Matiu 11
11
Jisas ni mae Jon Siublahi
(Luk 7:18-35)
1Ke leghugna te fagriura saleiphalu noa mae farogore, Jisas jifla ne tei ka gruru te chuku ke hnuagna provens Galili re, ne thuturi ni fagriura eu nanonire.
2Kate au te'au ka suga sosolo ie, mae Jon Siublahi ne rogira hna gloku te eira Kraes re. Agnoni, magne ne kuri ra keha noa mae farogore ne tei ka Jisas. 3Hatimare tei ne ghuhna eu'ani ka magne, “Ghoe lau mae te lepoza Jon Siublahi mala mei fakahrighami gheati tekeu ia, ba kahe mae nauwa au te mala tukiza gheati ie?”
4Jisas ne lepo eu'ani ka hatimare, “Ke figri sonighotolu ka mae Jon mala thuturi ka magne hna teke rogira ni kofira tekeu ghotolura. 5Rei gignoa igne ie fakekeli ra nanoni te doa, nanoni te blughu, nanoni te thubu bi'o, nanoni te megli, fakahra fapulo ra nanoni te leme, ni ghaghazalaza u Grorogo te Keli ie ka nanoni te chuku re. 6Eume, ihei te hneta fatheve noa fatutu'ani ka rei ie, magne kaina ie na hneahnegha noa lui.”
7Agnoni, ke leghugna teke pulo noa mae farogo Jon re, Jisas ne thuturiza magne ka nanonire. Magne ne ghuhna eu'ani ka hatimare, “Ka teke tei ghotolu ka nau nagou ie ia, hna nafnata nanoni teke tei kofiza ghotolu ie? Ghotolu neke tei kofiza kahe mae te jateula fora te blego tafiri ka naulafa ia euwa? The'o! 8Ba, ghotolu neke tei kofiza hna ie? Kofiza kahe mae te pipichi pohe te fua khuakuda lui? The'o! Ihei te pipichi nafnata pohe teuware au ka noa suga mae nafano. 9Ba, hna teke tei kofiza ghotolu ie? Kahe mae profet? Uve, tutu'ani lui! Mae Jon Siublahi gne kahe mae profet ke uludini mae profet teke kulu au tifara. 10Eigna God neke lepo eu'ani gna mae Jon Siublahi ka mae Thugna ie,
“ ‘Rei kaina kuriza nogu mae gloku ie mala kulu tei ke ulumu ghoe,
mala kulu tarabana nabrau mala teimu ghoe ie.’#11:10 Malakae 3:1.
11Tutu'ani lui, te lepoza rei ka ghotolu ie: Mae Jon Siublahi gne kahe mae ulu lui ke uludini nanoni te hui te kahra mei ka nauthoglu igne. Ni ihei te fua pari lahu ke hnuadi nanoni God te funei frunira re, magne mae ke ulu gnani mae Jon. 12Funu ka naga'e teke thuturiza mae Jon Siublahi grorogo gna God te ghile dufu gignoa igne, keha nanoni Jiure neke fariuriu mala magriza ni choghaza eu fagriu gna naga'e God nate funei frunira noa nanonire. 13Ame fufunu na Jon Siublahi noa gloku ie tekeuwe, mae profet fate'o ni noa vetula mae Moses teure neke ulu lepoza hui gna naga'e God te mala funei frunira noa nanonire. 14Ni te fatutu'ani ra ghotolu hna te lepora hatimare ire, keli lui, ghotolu laseza mae Jon Siublahi gne lana teke lepoza mae profet tifara, te mae Elaeja gne nake pulo mei au teu ia. 15Uve, ghotolu nanoni te farogo ka rei ire, hiro fakelira gaoghathodi goeghoze ire.
16“Rei laseghamu ghotolu nanoni gignoa igne re. Ghotolu jateula phalu thotoghei sua te hokro ka glalaba ie te aku eu'ani farithaidira euwa,
17“ ‘Gheati koze ka nifu mala hneahnegha ni ragi eu ghotolu,
ni ghotolu tho'anomi ragi lana.
Gheati kozeza khoze te mala di'agnagnafa ie,
ni ghotolu tho'anomi di'agnagnafa ni tahngi eu lana.’
