghotolu au noa sipsip. Agnoni, sipsip teugne plulu ka khora ka naga'e Sabat ie. Ihna, ghoe kaina theome tei kohro hagheza? 12Ni nanoni ie ke ulugnani sipsip! Eume, u vetula ie sakreghita aulana tati te mala eiza hna te keli te mala toghoza nanoni ka naga'e Sabat ie.”
13Agnoni, Jisas ne lepo eu'ani ka mae te leme khamegna ie, “Fakohlo sonighoe khamemu ie!” Agnoni, fakohlo teu magne khamegna ie, khame teugne ghoseni neke keli fapulo jateula keha phile khame ie neuwa. 14Ka naga'e teugne mae Farisire jifla kosi ne roghe mala falemeza Jisas.
Jisas gne mae gloku neke fafate thaigna God
15Kate laseza Jisas te hatimare ngagura mala falemeza magne ie, magne ne jifla kokoza hnimoto teugne. Euwateuwe, chuku nanoni ne tei balugna magne, ni magne ne kafua fakekelira ne hui nanoni te fogra re. 16Agnoni, Jisas ne lepo faheta ka nanonire mala tovi thuturiza magne ka iheina. 17Puhi te eiza magne igne ne tufuni horoghoto lui ka goeghozegna God teke lepo eu'ani mae profet Aesaea tifa ia,
18“Igne nogu mae gloku teke fafate rei ie.
Rei tufuni nahmaza ni hneghaza eu magne. Rei kaina ie sakre laoza ka magne Tharungagu ie.
Agnoni, magne kaina thuturiza goeghozegu rei ie ka nanoni te theome Jiure, mala ho'ignagnafa hatimare.
19Magne kaina ie theome fapoapola ba fnaja fabi'o,
ba ghoeghoze tafiri fabi'o ka glalabare.
20Nanoni te nigra file thono ba fatutu'ani re,
hatimare jateula sia te thatai klopa, ba hnalu'i te thatai leme ia euwa.
Ni magne kaina theome tho'ara nanoni te nigra re.
Magne kaina eiza fatheve igne ghile dufiza u naga'e nanoni te theome Jiure nate athiza nakahra noa God ie.
21Ni nanonigna nauthoglu gne mala fatutu'aniza magne te mala fakahrira re.”#12:21 Aesaea 42:1-4.
Jisas au noilaghi bi'o ke kliagna Satan
(Mak 3:20-30; Luk 11:14-23)
22Ke leghugna igne keha nanonire u'udi ne mei kahe mae ka Jisas. Mae teugne doa ni iho vevese euwa, eigna kahe na'itu au ka magne. Agnoni, Jisas ne fakekeliza mae teugne neke tangomana magne teke kokofu ni ke vevese teuwe. 23Kate kofiza hatimare igne, hatimare vere nodi lui ne lepo eu'ani, “Mae ghoe! Igne lana jau mae vikegna Nafano Devet te tukiza tati ie?”
24Kate rogiza goeghoze igne, mae Farisire ne lepo eu'ani, “Mae Belzebul, nodi mae funei na'iture te gulao hariza magne noilaghi te mala bruera na'itu are.”
25Jisas ne lasera hna te au ka u gaoghathodi mae Farisire, ne lepo eu'ani ka hatimare, “Jame nanonigna kahe nau hatimare magra farithaidi, nau teugne kaina ie gre'o lana. Jame kahe thabutua, ba nanonigna kahe gruru bi'o magra farithaidi, hatimare kaina ie theome au fakeli lana. 26Eume, jateula teugne euwa, jame brue ra mae Satan noa thotoghei na'itu thaigna re, noa thotoghei na'itu magne teure kaina ie magra farithaidi. Eume, jame teu hatimare ie, noa thotoghei magne teuware kaina ie theome kegra maku lana. 27Ni jame loku rei ka noa noilaghi Belzebul te brue ra rei na'iture, hei teke gulao noilaghi ka nomi mae gloku ghotolu teke brue ra hatimare na'itu ra? Neunani hatimare brue na'itu la ka noa noilaghi mae Satan euwa. Eume, hna teke eira hatimare teura falalasegna te mugna ghotolu ie. 28Ni te loku rei ka noa noilaghi God ie te brue fajiflara na'iture, igne lana falalasegna u naga'e God te funei frunira noa nanonire la mei huila ka ghotolu teuwe.
29“Jateula teugne eu theome tangomana kahe nanoni te ruma ka noa suga mae te hneta ie, te chikora noa goifata te keli magne re, eume theome kulu soliza magne mae te hneta ie. Kulu soliza magne mae te hneta gne ame tangomana na magne te ruma te chiko ie euwa.
30“Tutu'ani, mae ihei te theome leghughau rei ie, magne tho'anoaghau rei. Euwateuwe, ihei te theome toghoghau rei te mala atha mei ra nanonire ka God ie, magne jateula te brue famaghani ra eu nanonire ka God. 31Eigna teugne te lepoza rei ka ghotolu ie, nakhibo fate'o ni goeghoze fate'o te di'a te lepora nanonire, God tangomana atha kokora au lana. Ni ihei te lepo fapariza Tharunga te Blahi ie, God kaina ie theome tangomana te atha kokora nakhibogna magne re. 32Ni ihei te lepo fadi'aghau rei mae teke mei funugu ka God gne, God kaina ie tangomana te atha kokora nakhibogna re. Ni ihei te lepo fadi'aza Tharunga te Blahi ie, God na theome atha koko nakhibogna re, neubane gignoa igne ba nauthu'u nauriha ie.
