Mae khuru 9
9
Mae Sol ne funu fatutu'aniza Jisas
(Mae khuru 22:6-16; 26:12-18)
1Mae Sol ne tufuni lepo fahmauhmau ra ni faleme ra eu nanoni te fatutu'aniza Jisas re. Agnoni magne ne tei ka mae nului pirisi ie, 2ne toreza magne mala i'ini keha letasi mala atha balugna tei Damaskas ka nodi suga tharai mae Jiure. Magne ngaguza mae nului pirisi gne te i'ini hariza ka letasi ire u noa noilaghi te mala hiro ra magne nanonidi Damaskas te leghuza puhi mala fatutu'aniza Jisas gne, ni mala ne kofudei ra na magne keha nanoni te leghuza Jisas ka teuwae re ni, magne kaina ie na sagura ni atha fapulo ra Jerusalem. 3Kate tei thata mae Sol ka gruru Damaskas ie, kahe nabae te siasigla lui funugna klia ne megona ne bae falithuza magne. 4Sol ne uthu soru pari ne rogiza kahe naogla ne lepo eu'ani ka magne, “Sol, Sol! Ne fahneuwa ghoe te choghaghau rei gnea?”
5Agnoni, Sol ne ghuhna eu'ani, “Mae funei, ghoe mae heiuwa?”
Magne ne lepo eu'ani, “Rei Jisas. Mae ihei ghoe te choghaza ie. 6Kegra haghe tei ka gruru Damaskas. Kahe mae ka teuwae kaina ie na lepo harigho ghoe hna te mala eiza ghoe ie.”
7Mae teke tei balugna mae Sol re kegra lanauwa ka teuwae, ni hatimare theome tangomana te lepoza kahe goifata. Hatimare rogiza naogla teugne, ni theome ke kofiza lana ki mae. 8Sol kegra haghe ka glose ie ne dofra nathagnare, ni magne theome tangomana te kokofu ie. Agnoni mae teke tei balugna magne re ne faloku khameza magne ne tei dufu Damaskas. 9Tholu naga'e mae Sol ne theome tangomana te kokofu ie, ni eulanauwa magne theome ke ngamu ni ko'u.
10Ka naga'e teugne, kahe mae khilo'au ne au lanauwa ne'au Damaskas, nahngagna ie mae Ananaeas. God ne lepo eu'ani ka magne ka mifi ie, “Ananaeas!”
Mae Ananaeas ne lepo eu'ani, “Rei au te'au igne, Lod.”
11Lod ne lepo eu'ani ka magne, “Tei ka sugagna mae Judas ka nabrau te kiloza ‘Nagliu Kohlo’. Ni ghuhnaza mae Sol, maegna ka nau bi'o Tasis ka magne. Magne tarai au ka teuwae gignoa igne. 12Ka noa mifi ie, mae Sol gne ne kofigho ghoe mae Ananaeas mei ne habo lao khamemure ka magne neke kokofu fapulo noa.”
13Ni mae Ananaeas ne lepo eu'ani, “Lod, rei rogira chuku thuturigna mae teugne, magne ei chuku puhi te di'a harira nou nanoni ghoe te au Jerusalem re. 14Euwateuwe gignoa igne magne kela mei au ani Damaskas. Ni mae pirisi ulure ba gulao hariza lanau magne noilaghi te mala sagura nanoni te tufru sorugho ghoe re.”
15Ni Lod ne lepo eu'ani ka mae Ananaeas, “Tei sonighoe, mae teugne, rei au teke fafateza ie mala eira nogu gloku re. Magne kaina ie thuturiza nahngagu rei ka nanoni te theome Jiure, ni ka nodi mae nafano, ni nanonidi Israel teure. 16Ni rei kaina falalase ka magne, ngiha nafnata puhi te di'a kaina te dufiza magne kate thuturiza magne nahngagu rei ie.”
17Agnoni mae Ananaeas ne tei ka sugagna Judas ne kofiza mae Sol ka teuwae. Euwateuwe magne ne habo lao khamegnare ka mae Sol ne lepo eu'ani, “Mae tabusigna, Lod Jisas te kuri meighau rei ka ghoe gne. Magne lana teke takle ka ghoe ka nabrau ia. Magne kuri meighau rei mala tangomana ghoe teke kokofu fapulo nathamure, ni Tharunga te Blahi ie mala au balumu ghoe.” 18Ka teuwae lana, goifata jateula khapu sasa teure megona ne uthu soru ka phalu nathagna mae Sol re. Euwateuwe, magne neke kokofu fapulo! Agnoni, magne kegra haghe ne siublahi, 19euwateuwe, ke leghugna te ngamu ie, thonogna magne ie neke hneta fapulo.
Sol ne ghaghazala Damaskas
Sol ne au fapulo Damaskas keha naga'e baludi nanoni khilo'au re. 20Magne kohlo ne tei ruma lana ka nodi suga tharai mae Jiure ne thuturiza Jisas gne ne tufuni Thugna God teuwe. 21Nanoni te hui te rogiza magne re ne kafua vere nodi, ne lepo eu'ani, “Igne lana jau mae teke faleme ra nanoni te fatutu'aniza Jisas ra? Magne neke eiza puhi teugne Jerusalem, euwateuwe gignoa igne magne kela mei mala sagura noa mae farogo Jisas re ni atha me tei ka mae pirisi ulure eu jaugne! Ba fahneuwa?” 22Ni mae Sol tufuni noilaghi lui ka noa ghaghazalare. Eume mae Jiu te au Damaskas re theome tangomana te lepoza kihnana ka magne, eigna magne tufuni falalase harira hatimare te mae Jisas gne lana mae Kraes ie teuwe.