18Euwateuwe, kate mei mae Jon te theome ngamu ni theome ko'u waen teuwe, nanonire lepo eu'ani, ‘Mae igne au kahe na'itu ke hnuagna.’ 19Agnoni, kate mei rei te ngamu ni ko'u teuwe, nanonire ne lepo eu'ani, ‘Kofiza sonighotolu mae igne! Ngamu ni ko'u teure lana te ulu lui ka magne ie! Euwateuwe, mae te di'a te saosalo takisi ni mae te khibo teu ire lana mae kheragna magne re.’ Euwateuwe, hatimare kaina ie kofiza u noa gaoghatho te keli God ie ka takle meidi hna te tutu'ani re.”
Gruru te theome fatutu'aniza Jisas re
(Luk 10:13-15)
20Ke leghugna igne, Jisas ne funu lepo faparira gruru ahia teke eira magne noa kofunaboboi te chuku re, eigna nanonidi gruru teure theome ho'ignagnafa gnadi nakhibodi re. 21Magne ne lepo eu'ani, “Puhi bi'o ka ghotolu, nanonimi ka gruru Koresin! Puhi bi'o ka ghotolu, nanonimi ka gruru Betsaeda! Eigna ghotolu ne tho'anomi leghuza goeghozegna God ie. Kofunaboboi teke eira rei ka ghotolura, jame eira ka nodi gruru mae bongihehe Taea ni Saedon meuwe, hatimare jame hokro hui pari balu pohe thona, ni ghiha naprafu hui eu ka thonodire, falalase gna tela ho'ignagnafa ni koko nakhibo hui teuwe. 22Tutu'ani lui te lepoza rei ka ghotolu ie, ka naga'e fate ie, God kaina kokhonira nanonidi Taea ni Saedon teure ke tulaomini ghotolu. 23Ghotolu nanoni te au Kapanam ra, na euni na'a hagheghamu God klia eu ghotolu gaoghathomire? The'o lui! God kaina koko sorughamu ghotolu ka kha'aghi ie! U kofunaboboi te eira rei ka ghotolu ire, jame neke eira Sodom na meuwe, nanonidi Sodom re jame neke ho'ignagnafa, ni gruru Sodom gne jame au dufu gignoa igne. 24Tutu'ani lui te lepoza rei ka ghotolu ie, ka naga'e leghu lahu ie, God kaina fatera nanoni te au ka gruru igne. U fate teugne kaina ie fua bi'o lui ke uludini naga'e teke fatera magne nanoni te di'a te au ka gruru Sodom re.”
Mala gnafadi ihei te baba'o
(Luk 10:21-22)
25Agnoni Jisas ne lepo eu'ani ka mae Magna ie, “Maghe, rei lepo fakeligho, eigna ghoe te funei frunira gobigna goifata klia ni pari teure. Rei lepo fakeligho, eigna ghoe ne falalase goifata fate'o re ka ihei te jateula sua, ni ghoe phopolo glalase ire ka nanoni te lasera chuku goifata ni fahaehaghe lui teu gnadi nodi glalase re. 26Uve, Maghe, ghoe eiza igne eigna igne au hna te tufuni ngagughoza ghoe ie.”
27Agnoni Jisas neke lepo eu'ani, “Mae Magu rei ie la lisa mei hui ka khamegu rei goifata fate'o re. The'o kahe nanoni te tufuni laseza Thugna God ie, mae Magu thaigna lana. Tutu'ani, the'o kahe nanoni te tufuni laseza mae Magu ie, kahe mae Thugna ie lana ni ihei teke fafate mae Thugna ie eulana kaina te kofiza, ni laseza teu mae Magu ie.”
28Jisas ne lepo eu'ani, “Ghotolu fate'o tela baba'o ka leghura vetula fate'o te lepora nomi mae velepuhira, mei ka rei mala gnafa nomi. 29Ghotolu mei mala leghuza nogu vetula rei gne, ni sakreghau rei mala fagriughamu, eigna rei gne mae au famuu ni na'a faparighau eu thaigu. Euwateuwe, ghotolu kaina ie tufuni deiza hnimoto mala gnafa ie. 30Eume, gloku te lepoza rei mala eiza ghotolu teu igne, theome ninigrana. Euwateuwe, hnugru te gu'ari rei igne theome tahu.”
© 2025 SIL Solomon Islands