33“Gazu te keli ie kaina ure sisi te keli, ni gazu te di'a ie kaina ure sisi te di'a. Tutu'ani, gazu te hui re tati kafua kofu falasera ka sisidi re. Eume, kaina jateula teuwae eu tati kofu falaseza nanoni ie ka nakahragna ni puhigna teure. 34Ghotolu gne jateula pholi euwa, eigna ghotolu lase muamugna lui! Ninigrana lui harighamu ghotolu te mala lepoza kahe goifata te keli ie, eigna puhimi ghotolure theome keli. Hna te fodu ka gnagnafagna nanoni ie, teuwae lana te jifla mei ka goeghozegna magne ie. 35Eume, nanoni te keli ie au gaoghatho te keli ka gnagnafagna ie, magne tangomana te eira puhi te keli re. Ni nanoni te di'a ie au gaoghatho te di'a ka gnagnafagna ie, magne eira lana puhi te di'are. 36Ni te lepoza rei ka ghotolu ie; ka u naga'e fate ie, nanonire kaina ruarutha ka God gnadi nafnata goeghoze te the'o nafudi teke lepora thaidi re.
37“God kaina ie jateula teuwae eu fateghamu ghotolu ka hna te lepora ghotolure. Jame te lepora ghotolu goifata te keli re, magne kaina ie lepoza ne theome sapla ghotolu teuwe. Ni jame te lepora ghotolu goifata te di'are, magne kaina ie lepoza ne sapla ghotolu teuwe.”
Noa fagriu Jisas re fua keli
(Mak 8:11-12; Luk 11:29-32)
38Agnoni, keha mae Farisi ni mae velepuhigna noa vetula mae Moses teure ne mei lepo eu'ani ka Jisas, “Velepuhi, gheati ngagughamigho lui ghoe te eiza kahe kofunaboboi mala fatakleza ka gheati te ghoe mei funumu ka God teuwe.”
39Ni Jisas ne lepo eu'ani ka hatimare, “Icho idomi! Puhimi ghotolu nanoni gignoa igne re tufuni di'a lui. Ghotolu toreza koba kahe falalase ie, ni rei kaina theome fatakleza kahe falalase te funugna ka God ka ghotolu. Ni falalase te tangomana kofiza ghotolu ie, u falalase teke eiza lana God hariza mae profet Jona tifa ia euwa. 40Mae Jona neke au ka thi'agna sasa te bi'o lui ie tholu naga'e ni tholu bongi. Eume, kaina jateula teuwae eu rei mae teke mei funugu ka God ie, au ka glama glose tholu naga'e ni tholu bongi. 41Ka naga'e God nate fatera nanoni te hui re, nanonidi Ninive re kaina ie kegra haghe ni lepo fatakleza te ghotolu nanoni gignoa igne re tufuni sapla tutu'ani ie. Eigna ka naga'e teke ghaghazala mae Jona ie, hatimare neke ho'ignagnafa! Ni te lepoza rei ka ghotolu ie, kahe mae ke fua ulugnani mae Jona ie au hui ani! 42Kaina eulanauwa ka naga'e God nate fatera nanoni te hui re, nakrupe bi'o gna Seba ie kaina kegra haghe lepo takleza te ghotolu nanoni gignoa igne re te tufuni sapla tutu'ani ie. Eigna gne'e neke mei funugna ka gruru te tifa lui mala farogo ka noa fagriu te keli mae Nafano Solomon re. Ni te lepoza rei ka ghotolu ie, kahe mae ke ulugnani mae Nafano Solomon ie au hui ani mala thuturiza goeghozegna God ie!”
Ke pulo meigna na'itu
(Luk 11:24-26)
43-44Agnoni, Jisas neke lepo eu'anini ka nanonire, “Kate brue fajiflaza hatimare na'itu teke au ka nanoni ie, na'itu teuwae kaina ie tei tafiri ke hnua nau te gou ie, meula deiza kahe hnimoto ahia te mala au ie. Ni jame te theome ke deiza kahe hnimoto ie, na'itu ie na lepo eu'ani, ‘Rei gne kaina ke pulo lana ka nogu suga thaigu teke tei kokoza ia.’ Ka teke pulo meigna ie, na'itu ie kofiza nanoni teuwae ne jateula suga te famane sagla, hahaza faga'e, ni goifata fate'o re la na'a fakohlo huira euwa ke hnua ie. 45Euwateuwe, na'itu ie tei ne atha mei keha fitu na'itu teke tufuni di'a luignani thaigna. Hatimare tei ne au ke hnuagna nanoni teuwae. Agnoni, gignoa igne nakahragna nanoni teugne tufuni di'a lui ke tulaognani teke tifa ie. Eume, jateula teugne eu ghotolu nanoni te di'a gignoa igne re, eigna ghotolu ne tho'anomighau rei mae teke mei funu ka God ie.”
Tufuni vikegna Jisas
(Mak 3:31-35; Luk 8:19-21)
46Kate ghoeghoze te au Jisas ka nanonire, dogna ni mae tabusigna teu magne re ne dufu mei kegra ne au kosi. Hatimare ngagura mei vese ka magne. 47Agnoni, kahe mae ka nakrapu teugne ne lepo eu'ani ka magne, “Koma, domu ni tabusignamu teu ghoe re kegra au ke kosi ae, hatimare ngagura te vese balumu ghoe.”
48Jisas ne lepo eu'ani ka magne, “Ihei dogu rei ie, ni ihei mae tabusignagu rei re?” 49Agnoni, magne ne tusu laora noa mae farogore ne lepo eu'ani, “Ire lana jateula dogu ni mae tabusignagu teu rei re! 50Ihei te eiza hna te ngaguza mae Magu rei te au klia ie lana, tufuni tabusignagu ni greghagu ni dogu teu rei re.”
© 2025 SIL Solomon Islands