23Chuku naga'e ke leghugna igne, mae funeidi Jiure ne roghe mala falemeza mae Sol. 24Bongi naga'e re, hatimare tukiza mae Sol koba ka nathangadi babara thina te falithuza nau gne mala falemeza magne. Ni mae Sol kulu rogiza hui nodi groghe hatimare re. 25Agnoni kahe bongi, noa mae farogo Sol re ne toghoza magne ne fahokriza ka kahe khara'o ne fahruhru soruza ka widagna babara thina te falithuza Damaskas gne.
Sol au Jerusalem
26Kate tei dufu Jerusalem ie, mae Sol ne fariuriu mala tei au baludi noa mae farogo Jisas re. Ni hatimare ne kafua hmau nodiza magne, eigna hatimare theome fatutu'aniza ne kahe mae farogo tutu'ani magne teuwe. 27Ni mae Banabas ne toghoza magne ne udiza ne tei ka mae khurure. Banabas ne thuturi ka hatimare gna mae Sol teke kofiza Lod ka nabrau ie, ni teke vevese Lod balugna magne ie. Magne eulanauwa ne thuturi ka hatimare u ghaghazala noilaghi teke eira mae Sol Damaskas ka nahngagna Jisas re. 28Agnoni mae Sol ne au baludi mae farogo re ne tei fathe'oza Jerusalem, magne ne frane ne ghaghazala ka nahngagna Lod. 29Sol eulanauwa ne ghoeghoze koba ni fapoapola eu baludi thotoghei mae Jiu te lepo Griki re. Ni hatimare ne fariuriu mala falemeza magne. 30Eume, kate rogiza igne keha nanoni khilo'au re udiza Sol ne soru Sisaria, neke kuri fapuloza Tasis ka noa nau ie.
31Ka naga'e teuware, nanoni khilo'au te au hia te hia ka provens Judia, Galili ni Samaria teure ne au ka keliphari. God ne toghora hatimare ni hatimare ghatho boheza nodi Lod ie. Ni Tharunga te Blahi ne faheheta gaoghathodi hatimare re, ni nanoni te ruma haghe ka khilo'au ie ne chuku ke chukuni neuwa.
Pita neke au Laeda ni Jopa
32Pita ne tei ka chuku nau teuware, agnoni kahe fata magne tei ne sighora nanoni khilo'au te au Laeda re. 33Ka nau teugne Pita ne kofiza kahe mae te blughu, nahngagna ie mae Aenias. Aenias gne fehu finogha te theome tangomana ghae kokoza noa sape ie. 34Pita ne lepo eu'ani ka magne, “Aenias, Jisas Kraes ie kaina fakekeligho ghoe gignoa igne. Kegra haghe phiipiri nou sape ie!” Ka teuwae lana, mae Aenias ghoseni ne kegra haghe. 35Agnoni kate kofiza Aenias ie, nanonidi Laeda ni Saron teure ne funu fatutu'aniza Lod.
36Ka nau Jopa gne, kahe nani khilo'au nahngagna ie Tabita, gaoghathogna ka goeghoze Griki ie, “Dokas.” Gne'e eira koba puhi te keli re ni toghora eu nanoni te kuma re. 37Agnoni gne'e fogra ne leme. Nanonire ne fagaga'e thonogna ie ne nana'aza ka chogho klia ka suga ie.#9:37 Bitaza thonognae ni na'i farumaza ka chogho klia ka suga ie. 38Jopa gne kahe nau kehreagna Laeda lana, eume kate rogiza nanoni khilo'audi Jopa re te au te'au mae Pita Laeda ie, hatimare ne kuri ra phalumae ne tei ka mae Pita. Phalumare tei ne lepo eu'ani ka magne, “Gheati ngagughami te faghose ari la ghoe ka nomi nau ie gignoa igne!”
39Agnoni Pita faghose ne tei baludi phalumare. Kate dufu hatimare Jopa ie, hatimare udiza magne ne haghe ka nachogho ke klia ie. Ka teuwae, goro ga'ase te leme te hui khetodi re ne kafua kegra falithuza magne balu tahngi. Re'e ne fatakle lao ka mae Pita, phoko ni pohe u'uru eu teke susuki Dokas kani kahragna na te'au ie.
40Agnoni Pita ne lepora nanonire mala kafua jifla ka nachogho ie. Euwateuwe, magne ne turununu soru ne tarai. Magne figrilao ka nani te leme gne ne lepo eu'ani, “Tabita, dofra haghe!” Gne'e ne dofra haghe ne kofiza Pita hokro te'au ie, ne hokro haghe. 41Pita ne loku lao ka khamegna ie ne toghoza mala fakegra hagheza. Ke leghugna igne Pita ne kilo mei ra nanoni khilo'au re ni nani te leme khetodira eu ne mei mala kofiza Tabita te kela kahra fapulo ie. 42Grorogo igne ne tei fate'o hia te hia ka nau Jopa, agnoni chuku nanoni lui ne fatutu'aniza Lod. 43Pita ne au chuku naga'e Jopa ka sugagna mae Saemon. Mae teugne noa gloku ie mala fagaga'e ni e'ei goifata ka gulidi buluka te leme re.
© 2025 SIL Solomon Islands